«Վավերացնում եմ»

Հայաստանի Հանրապետության

Նախագահ Լ. Տեր-Պետրոսյան

19 մարտի 1996 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

19 մարտի 1996 թվականի N 85

քաղ. Երևան

ԲՌՆԱԳՐԱՎՎԱԾ ՄՇԱԿՈՒԹԱՅԻՆ ԱՐԺԵՔՆԵՐԻ ԻՐԱՑՈՒՄԻՑ ԳՈՅԱՑԱԾ ՄԻՋՈՑՆԵՐԻ ԲԱՇԽՄԱՆ ԵՎ ՕԳՏԱԳՈՐԾՄԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

Ի կատարումն Հայաստանի Հանրապետության Գերագույն խորհրդի 1994 թվականի մայիսի 25-ի «Մշակութային արժեքների արտահանման և ներմուծման մասին» Հայաստանի Հանրապետության օրենքի կիրարկման մասին» որոշման 4-րդ կետի «է» ենթակետի, Հայաստանի Հանրապետության կառավարությունը որոշում է.

1. Հաստատել բռնագրավված մշակութային արժեքների իրացումից գոյացած միջոցների բաշխման և օգտագործման կարգը (կցվում է):

2. Հայաստանի Հանրապետության կառավարության 1992 թվականի նոյեմբերի 18-ի «Բռնագրավված, տիրազուրկ, ժառանգական իրավունքով պետությանն անցած նյութական և դրամական արժեքների օգտագործման մասին» N 585 որոշման մեջ կատարել հետևյալ լրացումները`

ա) որոշման 1-ին կետի «բ» ենթակետը «պետական գանձարան» բառերից հետո լրացնել «իսկ բռնագրավված մշակութային արժեքները Հայաստանի Հանրապետության մշակույթի, երիտասարդության հարցերի և սպորտի նախարարության մշակութային արժեքների պահպանության վարչությանը:» բառերով.

բ) որոշման 2-րդ կետը «տեղական մարմինների վրա» բառերից հետո լրացնել «բացառությամբ մշակութային արժեքների:» բառերով:

3. Սույն որոշումն ուժի մեջ է մտնում 1996 թվականի մարտի 1-ից:

Հայաստանի Հանրապետության վարչապետ

Հ. ԲԱԳՐԱՏյան

Հաստատված է ՀՀ կառավարության 1996 թվականի մարտի 19-ի N 85 որոշմամբ

Կ Ա Ր Գ

ԲՌՆԱԳՐԱՎՎԱԾ ՄՇԱԿՈՒԹԱՅԻՆ ԱՐԺԵՔՆԵՐԻ ԻՐԱՑՈՒՄԻՑ ԳՈՅԱՑԱԾ ՄԻՋՈՑՆԵՐԻ ԲԱՇԽՄԱՆ ԵՎ ՕԳՏԱԳՈՐԾՄԱՆ

1. Հայաստանի Հանրապետության օրենսդրությամբ սահմանված կարգով բռնագրավված մշակութային արժեքները փոխանցվում են Հայաստանի Հանրապետության մշակույթի, երիտասարդության հարցերի և սպորտի նախարարության մշակութային արժեքների պահպանության վարչությանը, որն ապահովում է այդ արժեքների պահպանությունը, փորձաքննությունը:

Մշակութային արժեքների պահպանության վարչությունը սահմանված կարգով Հայաստանի Հանրապետության մշակույթի, երիտասարդության հարցերի և սպորտի նախարարության քննարկմանն է ներկայացնում բռնագրավված մշակութային արժեքները հանրապետության պետական թանգարաններն, արխիվներն և գրադարաններն մշտական պահպանության տալու կամ համապատասխան այլ կազմակերպություններն հանձնելու հարցը:

2. Թանգարաններին, արխիվներին, գրադարաններին և այլ պետական պահոցներին` մշակութային արժեքները մշտական պահպանման չտրված կամ համապատասխան այլ հաստատություններին չհանձնված բռնագրավված մշակութային արժեքները ենթակա են իրացման` օրենսդրությամբ սահմանված կարգով:

Իրացման ենթակա մշակութային արժեքները գնահատվում են ելնելով իրական շուկայական գնից:

3. Մշակութային արժեքները կարող են իրացվել ձեռնարկություններին, հիմնարկներին, կազմակերպություններին (անկախ սեփականության ձևից) և ֆիզիկական անձանց` կանխիկ կամ փոխանցման կարգով:

4. Հայաստանի Հանրապետության օրենսդրությամբ սահմանված կարգով բռնագրավված մշակութային արժեքների իրացումից (հանած իրացման հետ կապված ծախսերը) գոյացած միջոցները բաշխվում են`

ա) 10 տոկոսը փոխանցվում է Հայաստանի Հանրապետության մաքսային վարչության պահուստային ֆոնդին.

բ) 10 տոկոսը փոխանցվում է Հայաստանի Հանրապետության ներքին գործերի նախարարությանը կամ Հայաստանի Հանրապետության ազգային անվտանգության նախարարությանը` համապատասխան ստորաբաժանումների նյութատեխնիկական և ֆինանսական վիճակն ապահովելու համար:

գ) 10 տոկոսը փոխանցվում է Հայաստանի Հանրապետության արդարադատության նախարարությանը` համապատասխան դատարանների նյութատեխնիկական վիճակը բարելավելու համար.

դ) 10 տոկոսը թողնվում է մշակութային արժեքների պահպանության վարչությանը և օգտագործվում է վարչության նյութատեխնիկական բազայի ամրապնդման և աշխատողների նյութական խրախուսման համար:

ե) մնացած միջոցները հաշվանցվում են Հայաստանի Հանրապետության պետական բյուջե: