ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

4 հունիսի 1996 թ. N 332

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԵՂԵԿԱՏՎՈՒԹՅԱՆ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆԸ ԵՎ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

1. Հաստատել Հայաստանի Հանրապետության տեղեկատվության նախարարության կանոնադրությունը և կենտրոնական ապարատի կառուցվածքը (կցվում են):

2. Ուժը կորցրած ճանաչել Հայաստանի Հանրապետության կառավարության 1992 թվականի հունիսի 10-ի «Հայաստանի Հանրապետության հեռուստատեսության և ռադիոհաղորդումների պետական վարչության մասին» N 343 և 1992 թվականի սեպտեմբերի 26-ի «Հայաստանի Հանրապետության կառավարությանն առընթեր հրատարակչական գործի վարչության մասին» N 492 որոշումները:

Հայաստանի Հանրապետության վարչապետ

ՀԱՍՏԱՏՎԱԾ Է ՀՀ ՎԱՐՉԱՊԵՏԻ 1996 Թ. ՀՈՒՆԻՍԻ 4-Ի N 332 ՈՐՈՇՄԱՄԲ

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԵՂԵԿԱՏՎՈՒԹՅԱՆ ՆԱԽԱՐԱՐՈՒԹՅԱՆ

I. Ընդհանուր դրույթներ

1. Հայաստանի Հանրապետության տեղեկատվության նախարարությունը (այսուհետև` նախարարություն) պետական կառավարման մարմին է, որը Հայաստանի Հանրապետությունում իրականացնում է հեռուստատեսության, ռադիոյի, գրահրատարակչության, հայկական պետական լրատվական գործակալության ու մամուլի տպագրման ոլորտների կառավարումը և ենթարկվում է Հայաստանի Հանրապետության կառավարությանը:

Նախարարությունը պատասխանատվություն է կրում ոլորտում տիրող վիճակի և դրա հեռանկարային զարգացման, տեխնիկական ու կառուցվածքային քաղաքականության, շուկայական հարաբերությունների ծավալման նպատակով անհրաժեշտ նախադրյալների ստեղծման, ոլորտում սեփականության տարբեր ձևերի ներդաշնակ գործունեության ապահովման համար:

Նախարարությունն իրավաբանական անձ է, ունի Հայաստանի Հանրապետության պետական զինանշանի պատկերով և իր անվամբ կնիք ու դրոշմակնիք:

II. Նախարարության խնդիրները և գործառույթները

2. Նախարարության հիմնական խնդիրներն ու գործառույթներն են`

ա) տեղեկատվության` հեռուստառադիոհաղորդումների, հայկական պետական լրատվական գործակալության` Արմենպրեսի (այսուհետև` Արմենպրես), գրահրատարակչության, պոլիգրաֆիայի, գրականության և մամուլի տարածման գործում պետական միասնական քաղաքականության իրականացման միջոցառումների մշակումն ու իրագործումը.

բ) միջազգային հանրությանը, սփյուռքի հայահոծ վայրերին Հայաստանի Հանրապետության քաղաքական-տնտեսական և մշակութային կյանքի վերաբերյալ, ժողովրդավարական սկզբունքների հիման վրա, լայնորեն, համապարփակ և ճշմարտացի լրատվության ապահովումը.

գ) Հայաստանի Հանրապետությունում տնտեսական բարեփոխումների, պետական քաղաքականության լայնորեն լուսաբանումը համակարգի մամուլում և զանգվածային լրատվության մյուս միջոցներով.

դ) մասնակցությունը Հայաստանի Հանրապետության սոցիալ-տնտեսական զարգացման տարեկան և հեռանկարային ծրագրերի մշակմանը.

ե) պետական տեղեկատվության, հեռուստահաղորդումների, Արմենպրեսի, հրատարակչությունների, պոլիգրաֆիական ձեռնարկությունների և գրականության տարածման կազմակերպությունների զարգացման հիմնադրույթների, հայեցակարգերի, ընթացիկ և հեռանկարային ժամանակաշրջանների համար նպատակային ծրագրերի մշակումը և դրանց իրագործման միջոցառումների համակարգումը.

զ) գրականության պահանջարկի ուսումնասիրությունը, համապատասխան գրականության հրատարակության, ձեռքբերման, տարածման և գրադարանների լրակազմման միջոցառումների իրականացումը.

է) տպագիր արտադրանքի բարձր որակի ապահովումը.

ը) գրահրատարակչական ոլորտի ձեռնարկությունների, հիմնարկների և կազմակերպությունների անկախ սեփականության ձևից, արդյունավետ աշխատանքի համար անհրաժեշտ նախադրյալների ստեղծումը.

թ) պետական պատվերների կատարման ապահովումը.

ժ) համակարգի պետական ձեռնարկությունների և գույքի ապապետականացման ու սեփականաշնորհման գործընթացի ապահովման համար անհրաժեշտ միջոցների ձեռնարկումը.

ի) Հայաստանում հրատարակված գրքերի տարածումը և հայկական գրքարվեստի քարոզչությունն արտասահմանում, գրահրատարակչական միջազգային համագործակցության կազմակերպումը.

լ) աշխարհում և Հայաստանում տեղի ունեցող իրադարձությունների քննական վերլուծությունը և մեկնաբանությունը.

խ) ոլորտի տարբեր ճյուղերի զարգացման գործում միասնական պետական ինվեստիցիոն քաղաքականության իրականացման ապահովումը.

ծ) օտարերկրյա պետությունների հեռուստատեսային և ռադիոհաղորդումների ընկերությունների և այլ կազմակերպությունների հետ իր իրավասության սահմաններում համագործակցությունը, տեղեկատվական և մշակութային կապերի խթանումը.

կ) համագործակցությունն անկախ մամուլի և լրատվական գործակալությունների հետ.

հ) առևտրային և մյուս այլընտրանքային ծրագրերի իրականացման ապահովումը.

ձ) իր ոլորտի գործունեության լիցենզավորումը Հայաստանի Հանրապետության օրենսդրությամբ սահմանված կարգով.

ղ) պետական տեղեկատվության, հեռուստառադիոհաղորդումների, Արմենպրեսի, հրատարակչությունների, պոլիգրաֆիական ձեռնարկությունների և գրականության տարածման կազմակերպությունների զարգացման ծրագրերի մշակումը և իրականացումը.

ճ) հայ մամուլի և գրականության մատենագիտության մեջ (գրապալատի) մամուլի վիճակագրության, գրահրատարակչական գործի սոցոլոգիական հետազոտությունների, տեղեկատվական ժողովածուների հրատարակումը, հանրապետությունում և սփյուռքում լույս տեսնող գրքերի, պարբերական և շարունակական հրատարակությունների վերլուծական բացատրությունների ապահովումը.

մ) Հայաստանի Հանրապետության օրենսդրությամբ սահմանված կարգով եթեր հեռարձակվող նյութերի նախապատրաստումը, դրանց կոորդինացումը, վերահսկումը և ուղղորդումը, լրատվական դաշտի համակարգումը.

յ) Հայաստանի Հանրապետության օրենսդրությամբ սահմանված կարգով նախարարության թղթակցական կետերի և այլ ներկայացուցչությունների ստեղծումն արտասահմանում.

ն) համակարգչային եղանակով տեղեկատվության ստացման ապահովումը, մշակումը և սպառումը: Կապն արտաքին տեղեկատվական համակարգերի հետ.

շ) իր իրավասության սահմաններում միջազգային համագործակցության իրականացումն օտարերկրյա պետությունների հետ, համաձայնագրերի ու պայմանագրերի կնքումն արտասահմանյան պետական ընկերությունների, գործակալությունների և մասնավոր ֆիրմաների ներկայացուցիչների հետ:

III. Նախարարության աշխատանքի կազմակերպումը

3. Նախարարության համակարգն ընդգրկում է իր ենթակայության Արմենպրեսի, ձեռնարկությունների, հիմնարկների և կազմակերպությունների ամբողջությունը:

4. Նախարարությունը ոլորտին վերաբերող բոլոր հարցերը լուծում է իրեն վերապահված իրավասության սահմաններում, չխախտելով մյուս հանրապետական մարմինների, ձեռնարկությունների, հիմնարկների ու կազմակերպությունների Հայաստանի Հանրապետության գործող օրենսդրությամբ նախատեսված ինքնուրույնությունը: Նախարարությունը մյուս նախարարությունների հետ իրականացնում է կապեր ու համագործակցություն` միջճյուղային հարցերի մշակման ու լուծման համար:

5. Նախարարությունը Հայաստանի Հանրապետության կառավարության հանձնարարությամբ իրականացնում է ոլորտի պետական գույքի տիրապետման և օգտագործման գործառույթները:

Նախարարությունն իր համակարգում ապահովում է պետական սեփականության պահպանությունը:

6. Նախարարությունը`

ա) ղեկավարվում է Հայաստանի Հանրապետության գործող օրենսդրությամբ և սույն կանոնադրությամբ ու, դրանց հիման վրա և ի կատարումն դրանց, իր իրավասության սահմաններում արձակում է հրամաններ, հրահանգներ և տալիս ցուցումներ, որոնց կատարումը պարտադիր է Արմենպրեսի, համակարգի ձեռնարկությունների, հիմնարկնրի ու կազմակերպությունների համար, և ստուգում է դրանց կատարումը.

բ) մյուս նախարարությունների հետ համատեղ, անհրաժեշտության դեպքում, արձակում է հրամաններ և հրահանգներ.

գ) ընդհանրացնում է օրենսդրական ակտերի կիրառման պրակտիկան ոլորտում, առաջարկություններ է մշակում օրենսդրական ակտերի կատարելագործման վերաբերյալ և նախագծեր է ներկայացնում Հայաստանի Հանրապետության կառավարության կամ Հայաստանի Հանրապետության վարչապետի քննարկմանը.

դ) սահմանված կարգով մասնակցում է նախարարության իրավասության մեջ մտնող հարցերի վերաբերյալ միջազգային պայմանագրերի նախագծերի մշակմանն ու քննարկմանը.

ե) իր իրավասության սահմաններում կասեցնում, վերացնում կամ ուժը կորցրած է ճանաչում Արմենպրեսի, համակարգի ձեռնարկությունների, հիմնարկների ու կազմակերպությունների կողմից ընդունված հրամաններն ու հրահանգները:

7. Նախարարությունը ոլորտի կառավարման բոլոր հարցերի քննարկումն ու լուծումը կազմակերպում է կոլեգիալության և միանձնյա ղեկավարման զուգակցման հիման վրա, աշխատանքի հանձնարարված տեղամասում գործի վիճակի ու որոշակի առաջադրանքների կատարման համար պաշտոնատար անձանց պատասխանատվության ճշտորոշ սահմանումով:

8. Նախարարությունը գլխավորում է Հայաստանի Հանրապետության տեղեկատվության նախարարը, որին Հայաստանի Հանրապետության սահմանադրությանը համապատասխան պաշտոնի է նշանակում և պաշտոնից ազատում Հայաստանի Հանրապետության նախագահը` Հայաստանի Հանրապետության վարչապետի առաջարկությամբ:

Նախարարն ունի տեղակալներ, որոնց պաշտոնի է նշանակում և պաշտոնից ազատում Հայաստանի Հանրապետության վարչապետը խորհրդակցելով նախարարի հետ:

9. Նախարարը`

ա) ղեկավարում է նախարարության համակարգի ձեռնարկությունների, հիմնարկնրի ու կազմակերպությունների գործունեությունը.

բ) պատասխանատվություն է կրում նախարարության առջև դրված խնդիրների ու գործառույթների կատարման համար.

գ) սահմանում է նախարարի տեղակալների, վարչությունների ու բաժինների պետերի և նախարարության մյուս կառուցվածքային ստորաբաժանումների ղեկավարների պատասխանատվության աստիճանը` Արմենպրեսի և համակարգի ձեռնարկությունների, հիմնարկների ու կազմակերպությունների գործունեության համար.

դ) կատարում է նախարարի տեղակալների միջև պարտականությունների բաշխում.

ե) Հայաստանի Հանրապետության վարչապետի հաստատմանն է ներկայացնում նախարարության կանոնադրությունը, կենտրոնական ապարատի կառուցվածքը և աշխատողների թվաքանակը.

զ) հաստատում է նախարարության վարչությունների, բաժինների, նախարարության համակարգի ձեռնարկությունների, հիմնարկնրի և կազմակերպությունների կանոնադրությունները.

է) առաջարկում է նախարարության կոլեգիայի անդամների թվաքանակը և Հայաստանի Հանրապետության վարչապետի հաստատմանն է ներկայացնում կոլեգիայի անհատական կազմը.

ը) կազմակերպում և ղեկավարում է նախարարության կոլեգիայի նիստերը.

թ) կոնտրակտային եղանակով աշխատանքային պայմանագրեր է կնքում նախարարության համակարգի ձեռնարկությունների (բացառությամբ հատուկ նշանակության պետական ձեռնարկությունների), հիմնարկների և կազմակերպությունների ղեկավարների հետ:

10. Նախարարի բացակայության ժամանակ, նրա հանձնարարությամբ, նախարարի պարտականությունները կատարում է նախարարի առաջին տեղակալը կամ տեղակալներից որևէ մեկը:

11. Նախարարությունում ստեղծվում է կոլեգիա, որի կազմի մեջ մտնում են նախարարը (նախագահ), նախարարի տեղակալները ի պաշտոնե, նախարարության այլ ղեկավար աշխատողներ:

12. Նախարարության կոլեգիան իր պարբերաբար անցկացվող նիստերում քննության է առնում ոլորտի զարգացման հիմնական հարցերը և նախարարության գործունեության այլ հարցեր, քննարկում է Արմենպրեսի, համակարգի ձեռնարկությունների, հիմնարկների և կազմակերպությունների գործնական ղեկավարման, կատարման ստուգման, ղեկավար կադրերի ընտրության և տեղաբաշխման հարցերը, կարևորագույն հրամանների և հրահանգների նախագծերը, լսում է Արմենպրեսի, նախարարության վարչությունների, բաժինների, նախարարության համակարգի ձեռնարկությունների, հիմնարկների և կազմակերպությունների հաշվետվությունները:

Կոլեգիայի որոշումները կենսագործվում են, որպես կանոն, նախարարի հրամաններով: Նախարարի և կոլեգիայի անդամների միջև տարաձայնությունների առկայության դեպքում նախարարը կենսագործում է իր որոշումը, ծագած տարաձայնությունների մասին զեկուցելով Հայաստանի Հանրապետության կառավարությանը կամ Հայաստանի Հանրապետության վարչապետին, իսկ կոլեգիայի անդամներն իրենց հերթին կարող են իրենց կարծիքը հայտնել Հայաստանի Հանրապետության կառավարությանը կամ Հայաստանի Հանրապետության վարչապետին:

13. Գիտության և տեխնիկայի զարգացման հիմնական ուղղությունների վերաբերյալ առաջարկությունները քննության առնելու, ոլորտում գիտականորեն հիմնավորված միասնական տեխնիկական քաղաքականություն իրականացնելու, տնտեսավարման շուկայական ձևերն արմատավորելու վերաբերյալ հանձնարարությունները մշակելու համար նախարարությունում ստեղծվում է գիտատեխնիկական խորհուրդ` բաղկացած մասնագետներից, այդ թվում` օտարերկրյա, ինչպես նաև, գիտատեխնիկական ընկերությունների և այլ կազմակերպությունների ներկայացուցիչներից:

Գիտատեխնիկական խորհրդի կազմը և խորհրդի կանոնադրությունը հաստատում է նախարարը:

14. Նախարարությունը մասնակցում է ոլորտի աշխատողների մասնագիտական պիտանիության և որակավորման վերաբերյալ պահանջների սահմանման գործին, կոորդինացնում է համակարգի ղեկավար կադրերի ընտրության, բաշխման և մասնագիտական որակավորման բարձրացման աշխատանքները:

15. Նախարարությունը Հայաստանի Հանրապետության օրենսդրությամբ սահմանված կարգով ստեղծում, վերակազմավորում և լուծարում է համակարգի ձեռնարկությունները, հիմնարկներն ու կազմակերպությունները:

16. Նախարարությունը թույլտվություն է տալիս համակարգի ձեռնարկություններին պետական սեփականություն հանդիսացող դուստր ձեռնարկություններ հիմնադրելու և ձեռնարկությունների տնտեսական միավորումներին անդամակցելու համար:

17. Նախարարությունը համաձայնություն է տալիս համակարգի ձեռնարկությունների, հիմնարկների, կազմակերպությունների, բաժանմունքների, մասնաճյուղերի ու ներկայացուցչությունների տեղաբաշխման համար:

18. Նախարարությունը թույլտվություն է տալիս համակարգի ձեռնարկություններին, հիմնարկներին, կազմակերպություններին իրենց տնօրինության տակ գտնվող պետական ֆինանսական միջոցները Հայաստանի Հանրապետության սահմաններից դուրս ներդնելու համար:

19. Նախարարությունը Հայաստանի Հանրապետության օրենսդրությամբ սահմանված կարգով վերահսկում է Արմենպրեսի և համակարգի ձեռնարկությունների, հիմնարկների, կազմակերպությունների տնօրինությանը հանձնած պետական գույքի օգտագործումը, ինչպես նաև համաձայնություն է տալիս այդ գույքի օտարման կամ վարձակալության հանձնման համար:

20. Նախարարությունն իրականացնում է Արմենպրեսի և համակարգի ձեռնարկությունների, հիմնարկների, կազմակերպությունների գործունեության, ներառյալ հիմնադիր փաստաթղթերի և նրա կողմից կնքված պայմանագրերի օրինականության վերահսկումը:

21. Նախարարության ֆինանսավորումն իրականացվում է միայն պետական բյուջեի միջոցների հաշվին:

22. Նախարարությունը կազմակերպում է քաղաքացիների նամակների (դիմումների ու գանգատների) ժամանակին քննարկումը, հասնելով այդ նամակներում բարձրացված հարցերի ճիշտ լուծմանը, ինչպես նաև միջոցներ է ձեռնարկում քաղաքացիների նամակներում հաղորդվող նախարարության համակարգի ձեռնարկությունների, հիմնարկների ու կազմակերպությունների գործունեության մեջ տեղ գտած թերությունների վերացման համար:

ՀԱՍՏԱՏՎԱԾ Է ՀՀ ՎԱՐՉԱՊԵՏԻ 1996 Թ. ՀՈՒՆԻՍԻ 4-Ի N 332 ՈՐՈՇՄԱՄԲ

Կ Ա Ռ ՈՒ Ց Վ Ա Ծ Ք

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԵՂԵԿԱՏՎՈՒԹՅԱՆ ՆԱԽԱՐԱՐՈՒԹՅԱՆ ԿԵՆՏՐՈՆԱԿԱՆ ԱՊԱՐԱՏԻ