ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
ԱՍՈՑԻԱՑՎԱԾ ԱՆԴԱՄԻ ԻՐԱՎՈՒՆՔՈՎ ՏՆՏԵՍԱԿԱՆ ԴԱՇԻՆՔԻՆ ՈՒԿՐԱԻՆԱՅԻ ՄԻԱՆԱԼՈՒ ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
9 ապրիլի 1997 թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Ստեփանյանի, սահմանադրական դատարանի անդամներ Ա. Գյուլումյանի, Հ. Խաչատրյանի, Վ. Հովհաննիսյանի, Հ. Նազարյանի, Վ. Պողոսյանի, Վ. Սահակյանի, Մ. Սեւյանի,
մասնակցությամբ` Հայաստանի Հանրապետության Նախագահի ներկայացուցիչ` Հայաստանի Հանրապետության էկոնոմիկայի նախարար Վ. Ավանեսյանի,
համաձայն Հայաստանի Հանրապետության Սահմանադրության 100 հոդվածի 2 կետի և 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «Ասոցիացված անդամի իրավունքով Տնտեսական դաշինքին Ուկրաինայի միանալու մասին համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթ է հանդիսացել Հայաստանի Հանրապետության Նախագահի դիմումը սահմանադրական դատարան` Ասոցիացված անդամի իրավունքով Տնտեսական դաշինքին Ուկրաինայի միանալու մասին 1994 թվականի ապրիլի 15-ին Մոսկվայում ստորագրված համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ:
Լսելով սույն գործով զեկուցող` Հայաստանի Հանրապետության սահմանադրական դատարանի անդամ Ա. Գյուլումյանի հաղորդումը, Հայաստանի Հանրապետության Նախագահի ներկայացուցիչ Վ. Ավանեսյանի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
Տնտեսական դաշինքի ստեղծման մասին պայմանագիրը կնքվել է Մոսկվա քաղաքում` 1993 թվականի սեպտեմբերի 24-ին: Հայաստանի Հանրապետության Գերագույն խորհուրդն այն վավերացրել է 1994 թվականի մարտի 29-ին: Պայմանագրի 30 հոդվածին համապատասխան Տնտեսական դաշինքի անդամ պետությունների համաձայնությամբ և նրանց կողմից որոշված պայմաններով ասոցիացված անդամի իրավունքով դաշինքին կարող են միանալ այլ պետություններ:
Ասոցիացված անդամի իրավունքով Տնտեսական դաշինքին Ուկրաինայի միանալու մասին համաձայնագիրը կնքվել է 1994 թվականի ապրիլի 15-ին` Մոսկվա քաղաքում, հինգ տարի ժամկետով, և ուժի մեջ է մտնում այն օրվանից, երբ ավանդապահը ծանուցում կստանա, որ Կողմերը կատարել են դրա ուժի մեջ մտնելու համար անհրաժեշտ ներպետական ընթացակարգերը:
Համաձայնագրով Կողմերը պարտավորվում են գործունեության կոնկրետ ոլորտներում տնտեսական հարաբերությունները կարգավորել Տնտեսական դաշինքի նպատակների իրականացմանն ուղղված առանձին համաձայնագրեր կնքելով:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. Ասոցիացված անդամի իրավունքով Տնտեսական դաշինքին Ուկրաինայի միանալու մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Հայաստանի Հանրապետության |
Գ. Հարությունյան |
|
|