«Գրանցված է»
ՀՀ արդարադատության
նախարարության կողմից
18 սեպտեմբերի 2002 թ.
Պետական գրանցման թիվ 05002187

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

4 սեպտեմբերի 2002 թ. ք. Երևան

N 11/3-Ն

Ո Ր Ո Շ ՈՒ Մ

ՍՏՈՐԱԳՐՎԱԾ ՔՎԵԱԹԵՐԹԻԿՆԵՐԻ ՊԱՀՊԱՆՄԱՆ ԵՎ ՀԱՏԿԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով Հայաստանի Հանրապետության ընտրական օրենսգրքի 53-րդ հոդվածով, ՀՀ կենտրոնական ընտրական հանձնաժողովը

ՈՐՈՇՈՒՄ Է.

1. Սահմանել ստորագրված քվեաթերթիկների պահպանման և հատկացման կարգը (կցվում է)։

2. Սույն որոշումն ուժի մեջ մտնելու պահից ուժը կորցրած ճանաչել ԿԸՀ-ի 1999 թ. ապրիլի 6-ի արձ.14 կետ 2 «Ստորագրված քվեաթերթիկների պահպանման և հատկացման կարգի մասին» որոշումը։

Հայաստանի Հանրապետության կենտրոնական ընտրական հանձնաժողովի նախագահ`

Ա. Սահրադյան

Հավելված ՀՀ ԿԸՀ-ի 2002 թ. սեպտեմբերի 4-ի թիվ 11/3-Ն որոշման

Կ Ա Ր Գ

Ստորագրված քվեաթերթիկների պահպանման ԵՎ հատկացման

1. Սույնով սահմանվում է ՀՀ ընտրական օրենսգրքի 53-րդ հոդվածի 1-ին կետով սահմանված կարգով ստորագրված քվեաթերթիկների պահպանման և հատկացման կարգը։

2. Տեղամասային ընտրական հանձնաժողովը հաշվում է ստորագրված 100 քվեաթերթիկ և փաթեթավորում։ Փաթեթի հանգույցը սոսնձվում և դրա վրա հանձնաժողովի ցանկացող անդամները ստորագրում են, այնուհետև ստորագրված քվեաթերթիկների փաթեթները և կնիքի փաթեթը տեղադրվում են քվեարկության սենյակում գտնվող չհրկիզվող (մետաղյա) պահարանում։ Նշված գործողությունների մասին գործավարության մատյանում կազմվում է արձանագրություն:

3. Չհրկիզվող (մետաղյա) պահարանը փակվում, թղթով սոսնձվում է, սոսնձված թղթի վրա ստորագրում են հանձնաժողովի նախագահը, նախագահի տեղակալը, քարտուղարը և հանձնաժողովի ցանկացող անդամները:

4. Չհրկիզվող (մետաղյա) պահարանի պահպանումը հանձնաժողովի նախագահի կողմից հանձնվում է ՆԳ մարմինների աշխատակիցներին, որի մասին կազմվում է համապատասխան արձանագրություն հանձնողի և ընդունողի միջև:

5. Քվեարկության օրը տեղամասային ընտրական հանձնաժողովն ստուգում է չհրկիզվող պահարանին սոսնձված թղթի ամբողջականությունը, հանձնաժողովի նախագահն այն ընդունում է ՆԳ աշխատակիցներից, որի մասին կազմվում է համապատասխան արձանագրություն:

6. Հանձնաժողովի նախագահը սահմանված կարգով բացում է չհրկիզվող պահարանը և քվեաթերթիկների հատկացման համար հանձնաժողովի պատասխանատու յուրաքանչյուր անդամի հանձնում է 100-ական քվեաթերթիկ՝ համապատասխան գրանցում կատարելով գործավարության մատյանում: Քվեաթերթիկների հատկացման համար պատասխանատու անդամին հանձնված քվեաթերթիկների սպառման դեպքում վերջինս դիմում է տեղամասային ընտրական հանձնաժողովի նախագահին և ստանում քվեաթերթիկների նոր փաթեթ, որի մասին նույնպես գրանցում է կատարվում գործավարության մատյանում: