ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 մայիսի 1992 թվականի N 295

քաղ. Երևան

ԱՇԽԱՏԱՆՔԱՅԻՆ ԽԵՂՄԱՆ ԿԱՄ ՄԱՍՆԱԳԻՏԱԿԱՆ ՀԻՎԱՆԴՈՒԹՅԱՆ ՀԵՏԵՎԱՆՔՈՎ ԱՇԽԱՏՈՒՆԱԿՈՒԹՅՈՒՆԸ ԿՈՐՑՐԱԾ ԱՆՁԱՆՑ ՆՅՈՒԹԱԿԱՆ ՊԱՅՄԱՆՆԵՐԻ ԲԱՐԵԼԱՎՄԱՆ ՄԱՍԻՆ

1. Սահմանել, որ 1992 թվականի մայիսի 1-ից աշխատանքային խեղման կամ մասնագիտական հիվանդության հետևանքով աշխատողներին պատճառված վնասի փոխհատուցման գումարները հաշվարկվում են անկախ տուժողին նշանակված հաշմանդամության կենսաթոշակից և վճարվում լրիվ չափով:

2. Սահմանել, որ աշխատողներին աշխատանքային խեղման կամ մասնագիտական հիվանդության հետևանքով պատճառված վնասի փոխհատուցման գումարները 1992 թվականի մայիսի 1-ից ինդեքսավորվում են Հայաստանի Հանրապետության կառավարության 1992 թվականի հունվարի 4-ի «Բնակչության եկամուտների ինդեքսավորման կարգի մասին» հ. 6 որոշմանը համապատասխան:

3. Պատճառված վնասի փոխհատուցման գումարը վճարում են վնասի պատճառման համար պատասխանատու ձեռնարկությունները, հիմնարկները և կազմակերպությունները, վերջիններիս վերակազմավորման դեպքում` նրանց իրավահաջորդները, իսկ լուծարման դեպքում` սոցիալական ապահովության մարմինները, պետական բյուջեի միջոցների հաշվին:

4. Իրավունք վերապահել ձեռնարկություններին, հիմնարկներին և կազմակերպություններին հնարավորության սահմաններում բարձրացնել փոխհատուցման գումարի չափը:

5. Հանձնարարել Հայաստանի Հանրապետության աշխատանքի և սոցիալական ապահովության նախարարությանը` Հայաստանի Հանրապետության սոցիալական ապահովագրության ֆոնդի և Հայաստանի արհեստակցական միությունների կոնֆեդերացիայի հետ համատեղ 20-օրյա ժամկետում հաստատել սույն որոշման կիրարկման կարգը:

ՀԱՅԱՍՏԱՆի հանրապետության փոխնախագահ, վարչապետ

Գ. ՀԱՐՈՒԹՅՈՒՆՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ