«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
12 ապրիլի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 ապրիլի 2000 թվականի N 168
քաղ. Երևան

«ՏՈՒՄԻ» ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆ ԵՎ «ԿՈՆՎԵՐՍ ԲԱՆԿ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԿՈՂՄԻՑ ՍԻԳԱՐԵՏՆԵՐԻ ՎՐԱ «ԾԽԵԼԸ ՎՆԱՍԱԿԱՐ Է ԱՌՈՂՋՈՒԹՅԱՆԸ» ՀԱՅԵՐԵՆ ՆՇԱԳՐՈՒՄՈՎ ԺԱՄԱՆԱԿԱՎՈՐ ՊԻՏԱԿՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆ ՏԱԼՈՒ ՄԱՍԻՆ

Հաշվի առնելով այն հանգամանքը, որ Հայաստանի Հանրապետության կառավարության 1999 թվականի հունվարի 14-ի «Հայաստանի Հանրապետության տարածքում իրացվող սիգարետների վրա պարտադիր նշագրելու մասին» N 16 որոշմամբ (Հայաստանի Հանրապետության կառավարության 1999 թվականի օգոստոսի 3-ի N 493 որոշման խմբագրությամբ) սահմանված ժամկետների դրությամբ «ՏՈՒՄԻ» սահմանափակ պատասխանատվությամբ ընկերությունը Հայաստանի Հանրապետության տարածքում ուներ 6099 արկղ սահմանված կարգով դրոշմավորված, բայց չնշագրված սիգարետներ, իսկ «Կոնվերս բանկ» փակ բաժնետիրական ընկերությունը` 1998 թվականին տրամադրված վարկերի դիմաց ուներ 385 արկղ սահմանված կարգով դրոշմավորված, բայց չնշագրված սիգարետներով ապահովված գրավ, Հայաստանի Հանրապետության կառավարությունը որոշում է.

1. Թույլատրել «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության կողմից նշված քանակությամբ սիգարետների վրա «Ծխելը վնասակար է առողջությանը» հայերեն նշագրումով ժամանակավոր պիտակների օգտագործումը:

2. Հաստատել «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության կողմից սիգարետների վրա «Ծխելը վնասակար է առողջությանը» հայերեն նշագրումով ժամանակավոր պիտակների օգտագործման կարգը (կցվում է):

3. Սահմանել, որ`

ա) 2000 թվականի օգոստոսի 1-ից արգելվում է սույն որոշմամբ հաստատված կարգով նախատեսված ժամանակավոր պիտակներով պիտակավորված սիգարետների իրացումը Հայաստանի Հանրապետության տարածքում.

բ) ժամանակավոր պիտակների տպագրության և պիտակավորման հետ կապված ծախսերը կատարվում են «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության միջոցների հաշվին:

4. Հայաստանի Հանրապետության կառավարությանն առընթեր ստանդարտացման, չափագիտության և սերտիֆիկացման վարչությանը, Հայաստանի Հանրապետության ֆինանսների և էկոնոմիկայի նախարարությանը, Հայաստանի Հանրապետության պետական եկամուտների նախարարությանը` 5-օրյա ժամկետում հաստատել սույն որոշմամբ հաստատված կարգի պահանջներին համապատասխան ժամանակավոր պիտակների նմուշները:

5. Հայաստանի Հանրապետության պետական եկամուտների նախարարությանը` վերահսկողություն սահմանել սույն որոշման համաձայն թույլատրված ժամանակավոր պիտակների տպագրության, սիգարետների վրա սահմանված կարգով փակցնելու և դրանք իրացնելու նկատմամբ:

6. Սույն որոշումն ուժի մեջ է մտնում 2000 թվականի ապրիլի 12-ից:

ՀայաՍՏԱՆԻ հԱՆՐԱՊԵՏՈՒԹՅԱՆ ՎԱՐՉԱՊԵՏ

Ա. Սարգսյան

Հաստատված է ՀՀ կառավարության 2000 թվականի ապրիլի 12-ի N 168 որոշմամբ

Կ Ա Ր Գ

«ՏՈՒՄԻ» սահմանափակ պատասխանատվությամբ ընկերության ԵՎ «Կոնվերս բանկ» փակ բաժնետիրական ընկերության կողմից սիգարետների վրա «Ծխելը վնասակար է առողջությանը» հայերեն նշագրումով ժամանակավոր պիտակների օգտագործման

I. Ընդհանուր դրույթներ

1. Սույն կարգով սահմանվում է «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության կողմից սիգարետների վրա «Ծխելը վնասակար է առողջությանը» հայերեն նշագրումով ժամանակավոր պիտակների (այսուհետև` պիտակներ) օգտագործման կարգը:

2. Սույն կարգի դրույթները տարածվում են միայն Հայաստանի Հանրապետության կառավարության 1997 թվականի հունիսի 10-ի «Հայաստանի Հանրապետություն ներմուծվող ակցիզային հարկով հարկման ենթակա որոշ ապրանքների դրոշմավորման մասին» N 175 որոշմանը համապատասխան ակցիզային դրոշմանիշերով դրոշմավորված սիգարետների վրա:

3. Սույն կարգին համապատասխան պիտակները համարվում են խիստ հաշվառման փաստաթղթեր:

II. Պիտակավորման ենթակա սիգարետների վերաբերյալ անհրաժեշտ տեղեկությունների տրամադրումը

4. «ՏՈՒՄԻ» սահմանափակ պատասխանատվությամբ ընկերությունը և «Կոնվերս բանկ» փակ բաժնետիրական ընկերությունը 5-օրյա ժամկետում Հայաստանի Հանրապետության պետական եկամուտների նախարարություն են ներկայացնում տեղեկություններ`

ա) Հայաստանի Հանրապետության տարածքում «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության կողմից պիտակավորման ենթակա սիգարետների մնացորդների գտնվելու վայրի վերաբերյալ` ըստ արտադրանքի տեսականու, քանակի և արժեքի.

բ) պիտակներ տպագրող կազմակերպության տվյալների (կազմակերպության լրիվ անվանումը, հասցեն, բանկային տվյալները, ՀՎՀՀ, պետական ռեգիստրում գրանցման համարը), ինչպես նաև պատվիրված և յուրաքանչյուր անգամ փաստացի ստացված պիտակների թվի վերաբերյալ:

III. Պիտակներին ներկայացվող պահանջները

5. Պիտակները պետք է համապատասխանեն Հայաստանի Հանրապետության կառավարությանն առընթեր ստանդարտացման, չափագիտության և սերտիֆիկացման վարչության, Հայաստանի Հանրապետության ֆինանսների և էկոնոմիկայի նախարարության, Հայաստանի Հանրապետության պետական եկամուտների նախարարության հաստատած նմուշին:

6. Պիտակների վրա պարտադիր է «Ծխելը վնասակար է առողջությանը» հայերեն նշագրումը և պիտակների օգտագործման թույլտվություն ստացած կազմակերպության անվանումը:

7. Պիտակները պետք է նախատեսված լինեն միանգամյա օգտագործման համար, ունենան ինքնասոսնձվող շերտ, որը կբացառի պիտակները պոկելու հնարավորությունը` առանց պիտակների ամբողջականությունը վնասելու:

IV. Պիտակների հաշվառումը ԵՎ օգտագործումը

8. Պիտակները սահմանված կարգով հաշվառվում են դրանք արտադրող և պիտակների օգտագործման թույլտվություն ունեցող կազմակերպությունների կողմից: Վերջիններս դրանց գծով վարում են առանձնացված հաշվառում խիստ հաշվառման փաստաթղթերի համար Հայաստանի Հանրապետության օրենսդրությամբ սահմանված կարգով:

9. Պիտակները փակցվում են սիգարետների յուրաքանչյուր տուփի` պոլիէթիլենային թաղանթի բացման համար նախատեսված գծերի վրա:

10. Սույն կարգին համապատասխան Հայաստանի Հանրապետության տարածքում գտնվող սիգարետները պիտակավորվում են «ՏՈՒՄԻ» սահմանափակ պատասխանատվությամբ ընկերության և «Կոնվերս բանկ» փակ բաժնետիրական ընկերության կողմից` Հայաստանի Հանրապետության ֆինանսների և էկոնոմիկայի նախարարության, Հայաստանի Հանրապետության պետական եկամուտների նախարարության և Հայաստանի Հանրապետության կառավարությանն առընթեր ստանդարտացման, չափագիտության և սերտիֆիկացման վարչության մասնագետներից կազմված հանձնաժողովների ներկայությամբ:

Նշված հանձնաժողովները յուրաքանչյուր աշխատանքային օրվա վերջում կազմում են ակտ տվյալ օրվա ընթացքում պիտակավորված սիգարետների քանակի և տեսականու, օգտագործված և վնասված պիտակների քանակի վերաբերյալ: Ակտն ստորագրում են համապատասխան հանձնաժողովների բոլոր անդամները և կազմակերպության պատասխանատու (կամ կազմակերպության կողմից սահմանված կարգով լիազորված) անձը:

Սույն կետում նշված կարգով սիգարետները պիտակավորվում են ոչ ավելի, քան 20 աշխատանքային օրվա ընթացքում:

V. Պիտակավորված սիգարետների իրացման վերաբերյալ տեղեկությունների տրամադրումը

11. Սույն կարգով պիտակավորված սիգարետների իրացման վերաբերյալ «ՏՈՒՄԻ» սահմանափակ պատասխանատվությամբ ընկերությունը և «Կոնվերս բանկ» փակ բաժնետիրական ընկերությունը Հայաստանի Հանրապետության պետական եկամուտների նախարարություն են ներկայացնում տեղեկություններ`

ա) յուրաքանչյուր շաբաթվա ընթացքում իրացված սիգարետների տեսականու, քանակի և արժեքի վերաբերյալ.

բ) գնորդ կազմակերպության տվյալների (կազմակերպության լրիվ անվանումը, հասցեն, բանկային տվյալները, ՀՎՀՀ, պետական ռեգիստրում գրանցման համարը) վերաբերյալ:

Նշված տեղեկություններին պարտադիր կցվում են Հայաստանի Հանրապետության կառավարության 1998 թվականի օգոստոսի 25-ի «Ծախսերը հիմնավորող փաստաթղթերի նկատմամբ ներկայացվող պահանջները սահմանելու և այդ փաստաթղթերի կազմման կարգը հաստատելու մասին» N 525 որոշմամբ սահմանված կարգով իրացումը հիմնավորող հաշվարկային և վճարային փաստաթղթերի պատճենները:

Սույն կետում նշված տեղեկությունները և համապատասխան փաստաթղթերի պատճենները ներկայացվում են յուրաքանչյուր շաբաթվան հաջորդող 2 աշխատանքային օրվա ընթացքում, որոնք վերահասցեագրվում են համապատասխան տարածքային հարկային տեսչություններ` հետագա վերահսկումն իրականացնելու նպատակով: