«Վավերացնում եմ»

Հայաստանի Հանրապետության

Նախագահ Ռ. Քոչարյան

 7 օգոստոսի 2003 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

23 հուլիսի 2003 թվականի N 925-Ն

ԵՐԵՎԱՆԻ «ՋՐՄՈՒՂ-ԿՈՅՈՒՂԻ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆԸ ԵՎ «ՀԱՅՋՐՄՈՒՂԿՈՅՈՒՂԻ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆՆ ԱՆՀԱՏՈՒՅՑ ՕԳՏԱԳՈՐԾՄԱՆ ԳՈՒՅՔ ՀԱՆՁՆԵԼՈՒ ՄԱՍԻՆ

Երևանի «Ջրմուղ-կոյուղի» փակ բաժնետիրական ընկերության և «Հայջրմուղկոյուղի» փակ բաժնետիրական ընկերության բարեփոխումների ծրագրերով նախատեսված գործընթացների շրջանակներում իրականացվող գույքային հարաբերություններն առավել արդյունավետ կազմակերպելու և Կոտայքի, Արարատի, Արմավիրի ու Արագածոտնի մարզերի մի շարք համայնքների ջրամատակարարումը բարելավելու նպատակով՝ Հայաստանի Հանրապետության կառավարությունը որոշում է.

1. Ընդունել Երևանի «Ջրմուղ-կոյուղի» փակ բաժնետիրական ընկերությանը և «Հայջրմուղկոյուղի» փակ բաժնետիրական ընկերությանը պատկանող ջրատարներից սնվող Կոտայքի, Արարատի, Արմավիրի և Արագածոտնի մարզերի մի շարք համայնքների առաջարկությունները՝ նրանց պատկանող ջրամատակարարման ու ջրահեռացման համակարգերը (ջրմուղ-կոյուղու ցանցեր, օրվա կարգավորման ջրամբարներ, պոմպակայաններ, սարքավորումներ, շենքեր, շինություններ, մեքենա-մեխանիզմներ և այլն) Երևանի «Ջրմուղ-կոյուղի» փակ բաժնետիրական ընկերությանը և «Հայջրմուղկոյուղի» փակ բաժնետիրական ընկերությանը պայմանագրային հիմունքներով, 50 տարի ժամկետով, անհատույց օգտագործման հանձնելու մասին։

2. Առաջարկել սույն որոշման 1-ին կետում նշված մարզերի համայնքների ղեկավարներին իրականացնել համայնքներին պատկանող ջրամատակարարման և ջրահեռացման համակարգերի գույքագրման աշխատանքները։

3. Կոտայքի, Արարատի, Արմավիրի և Արագածոտնի մարզպետներին՝ ապահովել համայնքներին պատկանող ջրամատակարարման ու ջրահեռացման համակարգերի սեփականության իրավունքի և անշարժ գույքի անհատույց օգտագործման պայմանագրերից ծագող իրավունքների պետական գրանցման աշխատանքների կատարումը։

4. Հայաստանի Հանրապետության կառավարությանն առընթեր ջրային տնտեսության պետական կոմիտեի նախագահին՝ իրականացնել համայնքներին պատկանող ջրամատակարարման և ջրահեռացման համակարգերի՝ գույքագրման արդյունքներով վերագնահատման աշխատանքները։

5. Հայաստանի Հանրապետության կառավարությանն առընթեր ջրային տնտեսության պետական կոմիտեի նախագահին, Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահին, Կոտայքի, Արարատի, Արմավիրի և Արագածոտնի մարզպետներին՝ եռամսյա ժամկետում համայնքների ղեկավարների միջոցով ավարտել սույն որոշմամբ նախատեսված գույքագրման, վերագնահատման, սեփականության իրավունքի և անշարժ գույքի անհատույց օգտագործման պայմանագրերից ծագող իրավունքների պետական գրանցման աշխատանքները։

6. Հայաստանի Հանրապետության կառավարությանն առընթեր ջրային տնտեսության պետական կոմիտեի նախագահին՝ Երևանի «Ջրմուղ-կոյուղի» փակ բաժնետիրական ընկերության 2-րդ վարկային ծրագրի նախապատրաստման ժամանակ նախատեսել սույն որոշմամբ անհատույց օգտագործման վերցված՝ համայնքներին պատկանող ջրամատակարարման և ջրահեռացման համակարգերի (ներքին ցանցեր և ինժեներական կառուցվածքներ) բարելավման միջոցառումները։

7. Սահմանել, որ Կոտայքի, Արարատի, Արմավիրի և Արագածոտնի մարզերի համապատասխան համայնքների կողմից ջրամատակարարման ու ջրահեռացման ծառայությունների մատուցման արդյունքում առաջացած դեբիտորական և կրեդիտորական պարտքերը ենթակա չեն հաշվեգրման Երևանի «Ջրմուղ-կոյուղի» փակ բաժնետիրական ընկերության և «Հայջրմուղկոյուղի» փակ բաժնետիրական ընկերության հաշվեկշիռներում:

8. Հայաստանի Հանրապետության ֆինանսների և էկոնոմիկայի նախարարին՝ սույն որոշմամբ նախատեսված աշխատանքների ավարտից հետո մեկամսյա ժամկետում Հայաստանի Հանրապետության կառավարություն ներկայացնել առաջարկություն անհատույց օգտագործման վերցված ջրամատակարարման ու ջրահեռացման համակարգերի շահագործման արդյունքում Երևանի «Ջրմուղ-կոյուղի» փակ բաժնետիրական ընկերությունում և «Հայջրմուղկոյուղի» փակ բաժնետիրական ընկերությունում առաջացող ֆինանսական ճեղքվածքների փակման վերաբերյալ:

9. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2003 թ. հուլիսի 23 Երևան