040.0487.05.11.97

«Վավերացնում եմ» Հայաստանի Հանրապետության Նախագահ Լ. Տեր-Պետրոսյան 5 նոյեմբերի 1997 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

5 նոյեմբերի 1997 թվականի N 487
քաղ. Երևան

ՄՇՏԱԿԱՆ ՀԻՄՈՒՆՔՆԵՐՈՎ ՊԵՏԱԿԱՆ ԵՎ ԾԱՌԱՅՈՂԱԿԱՆ ԳԱՂՏՆԻՔ ԿԱԶՄՈՂ ՏԵՂԵԿՈՒԹՅՈՒՆՆԵՐԻ ՕԳՏԱԳՈՐԾՄԱՄԲ ԱՇԽԱՏԱՆՔՆԵՐ ԿԱՏԱՐՈՂ ՔԱՂԱՔԱՑԻՆԵՐԻ ԵՎ ԱՅԴՊԻՍԻ ԳԱՂՏՆԻՔԻ ՊԱՇՏՊԱՆՈՒԹՅԱՆ ԿԱՌՈՒՑՎԱԾՔԱՅԻՆ ՍՏՈՐԱԲԱԺԱՆՈՒՄՆԵՐԻ ԱՇԽԱՏՈՂՆԵՐԻՆ ՀԱՏԿԱՑՎՈՂ ԱՐՏՈՆՈՒԹՅՈՒՆՆԵՐԻ ՄԱՍԻՆ

«Պետական և ծառայողական գաղտնիքի մասին» Հայաստանի Հանրապետության օրենքի 8 հոդվածին համապատասխան` Հայաստանի Հանրապետության կառավարությունը որոշում է.

1. Մշտական հիմունքներով պետական և ծառայողական գաղտնիք կազմող տեղեկությունների օգտագործմամբ աշխատանքներ կատարող քաղաքացիների և այդպիսի գաղտնիքի պաշտպանության կառուցվածքային ստորաբաժանումների աշխատողների համար սահմանել հետևյալ արտոնությունները`

ա) լրացուցիչ վարձատրություն` պաշտոնային դրույքի 20 և 15 տոկոսի չափով` համապատասխանաբար, հատուկ կարևորության և հույժ գաղտնի տեղեկություններին փաստացի իրազեկ անձանց համար.

բ) լրացուցիչ վճարովի հնգօրյա արձակուրդ` սույն որոշման 1-ին կետի «ա» ենթակետում նշված անձանց, ինչպես նաև ծառայողական գաղտնիք կազմող տեղեկություններին փաստացի իրազեկ անձանց համար:

2. Սույն որոշման 1-ին կետում նշված արտոնությունների հետ կապված ծախսերը կատարել համապատասխան պետական և ծառայողական գաղտնիքը տնօրինող պետական մարմիններին` Հայաստանի Հանրապետության պետական բյուջեով նախատեսված միջոցների հաշվին: Ոչ պետական կազմակերպություններում նշված արտոնությունները տրվում են սեփական միջոցների հաշվին:

Մշտական հիմունքներով պետական և ծառայողական գաղտնիք կազմող տեղեկությունների օգտագործմամբ աշխատանքներ կատարող քաղաքացիների և այդպիսի գաղտնիքի պաշտպանության կառուցվածքային ստորաբաժանումների աշխատողների համար սահմանված համապատասխան լրացուցիչ վարձատրությունն իրականացվում է պետական գաղտնիքը տնօրինող պետական մարմինների, ձեռնարկությունների, հիմնարկների և կազմակերպությունների ռեժիմային գաղտնի մարմնի կողմից ներկայացվող ամենամսյա անվանացուցակի, իսկ լրացուցիչ վճարովի արձակուրդի տրամադրումը` անհատական տեղեկանքի հիման վրա:

3. Սույն որոշմամբ նախատեսված վճարումները ենթակա են կատարման նշված ծախսերը Հայաստանի Հանրապետության պետական բյուջեում նախատեսելուց հետո:

4. Սույն որոշումն ուժի մեջ է մտնում 1998 թվականի հունվարի 1-ից:

Հայաստանի Հանրապետության վարչապետ

Ռ. Քոչարյան