ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 փետրվարի 1992 թվականի N 125

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ՆԱԽԿԻՆ ԽՍՀՄ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ՆԵՐՔԻՆ ԶՈՐՔԵՐԻ ԶՈՐԱՄԱՍԵՐԻ ԴՈՒՐՍԲԵՐՄԱՆ ՄԱՍԻՆ

Հայաստանի Հանրապետության կառավարությունը որոշում է`

1. 1992 թվականի հունվարի 1-ից 3646, 3689 և 3407 զորամասերը համարել կազմալուծված:

2. Այն սպաների, պրապորշչիկների, գերակետիկ ծառայության զինծառայողների, բանվորների և ծառայողների համար, որոնք ցանկություն են հայտնել շարունակելու ծառայությունը և աշխատանքը Հայաստանի Հանրապետության իրավապահ մարմիններում ու այլ կազմավորումներում, պահպանել նախկին ԽՍՀՄ ներքին գործերի նախարարության ներքին զորքերում նրանց ծառայության ստաժը:

Հայաստանի Հանրապետության ներքին գործերի նախարարությանը` անցկացնել նշված անձանց ատեստավորում, սահմանված կարգով:

3. Հայաստանի Հանրապետության նախարարություններին և գերատեսչություններին` պահեստ արձակված կամ պաշտոնաթող սպաներին, պրապորշչիկներին և գերակետիկ ծառայության զինծառայողներին, որոնք ցանկություն են հայտնել մշտապես բնակվելու Հայաստանի Հանրապետությունում, ապահովել աշխատանքով, երաշխավորել նրանց սոցիալական պաշտպանվածությունը:

4. Երաշխավորել Հայաստանի Հանրապետության տարածքում ժամանակավորապես մնացած զինծառայողների ընտանիքների իրավական և սոցիալական պաշտպանվածությունը: Տեղափոխման դեպքում աջակցել նրանց տրանսպորտային և բեռնափոխադրման միջոցներ հատկացնելու հարցում:

5. Նշված զորամասերի զինվորական ավանները և գույքը անհատույց ընդունել Հայաստանի Հանրապետության ներքին գործերի նախարարության հաշվեկշռին:

6. Սույն որոշման կատարման նկատմամբ վերահսկողությունը դնել Հայաստանի Հանրապետության ներքին գործերի նախարարության վրա:

ՀԱՅԱՍՏԱՆի հանրապետության փոխնախագահ, վարչապետ

Գ. ՀԱՐՈՒԹՅՈՒՆՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ