«Վավերացնում եմ»
Հայաստանի Հանրապետության
Նախագահ Լ. Տեր-Պետրոսյան
28 դեկտեմբերի 1995 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
28 դեկտեմբերի 1995 թ. N 120
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳԻՏՈՒԹՅՈՒՆՆԵՐԻ ԱԶԳԱՅԻՆ ԱԿԱԴԵՄԻԱՅԻ, ԻՆՉՊԵՍ ՆԱԵՎ ՀԱՆՐԱՊԵՏՈՒԹՅՈՒՆՈՒՄ ԳԻՏԱԿԱՆ ԳՈՐԾՈՒՆԵՈՒԹՅԱՆ ԲԱՐԵԼԱՎՄԱՆ ՄԻ ՇԱՐՔ ՄԻՋՈՑԱՌՈՒՄՆԵՐԻ ՄԱՍԻՆ
Ի կատարումն Հայաստանի Հանրապետության Նախագահի 1993 թվականի մարտի 9-ի «Հայաստանի Հանրապետության գիտությունների ակադեմիայի մասին» հրամանագիրը և Հայաստանի Հանրապետության գիտական ներուժի արդյունավետ օգտագործման ու ամրապնդման, գիտության կառավարման բարելավման նպատակով Հայաստանի Հանրապետության կառավարությունը որոշում է.
1. Ստեղծել Հայաստանի Հանրապետության վարչապետին առընթեր գիտության և առաջատար տեխնոլոգիաների խորհուրդ:
Հայաստանի Հանրապետության կրթության և գիտության նախարարությանն ու Հայաստանի Հանրապետության գիտությունների ազգային ակադեմիային` երկշաբաթյա ժամկետում սահմանված կարգով Հայաստանի Հանրապետության վարչապետի հաստատմանը ներկայացնել նշված խորհրդի կանոնադրությունը և կազմը:
2. Սահմանել, որ Հայաստանի Հանրապետության գիտությունների ազգային ակադեմիայի պրեզիդենտն ունի Հայաստանի Հանրապետության նախարարի կարգավիճակ:
3. Հայաստանի Հանրապետության գիտությունների ազգային ակադեմիան ինքնակառավարվող պետական գիտական հաստատություն է, որն իր գործունեությունը կոորդինացնում է Հայաստանի Հանրապետության կրթության և գիտության նախարարության, ինչպես նաև մյուս շահագրգիռ նախարարությունների ու գերատեսչությունների հետ:
4. Սահմանել Հայաստանի Հանրապետության գիտությունների ազգային ակադեմիայի ակադեմիկոսների և թղթակից անդամների ամենամսյա պատվավճար` 20 հազար դրամի չափով:
5. Հայաստանի Հանրապետության էկոնոմիկայի նախարարությանը և Հայաստանի Հանրապետության ֆինանսների նախարարությանը` Հայաստանի Հանրապետության կառավարություն ներկայացնել Հայաստանի Հանրապետության գիտությունների ազգային ակադեմիայի հրատարակչական գործունեության համար կենտրոնացված կարգով ֆինանսական միջոցներ հատկացնելու մասին առաջարկություն:
6. Ուժը կորցրած ճանաչել Հայաստանի Հանրապետության կառավարության 1993 թվականի հուլիսի 16-ի «Հայաստանի Հանրապետության գիտությունների ազգային ակադեմիայի իսկական անդամների և թղթակից անդամների համար պատվավճար սահմանելու մասին» N 374 որոշումը և Հայաստանի Հանրապետության կառավարության 1994 թվականի նոյեմբերի 28-ի «Հայաստանի Հանրապետության գիտական փորձաքննության համակարգի մասին» N 546 որոշման 1-ին և 2-րդ կետերը:
7. Սույն որոշումն ուժի մեջ է մտնում 1996 թվականի հունվարի 1-ից:
|
|