ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԿԱՌԱՎԱՐՈՒԹՅԱՆՆ ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅՈՒՆ
|
7 դեկտեմբերի 2004 թ. |
N 6 |
ՊԱՇՏՈՆԱԿԱՆ ՊԱՐԶԱԲԱՆՈՒՄ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԳՈՐԾՈՂ ԲԱՆԿԵՐԻ ԵՎ ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ՆՎԱԶԱԳՈՒՅՆ ՇԱՀՈՒԹԱՀԱՐԿԻ ՀԱՇՎԱՐԿՄԱՆ ՎԵՐԱԲԵՐՅԱԼ
«Շահութահարկի մասին» Հայաստանի Հանրապետության օրենքի 471-րդ հոդվածի 3-րդ մասին և «Ռեզիդենտների կողմից շահութահարկի հաշվարկման և վճարման կարգի մասին» հրահանգի 9.5 կետին համապատասխան ռեզիդենտները նվազագույն շահութահարկի ամսական գումարները հաշվարկում են նախորդ ամսվա ընթացքում Հայաստանի Հանրապետության տարածքում և Հայաստանի Հանրապետության տարածքից դուրս ակտիվների իրացումից ու ծառայությունների մատուցումից հաշվեգրման եղանակով հաշվարկված եկամուտներից (իրացումից ստացվող հասույթից) ելնելով (բացառությամբ` հիմնական միջոցների, արժեթղթերի և ֆոնդային ապրանքների իրացումից հասույթի), ներառելով տրամադրված վարկերի (փոխառությունների) դիմաց ստացվող տոկոսները և վարձակալության դիմաց ստացվող եկամուտները (այսուհետ` նվազագույն շահութահարկի ամսական գումարի հաշվարկման բազա):
«Բանկերի և բանկային գործունեության մասին» և «Վարկային կազմակերպությունների մասին» Հայաստանի Հանրապետության օրենքներով տրված են բանկային և վարկային կազմակերպությունների գործունեության բնորոշումը, ինչպես նաև թվարկված են Հայաստանի Հանրապետությունում գործող բանկերի և վարկային կազմակերպությունների կողմից թույլատրվող ֆինանսական և այլ գործունեության տեսակները: Հայաստանի Հանրապետությունում գործող բանկերի և վարկային կազմակերպությունների համար «Շահութահարկի մասին» Հայաստանի Հանրապետության օրենքով սահմանված են առանձնահատկություններ միայն համախառն եկամտից իրականացվող նվազեցումների մասով (30-րդ հոդված):
Ստեղծված իրավիճակում տարաբնույթ է ընկալվում նշված իրավական ակտերի դրույթները` Հայաստանի Հանրապետությունում գործող բանկերի և վարկային կազմակերպությունների կողմից նվազագույն շահութահարկի ամսական գումարի հաշվարկման բազայում ներառվող եկամուտների առումով:
«Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի համաձայն իրավական ակտի պաշտոնական պարզաբանումը տրվում է իրավական ակտի պաշտոնական մեկնաբանման համար նախատեսված կանոններով, իսկ նշված օրենքի 86-րդ հոդվածի 1-ին մասի համաձայն իրավական ակտի մեկնաբանությամբ չպետք է փոփոխվի դրա իմաստը:
Հաշվի առնելով վերը նշվածը պաշտոնապես պարզաբանում եմ.
Ռեզիդենտ բանկերը և վարկային կազմակերպությունները նվազագույն շահութահարկի ամսական գումարի հաշվարկման բազայում ներառում են, մասնավորապես`
ա) տոկոսային եկամուտներ`
- արժութային սվոպից,
- բանկերին տրված վարկերից (այդ թվում` տրամադրված օվերդրաֆտներից և օվերնայթներից), կնքված ռեպո համաձայնագրերից և տրված ակրեդիտիվների դիմաց,
- ֆինանսական կազմակերպություններին տրված վարկերից (այդ թվում` տրամադրված օվերդրաֆտներից),
- իրավաբանական և ֆիզիկական անձանց, հիմնարկներին տրված վարկերից (այդ թվում` տրամադրված օվերդրաֆտներից, վարկային քարտերով տրված վարկերից), բանկի (վարկային կազմակերպության) աշխատակիցներին և բանկի (վարկային կազմակերպության) հետ կապված այլ անձանց տրված վարկերից (այդ թվում` տրամադրված օվերդրաֆտներից, տրված վարկային քարտերից),
- ֆինանսական վարձակալությունից.
բ) միջնորդավճարներ (այդ թվում` պլաստիկ քարտերի սպասարկումից).
գ) երաշխիքներից, հոժարագրերով, ակրեդիտիվներով գործառնություններից, հավատարմագրային կառավարման գործառնություններից եկամուտներ.
դ) ֆակտորինգից ստացված եկամուտներ.
ե) սեփականության իրավունքով բանկին (վարկային կազմակերպության) անցած գրավի առարկայի (բացառությամբ` որպես հիմնական միջոց բանկի (վարկային կազմակերպության) կողմից օգտագործվող) իրացումից ստացված եկամուտները:
Ռեզիդենտ բանկերը և վարկային կազմակերպությունները նվազագույն շահութահարկի ամսական գումարի հաշվարկման բազայում չեն ներառում, մասնավորապես`
ա) տոկոսային եկամուտներ`
- այլ բանկերում թղթակցային հաշիվների միջոցներից, այլ բանկերում և ֆինանսական հաստատություններում ներդրված ավանդներից (այդ թվում` թանկարժեք մետաղների բանկային ստանդարտացված ձուլակտորներով ավանդներից),
- ներդրումներից (արժեթղթերից).
բ) եկամուտ այլ կազմակերպություններում ներդրումներից (շահաբաժիններ).
գ) կորուստների վերականգնում (փոխհատուցում).
դ) եկամուտներ ստացված տույժերից և տուգանքներից.
ե) ֆոնդային ապրանք (արտարժույթ, թանկարժեք մետաղների բանկային ստանդարտացված ձուլակտորներ և մետաղադրամ, վարկային ռեսուրսներ) հանդիսացող ֆինանսական ակտիվների վաճառքից ստացված եկամուտներ.
ե) արտարժույթի առք ու վաճառքից ստացված եկամուտներ.
զ) արժեթղթերի (այդ թվում` ռեպո համաձայնագրերով ձեռք բերված արժեթղթերի) վաճառքից ստացված եկամուտներ:
Ակտիվների և պարտավորությունների (այդ թվում` արտարժույթի և արտարժույթով արտահայտված ակտիվների ու պարտավորությունների) վերագնահատման (վերաչափման) արդյունքները հաշվի չեն առնվում նվազագույն շահութահարկի ամսական գումարի հաշվարկման բազայում:
|
ՀՀ կառավարությանն առընթեր |
Ա. Ալավերդյան |
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|