«Վավերացնում եմ»

Հայաստանի Հանրապետության

Նախագահ Ռ. Քոչարյան

21 օգոստոսի 2003 թ.

Հայաստանի Հանրապետության կառավարություն

ո ր ո շ ու մ

14 օգոստոսի 2003 թվականի N 1012-Ն

ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՕԳՏԱԳՈՐԾՄԱՆ ԵՎ ԱՆՎՏԱՆԳՈՒԹՅԱՆ ԱՊԱՀՈՎՄԱՆ ԻՐԱԿԱՆԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հայաստանի Հանրապետության ջրային օրենսգրքի 121-րդ հոդվածի 5-րդ մասի 9-րդ կետին համապատասխան՝ Հայաստանի Հանրապետության կառավարությունը որոշում է.

1. Սահմանել հիդրոտեխնիկական կառուցվածքների օգտագործման և անվտանգության ապահովման իրականացման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ	Ա. Մարգարյան
2003 թ. օգոստոսի 21 Երևան

Հավելված ՀՀ կառավարության 2003 թվականի օգոստոսի 14-ի N 1012-Ն որոշման

Կ Ա Ր Գ

ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՕԳՏԱԳՈՐԾՄԱՆ ԵՎ ԱՆՎՏԱՆԳՈՒԹՅԱՆ ԱՊԱՀՈՎՄԱՆ ԻՐԱԿԱՆԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են Հայաստանի Հանրապետության տարածքում գտնվող և վթարի դեպքում արտակարգ իրավիճակ առաջացնող հիդրոտեխնիկական կառուցվածքների (այսուհետ՝ ՀՏԿ) օգտագործման և անվտանգության ապահովման գործընթացները:

2. ՀՏԿ-ների օգտագործման և անվտանգության ապահովման գործընթացների մշակման ելակետային տվյալներ են հանդիսացել Հայաստանի Հանրապետության ջրային օրենսգրքի 82-րդ հոդվածով ՀՏԿ-ների անվտանգությանը ներկայացվող պահանջները, ջրային համակարգերի օգտագործման թույլտվություններն ու ՀՏԿ-ների անվտանգության հայտարարագրերը:

3. ՀՏԿ-ներն օգտագործող կազմակերպությունն ու սեփականատերը, ելնելով Հայաստանի Հանրապետության ջրային օրենսգրքի պահանջներից, մշակում և հաստատում են ՀՏԿ-ի անվտանգ օգտագործման աշխատանքային հրահանգներ, ելնելով տվյալ կառուցվածքի կարգից, օգտագործման տեխնիկական առանձնահատկություններից, և հրամանագրվում են օգտագործող կազմակերպության ղեկավարի կամ սեփականատիրոջ կողմից:

4. ՀՏԿ-ի օգտագործման և անվտանգության ապահովման նպատակով ջրային համակարգերի կառավարման մարմինը՝

4.1. ՀՏԿ-ի անվտանգության ապահովման նպատակով`

ա) գնահատում է ՀՏԿ-ի համար թույլատրելի ռիսկի աստիճանը,

բ) որոշում է ՀՏԿ-ի անվտանգության ցուցանիշները,

գ) վերահսկում է ՀՏԿ-ի օգտագործման կանոնների պահպանումը,

դ) ապահովում է հիդրոհանգույցի կահավորումն ազդարարման և կապի միջոցներով.

4.2. ՀՏԿ-ի օգտագործման անվտանգության ապահովման նպատակով`

ա) սահմանում է ՀՏԿ-ի օգտագործման առանձնահատկությունները,

բ) ապահովում է ՀՏԿ-ի շահագործման անընդհատությունը,

գ) կատարում է ՀՏԿ-ի տեխնիկական վիճակի ուսումնասիրություններ՝ անվտանգության հայտարարագրով և իր կողմից սահմանված ժամկետներում,

դ) ապահովում և վերահսկում է ՀՏԿ-ի՝ տեղեկատվական, կարգավորիչ և չափիչ-հսկիչ սարքերով հագեցվածությունն ու տեխնիկական վիճակը,

ե) մշակում է բնապահպանական միջոցառումների պլան-ժամանակացույց և սահմանված կարգով համաձայնեցնելուց հետո վերահսկում դրա իրականացումը,

զ) ապահովում է ՀՏԿ-ների անվտանգության հայտարարագրով օգտագործող կազմակերպության աշխատակազմի որակավորմանը ներկայացվող պահանջները,

է) կազմակերպում է անօտարելի գոտիների իրացումը՝ տեխնիկական նորմերին համապատասխան:

Հաստատագրված ցուցանիշները ՀՏԿ-ի օգտագործման ժամանակ հիմք են ծառայում օգտագործող կազմակերպության անձնակազմի պարտականություններն ու գործառույթներն ամրագրելու համար:

II. ՀՏԿ-Ի ՕԳՏԱԳՈՐԾՄԱՆ ԵՎ ԱՆՎՏԱՆԳՈՒԹՅԱՆ ԱՊԱՀՈՎՄԱՆ ԻՐԱԿԱՆԱՑՄԱՆ ԿԱՐԳԸ՝ ԸՍՏ ԿԱՌՈՒՑՎԱԾՔՆԵՐԻ

5. Հաշվի առնելով ՀՏԿ-ների ռիսկի աստիճանները, անվտանգության պահանջները և օգտագործման առանձնահատկությունները՝ ՀՏԿ-ն օգտագործող կազմակերպության և սեփականատիրոջ կողմից, բացի սույն կարգի 4-րդ կետով նախատեսված միջոցառումներից, ստորև նշված կառուցվածքների համար լրացուցիչ իրականացվում են հետևյալ աշխատանքները՝

5.1. ջրամբարներ՝

ա) վերահսկվում է պատվարի և հիդրոհանգույցի ՀՏԿ-ների պարամետրերի համապատասխանությունը տարածքի համար նորմերով սահմանված սեյսմիկության գնահատականին,

բ) առավելագույն ելքերի անցման ժամանակահատվածում վերահսկվում է աղետային ջրհեռ կառուցվածքների աշխատանքը,

գ) վերահսկվում է պիեզոմետրիկ սարքերի աշխատանքը և ապահովվում դրանց կանոնավոր օգտագործումը,

դ) ստուգվում է հատակային ջրթող կառուցվածքների, կարգավորիչ և վթարային սարքերի աշխատունակությունը,

ե) վերահսկվում են ջրամբարի թասից ու պատվարի մարմնից ֆիլտրացիոն երևույթների հնարավոր օջախները, և գնահատվում է դրանց վտանգավոր ազդեցությունը շրջակա միջավայրի վրա,

զ) վերահսկվում են պատվարի կամ ջրամբարի շեպերի վրա սողքային երևույթների հնարավոր օջախները,

է) վերահսկվում և կանխարգելվում է ջրամբարի ներքին բիեֆի անօրինական կառուցապատումը.

5.2. ջրառ կառուցվածքներ՝

ա) վերահսկվում է հեղեղային ջրհեռ կառուցվածքներով գետի առավելագույն ելքերի անցման գործընթացը,

բ) ստուգվում է հիդրոհանգույցի կարգավորիչ և վթարային փականների տեխնիկական վիճակը.

գ) պարբերաբար իրականացվում են միջոցառումներ՝ հիդրոհանգույցի վերին բիեֆի մաքրման և ներքին բիեֆի ամրացման համար,

դ) վերահսկվում և կանխարգելվում է ջրառ կառուցվածքի ներքին բիեֆի անօրինական կառուցապատումը.

5.3. պոմպակայաններ՝

ա) նախատեսվում են միջոցառումներ՝ պոմպակայանի շենքը հրդեհից պաշտպանելու և սանիտարահիգիենիկ նորմերի պահանջների կատարումն ապահովելու համար,

բ) պոմպակայանի շենքը, բացի աշխատանքայինից, ապահովվում է վթարային լուսավորմամբ,

գ) ձեռնարկվում են միջոցներ՝ պոմպակայանի մեքենայական սրահը ջրածածկումից պաշտպանելու համար,

դ) ապահովվում է պոմպակայանի կարգավորիչ ու փակիչ սարքերի և փականների բնականոն աշխատանքային վիճակը,

ե) պոմպերի, էլեկտրաշարժիչների ու վերամբարձ սարքերի աշխատանքի և դրանց վերանորոգման ժամանակ ապահովվում է պոմպակայանի օգտագործող անձնակազմի անվտանգությունը,

զ) պոմպակայանն ապահովվում է կապի միջոցներով.

5.4. ջրանցքներ՝

ա) սահմանվում է հսկողություն ջրանցքի սարալանջային հատվածներում, և դիտարկվում են հնարավոր ֆիլտրացիոն երևույթները,

բ) բնակավայրերով անցնող ջրանցքի հատվածներն ապահովվում են ցանկապատերով,

գ) մշակվում են միջոցառումներ՝ ջրանցքներում դիմհարի երևույթները և հնարավոր ջրածածկման առաջացումը կանխարգելելու համար,

դ) վերահսկվում է ջրանցքի կարգավորիչ ու վթարային փականների աշխատանքը, և ապահովվում է դրանց բնականոն աշխատանքային վիճակը,

ե) խոր և շեպերի մեծ թեքություն ունեցող ջրանցքներում մաքրման և վերանորոգման աշխատանքներ կատարելիս՝ ձեռնարկվում են միջոցներ անձնակազմի անվտանգությունն ապահովելու համար.

5.5. թունելներ՝

ա) վերահսկվում է թունելի երեսապատման կոնստրուկցիայի տեխնիկական վիճակը՝ դեֆորմացիոն, էրոզիոն և ֆիլտրացիոն երևույթները‚ սահմանված մեթոդներով ու սարքերով,

բ) վերահսկվում են թունելի մուտքամասն ու ելքամասը բերվածքներից ու քարաթափվածքներից մաքրելու աշխատանքները,

գ) թունելում զոդման աշխատանքների կատարումը թույլատրվում է թունելախորշում գազայնության աստիճանը որոշելուց հետո,

դ) թունելում գործող անձնակազմը պարտադիր ծանոթանում է թունելի շահագործման անվտանգության կանոններին,

ե) վերանորոգման աշխատանքներ կատարելիս՝ թունելը ժամանակավորապես ապահովվում է կապի և լուսավորության միջոցներով,

զ) շինարարության ժամանակ օգտագործված օժանդակ հանքուղիներն ու հանքամիջանցքներն աշխատանքների ավարտից հետո հերմետիկ փակվում են,

է) թունելը կահավորվում է պայմանական ազդանշաններով:

III. ՀՏԿ-Ի ԱՆՎՏԱՆԳՈՒԹՅԱՆ ՄԻՋՈՑԱՌՈՒՄՆԵՐԻ ԻՐԱԿԱՆԱՑՈՒՄԸ

6. ՀՏԿ-ի անվտանգության ապահովման միջոցառումներն իրականացվում են ՀՏԿ-ի օգտագործման համար գործող տեխնիկական նորմերին, դրանց անվտանգ օգտագործման աշխատանքային հրահանգներին և սույն կարգի դրույթներին համապատասխան:

7. ՀՏԿ-ի անվտանգության ապահովման նպատակով՝ կարգով և պայմանագրով նախատեսված տեխնիկական միջոցառումների իրականացման համար պատասխանատու է ՀՏԿ-ն օգտագործող կազմակերպության ղեկավարը կամ սեփականատերը՝ Հայաստանի Հանրապետության ջրային օրենսգրքի 60-րդ հոդվածի 4-րդ և 83-րդ հոդվածի 1-ին կետերի համաձայն:

8. ՀՏԿ-ի օգտագործման և անվտանգության ապահովման գործընթացի տեխնիկական վերահսկումն իրականացվում է ջրային համակարգերի օգտագործման և պահպանության տեխնիկական գերատեսչական հանձնաժողովի կողմից՝ ջրային համակարգերի կառավարման մարմնի կողմից սահմանված ժամանակացույցի համաձայն:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՇԽԱՏԱԿԱԶՄԻ ՂԵԿԱՎԱՐ-ՆԱԽԱՐԱՐ

Մ. ԹՈՓՈՒԶՅԱՆ