«Վավերացնում եմ»

Հայաստանի Հանրապետության

Նախագահ Ռ. Քոչարյան

12 հունիսի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 հունիսի 2001 թվականի N 526
քաղ. Երևան

ՈՌՈԳՄԱՆ ՋՐԻ ԳՈՏԻԱԿԱՆ ՍԱԿԱԳՆԵՐԻ ԵՎ ՀԱՄԱՅՆՔՆԵՐԻ ԽՈՐՔԱՅԻՆ ՀՈՐԵՐՆ ՈՒ ԻՆՔՆԱՇԱՏՐՎԱՆՈՂ ՀՈՐԱՏԱՆՑՔԵՐԸ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՋՐԱՅԻՆ ՏՆՏԵՍՈՒԹՅԱՆ ՊԵՏԱԿԱՆ ԿՈՄԻՏԵԻՆ ՀԱՆՁՆԵԼՈՒ ՄԱՍԻՆ

Հաշվի առնելով Հայաստանի Հանրապետության գյուղատնտեսության նախարարության, Երևանի քաղաքապետի և այգեգործների սպառողական կոոպերատիվների առաջարկությունները` Հայաստանի Հանրապետության կառավարությունը որոշում է.

1. Հայաստանի Հանրապետության կառավարությանն առընթեր ջրային տնտեսության պետական կոմիտեին` Հայաստանի Հանրապետության գյուղատնտեսության նախարարության և Հայաստանի Հանրապետության գիտությունների ազգային ակադեմիայի համակարգի գիտահետազոտական ինստիտուտներին, սերմնաբուծական և պետական տնտեսություններին և այգեգործների սպառողական կոոպերատիվների հայկական հանրապետական միության կազմի մեջ մտնող և այլ այգեգործական ընկերություններին, Երևանի քաղաքային և թաղային նշանակության կանաչ տարածքներն սպասարկող ջրօգտագործողներին 2001 թվականին մատակարարվող ոռոգման ջրի սակագին սահմանել` կիրառելով «Հայաստանի Հանրապետության կառավարության 2001 թվականի փետրվարի 9-ի «Ոռոգում» պետական փակ բաժնետիրական ընկերության կողմից 2001 թվականին մատակարարվող ոռոգման ջրի գոտիական սակագները սահմանելու մասին» N 95 որոշմամբ (Հայաստանի Հանրապետության կառավարության 2001 թվականի մարտի 9-ի N 171 որոշման խմբագրությամբ) սահմանված գոտիական սակագները:

2. Ընդունել Հայաստանի Հանրապետության մարզպետների առաջարկությունները համայնքների խորքային հորերը և ինքնաշատրվանող հորատանցքերը Հայաստանի Հանրապետության կառավարությանն առընթեր ջրային տնտեսության պետական կոմիտեի համապատասխան ընկերություններին անժամկետ` անհատույց օգտագործման հանձնելու վերաբերյալ:

Սահմանել, որ նշված խորքային հորերի աշխատանքների համար մինչև 2001 թվականի հունիսի 1-ը ծախսված էլեկտրաէներգիայի և դրանց շահագործման ընթացքում գոյացած դեբիտորական ու կրեդիտորական պարտքերը մնում են համայնքների հաշվեկշիռներում, իսկ 2001 թվականի հունիսի 1-ից հետո ծախսվող էլեկտրաէներգիայի համար, որի լրացուցիչ քվոտան սահմանում է Հայաստանի Հանրապետության ֆինանսների և էկոնոմիկայի նախարարությունը, մատակարարման պայմանագիրը սահմանված կարգով կնքում է «Ոռոգում» փակ բաժնետիրական ընկերությունը` ջուրը վաճառելով Հայաստանի Հանրապետության կառավարության 2001 թվականի փետրվարի 9-ի N 95 որոշմամբ սահմանված սակագներով:

3. Հանձնարարել Հայաստանի Հանրապետության կառավարությանն առընթեր ջրային տնտեսության պետական կոմիտեին, Հայաստանի Հանրապետության մարզպետներին և առաջարկել Հայաստանի Հանրապետության համայնքների ղեկավարներին սահմանված կարգով կատարել խորքային հորերի և ինքնաշատրվանող հորատանցքերի հանձնման-ընդունման աշխատանքները` ապահովելով դրանց փաստացի տեխնիկական վիճակի գույքագրումը:

4. Սույն որոշումն ուժի մեջ է մտնում 2001 թվականի հունիսի 12-ից:

Հայաստանի Հանրապետության վարչապետ

Ա. Մարգարյան