«Վավերացնում եմ» 
Հայաստանի Հանրապետության
Նախագահ Ռ. Քոչարյան
13 մարտի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 մարտի 2000 թվականի N 110
քաղ. Երևան 

ՄԻ ՇԱՐՔ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆՆԵՐ (ՁԵՌՆԱՐԿՈՒԹՅՈՒՆՆԵՐ) ԼՈՒԾԱՐԵԼՈՒ, ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻ ՇԱՐՔ ՈՐՈՇՈՒՄՆԵՐ ՄԱՍՆԱԿԻ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

«Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 15 հոդվածի 7-րդ կետի «գ» ենթակետին և «Հայաստանի Հանրապետության պետական գույքի մասնավորեցման 1998-2000 թվականների ծրագրի մասին» Հայաստանի Հանրապետության օրենքի 8 հոդվածին համապատասխան Հայաստանի Հանրապետության կառավարությունը որոշում է.

1. Հայաստանի Հանրապետության օրենսդրությամբ սահմանված կարգով լուծարել մի շարք բաժնետիրական ընկերություններ (ձեռնարկություններ)` համաձայն հավելվածի:

2. Հայաստանի Հանրապետության պետական գույքի կառավարման նախարարությանը, Հայաստանի Հանրապետության տարածքային կառավարման և քաղաքաշինության գործունեությունը համակարգող նախարարությանն ու Հայաստանի Հանրապետության արդյունաբերության և առևտրի նախարարությանը բաժնետիրական ընկերությունների (ձեռնարկությունների) լուծարման աշխատանքներն իրականացնելու նպատակով 5-օրյա ժամկետում ստեղծել լուծարման հանձնաժողովներ` դրանց կազմում ընդգրկելով Հայաստանի Հանրապետության պետական գույքի կառավարման նախարարության, Հայաստանի Հանրապետության ֆինանսների և էկոնոմիկայի նախարարության, Հայաստանի Հանրապետության պետական եկամուտների նախարարության, լուծարվող բաժնետիրական ընկերությունների պետական սեփականություն հանդիսացող բաժնետոմսերը տնօրինող համապատասխան պետական կառավարման մարմինների (ձեռնարկությունների դեպքում` համապատասխան վերադաս պետական կառավարման մարմինների), այդ ընկերությունների (ձեռնարկությունների) գտնվելու վայրի պետական կառավարման տարածքային մարմինների և Հայաստանի Հանրապետության սոցիալական ապահովագրության պետական հիմնադրամի ներկայացուցիչներին:

3. Սահմանել, որ սույն որոշման համաձայն լուծարվող բաժնետիրական ընկերությունների (ձեռնարկությունների) լուծարման հաշվեկշիռները կազմելու օրվա դրությամբ այդ ընկերությունների (ձեռնարկությունների) դեբիտորական պարտքերը և այլ պահանջների իրավունքները վերապահվում են Հայաստանի Հանրապետության ֆինանսների և էկոնոմիկայի նախարարությանը:

4. Բաժնետիրական ընկերությունների (ձեռնարկությունների) լուծարումից հետո մնացած գույքը 20-օրյա ժամկետում հանձնել սույն որոշման հավելվածում նշված` Հայաստանի Հանրապետության համապատասխան նախարարության տնօրինությանը:

5. Հայաստանի Հանրապետության պետական գույքի կառավարման նախարարությանը` սույն որոշման 4-րդ կետում նշված գույքի հանձնման աշխատանքներն իրականացվելուց հետո, երկամսյա ժամկետում, լուծարված բաժնետիրական ընկերությունների պետական սեփականություն հանդիսացող բաժնետոմսերը տնօրինող համապատասխան պետական կառավարման մարմնի (ձեռնարկությունների դեպքում` համապատասխան վերադաս պետական կառավարման մարմնի) հետ համատեղ քննարկել և Հայաստանի Հանրապետության կառավարություն ներկայացնել առաջարկություններ բաժնետիրական ընկերությունների (ձեռնարկությունների) լուծարումից հետո մնացած գույքի տնօրինման վերաբերյալ:

6. Ուժը կորցրած ճանաչել`

ա) Հայաստանի Հանրապետության կառավարության 1998 թվականի հուլիսի 13-ի «Հայաստանի Հանրապետության պետական գույքի մասնավորեցման, Հայաստանի Հանրապետության կառավարության 1997 թվականի հուլիսի 9-ի N 255 և հուլիսի 28-ի N 305 որոշումներում փոփոխություններ կատարելու մասին» N 437 որոշման 12.1-ին կետը.

բ) Հայաստանի Հանրապետության կառավարության 1998 թվականի սեպտեմբերի 4-ի «Հայաստանի Հանրապետության պետական գույքի մասնավորեցման մասին» N 550 որոշման 11.1-ին կետը.

գ) Հայաստանի Հանրապետության կառավարության 1998 թվականի սեպտեմբերի 4-ի «Հայաստանի Հանրապետության պետական գույքի մասնավորեցման մասին» N 554 որոշման 4.1-ին կետը:

7. Սույն որոշումն ուժի մեջ է մտնում 2000 թվականի մարտի 13-ից:

Հայաստանի Հանրապետության վարչապետ

Ա. Սարգսյան

Հավելված ՀՀ կառավարության 2000 թվականի մարտի 13-ի N 110 որոշման

Ց Ա Ն Կ

լուծարվող բաժնետիրական ընկերությունների (ձեռնարկությունների)

ՀՀ պետական գույքի կառավարման նախարարություն

1. «Բերդ հյուրանոց» ՊՓԲԸ

2. «Սորտսերմբանջար» ՓԲԸ

3. «Հայառտեխնիկա» ՓԲԸ

4. «Ստեփանավանի պտուղ-բանջարեղենի և կարտոֆիլի մթերման, իրացման և մանրածախ առևտրի գրասենյակ» ՊՁ

5. ՀՀ կառավարությանն առընթեր «Հայավտոսերվիս» ՊՁ-ի «Մարալիկի ավտոտեխսպասարկում» ԴՁ

6. «Հայավտոսերվիս» փակ բաժնետիրական ընկերության «Ալավերդու ավտոտեխսպասարկում» ԴՁ

ՀՀ տարածքային կառավարման եվ քաղաքաշինության գործունեությունը համակարգող նախարարություն

1. «Գուգարք-1» ՊՓԲԸ

2. «Քաջարանշին-4» ՓԲԸ

3. «Սանտեխմոնտաժ» ՓԲԸ-ի «Սպիտակի N 6» ԴՁ

ՀՀ արդյունաբերության եվ առեվտրի նախարարություն

1. «Արդաուդիտ» ՊՁ

2. Մայիսյանի մեխանիկական նորոգման ՓԲԸ

3. «Կառնուտ» ՓԲԸ

ՀՀ վարչապետի գլխավոր խորհրդական ՀՀ կառավարության աշխատակազմի ղեկավար

Շ. Կարամանուկյան