ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱՐԱՐՆԵՐԻ ԽՈՐՀՈՒՐԴ

Ո Ր Ո Շ ՈՒ Մ

5 մարտի 1991 թվականի N 164

քաղ. Երևան

ՀՈՂԻ ՍԵՓԱԿԱՆՈՒԹՅԱՆ ԵՎ ՕԳՏԱԳՈՐԾՄԱՆ ԻՐԱՎՈՒՆՔԻ ՊԵՏԱԿԱՆ ԱԿՏԵՐԻ ՁԵՎԵՐԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության հողային օրենսգրքի պահանջներին համապատասխան Հայաստանի Հանրապետության նախարարների խորհուրդը որոշում է`

1. Հաստատել հողի սեփականության և օգտագործման իրավունքի պետական ակտերի ձևերը (կցվում են):

2. Սահմանել, որ հողի սեփականության և օգտագործման իրավունքի պետական ակտերը տրվում են հողի սեփականատերերին և օգտագործողներին, որոնք հաստատվում են ժողովրդական պատգամավորների տեղական (գյուղական, ավանային, շրջանային, քաղաքային) խորհուրդների գործադիր կոմիտեների կողմից, համաձայնեցնելով հողաշինարարական ծառայության հետ:

Մինչև հողի սեփականության և օգտագործման իրավունքի պետական ակտերի հանձնումը, ժողովրդական պատգամավորների համապատասխան տեղական (գյուղական, ավանային, շրջանային, քաղաքային) խորհուրդների գործադիր կոմիտեները հողի սեփականատերերին կամ օգտագործողներին տալիս են ժամանակավոր վկայականներ (ձևերը կցվում են):

Հողի սեփականության և օգտագործման իրավունքի պետական ակտերը կազմվում են երկու օրինակից: Առաջին օրինակը տրվում է  հողի սեփականատիրոջը կամ օգտագործողին, երկրորդ օրինակը պահվում է շրջանային հողաշինարարական ծառայությունում:

3. Հանձնարարել Հայաստանի Հանրապետության գյուղատնտեսության նախարարությանը և ժողովրդական պատգամավորների քաղաքային ու շրջանային խորհուրդների գործադիր կոմիտեներին`

ա) ապահովել հողի սեփականության և օգտագործման իրավունքի պետական ակտերի հանձնման հետ կապված աշխատանքների ժամանակին կատարումը.

բ) մինչև նշված ակտերի հանձնումը, անհրաժեշտության դեպքում կազմակերպել հողատարածությունների չափերի և սահմանների ճշտման աշխատանքներ, սահմաններն ամրացնելով համապատասխան սահմանասյուներով.

գ) բոլոր շրջաններն ապահովել հավաքական քարտեզներով, դրանցում արտահայտելով սեփականատերերի և օգտագործողների հողերը ու դրանց սահմանները.

դ) հողի սեփականության և օգտագործման իրավունքի պետական ակտերի կազմման հետ կապված բոլոր աշխատանքները կատարել Հայաստանի Հանրապետության գյուղատնտեսության նախարարության հողաշինարարության նպատակով նախատեսված միջոցների հաշվին:

4. Հանձնարարել Հայաստանի Հանրապետության Նախարարների խորհրդին առընթեր մամուլի կոմիտեին` ապահովել հողի սեփականության և օգտագործման իրավունքի պետական ակտերի ձևերի տպագրումը, համաձայն Հայաստանի Հանրապետության գյուղատնտեսության նախարարության պատվերի, սեփականաշնորհման գործընթացից ստացված գումարների հաշվին:

5. Ուժը կորցրած ճանաչել Հայկական ՍՍՀ Մինիստրների սովետի 1975 թվականի ապրիլի 7-ի «ՍՍՀՄ Մինիստրների սովետի 1975 թվականի մարտի 6-ի «Հողի օգտագործման իրավունքի պետական ակտերը հողօգտագործողներին հանձնելու մասին» N 174 որոշումը:

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի նախագահ

Վ. ՄԱՆՈՒԿՅԱՆ

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՀԱԿՈԲՅԱՆ

 Ձևեր

ՀԱՍՏԱՏՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱՐԱՐՆԵՐԻ ԽՈՐՀՐԴԻ 1991 ԹՎԱԿԱՆԻ ՄԱՐՏԻ 5-Ի N 164 ՈՐՈՇՄԱՄԲ