«Վավերացնում եմ»
Հայաստանի Հանրապետության
Նախագահ Ռ. Քոչարյան
 11 հունվարի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

23 դեկտեմբերի 2004 թվականի N 1854-Ն

ՎԱՐՁԱՏՐՎՈՂ ՀԱՍԱՐԱԿԱԿԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՄԱՆ ՈԼՈՐՏՆԵՐԸ ԵՎ ԱՆՑԿԱՑՄԱՆ ՊԱՅՄԱՆՆԵՐԸ ՀԱՍՏԱՏԵԼՈՒ ՄԱՍԻՆ

Համաձայն «Բնակչության զբաղվածության մասին» Հայաստանի Հանրապետության օրենքի 21-րդ հոդվածի` Հայաստանի Հանրապետության կառավարությունը որոշում է.

 1. Հաստատել վարձատրվող հասարակական աշխատանքների կազմակերպման ոլորտները և անցկացման պայմանները` համաձայն հավելվածի:

 2. Սահմանել, որ՝

ա) վարձատրվող հասարակական աշխատանքներում աշխատանք փնտրող քաղաքացիների ընդգրկման ժամկետը և ծրագրերի տևողությունը մինչև 3 ամիս է.

բ) վարձատրվող հասարակական աշխատանքներում ընդգրկված անձանց յուրաքանչյուր աշխատանքային օրվա համար սահմանվում է 1100 դրամ, որի նկատմամբ հաշվարկվում են պետական հարկերը և սոցիալական վճարները Հայաստանի Հանրապետության պետական բյուջեի «Վարձատրվող հասարակական աշխատանքներ» ծախսային ծրագրով նախատեսված միջոցների հաշվին.

գ) Հայաստանի Հանրապետության պետական բյուջեի «Վարձատրվող հասարակական աշխատանքներ» ծախսային ծրագրով նախատեսված միջոցների 0,75 տոկոսն ուղղել Հայաստանի Հանրապետության աշխատանքի և սոցիալական հարցերի նախարարության կողմից իրականացվող ծրագրի ուղեկցման աշխատանքների (գրասենյակային ապրանքներ և նյութեր, գործուղման, կապի և էլեկտրաէներգիայի ծախսեր), իսկ 0.75 տոկոսը` Հայաստանի Հանրապետության մարզպետարանների (Երևանի քաղաքապետարանի) կողմից իրականացվող ծրագրի ուղեկցման աշխատանքների (գործուղման, կապի և էլեկտրաէներգիայի ծախսեր) ֆինանսավորմանը:

3. Հայաստանի Հանրապետության աշխատանքի և սոցիալական հարցերի նախարարին`

ա) մինչև յուրաքանչյուր տարվա հունվարի 25-ը Հայաստանի Հանրապետության ֆինանսների և էկոնոմիկայի նախարարի ու Հայաստանի Հանրապետության տարածքային կառավարման և ենթակառուցվածքների գործունեությունը համակարգող նախարարի հետ համատեղ հաստատել Հայաստանի Հանրապետության տվյալ տարվա պետական բյուջեի «Վարձատրվող հասարակական աշխատանքներ» ծրագրով նախատեսված ֆինանսական միջոցների բաշխումը` ըստ Հայաստանի Հանրապետության մարզերի (Երևան քաղաքի)` հաշվի առնելով յուրաքանչյուր մարզի (Երևան քաղաքի) գործազուրկների թիվը, գործազրկության մակարդակը և աղքատության ընտանեկան նպաստի համակարգում ընդգրկված ընտանիքների թիվը.

բ) Հայաստանի Հանրապետության տարածքային կառավարման և ենթակառուցվածքների գործունեությունը համակարգող նախարարի հետ համատեղ հաստատել զբաղվածության աջակցության մարզային (Երևանի քաղաքային) հանձնաժողովի օրինակելի կանոնադրությունը:

 4. Ուժը կորցրած ճանաչել Հայաստանի Հանրապետության կառավարության 1997 թվականի հունիսի 25-ի «Բնակչության զբաղվածության մասին» Հայաստանի Հանրապետության օրենքի առանձին հոդվածների կիրարկումն ապահովող միջոցառումների մասին» N 222 որոշման 4-րդ կետը, Հայաստանի Հանրապետության կառավարության 2001 թվականի մայիսի 21-ի «Աշխատանքի դիմաց նպաստի նշանակման և վճարման կարգը հաստատելու մասին» N 434 որոշման 5-րդ կետի «ա» ենթակետը և 2002 թվականի ապրիլի 29-ի «Նպաստ աշխատանքի դիմաց» ծրագրի իրականացման կարգը հաստատելու մասին» N 473 որոշումը:

5. Սույն որոշումն ուժի մեջ է մտնում 2005 թվականի հունվարի 1-ից:

Հայաստանի Հանրապետության վարչապետ	Ա. Մարգարյան
2004 թ. դեկտեմբերի 29 Երևան

Հավելված ՀՀ կառավարության 2004 թվականի դեկտեմբերի 23-ի N 1854-Ն որոշման

ՎԱՐՁԱՏՐՎՈՂ ՀԱՍԱՐԱԿԱԿԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՄԱՆ ՈԼՈՐՏՆԵՐԸ ԵՎ ԱՆՑԿԱՑՄԱՆ ՊԱՅՄԱՆՆԵՐԸ

I. ԸՆԴՀԱՆՈՒՐ ԴՐՈՒՅԹՆԵՐ

1. Վարձատրվող հասարակական աշխատանքները գործազուրկների և սույն կարգով նախատեսված աշխատանք փնտրող անձանց ժամանակավոր զբաղվածության ապահովման, նախնական մասնագիտական պատրաստվածություն չպահանջող և մատչելի աշխատանքների իրականացման ծրագիր է (այսուհետ` ծրագիր), որն ունի սոցիալական օգտակար ուղղվածություն և նպատակաուղղված է համայնքի սոցիալ-կենցաղային նշանակության աշխատանքների կատարմանը:

2. Վարձատրվող հասարակական աշխատանքների կազմակերպման ոլորտներն են`

ա) ճանապարհների, փողոցների, խճուղիների, մայթերի, այգիների, պուրակների, խաղահրապարակների ու սիզամարգերի նորոգման, բարեկարգման, կառուցման, կանաչապատման, ծառատնկման և անտառի վերականգնման օժանդակ աշխատանքները.

բ) արտակարգ իրավիճակների հետևանքների վերացման օժանդակ աշխատանքները.

գ) սոցիալական ենթակառուցվածքի օբյեկտների (դպրոց, մանկապարտեզ, բուժհիմնարկ, մանկատուն, ծերանոց և նմանատիպ այլ կազմակերպություններ) բարեկարգման օժանդակ աշխատանքները.

դ) սոցիալական ոլորտի կազմակերպությունների շենքերի վերանորոգման և շրջակայքի բարեկարգման օժանդակ աշխատանքները.

ե) ջրավազանների և ոռոգման համակարգերի նորոգման, ջրմուղ-կոյուղու ցանցի նորոգման օժանդակ աշխատանքները.

զ) պատմաճարտարապետական հուշարձանների, մշակութային օջախների շրջակայքի բարեկարգման օժանդակ աշխատանքները: 

3. Ծրագրում, ըստ առաջնահերթության, ընդգրկվում են Հայաստանի Հանրապետության աշխատանքի և սոցիալական հարցերի նախարարության «Հայաստանի Հանրապետության զբաղվածության ծառայություն» գործակալության (այսուհետ՝ գործակալություն) տարածքային կենտրոնում (այսուհետ` տարածքային կենտրոն) հաշվառված գործազուրկները, աղքատության ընտանեկան նպաստի համակարգում ընդգրկված ընտանիքների չզբաղված անդամները, հողի սեփականաշնորհմանը մասնակցած աշխատանք փնտրող քաղաքացիները և ուսանողները:

Ուսանողներն այդ աշխատանքներին կարող են մասնակցել ամառային արձակուրդների ընթացքում:

4. Ծրագրում ընդգրկված գործազրկության նպաստ ստացող անձանց գործազրկության նպաստի վճարումը կասեցվում է ծրագրին մասնակցելու ամբողջ ժամանակահատվածի ընթացքում:

5. Ծրագրում ընդգրկված անձի ստացած աշխատավարձը, ընտանիքների անապահովության գնահատման ժամանակ, որպես եկամուտ չի հաշվարկվում:

6. Ծրագրում ընդգրկված անձանց վրա տարածվում է Հայաստանի Հանրապետության աշխատանքային օրենսդրության նորմերի պահանջները:

7. Աշխատավարձը վճարվում է աշխատած լրիվ օրերի համար:

II. ԾՐԱԳՐԻ ՊԱՏՎԻՐԱՏՈՒՆ, ԾՐԱԳՐԵՐԻ ԿԱԶՄՈՒՄԸ ԵՎ ՀԱՍՏԱՏՈՒՄԸ

8. Ծրագիրն իրականացվում է համայնքի ղեկավարի (այսուհետ` պատվիրատու) կողմից մարզպետարան ներկայացված հաջորդ տարվա ընթացքում իրականացվելիք ծրագրերի հայտ-առաջարկին համապատասխան, որտեղ նշվում է կատարման ենթակա աշխատանքների ցանկը, մարդ/օրերի թիվը, նախատեսվող ֆինանսական ներդրումների չափը, անհրաժեշտ ֆինանսական միջոցների չափը և իրականացման ժամանակացույցը:

Մարզպետը (Երևանի քաղաքապետը) տվյալ տարվա համար մարզին (Երևանի քաղաքապետարանին) հատկացված ֆինանսական միջոցները բաշխում է համայնքների միջև, ելնելով համայնքների կողմից մարզպետարան (Երևանի քաղաքապետարան) ներկայացված հայտ-առաջարկություններից` հաշվի առնելով տվյալ համայնքի գործազուրկների թիվը, գործազրկության մակարդակը և աղքատության ընտանեկան նպաստի համակարգում ընդգրկված ընտանիքների թիվը, ինչպես նաև մարզի զարգացման գերակա ուղղությունները:

Ֆինանսական միջոցների բաշխումը, ծրագրերի ուղղվածությունը և դրանց ներկայացման ժամանակացույցն ըստ համայնքների հաստատվում է մարզպետի (Երևանի քաղաքապետի) որոշմամբ` ոչ ուշ, քան մինչև յուրաքանչյուր տարվա փետրվարի 15-ը:

Մարզպետի որոշմամբ հաստատված ժամանակացույցը տրամադրվում է տեղական ինքնակառավարման մարմիններին և տարածքային կենտրոններին:

Հաստատված ժամանակացույցից և ծրագրերի ուղղվածությունից դուրս այլ ծրագրեր քննարկման ենթակա չեն, բացառությամբ սույն կարգի 2-րդ կետի «բ» ենթակետով սահմանված դեպքերի, կամ, եթե առկա են չծախսված ֆինանսական միջոցներ:

9. Ծրագիրն իրականացնում է պատվիրատուն կամ նրա կողմից ընտրված որևէ կազմակերպություն (այսուհետ՝ ծրագիր իրականացնող կազմակերպություն):

Պատվիրատուի կողմից ծրագիրն իրականացվելու դեպքում պատվիրատուն նշանակում է ծրագրի պատասխանատու:

10. Ծրագիրը կազմվում է, ելնելով համայնքի սոցիալ-կենցաղային, բնապահպանական, սոցիալական ենթակառուցվածքների բարեկարգման անհրաժեշտությունից, հաշվի առնելով տարածքային կենտրոնում հաշվառված և վարձատրվող հասարակական աշխատանքներում ընդգրկվելու ցանկություն հայտնած անձանց թիվը: Ծրագիրը պետք է պարունակի տվյալներ պատվիրատուի և ծրագիր իրականացնող կազմակերպության անվանման, ծրագրի նպատակի և նրա հիմնավորվածության, աշխատանքի բնույթի և կատարվող աշխատանքների ծավալի, իրականացման վայրի և ժամկետի, սպասվող արդյունքի, մարդ/օրերի թվի, ինչպես նաև նախատեսված աշխատանքների կազմակերպման և կատարման համար անհրաժեշտ ֆինանսական միջոցների նախահաշվի մասին, որտեղ պետք է նշված լինի պատվիրատուի (ծրագիրն իրականացնող կազմակերպության) կողմից կատարվելիք ներդրումների չափաքանակների և տեսակների (այդ թվում` մասնագիտական աշխատանքների իրականացման ուղղությամբ) մասին տվյալներ: Ծրագիրը պետք է լինի թելակարված, պաշտպանիչ թերթիկի վրա ստորագրված, կնքված և էջանշված:

11. Պատվիրատուն, սույն կարգի 8-րդ կետում նշված ժամանակացույցին համապատասխան եռօրյա ժամկետում մարզպետարան (Երևանի քաղաքապետարան) է ներկայացնում իրականացվող ծրագրի նախագիծ` երեք օրինակից` ծրագրի իրականացմանը մասնակցելու ենթակա անձանց թիվն ապահովելու վերաբերյալ տարածքային կենտրոնի կողմից տրված գրավոր տեղեկանքի հետ միասին (այսուհետ` տեղեկանք):

12. Սույն կարգի 8-րդ կետում նշված ժամանակացույցին և ծրագրերի ուղղվածությանը համապատասխան մարզպետարան (Երևանի քաղաքապետարան) ներկայացված ծրագրի նախագիծը մարզպետի (Երևանի քաղաքապետի) հանձնարարությամբ հնգօրյա ժամկետում քննարկվում է զբաղվածության աջակցության մարզային հանձնաժողովում (այսուհետ՝ հանձնաժողով):

13. Հանձնաժողովի կողմից հավանության արժանացած ծրագիրը հաստատվում է մարզպետի (Երևանի քաղաքապետի) որոշմամբ՝ եռօրյա ժամկետում:

Հաստատված ծրագրի երկու օրինակը մարզպետի (Երևանի քաղաքապետի) որոշման հետ միասին եռօրյա ժամկետում տրամադրվում է պատվիրատուին:

14. Սույն կարգի 10-րդ կետում նշված պահանջները չբավարարելու դեպքում ծրագիրը մերժվում է հանձնաժողովի կողմից և ծրագրի երկու օրինակն ու այն մերժելու մասին մարզպետի (Երևանի քաղաքապետի) որոշումը, համապատասխան գրությամբ, եռօրյա ժամկետում վերադարձվում է պատվիրատուին:

15. Պատվիրատուն ծրագիրը մերժելու մասին մարզպետի (Երևանի քաղաքապետի) որոշումը կարող է բողոքարկել դատական կարգով:

16. Պատվիրատուն տվյալ տարվա համար հաստատված ծրագրերը և ֆինանսական միջոցների բաշխումն ստանալուց հետո հնգօրյա ժամկետում Հայաստանի Հանրապետության ֆինանսների և էկոնոմիկայի նախարարության կողմից սահմանված ձևով կազմում և մարզպետին (Երևանի քաղաքապետին) է ներկայացնում ծրագրով համայնքին հատկացված միջոցների ծախսերի նախահաշիվ:

17. Մարզպետը (Երևանի քաղաքապետը) պատվիրատուներից ստացված ծախսերի նախահաշիվները հնգօրյա ժամկետում ներկայացնում է Հայաստանի Հանրապետության աշխատանքի և սոցիալական հարցերի նախարարության աշխատակազմ:

18. Հայաստանի Հանրապետության աշխատանքի և սոցիալական հարցերի նախարարության աշխատակազմի ղեկավարն ստացված ծախսերի նախահաշիվները հաստատում և հնգօրյա ժամկետում ներկայացնում է մարզպետին (Երևանի քաղաքապետին):

19. Մարզպետը (Երևանի քաղաքապետը) հաստատված ծախսերի նախահաշիվներն ստանալուց հետո երկօրյա ժամկետում ներկայացնում է պատվիրատուներին:

20. Ծրագրով նախատեսված աշխատանքներն սկսվում են ծրագիրը հաստատվելուց ոչ ուշ, քան քսան օր հետո: Սահմանված ժամկետում ծրագիրը չսկսվելու դեպքում պատվիրատուն եռօրյա ժամկետում գրավոր բացատրություն է ներկայացնում մարզպետին (Երևանի քաղաքապետին)` ծրագրի իրականացման ժամկետները փոփոխելու կամ ծրագիրը չսկսելու մասին համապատասխան որոշում ընդունելու համար:

21. Պատվիրատուն եռօրյա ժամկետում հաստատված ծրագրի մեկ օրինակը ներկայացնում է տարածքային կենտրոն, որը մինչև հաջորդ ամսվա 5-ը նախորդ ամսվա հաստատված ծրագրերի մասին հայտնում է գործակալության համապատասխան բաժին:

III. ԱՇԽԱՏԱՆՔԻ ԿԱԶՄԱԿԵՐՊՈՒՄԸ ԵՎ ԾՐԱԳՐԻ ԻՐԱԿԱՆԱՑՈՒՄԸ

22. Տարածքային կենտրոնը սույն կարգի 3-րդ կետում նշված անձանց առաջարկում է տվյալ ծրագրով նախատեսված աշխատանքները, իսկ այդ աշխատանքներին մասնակցելու ցանկություն հայտնած անձանց ցուցակը ծրագիրն սկսելուց հինգ օր առաջ տրամադրում է ծրագրի պատվիրատուին:

23. Պատվիրատուն տարածքային կենտրոնի կողմից գործուղված անձանց հետ կնքում է ժամկետային աշխատանքային պայմանագրեր` այդ մասին հնգօրյա ժամկետում տեղեկատվություն ներկայացնելով տարածքային կենտրոն:

24. Ծրագիրն իրականացվում է բացառապես ծրագրով նախատեսված աշխատանքներին համապատասխան:

25. Յուրաքանչյուր ամսվա առաջին հինգ օրերի ընթացքում ծրագիրն իրականացնող կազմակերպությունը կամ ծրագրի պատասխանատուն պատվիրատուի հաստատմանն է ներկայացնում նախորդ ամսում կատարված աշխատանքների կատարողական ակտը (ձև N 1) և սույն կարգի 22-րդ կետով նախատեսված անձանց հաճախումների (մարդ/օրերի) տեղեկանքը (ձև N 2):

26. Պատվիրատուն սույն կարգի 25-րդ կետում նշված կատարողական ակտի հիման վրա մինչև տվյալ ամսվա 10-ը մարզպետարան է ներկայացնում վճարման հայտ-պահանջագիր:

27. Պատվիրատուն սույն կարգի 25-րդ կետում նշված կատարողական ակտի և տեղեկանքի հիման վրա կազմում է աշխատավարձի վճարման ցուցակ (ձև N 3):

28. Մարզպետը (Երևանի քաղաքապետը) պատվիրատուներից ստացված, ամփոփված և ըստ համայնքների կազմված ֆինանսավորման հայտը` մինչև տվյալ ամսվա 15-ը ներկայացնում է Հայաստանի Հանրապետության աշխատանքի և սոցիալական հարցերի նախարարության աշխատակազմ:

29. Հայաստանի Հանրապետության աշխատանքի և սոցիալական հարցերի նախարարության աշխատակազմը մարզպետներից ստացված և ամփոփված ֆինանսական հայտերի հիման վրա մինչև տվյալ ամսվա 20-ը Հայաստանի Հանրապետության օրենսդրությամբ սահմանված կարգով Հայաստանի Հանրապետության ֆինանսների և էկոնոմիկայի նախարարություն է ներկայացնում ըստ համայնքների կազմված վճարումները հիմնավորող փաստաթղթեր:

30. Վճարման ենթակա գումարը սահմանված կարգով փոխանցվում է տեղական ինքնակառավարման մարմինների անվանումներով վերջիններիս սպասարկող տեղական գանձապետական բաժիններում բացված «Վարձատրվող հասարակական աշխատանքներ» եկամտային հաշիվներին:

31. Յուրաքանչյուր ծրագրի իրականացման աշխատանքներում ընդգրկված անձանց աշխատավարձը հաշվարկում, վճարում, դրա նկատմամբ պետական հարկերը և սոցիալական վճարները հաշվարկում ու համապատասխան մարմիններ է փոխանցում պատվիրատուն:

32. Պատվիրատուի կամ ծրագիրն իրականացնող կազմակերպության սխալի հետևանքով չվճարված աշխատավարձի գումարները ենթակա են միանվագ վճարման՝ Հայաստանի Հանրապետության օրենսդրությամբ սահմանված կարգով:

33. Ծրագիրն իրականացնող կազմակերպությունը կամ ծրագրի պատասխանատուն ծրագրի ավարտից հետո եռօրյա ժամկետում պատվիրատուին է ներկայացնում տեղեկատվություն կատարված աշխատանքների արդյունքների մասին` կցելով ամփոփ կատարողական ակտ` երկու օրինակից:

Պատվիրատուն ամփոփ կատարողական ակտի մեկ օրինակը կատարված աշխատանքների արդյունավետությունը գնահատող եզրակացության հետ միասին, եռօրյա ժամկետում ներկայացնում է մարզպետին (Երևանի քաղաքապետին):

Ծրագիրը համարվում է ավարտված ծրագրի ավարտը հավաստող փաստաթղթերը մարզպետի (Երևանի քաղաքապետի) կողմից հաստատվելուց հետո: Ծրագրի ավարտի մասին պատվիրատուն գրավոր տեղեկացնում է տարածքային կենտրոնին:

34. Սույն կարգի պահանջների խախտմամբ նշանակված և վճարված աշխատավարձը ենթակա է վերադարձման Հայաստանի Հանրապետության պետական բյուջե՝ Հայաստանի Հանրապետության օրենսդրությամբ սահմանված կարգով:

35. Ծրագրի կատարման ընթացքի նկատմամբ մոնիտորինգ և վերահսկողություն են իրականացնում Հայաստանի Հանրապետության օրենսդրությամբ լիազորված մարմինները:

36. Ծրագրով նախատեսված աշխատանքների իրականացումն անհնարին դարձնող հանգամանքների ի հայտ գալու դեպքում ծրագիրն իրականացնող կազմակերպությունը կամ ծրագրի պատասխանատուն ծրագրի իրականացման ժամկետների կամ իրականացվելիք աշխատանքների ծավալների փոփոխության կամ ժամկետից շուտ դադարեցման վերաբերյալ առաջարկությունը ներկայացնում է պատվիրատուին, որը, համապատասխան եզրակացությամբ եռօրյա ժամկետում այն ներկայացնում է մարզպետին (Երևանի քաղաքապետին):

37. Ծրագրի խախտումներ հայտնաբերվելու դեպքում պատվիրատուն մարզպետին (Երևանի քաղաքպետին) է ներկայացնում ծրագրի իրականացման ժամկետից շուտ դադարեցման վերաբերյալ առաջարկություն` նշելով խախտումները, այն թույլ տված անձանց անունները և խախտման հետևանքով պատճառված վնասի չափը:

38. Մարզպետի կողմից ծրագիրն անարդյունավետ գնահատվելու դեպքում պատվիրատուն և ծրագիրն իրականացնող կազմակերպությունը պատասխանատվություն են կրում պետությանը պատճառված վնասի (վճարված աշխատավարձի մասով) համար` Հայաստանի Հանրապետության օրենքով սահմանված կարգով:

39. Ծրագրի իրականացման ժամկետը փոփոխվում կամ ծրագրի իրականացումը ժամկետից շուտ դադարեցվում է մարզպետի (Երևանի քաղաքապետի) որոշմամբ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև N 1

	Հաստատում եմ
	_______________ (պատվիրատուի անվանումը) հասցեն` ______________ ԿՎՎ ________________ սպասարկող բանկը` _______ հ/հ _________________ Կ. Տ.

Կ Ա Տ Ա Ր Ո Ղ Ա Կ Ա Ն  Ա Կ Տ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 2005 ԹՎԱԿԱՆԻ ՊԵՏԱԿԱՆ ԲՅՈՒՋԵԻ «ՎԱՐՁԱՏՐՎՈՂ ՀԱՍԱՐԱԿԱԿԱՆ ԱՇԽԱՏԱՆՔՆԵՐ» ԾՐԱԳՐԻ ՇՐՋԱՆԱԿՆԵՐՈՒՄ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ________________ ՄԱՐԶԻ ____________ ՀԱՄԱՅՆՔԻ ԾՐԱԳՐՈՎ ԻՐԱԿԱՆԱՑՎՈՂ ԱՇԽԱՏԱՆՔՆԵՐԻ

Ծրագրի անվանումը` ____________________________________

Ծրագրի ընդհանուր գումարը` ___________________ հազ. դրամ

Ծրագրի սկիզբը` ______________________ (ամիսը, ամսաթիվը, տարեթիվը)

Ծրագրի ավարտը` ______________________ (ամիսը, ամսաթիվը, տարեթիվը)

Ծրագրի սկզբից իրացված գումարը` ______________ հազ. դրամ

Հաշվետու ամիսը` _______________ 2005 թ.

NN ը/կ	Կատարված աշխատանքների նկարագիրը	Չափի միավորը	Քանակը	Միավորի գինը (դրամ)	Մարդ/օրերի թիվը	Գումարը (դրամ)
1.
2.

___________________________ (ծրագրի իրականացնող կազմակերպության անվանումը) հասցեն` _____________________ ԿՎՎ _______________________ սպասարկող բանկը` ______________ հ/հ ________________________ Կ. Տ.

Ձև N 2

	Հաստատում եմ
	_______________ (պատվիրատուի անվանումը) հասցեն` ______________ ԿՎՎ ________________ սպասարկող բանկը` _______ հ/հ _________________ Կ. Տ.

Տ Ե Ղ Ե Կ Ա Ն Ք

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 2005 ԹՎԱԿԱՆԻ ՊԵՏԱԿԱՆ ԲՅՈՒՋԵԻ «ՎԱՐՁԱՏՐՎՈՂ ՀԱՍԱՐԱԿԱԿԱՆ ԱՇԽԱՏԱՆՔՆԵՐ» ԾՐԱԳՐԻ ՇՐՋԱՆԱԿՆԵՐՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ______________ ՄԱՐԶԻ ___________ ՀԱՄԱՅՆՔԻ ԾՐԱԳՐՈՎ ԻՐԱԿԱՆԱՑՎՈՂ ԱՇԽԱՏԱՆՔՆԵՐԻՆ ՄԱՍՆԱԿՑԱԾ ԱՆՁԱՆՑ ՀԱՃԱԽՈՒՄՆԵՐԻ ՄԱՐԴ/ՕՐԵՐԻ

Ծրագրի անվանումը` ____________________________________

Ծրագրի ընդհանուր գումարը` ___________________ հազ. դրամ

Ծրագրի սկիզբը` ______________________ (ամիսը, ամսաթիվը, տարեթիվը)

Ծրագրի ավարտը` ______________________ (ամիսը, ամսաթիվը, տարեթիվը)

Հաշվետու ամիսը` _______________ 2005 թ.

NN ը/կ	Աշխատանքներին մասնակցած անձանց անունը, ազգանունը, հայրանունը	Հաճախած օրերի թիվը	Հաշվարկված աշխատավարձի չափը (դրամ)	Այդ թվում`
				հաշվարկված հարկերը (դրամ)	հաշվարկված սոցիալական վճարները ընդամենը (դրամ)	որից`		անձին վճարման ենթական աշխատավարձի չափը (դրամ)
						գործատուի կողմից վճարված	անձի կողմից վճարված
1.
2.

___________________________ (ծրագրի իրականացնող կազմակերպության անվանումը) հասցեն` _____________________ ԿՎՎ _______________________ սպասարկող բանկը` ______________ հ/հ ________________________ Կ. Տ.

Ձև N 3

Ա Շ Խ Ա Տ Ա Վ Ա Ր Ձ Ի  Վ Ճ Ա Ր Մ Ա Ն  Ց ՈՒ Ց Ա Կ

____ ___________ 2005 թ.

NN ը/կ	Աշխատանքներին մասնակցած անձանց անունը, ազգանունը, հայրանունը	Աշխատանքի հաճախած օրերի թիվը	Հաշվարկված աշխատավարձի չափը	Հաշվարկված հարկերը	Հաշվարկված սոցիալական վճարները	Ընդամենը` պահումներ	Անձին վճարման ենթակա աշխատա- վարձը	Աշխատա- վարձն ստանալու համար անձի ստորագրությունը
1.
2.

Պատվիրատու ____________________

Կ. Տ.