1. «Գյուղական ֆինանսավորման կառույց-ծրագրի իրականացման գրասենյակ»  պետական հիմնարկը (այսուհետ` ԳՖԿ) իրավաբանական անձի կարգավիճակ չունեցող կազմակերպություն է: ԳՖԿ-ն ստեղծվել է Հայաստանի Հանրապետության կառավարության (այսուհետ` հիմնադիր) 2005 թվականի հուլիսի 14-ի «Գյուղական ֆինանսավորման կառույց-ծրագրի իրականացման գրասենյակ» պետական հիմնարկ ստեղծելու մասին» N 1005-Ն որոշման համաձայն:

2. ԳՖԿ-ն իր գործունեության ընթացքում ղեկավարվում է Հայաստանի Հանրապետության և Գյուղատնտեսության զարգացման միջազգային հիմնադրամի (այսուհետ` ԳԶՄՀ) միջև 2005 թվականի հունվարի 28-ին ստորագրված «Գյուղական տարածքների տնտեսական զարգացման ծրագիր» փոխառության համաձայնագրով (այսուհետ` փոխառության համաձայնագիր), Հայաստանի Հանրապետության օրենքներով, սույն կանոնադրությամբ և այլ իրավական ակտերով:

3. Հիմնադրի և ԳՖԿ-ի միջև հարաբերությունները կարգավորվում են փոխառության համաձայնագրով, Հայաստանի Հանրապետության օրենսդրությամբ և սույն կանոնադրությամբ:

4. ԳՖԿ-ն և դրա ամբողջ գույքը սեփականության իրավունքով պատկանում են հիմնադրին:

5. ԳՖԿ-ի անվանումն է`

հայերեն լրիվ`	«Գյուղական ֆինանսավորման կառույց-ծրագրի իրականացման գրասենյակ» պետական հիմնարկ,
ռուսերեն լրիվ`	Государственное Учреждение "Бюро реализации программ сельского финансирования",
անգլերեն լրիվ`	"Rural Finance Facility- Project Implementation Unit" State Institution,
հայերեն կրճատ`	«ԳՖԿ- ԾԻԳ» ՊՀ,
ռուսերեն կրճատ`	ГУ БРП "СФ",
անգլերեն կրճատ`	"RFF-PIU" SI:

6. ԳՖԿ-ի գտնվելու վայրն է` քաղ. Երևան:

7. ԳՖԿ-ն կարող է հիմնադրի որոշման հիման վրա վերակազմակերպվել պետական ոչ առևտրային կազմակերպության: 

8. ԳՖԿ-ի գործունեության նպատակը փոխառության համաձայնագրի Գյուղական տարածքների տնտեսական զարգացման ծրագրի գյուղական ձեռնարկատիրության ֆինանսավորման բաղադրիչով (այսուհետ` ծրագիր) նախատեսված գործառույթների իրականացումն է:

9. ԳՖԿ-ի խնդիրներն են`

ա) ծրագրի շրջանակներում մասնակից ֆինանսական կազմակերպության ընտրության նպատակով բանկերի և վարկային կազմակերպությունների նախաորակավորման իրականացումը և նախաորակավորում անցած կազմակերպությունների ցանկը գյուղական տարածքների տնտեսական զարգացման ծրագրի համակարգող խորհրդի (այսուհետ` ԾՀԽ) հաստատմանը ներկայացնելը.

բ) նախաորակավորում անցած բանկերի և վարկային կազմակերպությունների (այսուհետ` ՄՖԿ «Մասնակից ֆինանսական կառույց») հետ Հայաստանի Հանրապետության անունից վարկավորման (սուբսիդավորման) պայմանագրերի կնքումը.

գ) փոխառության համաձայնագրով նախատեսված վարկավորման կանոնակարգի և դրանում անհրաժեշտ փոփոխությունների նախապատրաստումն ու ծրագրի համակարգող խորհրդի հաստատմանը ներկայացնելը.

դ) փոխառության համաձայնագրով նախատեսված ԳՖԿ-ի հաշիվների ‎ֆինանսական հոսքերի կառավարումը,

ե) մինչև 5 հազ. ԱՄՆ-ի դոլար արժողությամբ ՄՖԿ-ի կողմից հաճախորդներին վարկավորման հայտերն ուղղակի հաստատելն ու ‎ֆինանսավորում իրականացնելը.

զ) ՄՖԿ-ի հաճախորդներին տրամադրվող 5000 ԱՄՆ-ի դոլարից բարձր վարկերի համար ՄՖԿ-ի դիմումների նախապատրաստումը և դրանք փոխառության համաձայնագրով նախատեսված վարկային խորհրդի հաստատմանը ներկայացնելը.

է) ՄՖԿ-ի հաշվետվությունների ընդունումը, ընդհանրացումը, վերլուծումը և  «Գյուղական տարածքների տնտեսական զարգացման ծրագրի վերլուծության և կառավարման գրասենյակ» պետական հիմնարկին (այսուհետ` ԾՎԿԳ) և Հայաստանի Հանրապետության ֆինանսների և էկոնոմիկայի նախարարություն ներկայացնելը.

ը) ծրագրում ընդգրկված գործունեության շրջանակներում աշխատանքների կատարման ժամանակացույցի և ծրագրի ընդհանուր ու տարեկան բյուջեների կազմումը և սահմանված ժամկետներում ԾՎԿԳ-ին  ներկայացնելը.

թ) ՄՖԿ-ների գործունեության ուսումնասիրությունը և ՄՖԿ-ների կողմից վարկային ու սուբսիդավորման պայմանագրերի խախտումների և ՄՖԿ-ներին պարտավորությունների վաղաժամկետ կատարման պահանջի ներկայացման հիմքերի առկայության վերաբերյալ ԾՎԿԳ-ին և Հայաստանի Հանրապետության ֆինանսների և էկոնոմիկայի նախարարությանը տեղեկացնելը.

ժ) ծրագրով նախատեսված մասհանումների համար անհրաժեշտ դիմումներ նախապատրաստելն ու ներկայացնելը.

ժա) ծրագրի իրականացման հետ կապված վճարումների կատարումը:

III. ԳՖԿ-Ի ԻՐԱՎԱՍՈՒԹՅՈՒՆԸ

10. ԳՖԿ-ն օգտվում է փոխառության  համաձայնագրով սահմանված արտոնություններից:

11. ԳՖԿ-ի իրավունակությունը ծագում է իրավաբանական անձանց գրանցող մարմնում հաշվառման պահից:

12. ԳՖԿ-ի իրավունքները և պարտականությունները սահմանվում են փոխառության համաձայնագրով, սույն կանոնադրությամբ, ծրագրի իրականացման գրասենյակների գործունեությունը կանոնակարգող իրավական ակտերով, պայմանագրերով և այլ համաձայնագրերով:

13. ԳՖԿ-ն իր հիմնադրի անունից, սույն կանոնադրությամբ նախատեսված գործունեության նպատակներին համապատասխան, կարող է ունենալ քաղաքացիական իրավունքներ և կրել այդ գործունեության հետ կապված քաղաքացիական պարտականություններ: ԳՖԿ-ին պատկանող քաղաքացիական իրավունքները, ներառյալ դրա պաշտպանության իրավունքը, ԳՖԿ-ն իրականացնում է հիմնադրի հայեցողությամբ` նրա անունից:

14. ԳՖԿ-ն ունի անվանում, օգտագործում է հիմնադրի անունից իրեն ամրագրված գույքը, Հայաստանի Հանրապետության զինանշանի պատկերով կլոր կնիք, դրոշմակնիք, հաշիվներ բանկերում` Հայաստանի Հանրապետության արժույթով և արտարժույթով:

15. ԳՖԿ-ն հիմնադրի անունից իրավունք ունի`

ա) ձեռք բերելու և իրականացնելու գույքային ու անձնական ոչ գույքային իրավունքներ, կրելու պարտականություններ.

բ) դատարանում հանդես գալու որպես հայցվոր կամ պատասխանող.

գ) Հայաստանի Հանրապետության օրենսդրությամբ սահմանված կարգով կնքելու պայմանագրեր և կրելու պարտավորություններ:

16. ԳՖԿ-ի իրավունքները կարող են սահմանափակվել օրենքով նախատեսված դեպքերում և սահմանված կարգով, ինչպես նաև հիմնադրի որոշմամբ, եթե դրանք չեն հակասում փոխառության համաձայնագրին:

17. ԳՖԿ-ի պարտավորությունների համար պատասխանատվություն է կրում հիմնադիրը` օրենքով սահմանված կարգով:

18. ԳՖԿ-ն պարտավոր է`

ա) փոխառության համաձայնագրի պահանջներին համապատասխան, օրենքով և այլ իրավական ակտերով սահմանված կարգով, վարել հաշվապահական հաշվառում ու ներկայացնել հաշվետվություններ.

բ) ապահովել ԳՖԿ-ի փաստաթղթերի (ԳՖԿ-ի կանոնադրություն, գույքի նկատմամբ գույքային իրավունքները հաստատող փաստաթղթեր, ԳՖԿ-ի ներքին փաստաթղթեր, տարեկան հաշվետվություններ, հաշվապահական հաշվառման փաստաթղթեր, արձանագրություններ, օրենքով և այլ իրավական ակտերով նախատեսված այլ փաստաթղթեր) պահպանումը.

գ) իր իրավասությունների սահմաններում վերահսկել ծրագրի իրականացման ընթացքը և անհրաժեշտության դեպքում առաջարկել փոփոխություններ:

IV. ԳՖԿ-Ի ԿԱՌԱՎԱՐՈՒՄԸ

19. ԳՖԿ-ի հիմնադրին է պատկանում ԳՖԿ-ի կառավարման և գործունեության վերաբերյալ ցանկացած հարցի վերջնական լուծման իրավունքը, որը փոխառության համաձայնագրով նախատեսված դեպքերում  պետք է համաձայնեցված լինի ԳԶՄՀ-ի հետ:

Սույն կանոնադրությամբ նախատեսված` ԳՖԿ-ի հիմնադրի լիազորությունները հիմնադրի որոշմամբ փոխանցվել են Հայաստանի Հանրապետության ֆինանսների և էկոնոմիկայի նախարարությանը:
    20. ԳՖԿ-ի հիմնադրի իրավասության հարցերն են`

ա) ԳՖԿ-ի կանոնադրության հաստատումը, դրանում փոփոխությունների ու լրացումների կատարումը.

բ) ԳՖԿ-ի վերակազմակերպումը, գործունեության դադարումը` ԳԶՄՀ-ի համաձայնությամբ.

գ) կառուցվածքի և հաստիքացուցակի հաստատումը.

դ) վերահսկողության իրականացումը, տնօրենի ապօրինի հրամանների վերացումը, վերստուգման արդյունքների քննարկումը.

ե) փոխառության համաձայնագրով, Հայաստանի Հանրապետության օրենքներով և այլ իրավական ակտերով տրված այլ լիազորություններ:

21. ԳՖԿ-ի ղեկավար պաշտոնատար անձը տնօրենն է, որին մրցութային կարգով պաշտոնի է նշանակում Հայաստանի Հանրապետության ֆինանսների և էկոնոմիկայի նախարարը` ԳԶՄՀ-ի համաձայնությամբ` կնքելով ժամկետային աշխատանքային պայմանագիր:

22. ԳՖԿ-ի տնօրենը գործում է փոխառության համաձայնագրի, սույն կանոնադրության, Հայաստանի Հանրապետության ֆինանսների և էկոնոմիկայի նախարարի, ԾՀԽ-ի հանձնարարականների համաձայն:

23. ԳՖԿ-ի տնօրենը`

ա) տիրապետում և օգտագործում է ԳՖԿ-ին ամրացված գույքը (այդ թվում` ֆինանսական միջոցները), գործարքներ կնքում հիմնադրի անունից.

բ) պատասխանատու է փոխառության համաձայնագրով սահմանված ԳՖԿ-ի գործառույթների իրականացման համար.

գ) ներկայացնում է ԳՖԿ-ն Հայաստանի Հանրապետությունում և օտարերկրյա պետություններում.

դ) գործում է առանց լիազորագրի, հանդես է գալիս դատարանում.

ե) տալիս է լիազորագրեր.

զ)  կնքում է պայմանագրեր (այդ թվում` աշխատանքային).

է) բանկերում և (կամ) գանձապետարանում բացում և իր իրավասությունների սահմաններում տնօրինում է ԳՖԿ-ի բանկային հաշիվները.

ը) իր իրավասության սահմաններում արձակում է հրամաններ, հրահանգներ, տալիս է կատարման համար պարտադիր ցուցումներ և վերահսկում դրանց կատարումը.

թ) մրցութային կարգով (բացառությամբ սպասարկող աշխատակազմի) աշխատանքի ընդունում և աշխատանքից ազատում է ԳՖԿ-ի աշխատողներին.

ժ) ԳՖԿ-ի աշխատողների նկատմամբ կիրառում է խրախուսման և կարգապահական պատասխանատվության միջոցներ.

ժա) իրականացնում է Հայաստանի Հանրապետության օրենսդրությամբ, փոխառության համաձայնագրով, սույն կանոնադրությամբ ու Հայաստանի Հանրապետության ֆինանսների և էկոնոմիկայի նախարարի, ԾՀԽ-ի հանձնարարականներով նախատեսված այլ լիազորություններ:

24. ԳՖԿ-ի գործունեության նկատմամբ վերահսկողությունն իրականացվում է հիմնադրի և ԳԶՄՀ-ի կողմից սահմանված կարգով:
                         

V. ԳՖԿ-Ի ԱՇԽԱՏԱԿԱԶՄԸ

25. ԳՖԿ-ի  աշխատակազմի աշխատողներն աշխատանքի են նշանակվում տնօրենի կողմից` պայմանագրային հիմունքներով:

26. ԳՖԿ-ի աշխատակազմի աշխատողների ընտրությունը կատարվում է տնօրենի կողմից` ազատ հաստիքների համար հրապարակային հայտարարությունից հետո:

27. ԳՖԿ-ի աշխատակազմը (բացառությամբ սպասարկող աշխատակազմի) նշանակումից առաջ պետք է հաստատվի ԳԶՄՀ-ի կողմից:
 

VI. ԳՖԿ-Ի ՄԻՋՈՑՆԵՐԸ

28. ԳՖԿ-ն իր հիմնադրից առանձնացված գույք չունի: ԳՖԿ-ի գույքը սեփականության իրավունքով պատկանում է հիմնադրին:

29. ԳՖԿ-ի գույքային իրավունքների օբյեկտներն են`

ա) գույքը` ներառյալ դրամական միջոցները, արժեթղթերը և գույքային իրավունքները,

բ) աշխատանքները և ծառայությունները,

գ) տեղեկատվությունը,

դ) ոչ նյութական արժեքները:

30. ԳՖԿ-ի գույքը գտնվում է Հայաստանի Հանրապետության պաշտպանության  ներքո:

VII. ԳՖԿ -Ի ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

31. ԳՖԿ-ի գործունեությունը կարող է դադարել ծրագրի ավարտից հետո` հիմնադրի որոշմամբ` ԳԶՄՀ-ի նախնական համաձայնության դեպքում:

32. ԳՖԿ-ի կազմակերպության գործունեության դադարման մասին հիմնադրի կողմից որոշման ընդունումից հետո ստեղծվում է լուծարման հանձնաժողով, սահմանվում լուծարման կարգն ու ժամկետները: ԳՖԿ-ի լուծարման ժամկետը չի կարող 2 ամսվանից պակաս լինել:

33. ԳՖԿ-ի գործունեությունը համարվում է դադարած` հիմնադրի սահմանած օրվանից: