«Վավերացնում եմ»
Հայաստանի Հանրապետության
Նախագահ Ռ. Քոչարյան
19 հոկտեմբերի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
19 հոկտեմբերի 2000 թվականի N 695
քաղ. Երևան
«ԵՐԵՎԱՆԻ ԷԼԵԿՏՐԱՑԱՆՑ», «ՀՅՈՒՍԻՍԱՅԻՆ ԷԼԵԿՏՐԱՑԱՆՑ», «ՀԱՐԱՎԱՅԻՆ ԷԼԵԿՏՐԱՑԱՆՑ» ԵՎ «ԿԵՆՏՐՈՆԱԿԱՆ ԷԼԵԿՏՐԱՑԱՆՑ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆՆԵՐԻ ՄԱՍՆԱՎՈՐԵՑՄԱՆ ՄՐՑՈՒԹԱՅԻՆ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ
«Հայաստանի Հանրապետության պետական գույքի մասնավորեցման 1998-2000 թվականների ծրագրի մասին» Հայաստանի Հանրապետության օրենքում լրացում կատարելու և «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների մասնավորեցման մասին» Հայաստանի Հանրապետության օրենքի 6 հոդվածին և Հայաստանի Հանրապետության կառավարության 1999 թվականի հուլիսի 10-ի «Երևանի էլեկտրացանց» պետական փակ բաժնետիրական ընկերության, «Կենտրոնական էլեկտրացանց» պետական փակ բաժնետիրական ընկերության, «Հյուսիսային էլեկտրացանց» պետական փակ բաժնետիրական ընկերության և «Հարավային էլեկտրացանց» պետական փակ բաժնետիրական ընկերության բաժնետոմսերը մասնավորեցնելու մասին» N 407 որոշմանը (Հայաստանի Հանրապետության կառավարության 2000 թվականի սեպտեմբերի 13-ի N 563 որոշման խմբագրությամբ) համապատասխան` Հայաստանի Հանրապետության կառավարությունը որոշում է.
1. Հաստատել «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների մասնավորեցման մրցութային հանձնաժողովի գործունեության կանոնակարգը (կցվում է):
2. Սույն որոշումն ուժի մեջ է մտնում 2000 թվականի հոկտեմբերի 19-ից:
| Հայաստանի Հանրապետության վարչապետ | Ա. Մարգարյան |
|
Հաստատված է |
Կ Ա Ն Ո Ն Ա Կ Ա Ր Գ
«ԵրԵՎանի էլեկտրացանց», «Հյուսիսային էլեկտրացանց», «Հարավային էլեկտրացանց» եվ «Կենտրոնական էլեկտրացանց» փակ բաժնետիրական ընկերությունների մասնավորեցման մրցութային հանձնաժողովի գործունեության
I. Ընդհանուր դրույթներ
1. «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների (այսուհետև` էլեկտրաէներգիա բաշխող ընկերություններ) մասնավորեցման մրցութային հանձնաժողովը (այսուհետև` հանձնաժողով) ստեղծվել է «Հայաստանի Հանրապետության պետական գույքի մասնավորեցման 1998-2000 թվականների ծրագրի մասին» Հայաստանի Հանրապետության օրենքում լրացում կատարելու և «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների մասնավորեցման մասին» Հայաստանի Հանրապետության օրենքի 6 հոդվածի և Հայաստանի Հանրապետության կառավարության 1999 թվականի հուլիսի 10-ի «Երևանի էլեկտրացանց» պետական փակ բաժնետիրական ընկերության, «Կենտրոնական էլեկտրացանց» պետական փակ բաժնետիրական ընկերության, «Հյուսիսային էլեկտրացանց» պետական փակ բաժնետիրական ընկերության և «Հարավային էլեկտրացանց» պետական փակ բաժնետիրական ընկերության բաժնետոմսերը մասնավորեցնելու մասին» N 407 որոշման (Հայաստանի Հանրապետության կառավարության 2000 թվականի սեպտեմբերի 13-ի N 563 որոշման խմբագրությամբ) համաձայն:
2. Հանձնաժողովն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենքներով, այլ իրավական ակտերով, սույն կանոնակարգով և հանձնաժողովի որոշումներով:
3. Հանձնաժողովը լիազորված է կազմակերպել և կարգավորել`
ա) յուրաքանչյուր փաթեթում ընդգրկված` էլեկտրաէներգիա բաշխող ընկերությունների բաժնետոմսերի առնվազն 51 տոկոսի վաճառքը միջազգային մրցույթով.
բ) յուրաքանչյուր փաթեթում ընդգրկված` էլեկտրաէներգիա բաշխող ընկերությունների բաժնետոմսերի մինչև 20 տոկոսի ուղղակի վաճառքը միջազգային ֆինանսական հաստատությանը:
II. Հանձնաժողովի խնդիրները եվ գործառույթները
4. Հանձնաժողովը`
ա) իրականացնում է էլեկտրաէներգիա բաշխող ընկերությունների մասնավորեցման միջազգային մրցույթի նախապատրաստումն ու անցկացումը, կազմում և Հայաստանի Հանրապետության կառավարության հաստատմանն է ներկայացնում աշխատանքների իրականացման ժամանակացույցը.
բ) կատարում է Հայաստանի Հանրապետության կառավարության իրավական խորհրդատուի ընտրությունը.
գ) քննարկում և համաձայնություն է տալիս Հայաստանի Հանրապետության կառավարության իրավական խորհրդատուի կողմից ներկայացված մրցութային փաստաթղթերի նախագծերին.
դ) Հայաստանի Հանրապետության կառավարության, Հայաստանի Հանրապետության էներգետիկայի հանձնաժողովի (իր իրավասության սահմաններում) և մրցույթի` որակավորված մասնակիցների քննարկմանն է ներկայացնում մասնավորեցման մրցութային փաստաթղթերի (բաժնետոմսերի առուվաճառքի վերաբերյալ առաջարկություն, սակագնային համաձայնագիր, գործունեության լիցենզիա, էլեկտրաէներգիա մատակարարող և բաշխող ընկերությունների միջև կնքվելիք օրինակելի պայմանագիր, էլեկտրաէներգիա բաշխողների և սպառողների միջև կնքվելիք օրինակելի պայմանագիր և այլն) նախագծերը.
ե) ուսումնասիրում է մրցութային առաջարկների փաթեթները և որոշում մրցույթի հաղթողին.
զ) հայտարարում է մրցույթի արդյունքները:
III. Հանձնաժողովի գործունեության կազմակերպումը
5. Հանձնաժողովի գործունեությունը կազմակերպվում է նիստերի և խորհրդակցությունների միջոցով: Նիստերը հրավիրվում են ըստ անհրաժեշտության` հանձնաժողովի նախագահի նախաձեռնությամբ, բայց առնվազն յուրաքանչյուր ամիսը մեկ անգամ, կամ հանձնաժողովի անդամների առնվազն մեկ երրորդի պահանջով:
6. Հանձնաժողովը ձայների մեծամասնությամբ ընտրում է հանձնաժողովի քարտուղար:
7. Հանձնաժողովի օրակարգում ընդգրկված` հրապարակման ոչ ենթակա հարցերի մասին արձանագրությունները կազմվում են առանձին: Պետական գաղտնիք պարունակող հարցերի քննարկումը և որոշումների ընդունումը կարգավորվում են «Պետական և ծառայողական գաղտնիքի մասին» Հայաստանի Հանրապետության օրենքին համապատասխան: Նշված հարցերը հանձնաժողովի լիազորությունների շրջանակներում քննարկվում են բացառապես հանձնաժողովի անդամների կողմից, անհրաժեշտության դեպքում ներգրավելով համապատասխան մասնագետների, որոնք պատասխանատվություն են կրում քննարկված հարցերի գաղտնիության` Հայաստանի Հանրապետության օրենսդրությամբ սահմանված կարգով պահպանման համար:
8. Հանձնաժողովի աշխատանքները ղեկավարում է հանձնաժողովի նախագահը, իսկ նրա բացակայության դեպքում` հանձնաժողովի անդամներից մեկը` հանձնաժողովի նախագահի հանձնարարությամբ:
9. Հանձնաժողովի նիստի օրակարգը կազմում է նախագահը` հաշվի առնելով հանձնաժողովի անդամներից ստացված առաջարկությունները:
Օրակարգը հաստատվում է հանձնաժողովի որոշմամբ:
10. Հանձնաժողովի անդամներին հանձնաժողովի նիստերի հրավիրման, դրանց տեղի և ժամանակի մասին նիստի հրավիրման օրվանից մեկ օր առաջ իրազեկում է հանձնաժողովի քարտուղարը` նրանց առաքելով համապատասխան նյութերը, որոնք հասցեատիրոջն են տրամադրվում առձեռն կամ ֆաքսիմիլային կապի միջոցով:
11. Հանձնաժողովի նիստերում քննարկվում են օրակարգում ընդգրկված հարցերը:
12. Հանձնաժողովի նիստը համարվում է իրավազոր, եթե դրան մասնակցում է հանձնաժողովի անդամների կեսից ավելին:
13. Հանձնաժողովի որոշումներն ընդունվում են, եթե դրանց օգտին քվեարկել է նիստին մասնակցած հանձնաժողովի անդամների կեսից ավելին: Հանձնաժողովի անդամների ձայների հավասարության դեպքում հանձնաժողովի նախագահի ձայնը վճռորոշ է:
14. Հանձնաժողովի նիստերին կարող են հրավիրվել նաև այլ անձինք` նախագահի նախաձեռնությամբ, ինչպես նաև հանձնաժողովի անդամների առնվազն մեկ երրորդի պահանջով:
15. Հանձնաժողովի որոշումները ձևակերպվում են արձանագրությամբ, որտեղ, մասնավորապես, նշվում են անվանական քվեարկության արդյունքները:
16. Արձանագրությունն ստորագրում են հանձնաժողովի նիստին ներկա բոլոր անդամները: Հատուկ կարծիքի դեպքում այն գրավոր ներկայացվում է հանձնաժողովի նախագահին և կցվում արձանագրությանը:
17. Հանձնաժողովի նախագահը`
ա) հրավիրում է հանձնաժողովի նիստեր և նախագահում է դրանք.
բ) կազմակերպում և համակարգում է հանձնաժողովի աշխատանքները.
գ) ստորագրում է հանձնաժողովի նիստերի որոշումներն ու արձանագրությունները, հանձնաժողովի գործունեությանն առնչվող անհրաժեշտ փաստաթղթերն ու գրությունները:
18. Հանձնաժողովի անդամները`
ա) մասնակցում են հանձնաժողովի նիստերին և իրականացնում հանձնաժողովի առջև դրված խնդիրների լուծման հետ կապված աշխատանքները.
բ) ստորագրում են հանձնաժողովի նիստերի արձանագրությունները.
գ) հանձնաժողովի նիստին մասնակցել չկարողանալու (հարգելի պատճառով) դեպքում նախապես տեղեկացնում են հանձնաժողովի նախագահին:
19. Հանձնաժողովի քարտուղարը`
ա) նախապատրաստում է հանձնաժողովի նիստերը.
բ) հանձնաժողովին տրամադրում է վերջինիս գործունեությանը վերաբերող նյութերն ու ընթացիկ տեղեկատվությունը.
գ) կազմում է հանձնաժողովի նիստերի արձանագրությունները և դրանք ներկայացնում նիստին մասնակցած հանձնաժողովի անդամներին` ստորագրության.
դ) հաղորդագրություն է տրամադրում լրատվության միջոցներին:
IV. Հանձնաժողովի գործունեության դադարումը
20. Հանձնաժողովի գործունեությունը դադարում է Հայաստանի Հանրապետության կառավարության որոշմամբ:
21. Հանձնաժողովի լուծարումից հետո` հանձնաժողովի գործունեությանն առնչվող փաստաթղթերը և մյուս նյութերը ենթակա են պահպանման` Հայաստանի Հանրապետության պետական գույքի կառավարման նախարարությունում` Հայաստանի Հանրապետության օրենսդրությամբ սահմանված կարգով: