040.0011.08.01.02

«Վավերացնում եմ»

Հայաստանի Հանրապետության

Նախագահ Ռ. Քոչարյան

8 հունվարի 2002թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

8 հունվարի 2002 թվականի N 11

քաղ. Երևան

ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ, ԿԵՆՍԱԲԱՆԱԿԱՆ ՄԻՋՈՑՆԵՐԻ ԵՎ ԿԵՆՍԱԲԱՆԱԿԱՆ ԱԿՏԻՎ ՆՅՈՒԹԵՐԻ ԳՐԱՆՑՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարության 2001 թվականի հունվարի 11-ի «Բույսերի պաշտպանության քիմիական, կենսաբանական միջոցների և կենսաբանական ակտիվ նյութերի գրանցման միջգերատեսչական հանձնաժողովի անհատական կազմը հաստատելու մասին» N 18 որոշմանը համապատասխան՝ Հայաստանի Հանրապետության կառավարությունը որոշում է.

Հաստատել բույսերի պաշտպանության քիմիական, կենսաբանական միջոցների և կենսաբանական ակտիվ նյութերի գրանցման միջգերատեսչական հանձնաժողովի կանոնադրությունը (կցվում է):

Հայաստանի Հանրապետության վարչապետ	Ա. Մարգարյան

Հաստատված է ՀՀ կառավարության 2002 թվականի հունվարի 8-ի N 11 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ, ԿԵՆՍԱԲԱՆԱԿԱՆ ՄԻՋՈՑՆԵՐԻ ԵՎ ԿԵՆՍԱԲԱՆԱԿԱՆ ԱԿՏԻՎ ՆՅՈՒԹԵՐԻ ԳՐԱՆՑՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

I. Ընդհանուր դրույթներ

1. Բույսերի պաշտպանության քիմիական, կենսաբանական միջոցների և կենսաբանական ակտիվ նյութերի գրանցման միջգերատեսչական հանձնաժողովը (այսուհետև՝ հանձնաժողով) իր գործունեության ընթացքում ղեկավարվում է «Բույսերի պաշտպանության և բույսերի կարանտինի մասին» Հայաստանի Հանրապետության օրենքով, Հայաստանի Հանրապետության օրենսդրությամբ և սույն կանոնադրությամբ:

II. Հանձնաժողովի գործունեության նպատակը

2. Հանձնաժողովի գործունեության նպատակը բույսերի պաշտպանության միջոցների գրանցման մասին եզրակացություն տալն է:

III. Հանձնաժողովի իրավունքները

3. Հանձնաժողովն իրավունք ունի՝

ա) մասնակցելու մարդկանց և շրջակա միջավայրի վրա բույսերի պաշտպանության միջոցների բացասական ազդեցության կանխման նախազգուշական միջոցառումների ծրագրերի մշակմանը.

բ) անհրաժեշտության դեպքում դիմելու Հայաստանի Հանրապետության գյուղատնտեսության նախարարություն և Հայաստանի Հանրապետության առողջապահության նախարարություն՝ փորձարկումների իրականացման աշխատանքների կատարելագործման կամ առանձին փորձերի դադարեցման մասին խնդրանքով.

գ) առնվազն տարեկան մեկ անգամ հանձնաժողովի անդամների և փորձագետների միջոցով ստուգելու գրանցման նպատակով բույսերի պաշտպանության փորձարկվող միջոցների լաբորատոր և դաշտային փորձարկումների իրականացման մեթոդական ճշտությունն ու տվյալների արժանահավատությունը.

դ) սույն կանոնադրության դրույթներին համապատասխան, համաձայնեցնելով Հայաստանի Հանրապետության առողջապահության նախարարության և Հայաստանի Հանրապետության բնապահպանության նախարարության հետ, Հայաստանի Հանրապետության գյուղատնտեսության նախարարություն ներկայացնելու առաջարկություն բույսերի պաշտպանության քիմիական, կենսաբանական միջոցների և կենսաբանական ակտիվ նյութերի կիրառման ընթացքում մարդկանց առողջության ու շրջակա միջավայրի վրա բացասական ազդեցություն գործած, բույսերի պաշտպանության ցածր արդյունավետ միջոցների գրանցումն ուժը կորցրած ճանաչելու վերաբերյալ:

IV. Հանձնաժողովի պարտականությունները

4. Հանձնաժողովը պարտավոր է՝

ա) նորագույն գիտատեխնիկական ու արտադրական տեղեկությունների վերլուծության հիման վրա մշակել բույսերի պաշտպանության նոր միջոցների փորձարկման երկամյա ծրագրեր և ներկայացնել Հայաստանի Հանրապետության գյուղատնտեսության նախարարության ու Հայաստանի Հանրապետության առողջապահության նախարարության համաձայնեցմանը.

բ) բույսերի պաշտպանության միջոցների փորձարկումներ իրականացնող իրավաբանական անձանցից պահանջել փորձարկումների արդյունքների մասին կիսամյակային և տարեկան տեղեկատվություն.

գ) յուրաքանչյուր տարվա վերջում, փորձարկումների մասին տվյալների հիման վրա, ընդունել որոշում բույսերի պաշտպանության միջոցների գրանցման վերաբերյալ եզրակացություն տալու մասին և այն՝ որոշումից քաղվածքի, եզրակացության ու տեղեկանքի հետ միասին, ներկայացնել Հայաստանի Հանրապետության գյուղատնտեսության նախարարություն:

V. Հանձնաժողովի գործունեության կազմակերպումը

5. Հանձնաժողովի գործունեությունը կազմակերպվում է նիստերի միջոցով: Նիստերը հրավիրվում են ըստ անհրաժեշտության, բայց ոչ ուշ, քան տարեկան 2 անգամ:

Հանձնաժողովի նիստերն իրավազոր են, եթե դրանց մասնակցում է հանձնաժողովի անդամների թվի կեսից ավելին: Որոշումներն ընդունվում են հանձնաժողովի անդամների ընդհանուր թվի ձայների պարզ մեծամասնությամբ: Քվեարկության արդյունքում հանձնաժողովի անդամների ձայների հավասարության դեպքում հանձնաժողովի նախագահի ձայնը վճռորոշ է:

6. Հանձնաժողովի նախագահն անհրաժեշտության դեպքում հանձնաժողովի աշխատանքներում կարող է ներգրավել փորձագետների, որոնք ուսումնասիրում են փորձերի ընթացքը և արդյունքների մասին զեկուցում հանձնաժողովին:

7. Բույսերի պաշտպանության միջոցների գրանցման մասին հանձնաժողովի որոշումն ընդունվում է փորձարկումների մասին արժանահավատ տվյալների հիման վրա:

8. Հանձնաժողովի նախագահի տեղակալը՝

ա) նախագահի բացակայության ժամանակ փոխարինում է նրան.

բ) հսկում է հաշվետվությունները ներկայացնելու գործընթացը.

գ) ստուգում է ստացված տվյալների ճշտությունը:

9. Հանձնաժողովի քարտուղարը նախապատրաստում է հանձնաժողովի նիստերի անցկացումը, կազմում արձանագրություն և լաբորատոր ու դաշտային փորձերի արդյունքների մասին ստացված հաշվետվությունները ներկայացնում է հանձնաժողովի քննարկմանը: Քննարկման արդյունքների հիման վրա կազմվում է բույսերի պաշտպանության միջոցների գրանցման մասին եզրակացությունը, որը, հանձնաժողովի նիստում քվեարկությանը մասնակցած անդամների ստորագրությամբ, ներկայացվում է հանձնաժողովի նախագահին՝ ստորագրության:

VI. Հանձնաժողովի գործունեության դադարումը

10. Հանձնաժողովի գործունեությունը դադարում է Հայաստանի Հանրապետության օրենսդրությամբ սահմանված կարգով: