ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
1997 ԹՎԱԿԱՆԻ ՀՈՒՆԻՍԻ 27-ԻՆ ԲՐՅՈՒՍԵԼՈՒՄ ՍՏՈՐԱԳՐՎԱԾ` ԲԱԶՄԻՑՍ ՓՈՓՈԽՎԱԾ` 1960 ԹՎԱԿԱՆԻ ԴԵԿՏԵՄԲԵՐԻ 13-Ի` ՕԴԱՆԱՎԱԳՆԱՑՈՒԹՅԱՆ ԱՆՎՏԱՆԳՈՒԹՅԱՆ ՀԱՄԱՐ ՀԱՄԱԳՈՐԾԱԿՑՈՒԹՅԱՆ ՄԱՍԻՆ «ԵՎՐԱԿՈՆՏՐՈԼ» ՄԻՋԱԶԳԱՅԻՆ ԿՈՆՎԵՆՑԻԱՆ ԱՄՓՈՓՈՂ ԱՐՁԱՆԱԳՐՈՒԹՅԱՆ ՄԵՋ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
17 մայիսի 2005 թ. |
Հայաստանի Հանրապետության սահմանադրական դատարանը` կազմով. սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Կ. Բալայանի, Ֆ. Թոխյանի (զեկուցող), Զ. Ղուկասյանի, Հ. Նազարյանի, Ռ. Պապայանի, Վ. Պողոսյանի,
մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության պետ Ա. Մովսեսյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «1997 թվականի հունիսի 27-ին Բրյուսելում ստորագրված` Բազմիցս փոփոխված` 1960 թվականի դեկտեմբերի 13-ի` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիան ամփոփող արձանագրության մեջ ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հանրապետության Նախագահի դիմումն է սահմանադրական դատարան:
Լսելով սույն գործով զեկուցողի հաղորդումը, Հանրապետության Նախագահի ներկայացուցչի բացատրությունները, հետազոտելով արձանագրությունը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Արձանագրությունն ստորագրվել է 1997 թ. հունիսի 27-ին` Բրյուսելում:
Արձանագրության նպատակը 1960 թվականի դեկտեմբերի 13-ի` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիան և դրանում կատարված փոփոխություններն ամփոփելն ու միացյալ տեքստով ընդունելն է:
Արձանագրությունը դեռևս ուժի մեջ չի մտել:
Հայաստանի Հանրապետությունն արձանագրությունն ստորագրել է 2004 թ. դեկտեմբերի 10-ին:
2. Քննության առարկա արձանագրությամբ 1960 թվականի դեկտեմբերի 13-ին Բրյուսելում ստորագրված` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիան` 1970 թ. հուլիսի 6-ի, 1978 թ. նոյեմբերի 21-ի և 1981 թ. փետրվարի 12-ի արձանագրություններով կատարված փոփոխություններով, փոխարինվում է արձանագրությանը կցված տեքստով (այսուհետև` Կոնվենցիա), որը վերնագրված է «Գործող Կոնվենցիայի` ուժի մեջ գտնվող դրույթները և 1997 թվականի հունիսի 27-ի` Դիվանագիտական համաժողովի կողմից կատարված փոփոխությունները միավորող ամփոփված տարբերակ», և որում միավորված են Կոնվենցիայի` 1997 թվականի հունիսի 27-ի դրությամբ ուժի մեջ գտնվող տեքստը և 1997 թվականի հունիսի 27-ին գումարված Դիվանագիտական համաժողովի կողմից կատարված փոփոխությունները:
3. Կոնվենցիան ունի չորս հավելված` հավելված 1. «Գործակալության կանոնադրությունը», հավելված 2. «Թռիչքների տեղեկատվական շրջանները», հավելված 3. «Հարկերին վերաբերող դրույթներ» և հավելված 4. «Օդային փոխադրումների սպասարկման վճարների ընդհանուր համակարգին վերաբերող դրույթներ»:
Հավելված 3-ը փոխարինում է 1970 թվականի հուլիսի 6-ին Բրյուսելում ստորագրված` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիայի լրացուցիչ արձանագրությանը` 1978 թվականի նոյեմբերի 21-ին Բրյուսելում ստորագրված` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիայի 1970 թվականի հուլիսի 6-ի լրացուցիչ արձանագրությունը փոփոխող արձանագրությամբ և 1981 թվականի փետրվարի 12-ին Բրյուսելում ստորագրված` «Ի փոփոխություն 1960 թվականի դեկտեմբերի 13-ի` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիայի» արձանագրության 38 հոդվածով կատարված փոփոխություններով:
Հավելված 4-ը, Կոնվենցիայի համապատասխան դրույթների հետ մեկտեղ, փոխարինում է 1981 թվականի փետրվարի 12-ին Բրյուսելում ստորագրված` Օդային երթուղիների սպասարկման վճարների մասին բազմակողմ համաձայնագրին, որը քննության առարկա արձանագրության ուժի մեջ մտնելու պահից համարվում է ուժը կորցրած:
4. Կոնվենցիայի նպատակն օդային փոխադրումների կառավարման միասնական եվրոպական համակարգի ստեղծումն ու տարբեր երկրների օդային փոխադրումների սպասարկման համակարգերի և ծառայությունների ներդաշնակեցումն ու ինտեգրման ապահովումն է: Ընդ որում, այդ նպատակի իրականացումը չպետք է որևէ կերպ ազդի իր տարածքի վրա գտնվող օդային տարածության նկատմամբ յուրաքանչյուր պետության լիակատար և բացարձակ ինքնիշխանության սկզբունքի կամ իր օդային տարածքում սեփական անվտանգության և պաշտպանության համար անհրաժեշտ քայլեր ձեռնարկելու իր արտոնություններից օգտվելու որևէ պետության իրավունքների վրա:
5. Կոնվենցիայի նպատակների համար հիմնվում է «ԵՎՐԱԿՈՆՏՐՈԼ» Օդանավագնացության անվտանգության եվրոպական կազմակերպություն (այսուհետ` Կազմակերպություն), որը բաղկացած է երեք մարմիններից` Գլխավոր ասամբլեա, որը որոշում և հաստատում է Կազմակերպության ընդհանուր քաղաքականությունը, Խորհուրդ, որն ստանձնում է Գլխավոր ասամբլեայի կողմից ընդունված որոշումների կատարման և վերջինիս իրավասությունների շրջանակներում Պայմանավորվող կողմերին ուղղված և նրանց պարտականությունների մեջ մտնող բոլոր միջոցների կառավարման, ինչպես նաև Գործակալության աշխատանքի վերահսկման պարտականությունները, և Գործակալություն, որն ստանձնում է Կազմակերպության վրա դրված և Գլխավոր ասամբլեայի կամ Խորհրդի կողմից իր վրա դրված խնդիրների իրականացման, ինչպես նաև Կազմակերպության նպատակների իրականացման կապակցությամբ առաջարկություններ ներկայացնելու և համապատասխան տեխնիկական, ֆինանսական և աշխատանքային միջոցների օգտագործման պարտականությունները: Կազմակերպության նստավայրը Բրյուսել քաղաքն է:
Կոնվենցիայի 3-րդ հոդվածի 1-ին կետի համաձայն` Կոնվենցիան կիրառվելու է Կոնվենցիայի 2-րդ հավելվածում թվարկված` թռիչքների տեղեկատվական շրջաններում օդային փոխադրումներն սպասարկող` երթուղում թռիչքի կառավարման համար նախատեսված օդանավագնացության սպասարկման ծառայությունների և դրանց հետ առնչվող` վայրէջքի գոտում և օդանավակայանում թռիչքի կառավարման ծառայությունների նկատմամբ:
Կոնվենցիան սահմանում է Կազմակերպության կարգավիճակը, Գլխավոր ասամբլեայի և Խորհրդի կազմավորման կարգը, իրավասությունները, դրանց կողմից որոշումների ընդունման կարգը, այդ որոշումների իրավաբանական ուժը, դրանցով կարգավորվող հարցերի շրջանակը, Կոնվենցիայի մեկնաբանման, կիրառման կամ կատարման հետ կապված վեճերի լուծման կարգը:
6. Արձանագրությամբ Պայմանավորվող կողմերն ստանձնում են, մասնավորապես, հետևյալ պարտավորությունները.
- Կոնվենցիայի նպատակների համար մշակել օդային փոխադրումների կառավարման ոլորտում միասնական եվրոպական քաղաքականություն,
- որևէ կերպ չսահմանափակել Կազմակերպության պաշտոնական գործունեության առնչությամբ նրա կողմից պատրաստվող կամ նրան ուղարկված հրատարակությունների կամ այլ տեղեկատվական նյութերի տարածումը,
- Կազմակերպությանն ազատել իր հիմնադրմանը, գործունեության դադարեցմանը կամ լուծարմանն առնչվող, ինչպես նաև անշարժ գույքի ձեռքբերման հետ կապված բոլոր տուրքերից, հարկերից և այլ վճարներից,
- Կազմակերպությանն ազատել իրեն, իր ունեցվածքին, ակտիվներին և եկամուտներին վերագրվող բոլոր ուղղակի հարկերից, փոխառությունների թողարկման և իր պարտականությունների կատարման հետևանքով առաջացած բոլոր անուղղակի վճարումներից, բացառիկ կամ խտրական բնույթի ցանկացած հարկումից,
- Կազմակերպությանն ազատել բոլոր տեսակի մաքսատուրքերից, հարկերից կամ համանման նպատակով գանձվող վճարներից, պաշտոնական օգտագործման համար Կազմակերպության շինությունների և օբյեկտների կամ նրա գործունեությունն ապահովելու համար ներմուծված նյութերի, սարքավորումների, ռեսուրսների և այլ առարկաների նկատմամբ ներմուծման կամ արտահանման որևէ արգելքից կամ սահմանափակումից, իր գործունեությանն առնչվող հրատարակությունների նկատմամբ բոլոր տեսակի մաքսատուրքերից և ներմուծման կամ արտահանման որևէ արգելքից կամ սահմանափակումից,
- Կազմակերպության անձնակազմի անդամներին ազատել մաքսատուրքերից և վճարներից` իրենց անձնական օգտագործման իրերը, շարժական գույքը և տնտեսական այլ ապրանքները ներմուծելիս,
- Կազմակերպությանը, նրա Գլխավոր տնօրենին և անձնակազմին ազատել տվյալ պետության սոցիալական ապահովության հիմնադրամին կատարվող բոլոր պարտադիր վճարումներից, և այլ պարտավորություններ:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 1997 թ. հունիսի 27-ին Բրյուսելում ստորագրված` Բազմիցս փոփոխված` 1960 թվականի դեկտեմբերի 13-ի` Օդանավագնացության անվտանգության համար համագործակցության մասին «ԵՎՐԱԿՈՆՏՐՈԼ» միջազգային կոնվենցիան ամփոփող արձանագրության մեջ ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Նախագահող |
Վ. Հովհաննիսյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|