«Վավերացնում եմ»
Հայաստանի Հանրապետության
Նախագահ Ռ. Քոչարյան
31 դեկտեմբերի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 դեկտեմբերի 2000 թվականի N 899
քաղ. Երևան

 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԻՐԱՎԱԲԱՆԱԿԱՆ ԻՆՍՏԻՏՈՒՏԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

Հաստատել Հայաստանի Հանրապետության արդարադատության նախարարության իրավաբանական ինստիտուտի կանոնադրությունը (կցվում է):

Հայաստանի Հանրապետության վարչապետ

Ա. Մարգարյան

Հաստատված է ՀՀ կառավարության 2000 թվականի դեկտեմբերի 31-ի N 899 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

Հայաստանի Հանրապետության արդարադատության նախարարության իրավաբանական ինստիտուտի

I. Ընդհանուր դրույթներ

1. Հայաստանի Հանրապետության արդարադատության նախարարության իրավաբանական կադրերի որակավորման բարձրացման ինստիտուտն ստեղծվել է Հայաստանի Հանրապետության կառավարության 1990 թվականի հոկտեմբերի 18-ի N 681 կարգադրությամբ և Հայաստանի Հանրապետության կառավարության 1996 թվականի հոկտեմբերի 7-ի «Հայաստանի Հանրապետության արդարադատության նախարարության իրավաբանական կադրերի որակավորման բարձրացման ինստիտուտի վերակառուցման մասին» N 328 որոշմամբ վերակազմակերպվել է Հայաստանի Հանրապետության արդարադատության նախարարության իրավաբանական ինստիտուտի:

2. Հայաստանի Հանրապետության արդարադատության նախարարության իրավաբանական ինստիտուտը (այսուհետև` ինստիտուտ) պետական հիմնարկ է, որը Հայաստանի Հանրապետության օրենսդրությամբ սահմանված կարգով, իր գործունեության նպատակներին, սույն կանոնադրությանը և իրեն ամրացված գույքի նշանակությանը համապատասխան տիրապետում, օգտագործում և տնօրինում է գույքը:

3. Ինստիտուտը գործում է Հայաստանի Հանրապետության օրենսդրությանը համապատասխան և իր առջև դրված խնդիրները լուծելու նպատակով իրականացնում է Հայաստանի Հանրապետության օրենքներով, այլ իրավական ակտերով և սույն կանոնադրությամբ իրեն վերապահված լիազորություններ:

4. Ինստիտուտն ունի հաշվեկշիռ, նախահաշիվ և գանձապետական հաշիվ:

5. Ինստիտուտն ունի Հայաստանի Հանրապետության զինանշանի պատկերով և իր անվամբ կնիք ու դրոշմակնիք, ձևաթղթեր, ինչպես նաև խորհրդանիշ:

6. Ինստիտուտի լրիվ անվանումն է`

հայերեն`	Հայաստանի Հանրապետության արդարադատության նախարարության իրավաբանական ինստիտուտ
ռուսերեն`	Þðèäè÷åñêèé èíñòèòóò ìèíèñòåðñòâà ‏þñòèöèè ðåñïóáëèêè Àðìåíèÿ
անգլերեն`	.Law Institute of the Ministry of Justice of the Republic of Armenia

    7. Ինստիտուտի գտնվելու վայրն է` քաղ. Երևան, Մովսես Խորենացու 162 ա:

II. Ինստիտուտի խնդիրներն ու գործառույթները

8. Ինստիտուտի հիմնական խնդիրներն են`

ա) մասնագետների կրթական մակարդակի և գիտամանկավարժական որակավորման բարձրացումը.

բ) տարբեր կրթական ծրագրերի իրականացումը.

գ) իրավագիտության բնագավառում գիտական, ուսումնամեթոդական և գիտամանկավարժական հետազոտությունների իրականացումը.

դ) գիտական մշակումների տարածումն ու լուսավորական աշխատանքների իրականացումը.

ե) ինստիտուտի հիմնադրի կողմից պատվիրված օրենսդրական բարեփոխումների ծրագրերի նախագծերի մշակումը.

զ) Հայաստանի Հանրապետության արդարադատության նախարարության և նրա համակարգի հիմնարկների գիտական, մեթոդական և փորձարարական ծրագրերի մշակումն ու իրականացումը:

9. Իր առջև դրված խնդիրներին համապատասխան` ինստիտուտը`

ա) որոշում է ինստիտուտի կառուցվածքը, կազմում ուսումնական պլաններ և առարկայական ծրագրեր.

բ) սահմանված կարգով ստեղծում է գիտահետազոտական կենտրոններ.

գ) շնորհում է ինստիտուտի պատվավոր կոչումներ, անվանական կրթաթոշակներ, պարգևատրում ինստիտուտի պարգևներով.

դ) մշակում է իրավաբանական կադրերի որակավորման բարձրացման և վերապատրաստման իրականացման մեթոդիկան.

ե) մշակում է իրավաբանական կադրերի, պետական կառավարման մարմինների կառուցվածքային ստորաբաժանումների ղեկավար աշխատողների, մասնագետների որակավորման բարձրացման և որակավորման ստուգման (ատեստավորման) համար անհրաժեշտ նյութեր.

զ) մշակում է Հայաստանի Հանրապետության արդարադատության նախարարության համակարգի ոչ իրավաբանական կրթությամբ կադրերի վերապատրաստման ու վերաորակավորման, ինչպես նաև նրանց ինքնակրթության կազմակերպման մեթոդները.

է) կազմակերպում է իրավաբանական առաջավոր փորձի ուսումնասիրման ու ներդրման, միջազգային, հանրապետական և այլ գիտաժողովների նախապատրաստման ու անցկացման աշխատանքները.

ը) կազմակերպում է իրավաբանական մասնագիտական գրադարանային ֆոնդի, ուսումնական ձայնատեսադարանների, ֆիլմադարանների ձևավորման և պահպանման աշխատանքները.

թ) իրականացնում է հրատարակչական, տպագրական գործունեություն.

ժ) կնքում է պայմանագրեր` Հայաստանի Հանրապետության և օտարերկրյա իրավաբանական ու ֆիզիկական անձանց հետ.

ժա) իր գործունեության նպատակներին համապատասխան կարող է իրականացնել վճարովի ուսումնական, հետազոտական և գիտաարտադրական ծառայություններ:

III. Ինստիտուտի կառավարումը

9. Ինստիտուտի կառավարումն իրականացվում է Հայաստանի Հանրապետության օրենսդրությանը և սույն կանոնադրությանը համապատասխան:

10. Ինստիտուտի գիտական խորհուրդն ինստիտուտի կառավարման բարձրագույն մարմինն է, որի լիազորությունների ժամկետը 5 տարի է:

11. Ինստիտուտի գիտական խորհուրդը`

ա) մշակում և սահմանված կարգով հաստատման է ներկայացնում ինստիտուտի կանոնադրության մեջ փոփոխություններ ու լրացումներ կատարելու մասին որոշումների նախագծերը.

բ) մշակում ու սահմանված կարգով հաստատման է ներկայացնում ինստիտուտի տարեկան ծախսերի նախահաշիվը.

գ) սահմանված կարգով քննարկում և հաստատում է ինստիտուտի տարեկան գործունեության մասին ռեկտորի հաշվետվությունը.

դ) սահմանված կարգով ստեղծում, վերակազմակերպում, լուծարում է ինստիտուտի մասնաճյուղեր, գիտահետազոտական կենտրոններ, հաստատում ինստիտուտի կառուցվածքը.

ե) մշակում է դիմորդների ընդունելության կանոնների նախագծերը և դրանք ներկայացնում պետական կառավարման լիազորված մարմին.

զ) ըստ մասնագիտությունների հաստատում է ուսումնական պլանները և առարկայական ծրագրերը.

է) քննարկում է ինստիտուտի գիտական գործունեության գլխավոր և հեռանկարային ուղղությունները, ինստիտուտում կատարվող կարևորագույն գիտահետազոտական և գիտամեթոդական աշխատանքների արդյունքները.

ը) իրականացնում է սույն կանոնադրությունից բխող` ինստիտուտի ուսումնամեթոդական և գիտահետազոտական գործունեության հետ կապված այլ գործառույթներ:

Ինստիտուտի գիտական խորհրդի կազմի մեջ ի պաշտոնե մտնում են ռեկտորը (նախագահ), պրոռեկտորները, ինստիտուտի գիտական քարտուղարը, մասնաճյուղերի, գիտահետազոտական կենտրոնների տնօրենները, ֆակուլտետների դեկանները, ամբիոնների վարիչները, սովորողների խորհրդի նախագահը: Ինստիտուտի գիտական խորհրդի կազմի մեջ ռեկտորի նշանակմամբ կարող են մտնել նաև կառուցվածքային այլ ստորաբաժանումների ղեկավարներ, ինստիտուտի առանձին դասախոսներ և գիտաշխատողներ, հանրապետության գիտության և կրթության առաջատար մասնագետներ:

Գիտական խորհրդի նիստերը գումարվում են ռեկտորի կողմից` առնվազն յուրաքանչյուր եռամսյակը մեկ անգամ: Ինստիտուտի գիտական խորհրդի նիստը համարվում է իրավազոր, եթե նիստին ներկա է անդամների 2/3-ը: Որոշումներն ընդունվում են գիտական խորհրդի անդամների ձայների պարզ մեծամասնությամբ:

Ինստիտուտի գիտական խորհրդի որոշումները կենսագործվում են ինստիտուտի ռեկտորի հրամաններով: Որոշման հետ անհամաձայնության դեպքում ռեկտորը մեկ շաբաթվա ընթացքում խորհուրդ է ներկայացնում քննարկված հարցի վերաբերյալ իր առաջարկությունները, որոնք քվեարկվում են ոչ ուշ, քան մեկ ամսվա ընթացքում: Ինստիտուտի գիտական խորհրդի կողմից որոշման ընդունումից հետո ոչ ուշ, քան երեք օրվա ընթացքում ռեկտորն արձակում է դրա կենսագործման մասին համապատասխան հրաման:

12. Ինստիտուտի անմիջական ղեկավարումն իրականացնում է ռեկտորը, որին աշխատանքի նշանակում և աշխատանքից ազատում է Հայաստանի Հանրապետության արդարադատության նախարարը:

13. Ինստիտուտի ռեկտորը`

ա) հաստատում է ինստիտուտի կառուցվածքային ստորաբաժանումների կանոնակարգերը և ինստիտուտի ներքին կարգապահական կանոնները.

բ) կազմակերպում է ինստիտուտի ղեկավար մարմինների և կառուցվածքային ստորաբաժանումների աշխատանքը` ապահովելով դրանց ներդաշնակ գործունեությունը.

գ) արձակում է հրամաններ, որոնց կատարումը պարտադիր է ինստիտուտի աշխատողների, ունկնդիրների և սովորողների համար.

դ) ներկայացնում է ինստիտուտը Հայաստանի Հանրապետության պետական մարմիններում, հիմնարկներում, կազմակերպություններում, ինչպես նաև օտարերկրյա պետություններում և միջազգային կազմակերպություններում.

ե) ապահովում է համապատասխան մասնագետների պատրաստումը և գիտահետազոտական աշխատանքների պետական պատվերների կատարումը.

զ) աշխատանքի նշանակում և աշխատանքից ազատում է ինստիտուտի կառուցվածքային ստորաբաժանումների ղեկավարներին և մյուս աշխատողներին.

է) կարգապահական ներգործության միջոցներ է կիրառում աշխատողների ու սովորողների նկատմամբ.

ը) իրականացնում է Հայաստանի Հանրապետության օրենսդրությամբ և սույն կանոնադրությամբ սահմանված այլ լիազորություններ:

IV. Ինստիտուտի կառուցվածքը

14. Ինստիտուտի հիմնական կառուցվածքային ստորաբաժանումներն են`

ա) ինստիտուտի ֆակուլտետը,

բ) ինստիտուտի ամբիոնը:

15. Ինստիտուտի ուսումնագիտական ինքնուրույն կառուցվածքային ստորաբաժանումը ֆակուլտետն է, որը ձևավորվում է ըստ ընդհանուր մասնագիտական կողմնորոշման կամ ըստ գործունեության բնույթի:

Ֆակուլտետի կազմում գործում են ամբիոններ, ինչպես նաև կարող են ստեղծվել ուսումնագիտական լաբորատորիաներ:

16. Ֆակուլտետը ղեկավարում է դեկանը, որին, մինչև 5 տարի ժամկետով, աշխատանքի նշանակում և աշխատանքից ազատում է ինստիտուտի ռեկտորը:

Ֆակուլտետի դեկանը`

ա) ղեկավարում է ֆակուլտետի ուսումնամեթոդական և գիտահետազոտական գործունեությունը.

բ) ներկայացնում է ֆակուլտետը ինստիտուտի կառավարման մարմնում.

գ) սահմանված կարգով ինստիտուտի ռեկտորին ներկայացնում է առաջարկություններ դեկանի տեղակալին պաշտոնի նշանակելու և պաշտոնից ազատելու, սովորողներին կուրսից կուրս փոխադրելու, կուրսում թողնելու, հեռացնելու, վերականգնելու վերաբերյալ.

դ) ինստիտուտի ռեկտորին ներկայացնում է առաջարկություններ ամբիոնի վարիչի, պրոֆեսորի, դոցենտի, ավագ դասախոսի, ասիստենտի թափուր պաշտոնների համար մրցույթ անցկացնելու, ֆակուլտետում նոր կառուցվածքային փոփոխություններ կատարելու վերաբերյալ.

ե) ինստիտուտի գիտական խորհրդի հաստատմանն է ներկայացնում ֆակուլտետի ուսումնական պլաններն ու առարկայական ծրագրերը.

զ) լուծում է սույն կանոնադրությունից բխող` ֆակուլտետի ուսումնամեթոդական և գիտահետազոտական գործունեության հետ կապված այլ հարցեր:

17. Ամբիոնն ինստիտուտի ուսումնագիտական գործընթացի կազմակերպման կառուցվածքային ստորաբաժանում է, որը միավորում է մասնագիտական ընդհանրություն ունեցող դասախոսներին ու հետազոտողներին: Ամբիոնը ղեկավարում է վարիչը, որին աշխատանքի նշանակում և աշխատանքից ազատում է ինստիտուտի ռեկտորը:

V. Ինստիտուտում ուսումնական ԵՎ գիտական գործընթացի կազմակերպումը

18. Ինստիտուտը Հայաստանի Հանրապետության արդարադատության նախարարության համակարգի աշխատողների ուսուցումը և վերապատրաստումն իրականացնում է նախարարության համապատասխան կառուցվածքային ստորաբաժանումների հետ համատեղ: Դասընթացները հրավիրվում են Հայաստանի Հանրապետության արդարադատության նախարարության կողմից հաստատված ժամանակացույցի համաձայն:

Հաշվի առնելով ունկնդիրների զբաղեցրած պաշտոնը, իրավական պատրաստվածության աստիճանը, աշխատանքային փորձը, ինչպես նաև նրանց ցանկությունը` կազմակերպվում է տարբերակված ուսուցում:

Դասընթացները կարող են կազմակերպվել աշխատանքից կտրված և չկտրված, ինչպես նաև մասնակիորեն կտրված և հեռակա ձևերով:

Իրավաբանական կադրերի ուսուցման և վերապատրաստման ծրագրերի յուրացումն ավարտվում է շրջանավարտների գիտելիքների, կարողությունների և հմտությունների պարտադիր ամփոփիչ ատեստավորմամբ:

19. Վերապատրաստման կամ որակավորման բարձրացման դասընթացներ ավարտած ունկնդիրներին, մասնագետներին տրվում է համապատասխան վկայական (դիպլոմ):

20. Ինստիտուտում իրականացվող գիտահետազոտական աշխատանքներին կարող են մասնակցել դասախոսները, գիտաշխատողները, ասպիրանտները, հետազոտողները, հայցողները, ունկնդիրները և սովորողները, ինչպես նաև պայմանագրային կարգով հրավիրված այլ մասնագետներ: Ինստիտուտում կրթության գործընթացը կարգավորվում է ուսումնական պլաններով, առարկայական ծրագրերով, ուսումնական ժամանակացույցով և դասացուցակներով:

21. Սովորողների ընդունելությունը կատարվում է Հայաստանի Հանրապետության օրենսդրությանը համապատասխան:

22. Ինստիտուտում ուսուցումն իրականացվում է ցերեկային և դրսեկության (էքստեռն) ձևերով:

23. Ինստիտուտում ուսումնական գործընթացը կազմակերպվում է 2 կիսամյակից բաղկացած ուսումնական տարով: Յուրաքանչյուր կիսամյակն ավարտվում է քննաշրջանով:

24. Ինստիտուտում սահմանվում են ուսուցման հետևյալ հիմնական տեսակները` դասախոսություն, գործնական (սեմինար) և լաբորատոր պարապմունքներ, խորհրդատվություն, ուսումնական և արտադրական պրակտիկա:

25. Ինստիտուտի շրջանավարտներին տրվում են համապատասխան որակավորում և ավարտական վկայական (դիպլոմ):

VI. Ինստիտուտի գույքը ԵՎ ֆինանսատնտեսական գործունեությունը

26. Ինստիտուտն իր կանոնադրական գործունեությունն ապահովելու նպատակով տիրապետում, օգտագործում և տնօրինում է հիմնադրի կողմից իրեն ամրացված շենքերը, շինությունները, սարքավորումները և այլ անհրաժեշտ գույք:

27. Ինստիտուտը պետական կառավարման լիազորված մարմնի առջև պատասխանատու է իրեն ամրացված սեփականության պահպանման և արդյունավետ օգտագործման համար:

28. Ինստիտուտը, Հայաստանի Հանրապետության օրենսդրությանը համապատասխան, պատասխանատու է բնապահպանական նորմերի պահպանման համար:

29. Ինստիտուտի ծախսերն ու եկամուտները նախատեսվում և օգտագործվում են սահմանված կարգով հաստատված նախահաշվին համապատասխան:

30. Ինստիտուտի գույքի և գործունեության ֆինանսավորման աղբյուրներն են`

ա) կրթական գործունեության ապահովմանն ուղղված պետական բյուջետային միջոցները,

բ) վճարովի ուսուցման դիմաց ստացվող միջոցները,

գ) տարբեր տեսակի գործունեության իրականացումից գոյացած սեփական միջոցները,

դ) իրավաբանական և ֆիզիկական անձանց կամավոր նվիրատվությունները, նպատակային վճարները և կատարած ներդրումները,

ե) Հայաստանի Հանրապետության օրենսդրությամբ չարգելված այլ աղբյուրներ:

31. Հայաստանի Հանրապետության պետական բյուջեից ինստիտուտի ֆինանսավորումն իրականացվում է հիմնադրի կողմից` պետական պատվերով մասնագետների պատրաստման չափաքանակի սահմաններում:

32. Ինստիտուտի գույքն օտարվում է հիմնադրի համաձայնությամբ:

33. Ինստիտուտը հիմնարկների, իրավաբանական ու ֆիզիկական անձանց հետ կնքված պայմանագրերի հիման վրա կարող է մատուցել վճարովի կրթական ծառայություններ, իրականացնել Հայաստանի Հանրապետության օրենսդրությամբ չարգելված այլ գործունեություն և Հայաստանի Հանրապետության օրենսդրությամբ սահմանված կարգով տնօրինել այդ գործունեությունից ստացված եկամուտները:

Վճարովի կրթական ծառայությունները չեն կարող իրականացվել բյուջետային ֆինանսավորմամբ նախատեսված հիմնական կրթական գործունեության շրջանակներում և դրա փոխարեն:

34. Ինստիտուտն իրավունք ունի իր կանոնադրական գործունեության իրականացման նպատակով պատվիրելու աշխատանքներ և ծառայություններ` այդ նպատակի համար նախատեսված միջոցների սահմաններում:

35. Ինստիտուտն աշխատանքի վարձատրության համար ունեցած միջոցների սահմաններում` սահմանված կարգով որոշում է աշխատանքի (ծառայության) դիմաց վճարման ձևն ու համակարգը, հավելավճարի, պարգևատրումների և խրախուսական բնույթի այլ վճարումների չափերը:

36. Ինստիտուտն իրականացնում է իր աշխատանքի արդյունքների օպերատիվ և հաշվապահական հաշվառում, սահմանված կարգով վարում է վիճակագրական ու հաշվապահական հաշվետվություն, հիմնադրին է ներկայացնում տարեկան միջոցների մուտքերի և ծախսերի մասին հաշվետվություն:

VII. Ինստիտուտի վերակազմակերպումն ու գործունեության դադարեցումը

37. Ինստիտուտի վերակազմակերպումն ու գործունեության դադարումն իրականացվում են Հայաստանի Հանրապետության օրենսդրությամբ սահմանված կարգով: