«Վավերացնում եմ»
Հայաստանի Հանրապետության
Նախագահ Լ. Տեր-Պետրոսյան
16 օգոստոսի 1997 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 օգոստոսի 1997 թվականի N 339
քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԶԻՆՎԱԾ ՈՒԺԵՐԻ ՊԱՀԵՍՏԱԶՈՐԻ ԱՌԱՋԻՆ ԽՄԲԻ ՍՊԱՆԵՐԻ ԶՈՐԱԿՈՉ ԱՆՑԿԱՑՆԵԼՈՒ ՄԱՍԻՆ

Ի կատարումն Հայաստանի Հանրապետության նախագահի 1997 թվականի օգոստոսի 16-ի «Հայաստանի Հանրապետության զինված ուժերի պահեստազորի առաջին խմբի սպաների զորակոչ անցկացնելու մասին» հրամանագրի, Հայաստանի Հանրապետության կառավարությունը որոշում է.

1. Հայաստանի Հանրապետության պաշտպանության նախարարությանը` ապահովել 1997 թվականի օգոստոս ամսին Հայաստանի Հանրապետության զինված ուժերի պահեստազորի առաջին խմբի սպաների զորակոչի անցկացումը:

2. Հաստատել զորակոչի ենթակա Հայաստանի Հանրապետության զինված ուժերի պահեստազորի առաջին խմբի սպաների թվաքանակը` 500 մարդ:

3. Հաստատել զորակոչի տարկետման իրավունքից օգտվող առաջին խմբի պահեստազորի առանձին կատեգորիաների սպաների ցանկը (կցվում է):

4. Սույն որոշման կատարման վերահսկողությունը դնել Հայաստանի Հանրապետության պաշտպանության նախարարության վրա:

5. Սույն որոշումն ուժի մեջ է մտնում 1997 թվականի օգոստոսի 16-ից:

Հայաստանի Հանրապետության վարչապետ

Ռ. Քոչարյան

Հաստատված է ՀՀ կառավարության 1997 թվականի օգոստոսի 16-ի N 339 որոշմամբ

Ց Ա Ն Կ

ԶՈՐԱԿՈՉԻ ՏԱՐԿԵՏՄԱՆ ԻՐԱՎՈՒՆՔԻՑ ՕԳՏՎՈՂ ԱՌԱՋԻՆ ԽՄԲԻ ՊԱՀԵՍՏԱԶՈՐԻ ԱՌԱՆՁԻՆ ԿԱՏԵԳՈՐԻԱՆԵՐԻ ՍՊԱՆԵՐԻ

1. Նախկինում զինվորական ծառայություն անցած պահեստազորի սպաներ:

2. Գիտական աստիճան ունեցող պահեստազորի սպաներ (գիտության թեկնածուներ, գիտության դոկտորներ), որոնք աշխատում են պետական բուհերում, պետական ձեռնարկություններում, հիմնարկներում և կազմակերպություններում` ըստ իրենց մասնագիտության: Մագիստրատուրայում, ասպիրանտուրայում, ինտերնատուրայում և կլինիկական օրդինատուրայում սովորողներ, բացի հեռակա բաժանմունքներում սովորողներից:

3. Չորս և ավելի երեխաներ ունեցողներ:

4. Առաջին խմբի հաշմանդամ կին, երեխա, հայր և մայր ունեցողներ, որոնք բնակվում են միասին և գտնվում են իրենց խնամքի տակ:

5. Հատուկ հաշվառման մեջ գտնվող (ամրագրված) պահեստազորի սպաներ, բացի տանկիստի, հրետանավորի և կապավորի զինվորական մասնագիտություն ունեցողներից:

6. Հայաստանի Հանրապետության Նախագահի, Հայաստանի Հանրապետության Ազգային ժողովի, Հայաստանի Հանրապետության կառավարության աշխատակազմերի աշխատողներ:

7. Հայաստանի Հանրապետության սահմանադրական դատարանի նախագահ, նրա տեղակալը, սահմանադրական դատարանի անդամներ, աշխատակազմի աշխատողներ:

8. Հայաստանի Հանրապետության գլխավոր դատախազ, նրա տեղակալներ, Հայաստանի Հանրապետության դատախազության կենտրոնական ապարատի վարչությունների և բաժինների պետեր, զոնալ դատախազներ, նախկին վարչական շրջանների (քաղաքների) տարածքների դատախազներ, նրանց տեղակալներ և օգնականներ:

9. Հայաստանի Հանրապետության գլխավոր պետական արբիտր, նրա տեղակալը, պետական արբիտրներ, գերագույն դատարանի և պետական արբիտրաժի բաժինների պետեր:

10. Կենտրոնական, մարզային, համայնքային և տեղամասային ընտրական հանձնաժողովի անդամներ:

11. Մարզպետներ, նրանց տեղակալներ, մարզպետարանների քարտուղարներ, բաժինների վարիչներ, Երևանի քաղաքապետ, նրա տեղակալներ, քաղաքապետարանի քարտուղար, բաժինների վարիչներ, համայնքների ղեկավարներ և նրանց տեղակալներ:

12. Հայաստանի Հանրապետության նախարարությունների, վարչությունների, գերատեսչությունների ղեկավարներ, նրանց տեղակալներ, կառուցվածքային ստորաբաժանումների ղեկավարներ, մոբիլիզացիոն հարցերով զբաղվող աշխատակիցներ:

13. Հայաստանի Հանրապետության կենտրոնական բանկի նախագահ, նրա տեղակալը, խորհրդի անդամներ, կառուցվածքային ստորաբաժանումների պետեր, բանկերի գործադիր տնօրեններ:

14. Դիվանագիտական աստիճան ունեցող անձինք:

15. Պետական ձեռնարկությունների տնօրեններ, պետական ձեռնարկությունների մասնակի անհատույց սեփականաշնորհման կամ սեփականաշնորհման հիման վրա վերակազմավորված բաժնետիրական ընկերությունների գործադիր տնօրեններ, պետական հիմնարկների, կազմակերպությունների ղեկավարներ, բացի պահեստազորի այն սպաներից, որոնք ունեն տանկիստի, հրետանավորի և կապավորի զինվորական մասնագիտություն:

16. Պետական բուհերի ռեկտորներ, պրոռեկտորներ, ֆակուլտետների դեկաններ, ամբիոնների վարիչներ:

17. Մինչև 1997 թվականի օգոստոսի 1-ը օրենքով սահմանված կարգով գրանցված կրոնական կազմակերպությունների կենտրոնական մարմինների ղեկավարներ:

18. Ավիացիայի ոլորտում` Հայաստանի Հանրապետության պաշտպանության նախարարության և Հայաստանի Հանրապետության քաղաքացիական ավիացիայի գլխավոր վարչության փոխհամաձայնեցված ցուցակում նշված անձինք:

19. Էներգետիկայի ոլորտում` ՀԱԷԿ-ի ծառայողներ, Հայաստանի Հանրապետության էներգետիկայի նախարարության համակարգի պետական ձեռնարկությունների կարգավարներ (դիսպետչերներ):

20. Ռազմաարդյունաբերական հանձնաժողովի կողմից հաստատված անվանական ցուցակներում նշված անձինք:

21. Օպերատիվ կառավարման հանրապետական շտաբի կողմից հաստատված ցուցակներում նշված անձինք: