ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԷԿՈՆՈՄԻԿԱՅԻ ՆԱԽԱՐԱՐ

12 սեպտեմբեր 2023 թ. ք. Երևան

N 04

Պ Ա Շ Տ Ո Ն Ա Կ Ա Ն  Պ Ա Ր Զ Ա Բ Ա Ն ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2021 ԹՎԱԿԱՆԻ ՀՈՒՆԻՍԻ 3-Ի N 927-Լ ՈՐՈՇՄԱՆ ԴՐՈՒՅԹՆԵՐԻ ՎԵՐԱԲԵՐՅԱԼ

ՆԵՐԱԾԱԿԱՆ ՄԱՍ

 Հայաստանի Հանրապետության էկոնոմիկայի նախարարություն գրությամբ դիմել է «Ագրոհարվեստ» սահմանափակ պատասխանատվությամբ ընկերության տնօրեն Ա․ Մելքոնյանը՝ Հայաստանի Հանրապետության կառավարության 2021 թվականի հունիսի 3-ի N 927-Լ որոշման (այսուհետ՝ Որոշում) որոշ կարգավորումների կիրառության ժամանակ ի հայտ եկած տարընկալումների հետևանքով առաջացած իրավահարաբերություններում ծագած հարցերի մասով պաշտոնական պարզաբանում ստանալու վերաբերյալ: Դիմումատուն խնդրում է պաշտոնապես պարզաբանել Որոշման հավելվածի 23-րդ կետի 13-րդ ենթակետի ա․ պարբերության դրույթը՝ վարկի տրամադրման և մայր գումարի արտոնյալ ժամկետների վերաբերյալ, մասնավորապես՝ «Արդյո՞ք թույլատրելի է նախատեսել վարկի մարման ընդհանուր ժամկետը մինչև 7 տարի՝ պահպանելով մայր գումարի արտոնյալ ժամկետը՝ մինչև 5 տարի։ Միաժամանակ թույլատրելի է արդյո՞ք վերոնշյալ դեպքում այգեհիմնման վարկի մարման ընդհանուր մինչև 7 տարի ժամկետը այգեհիմնման հետագա տարիներին նույն այգու մասով երկարաձգել ևս 1 տարի ժամկետով, որի պարագայում վարկի մարման ընդհանուր ժամկետը կդառնա մինչև 8 տարի»: 

Դիմումատուն ներկայացնում է, որ ֆինանսական կառույցը առաջարկել է վարկի մարման ընդհանուր ժամկետ սահմանել ոչ թե 8 տարի, այլ 7 տարի՝ պահպանելով մայր գումարի արտոնյալ ժամկետը՝ 5 տարի։ Միաժամանակ ֆինանսական կառույցը դիտարկում է տարբերակ, որ Որոշման հավելվածի շրջանակում այգեհիմնման 2-ից 7-րդ տարվա ընթացքում կարող է վարկի մարման ժամկետը երկարաձգվել ևս 1 տարով, որի պարագայում մարման ընդհանուր ժամկետը կդառնա 8 տարի։

Վերոնշյալ տարբերակները ընդունելի են ընկերության կողմից, սակայն վերջինս տարընկալումներից խուսափելու համար ցանկանում է ստանալ նախարարության պաշտոնական պարզաբանումը։

ՆԿԱՐԱԳՐԱԿԱՆ ՄԱՍ

Համաձայն ՀՀ կառավարության 2021 թվականի հունիսի 3-ի N 927-Լ որոշմամբ հաստատված «Հայաստանի Հանրապետությունում ինտենսիվ այգեգործության զարգացման, արդիական տեխնոլոգիաների ներդրման և ոչ ավանդական բարձրարժեք մշակաբույսերի արտադրության խթանման պետական աջակցության 2021-2023 թվականների» ծրագրի (այսուհետ՝ ծրագիր) 5-րդ կետի ծրագիրն իրականացվում է երկու բաղադրիչով՝ վարկերի տոկոսադրույքների մասնակի սուբսիդավորման և ծախսերի մասնակի փոխհատուցման միջոցով։ Ծրագրի շրջանակում տրամադրվող վարկերի տոկոսադրույքների մասնակի սուբսիդավորման ընթացակարգը նախատեսված է 23-րդ կետում։ Մասնավորապես, ծրագրի 23-րդ կետի 13-րդ ենթակետի ա․ պարբերությունով հստակ սահմանված է այգեհիմնման համար տրամադրվող վարկի մարման ժամկետը 8 տարի, մայր գումարի արտոնյալ ժամկետը՝ 5 տարի։

Միաժամանակ, ծրագրի 23-րդ կետի 13-րդ ենթակետի ե․ պարբերությամբ սահմանված է, որ շահառուի համաձայնությամբ կարող է սահմանվել արտոնյալ ժամկետի առավել կարճ ժամանակահատված, իսկ արդեն սահմանված ժամանակահատվածը կարող է կրճատվել կամ դադարեցվել՝ ֆինանսական կառույցի ընթացակարգին համապատասխան։ Բացի այդ, ծրագրի 23-րդ կետի 13-րդ ենթակետի զ․ պարբերության համաձայն, եթե շահառուին միևնույն նախագծի համար վարկը տրամադրվում է փուլերով կամ մեկից ավելի վարկային պայմանագրերով (մասնաբաժիններով), ապա յուրաքանչյուր հաջորդ վարկը համարվում է առաջին տրված վարկի շարունակությունը, և վարկի մարման ու մայր գումարի արտոնյալ ժամկետները պետք է համապատասխանեն առաջին տրված վարկի մարման և մայր գումարի արտոնյալ ժամկետին։

Ծրագրի 23-րդ կետի 14-րդ ենթակետի համաձայն վարկի վաղաժամկետ վճարման դեպքում տույժեր և տուգանքներ չեն սահմանվում։

ՊԱՏՃԱՌԱԲԱՆԱԿԱՆ ՄԱՍ

Ծրագրի 23-րդ կետի 13-րդ ենթակետի ա․ պարբերության դրույթը սահմանվել է այն պատճառաբանությամբ, որ խուսափենք ֆինանսական կառույցների կամայականություններից, ինչպես նաև ծրագրին մասնակից տնտեսավարողը կարողանա այգուց ստացված եկամտի հաշվին մարել վարկային պարտավորությունները։ Միաժամանակ, տնտեսավարողների շահերից ելնելով ծրագրում սահմանվել են 23-րդ կետի 13-րդ ենթակետի ե․ պարբերության և 23-րդ կետի 14-րդ ենթակետի դրույթները՝ հաշվի առնելով այն հանգամանքը, որ հնարավոր է տնտեսավարողների եկամուտները հնարավորություն ընձեռեն սահմանված ժամկետից ավելի շուտ մարել վարկային պարտավորությունները։

ԵԶՐԱՓԱԿԻՉ ՄԱՍ

Հիմք ընդունելով վերոգրյալը՝ պաշտոնապես պարզաբանում ենք․

 Ծրագրով սահմանված այգեհիմնման վարկի ժամկետը 8 տարի է, իսկ մայր գումարի արտոնյալ ժամկետը՝ 5 տարի։

 Շահառուի համաձայնությամբ կարող է սահմանվել արտոնյալ ժամկետի առավել կարճ ժամանակահատված, իսկ արդեն սահմանված ժամանակահատվածը կարող է կրճատվել կամ դադարեցվել՝ ֆինանսական կառույցի ընթացակարգին համապատասխան։

 Եթե շահառուին միևնույն նախագծի համար վարկը տրամադրվում է փուլերով կամ մեկից ավելի վարկային պայմանագրերով (մասնաբաժիններով), ապա յուրաքանչյուր հաջորդ վարկը համարվում է առաջին տրված վարկի շարունակությունը, և վարկի մարման ու մայր գումարի արտոնյալ ժամկետները պետք է համապատասխանեն առաջին տրված վարկի մարման և մայր գումարի արտոնյալ ժամկետին։

Պաշտոնական հրապարակման օրը՝ 26 սեպտեմբերի 2023 թվական: