ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
Ո Ր Ո Շ ՈՒ Մ
17 հոկտեմբերի 1997 թ. N 487
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՏԵՂԵԿԱՏՎՈՒԹՅԱՆ ԵՎ ԳՐԱՀՐԱՏԱՐԱԿՉՈՒԹՅԱՆ ՎԱՐՉՈՒԹՅԱՆ ԿԱՆՈՆԱԴՐՈՒԹՅՈՒՆԸ ԵՎ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ
Հայաստանի Հանրապետության կառավարության 1997 թվականի մայիսի 13-ի «Հայաստանի Հանրապետության կառավարությանն առընթեր տեղեկատվության և գրահրատարակչության վարչություն ստեղծելու մասին» N 133 որոշմանը համապատասխան`
1. Հաստատել Հայաստանի Հանրապետության կառավարությանն առընթեր տեղեկատվության և գրահրատարակչության վարչության կանոնադրությունը և կենտրոնական ապարատի կառուցվածքը (կցվում են):
2. Ուժը կորցրած ճանաչել Հայաստանի Հանրապետության վարչապետի 1996 թվականի հունիսի 4-ի «Հայաստանի Հանրապետության տեղեկատվության նախարարության կանոնադրությունը և կենտրոնական ապարատի կառուցվածքը հաստատելու մասին» N 332 որոշումը:
|
Հայաստանի Հանրապետության |
|
|
Հաստատված է |
Կ Ա Ն Ո Ն Ա Դ Ր ՈՒ Թ Յ ՈՒ Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՏԵՂԵԿԱՏՎՈՒԹՅԱՆ ԵՎ ԳՐԱՀՐԱՏԱՐԱԿՉՈՒԹՅԱՆ ՎԱՐՉՈՒԹՅԱՆ
I. Ընդհանուր դրույթներ
1. Հայաստանի Հանրապետության կառավարությանն առընթեր տեղեկատվության և գրահրատարակչության վարչությունը (այսուհետև` վարչություն) պետական կառավարման հանրապետական մարմին է, որն իրականացնում է տեղեկատվության և գրահրատարակչության բնագավառի կառավարումը` ենթարկվելով Հայաստանի Հանրապետության կառավարությանը:
2. Վարչությունը պատասխանատվություն է կրում ոլորտում տիրող վիճակի և դրա հեռանկարային զարգացման, գիտատեխնիկական ու կառուցվածքային քաղաքականության, շուկայական հարաբերությունների ծավալման նպատակով անհրաժեշտ նախադրյալների ստեղծման, սեփականության տարբեր ձևերի ներդաշնակ գործունեության ապահովման համար:
3. Վարչությունն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենսդրությամբ և սույն կանոնադրությամբ:
4. Վարչությունն իրավաբանական անձ է, ունի Հայաստանի Հանրապետության պետական զինանշանի պատկերով և իր անվամբ կնիք:
II. ՎԱՐՉՈՒԹՅԱՆ ԽՆԴԻՐՆԵՐՆ ՈՒ ԳՈՐԾԱՌՈՒՅԹՆԵՐԸ
5. Վարչության հիմնական խնդիրներն ու գործառույթներն են`
ա) տեղեկատվական արդիական միջավայրերի ու հոսքերի, հեռուստատեսության և ռադիոյի, մամուլի, գրահրատարակչության ոլորտներում միասնական պետական քաղաքականության մշակումն ու իրականացումը.
բ) Հայաստանի Հանրապետության ներքին և արտաքին քաղաքականության վերաբերյալ տեղեկատվության ապահովումը.
գ) տեղեկատվության ոլորտում պետական և ոչ պետական մարմինների հետ համագործակցված աշխատանքի կազմակերպումը, համապատասխան օրենսդրական և իրավական այլ ակտերի նախագծերի նախապատրաստումը և Հայաստանի Հանրապետության կառավարություն ներկայացնելը.
դ) օտարերկրյա պետական ու ոչ պետական տեղեկատվական մարմինների և կազմակերպությունների հետ համագործակցության կազմակերպումն ու իրականացումը.
ե) Հայաստանի Հանրապետության քաղաքական, տնտեսական, մշակութային և սոցիալական կյանքի վերաբերյալ տեղեկատվության արտահանման կազմակերպումը, Հայաստանի Հանրապետության հեղինակության բարձրացմանը նպաստելը.
զ) վարչության համակարգի բարեփոխումների ու սոցիալ-տնտեսական զարգացման ծրագրերի մշակումը և դրանց վերաբերյալ Հայաստանի Հանրապետության կառավարություն համապատասխան առաջարկություններ ներկայացնելը.
է) պետական պատվերների տեղաբաշխման և դրանց ժամանակին ու անթերի կատարումն ապահովող աշխատանքների կազմակերպումը.
ը) վարչության համակարգի սեփականաշնորհված ձեռնարկությունների պետական բաժնեմասի տնօրինման և կառավարման իրականացումը.
թ) տպագիր արտադրանքի բարձր որակի և արդյունավետ վաճառքի կազմակերպումն ապահովելը.
ժ) պահանջարկ ունեցող գրականության հրատարակության, ձեռքբերման, տարածման և գրադարանների լրակազմման միջոցառումների իրականացումը.
ժա) գրահրատարակչական ոլորտի ձեռնարկությունների (անկախ սեփականության ձևից), հիմնարկների ու կազմակերպությունների արդյունավետ աշխատանքի համար անհրաժեշտ նախադրյալների ստեղծումը.
ժբ) Հայաստանի Հանրապետությունում հրատարակված գրքերի տարածումը և օտարերկրյա պետություններում հայկական գրքարվեստի քարոզչությունը, գրահրատարակչական միջազգային համագործակցությանը նպաստելը.
ժգ) հեռուստառադիո հաղորդաշարերի որակի բարձրացման ապահովումը, հեռարձակումների որակի վերահսկողությունը.
ժդ) իր ոլորտին առնչվող ուսումնական և հետազոտական ծրագրերի մշակման ու իրականացման ապահովումը.
ժե) Հայաստանի Հանրապետությունում միասնական տեղեկատվական դաշտի ստեղծման և միջազգային տեղեկատվական համակարգերում դրա ներգրավման ապահովումը.
ժզ) վարչության համակարգի պետական ձեռնարկությունների, հիմնարկների ու կազմակերպությունների աշխատանքի արդյունավետության բարձրացման նախադրյալների ստեղծումը, ինչպես նաև աշխատողների իրավական և սոցիալական շահերի պաշտպանության ապահովումը.
ժէ) վարչության համակարգի պետական ձեռնարկությունների, հիմնարկների ու կազմակերպությունների հետագա զարգացման և ներդրումների աջակցման ուղղությամբ համապատասխան միջոցառումների իրականացումը.
ժը) թողարկվող արտադրանքի պահանջարկի վերաբերյալ շուկայաբանական (մարքեթինգ) հետազոտությունների կազմակերպումը.
ժթ) Հայաստանի Հանրապետության օրենսդրությամբ սահմանված այլ խնդիրների և գործառույթների իրականացումը:
III. ՎԱՐՉՈՒԹՅԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ
6. Վարչության համակարգն ընդգրկում է իր ենթակայության պետական ձեռնարկությունների, հիմնարկների ու կազմակերպությունների ամբողջությունը:
7. Վարչությունը սույն կանոնադրությամբ սահմանված խնդիրներն ու գործառույթներն իրականացնում է իրեն վերապահված իրավունքների սահմաններում` չխախտելով համակարգի ձեռնարկությունների, հիմնարկների ու կազմակերպությունների Հայաստանի Հանրապետության օրենսդրությամբ նախատեսված ինքնուրույնությունը:
8. Վարչությունը մյուս նախարարությունների և գերատեսչությունների հետ իրականացնում է գործարար կապեր ու համագործակցություն` միջճյուղային հարցերի մշակման և լուծման համար:
9. Վարչությունը Հայաստանի Հանրապետության կառավարության հանձնարարությամբ իրականացնում է իր ոլորտի պետական գույքի տիրապետման և օգտագործման գործառույթները, ապահովում պետական սեփականության պահպանությունը:
10. Վարչությունը`
ա) ընդհանրացնում է իր իրավասության մեջ մտնող հարցերի վերաբերյալ Հայաստանի Հանրապետության օրենսդրության կիրառման փորձը, դրա հիման վրա մշակում է Հայաստանի Հանրապետության օրենսդրության կատարելագործմանն ուղղված առաջարկություններ և դրանք ներկայացնում Հայաստանի Հանրապետության կառավարության կամ Հայաստանի Հանրապետության վարչապետի քննարկմանը.
բ) սահմանված կարգով մասնակցում է վարչության իրավասության մեջ մտնող հարցերի վերաբերյալ միջազգային պայմանագրերի նախագծերի մշակմանն ու քննարկմանը.
գ) իր իրավասության սահմաններում կասեցնում կամ ուժը կորցրած է ճանաչում համակարգի ձեռնարկությունների, հիմնարկների ու կազմակերպությունների ընդունած հրամաններն ու հրահանգները:
11. Վարչությունը Հայաստանի Հանրապետության օրենսդրությամբ սահմանված կարգով ստեղծում, վերակազմավորում և լուծարում է համակարգի ձեռնարկությունները, հիմնարկներն ու կազմակերպությունները:
12. Վարչությունը թույլտվություն է տալիս համակարգի ձեռնարկություններին պետական սեփականություն հանդիսացող դուստր ձեռնարկություններ հիմնադրելու և ձեռնարկությունների տնտեսական միավորումներին անդամակցելու համար:
13. Վարչությունը թույլտվություն է տալիս համակարգի ձեռնարկություններին, հիմնարկներին ու կազմակերպություններին իրենց տնօրինության տակ գտնվող պետական ֆինանսական միջոցները Հայաստանի Հանրապետության սահմաններից դուրս ներդնելու համար:
14. Վարչությունը Հայաստանի Հանրապետության օրենսդրությամբ սահմանված կարգով վերահսկում է համակարգի ձեռնարկությունների, հիմնարկների, կազմակերպությունների տնօրինությանը հանձնված պետական գույքի օգտագործումը, ինչպես նաև համաձայնություն է տալիս այդ գույքի օտարման կամ վարձակալության հանձնման համար:
15. Վարչությունն իրականացնում է համակարգի պետական ձեռնարկությունների, հիմնարկների և կազմակերպությունների գործունեության, ներառյալ նաև հիմնադիր փաստաթղթերի և նրանց կողմից կնքված պայմանագրերի օրինականության նկատմամբ վերահսկողություն:
16. Վարչությունը սահմանված կարգով կազմակերպում է քաղաքացիների նամակների (դիմումների ու գանգատների) քննարկում:
17. Վարչության աշխատանքների կազմակերպումն իրականացվում է կոլեգիալության և միանձնյա ղեկավարման զուգակցման հիման վրա` աշխատանքի հանձնարարված տեղամասում գործերի վիճակի ու որոշակի առաջադրանքների կատարման համար պաշտոնատար անձանց պատասխանատվության սահմանումով:
18. Վարչությունը գլխավորում է պետը, որին պաշտոնի է նշանակում և պաշտոնից ազատում Հայաստանի Հանրապետության վարչապետը:
Վարչության պետն ունի տեղակալներ, որոնց պաշտոնի է նշանակում և պաշտոնից ազատում Հայաստանի Հանրապետության վարչապետը` խորհրդակցելով վարչության պետի հետ:
19. Վարչության պետը`
ա) պատասխանատվություն է կրում վարչության առջև դրված խնդիրների և գործառույթների կատարման համար, կազմակերպում ու ղեկավարում է վարչության գործունեությունը.
բ) իր իրավասության սահմաններում արձակում է հրամաններ, հրահանգներ, տալիս ցուցումներ, որոնց կատարումը պարտադիր է իր ոլորտի ձեռնարկությունների, հիմնարկների ու կազմակերպությունների համար և ստուգում դրանց կատարումը.
գ) անհրաժեշտության դեպքում նախարարությունների և գերատեսչությունների հետ համատեղ արձակում է հրամաններ.
դ) սահմանում է պետի տեղակալների, բաժինների պետերի և վարչության մյուս կառուցվածքային ստորաբաժանումների ղեկավարների պատասխանատվության աստիճանը` վարչության համակարգի ձեռնարկությունների, հիմնարկների և կազմակերպությունների գործունեության համար.
ե) կատարում է պետի տեղակալների միջև պարտականությունների բաշխում.
զ) Հայաստանի Հանրապետության վարչապետի հաստատմանն է ներկայացնում վարչության կենտրոնական ապարատի կառուցվածքը, աշխատողների թիվը, կանոնադրությունը, կոլեգիայի անդամների թիվը և անհատական կազմը.
է) հաստատում է վարչության բաժինների, վարչության համակարգի ձեռնարկությունների, հիմնարկների և կազմակերպությունների, ինչպես նաև դուստր ձեռնարկությունների կանոնադրությունները.
ը) կազմակերպում և վարում է կոլեգիայի նիստերը.
թ) սահմանված կարգով աշխատանքային պայմանագրեր է կնքում վարչության համակարգի ձեռնարկությունների, հիմնարկների և կազմակերպությունների ղեկավարների հետ:
20. Պետի բացակայության ժամանակ, նրա հանձնարարությամբ, պետի պարտականությունները կատարում է տեղակալներից մեկը:
21. Վարչությունում ստեղծվում է կոլեգիա, որի կազմի մեջ մտնում են պետը (նախագահ), պետի տեղակալները` ի պաշտոնե, և վարչության այլ աշխատողներ:
22. Վարչության կոլեգիան իր պարբերաբար (ոչ պակաս, քան ամիսը մեկ անգամ) անցկացվող նիստերում քննարկում է համակարգի ձեռնարկությունների, հիմնարկների և կազմակերպությունների գործնական ղեկավարման, ղեկավար կադրերի ընտրության հարցերը, կարևորագույն հրամանների ու հրահանգների նախագծերը, լսում վարչության բաժինների և կառուցվածքային ստորաբաժանումների, համակարգի ձեռնարկությունների, հիմնարկների ու կազմակերպությունների հաշվետվությունները:
Կոլեգիայի որոշումները կենսագործվում են, որպես կանոն, պետի հրամաններով:
Պետի և կոլեգիայի անդամների միջև ծագած տարաձայնությունների դեպքում պետը կենսագործում է իր որոշումը` դրանց մասին զեկուցելով Հայաստանի Հանրապետության կառավարությանը կամ Հայաստանի Հանրապետության վարչապետին, իսկ կոլեգիայի անդամները նույնպես կարող են իրենց կարծիքը հայտնել Հայաստանի Հանրապետության կառավարությանը կամ Հայաստանի Հանրապետության վարչապետին:
23. Կոլեգիայի նիստերին կարող են հրավիրվել Հայաստանի Հանրապետության նախարարությունների, այլ վարչությունների, գերատեսչությունների, պետական կառավարման տարածքային մարմինների, պետական ու ոչ պետական ձեռնարկությունների, մամուլի և զանգվածային լրատվության միջոցների ու այլ կազմակերպությունների ներկայացուցիչներ:
24. Վարչության կենտրոնական ապարատի ֆինանսավորումն իրականացվում է Հայաստանի Հանրապետության պետական բյուջեի միջոցների հաշվին:
|
|
Հաստատված է |
Կ Ա Ռ ՈՒ Ց Վ Ա Ծ Ք
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՏԵՂԵԿԱՏՎՈՒԹՅԱՆ ԵՎ ԳՐԱՀՐԱՏԱՐԱԿՉՈՒԹՅԱՆ ՎԱՐՉՈՒԹՅԱՆ ԿԵՆՏՐՈՆԱԿԱՆ ԱՊԱՐԱՏԻ
Լրատվական-վերլուծական բաժին
Ռազմավարական ծրագրերի բաժին
Հեռուստատեսության և ռադիոյի զարգացման ծրագրերի բաժին
Գրահրատարակչության զարգացման ծրագրերի բաժին
Ցանցային տեղեկատվության բաժին
ֆինանսատնտեսագիտական և հաշվապահական հաշվառման բաժին
իրավաբանական բաժին
Վարչության պետի աշխատակազմ