«Վավերացնում եմ»
Հայաստանի Հանրապետության
Նախագահ Ռ. Քոչարյան
22 հոկտեմբերի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
25 սեպտեմբերի 2003 թվականի N 1283-Ն
ՎԱՆԱՁՈՐՈՒՄ ԵՐԵՎԱՆԻ ԹԱՏՐՈՆԻ ԵՎ ԿԻՆՈՅԻ ՊԵՏԱԿԱՆ ԻՆՍՏԻՏՈՒՏԻ ՄԱՍՆԱՃՅՈՒՂ ՍՏԵՂԾԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ԴԵԿՏԵՄԲԵՐԻ 26-Ի N 2176-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
«Պետական ոչ առևտրային կազմակերպությունների մասին» Հայաստանի Հանրապետության օրենքի 8-րդ հոդվածի 1-ին կետին համապատասխան` Հայաստանի Հանրապետության կառավարությունը որոշում է.
1. Վանաձորում ստեղծել Երևանի թատրոնի և կինոյի պետական ինստիտուտի մասնաճյուղ:
2. Հայաստանի Հանրապետության կառավարության 2002 թվականի դեկտեմբերի 26-ի «Երևանի թատրոնի և կինոյի պետական ինստիտուտ» պետական հիմնարկը վերակազմակերպելու և «Երևանի թատրոնի և կինոյի պետական ինստիտուտ» պետական ոչ առևտրային կազմակերպության կանոնադրությունը հաստատելու մասին» N 2176-Ն որոշման մեջ կատարել հետևյալ լրացումները և փոփոխությունը`
ա) որոշման 5-րդ և որոշմամբ հաստատված կանոնադրության 13-րդ կետերի «ա» ենթակետերը «բարձրագույն» բառից առաջ լրացնել «հանրակրթության» բառով.
բ) որոշմամբ հաստատված կանոնադրության 31-րդ կետը շարադրել հետևյալ խմբագրությամբ.
«31. Ինստիտուտի կառուցվածքային ստորաբաժանումներն են` ֆակուլտետները, ամբիոնները, բաժինները, լաբորատորիաները և գիտական գրադարանը:
Ինստիտուտի տարածքային առանձնացված ստորաբաժանումներն են` մասնաճյուղերը:
Ինստիտուտի կառուցվածքային և առանձնացված ստորաբաժանումների իրավասությունները սահմանվում են սույն և իրենց կանոնադրություններով»:
3. Երևանի թատրոնի և կինոյի պետական ինստիտուտին հատկացնել 2003/2004 ուսումնական տարվա ընդունելության անվճար ուսուցման երկուական և վճարովի ուսուցման երեքական տեղ` «0501 Դրամատիկական թատրոնի դերասան» և «0502 Դրամատիկական թատրոնի ռեժիսոր» մասնագիտությունների գծով` Հայաստանի Հանրապետության պետական բարձրագույն ուսումնական հաստատությունների 2003/2004 ուսումնական տարվա ընդունելության պահուստային տեղերի հաշվին:
4. Հայաստանի Հանրապետության կրթության և գիտության նախարարին` ապահովել սույն որոշման 3-րդ կետով հատկացված տեղերում ընդունված ուսանողների ուսումնառությունը Վանաձոր քաղաքում` մինչև Երևանի թատրոնի և կինոյի պետական ինստիտուտի Վանաձորի մասնաճյուղի բնականոն գործունեությունն սկսելը:
5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
|
Հայաստանի Հանրապետության |
Ա. Մարգարյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|