ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ՄԻՋԱԶԳԱՅԻՆ ԶԱՐԳԱՑՄԱՆ ԸՆԿԵՐԱԿՑՈՒԹՅԱՆ ՄԻՋԵՎ 2000 ԹՎԱԿԱՆԻ ՀՈՒԼԻՍԻ 7-ԻՆ ՎԱՇԻՆԳՏՈՆՈՒՄ ՍՏՈՐԱԳՐՎԱԾ ԶԱՐԳԱՑՄԱՆ ՎԱՐԿԻ (ՏՐԱՆՍՊՈՐՏԻ ԾՐԱԳԻՐ) ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
21 հուլիսի 2000 թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Վ. Պողոսյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության տրանսպորտի և կապի նախարարի առաջին տեղակալ Հ. Բեգլարյանի,
համաձայն Հայաստանի Հանրապետության Սահմանադրության 100 հոդվածի 2 կետի և 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «Հայաստանի Հանրապետության և Միջազգային զարգացման ընկերակցության միջև 2000 թվականի հուլիսի 7-ին Վաշինգտոնում ստորագրված Զարգացման վարկի (Տրանսպորտի ծրագիր) համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հայաստանի Հանրապետության Նախագահի դիմումն է սահմանադրական դատարան:
Լսելով սույն գործով զեկուցող` Հայաստանի Հանրապետության սահմանադրական դատարանի անդամ Ա. Գյուլումյանի հաղորդումը, Հայաստանի Հանրապետության Նախագահի ներկայացուցիչ Հ. Բեգլարյանի բացատրությունները, հետազոտելով համաձայնագիրն ու գործում առկա մյուս փաստաթղթերը և ուսումնասիրելով տրանսպորտի ծրագրերի իրականացմանն ուղղված նախկին վարկային համաձայնագրերի իրավակիրառական պրակտիկան, Հայաստանի Հանրապետության սահմանադրական դատարանը ՊԱՐԶԵՑ.
1. Քննության առարկա համաձայնագիրն ստորագրվել է 2000 թվականի հուլիսի 7-ին` Վաշինգտոնում: Ըստ համաձայնագրի` Միջազգային զարգացման ընկերակցությունը տրանսպորտի ծրագրի իրականացման համար Հայաստանի Հանրապետությանը տարբեր տարադրամներով տրամադրելու է քսանինը միլիոն ինը հարյուր հազար փոխառության հատուկ իրավունքներին համարժեք (SDR 29,9 միլիոն) վարկ: Հայաստանի Հանրապետությունը պարտավորվում է պարբերաբար Ընկերակցությանը վճարել պարտավճար` վարկի չառհանված գումարների դիմաց` ոչ ավելի, քան տարեկան 0,5 տոկոսի չափով, և սպասարկման վարձ` վարկի առհանումների և մնացորդի դիմաց` տարեկան 0,75 տոկոսի չափով: Վարկի հիմնագումարը պետք է մարել կիսամյակային մուծումներով` 2010 թվականի դեկտեմբերի 1-ից մինչև 2035 թվականի հունիսի 1-ը:
2. Հայաստանի Հանրապետությունը պարտավորվում է իրագործել Տրանսպորտի ծրագրի նպատակները, անհրաժեշտության դեպքում հնարավորին չափ արագ տրամադրել ծրագրի համար պահանջվող միջոցներ, տարածքներ, ծառայություններ և այլ ռեսուրսներ, Ընկերակցության համար ընդունելի բանկում բացել և պահել ծրագրի հաշիվ և վարկի միջոցներից Հայկական երկաթուղու դեպարտամենտին տրամադրել ենթավարկ:
Տրանսպորտի ծրագրի նպատակներն են` Հայաստանի Հանրապետությունում տրանսպորտի հուսալիության և հիմնական ճանապարհացանցի բարելավումը, տրանսպորտային ծախսերի կրճատումը, Հայաստանի ավտոմոբիլային ճանապարհների գործառնական արդյունավետության բարձրացումը, երկաթուղային ծառայությունների և Հայկական երկաթուղու դեպարտամենտի ֆինանսական և կառավարման աշխատանքների բարելավումը, ինչպես նաև ՀՀ տրանսպորտի և կապի նախարարության պլանավորման հմտությունների ամրապնդումը: Այդ նպատակներով նախատեսվում է վերականգնել ընտրված ճանապարհահատվածները և կամուրջները, ստեղծել ճանապարհային անվտանգության ազգային խորհուրդ, մշակել ճանապարհային պատահարների գրանցման համակարգ, իրականացնել անվտանգության ապահովման տեխնիկական աշխատանքներ, նորոգել Երևանից մինչև Հայաստանի և Վրաստանի սահմաններն ընկած երկաթգծերն ու կամուրջները, իրականացնել քարշերի, բեռնատար և մարդատար վագոնների մանրամասն զննում, փոխել մոտ 150 կմ երկարությամբ հաղորդակցության լարը և նորոգել ենթակայանների սարքավորումները, բաց լարերի փոխարեն անցկացնել 42 կմ երկարությամբ կաբել և տեղադրել համապատասխան սարքավորումներ: Նախատեսվում է նաև տեխնիկական աջակցություն Հայկական երկաթուղու դեպարտամենտին և ՀՀ տրանսպորտի և կապի նախարարությանը:
3. «Սահմանադրական դատարանի մասին» Հայաստանի Հանրապետության օրենքի 67 հոդվածի առաջին մասի հիման վրա ուսումնասիրելով Հայաստանի Հանրապետության և Միջազգային զարգացման ընկերակցության միջև կնքված տրանսպորտի ծրագրերի իրականացմանն ուղղված նախկին վարկային համաձայնագրերի գործադրման իրավակիրառական պրակտիկան, սահմանադրական դատարանը միաժամանակ պարզեց.
1995 թ. հոկտեմբերի 2-ին Հայաստանի Հանրապետության և Միջազգային զարգացման ընկերակցության միջև մայրուղիների ծրագրի վերաբերյալ կնքվել է վարկային համաձայնագիր, իսկ 1997 թ. հուլիսի 17-ին կնքվել է այդ համաձայնագրի փոփոխությունների մասին նոր համաձայնագիր: Նշված երկրորդ համաձայնագրի` Հայաստանի Հանրապետության Սահմանադրությանը համապատասխանության հարցը որոշելու վերաբերյալ գործով 1998 թ. հունվարի 16-ի ՍԴՈ-76 որոշմամբ սահմանադրական դատարանն արձանագրել է, որ առաջին վարկային ծրագրի իրականացման փուլում տեղ են գտել թերացումներ և բացթողումներ, որոնց հաղթահարման ուղղությամբ ձեռնարկված միջոցների վերաբերյալ գործով ներկայացվել են անհրաժեշտ փաստաթղթեր:
4. Սահմանադրական դատարանը միաժամանակ գտնում է, որ ՀՀ կառավարության կողմից նման վարկային ծրագրերի և դրանց կատարման արդյունքների քննարկումն ու գործադիր իշխանության հստակ վերաբերմունքը կարևոր նախադրյալ կհանդիսանան վարկային միջոցների արդյունավետ և նպատակային օգտագործման համար:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. Հայաստանի Հանրապետության և Միջազգային զարգացման ընկերակցության միջև 2000 թվականի հուլիսի 7-ին Վաշինգտոնում ստորագրված Զարգացման վարկի (Տրանսպորտի ծրագիր) համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Հայաստանի Հանրապետության |
Գ. Հարությունյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|