ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
2005 ԹՎԱԿԱՆԻ ՓԵՏՐՎԱՐԻ 25-ԻՆ ԵՐԵՎԱՆՈՒՄ ՍՏՈՐԱԳՐՎԱԾ` ԱՍԻԱԿԱՆ ԶԱՐԳԱՑՄԱՆ ԲԱՆԿԻ ՄԱՍՆԱՎՈՐ ՀԱՏՎԱԾԻ ԳՈՐԾՈՂՈՒԹՅՈՒՆՆԵՐԻ ԵՐԱՇԽԱՎՈՐԱԳԻՐ-ՆԱՄԱԿՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
29 ապրիլի 2005 թ. |
Հայաստանի Հանրապետության սահմանադրական դատարանը` կազմով. նախագահող` սահմանադրական դատարանի նախագահ Գ. Հարությունյանի, սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Կ. Բալայանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի (զեկուցող),
մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության ֆինանսների և էկոնոմիկայի նախարարի տեղակալ Դ. Ավետիսյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 21 հոդվածի, 25 հոդվածի 1 կետի և 56 և 67 հոդվածների,
դռնբաց նիստում քննեց «2005 թվականի փետրվարի 25-ին Երևանում ստորագրված` Ասիական զարգացման բանկի մասնավոր հատվածի գործողությունների երաշխավորագիր-նամակում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հանրապետության Նախագահի դիմումն է ՀՀ սահմանադրական դատարան:
Լսելով սույն գործով զեկուցողի հաղորդումը, Հանրապետության Նախագահի ներկայացուցչի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Սույն Երաշխավորագիր-նամակն ստորագրվել է 2005 թ. փետրվարի 25-ին` Երևանում:
Երաշխավորագիր-նամակի նպատակը Ասիական զարգացման բանկի Հայաստանի Հանրապետությունում ներդրումային գործողություններ իրականացնելու համար իրավական հիմք ստեղծելն է:
2. Երաշխավորագիր-նամակը սահմանում է, որ մասնավոր հատվածի ներդրումային գործողությունները ներառում են մասնավոր հատվածին վարկերի տրամադրում, հիշյալ Բանկի կողմից երաշխիքների տրամադրում, մասնավոր հատվածում բաժնետոմսերի ներդրումներ` առևտրային պայմաններով և առանց կառավարական երաշխիքների:
Երաշխավորագիր-նամակը սահմանում է նաև, որ հիշյալ Բանկի հիմնադիր համաձայնագրի դրույթները կիրառելի են Բանկի ներդրումային գործողությունների նկատմամբ` Բանկի և Հայաստանի Հանրապետության կառավարության փոխհամաձայնության դեպքում:
3. Երաշխավորագիր-նամակով նախատեսված են Հայաստանում թողարկված արժեթղթերի տեղաբաշխման ժամանակ Բանկի մասնակցության կամ տեղաբաշխման իրավունքը, ինչպես նաև Բանկի վարկերի երաշխիք գրավադրված գույքի նկատմամբ սեփականության ձեռք բերումը:
4. Երաշխավորագիր-նամակով Հայաստանի Հանրապետության կառավարությունը պարտավորվում է, մասնավորապես,
- ապահովել Բանկի հիմնադիր համաձայնագրի` Բանկի կարգավիճակը, նրա անձնակազմի արտոնություններն ու անձեռնմխելիությունները սահմանող 8-րդ գլխի դրույթների կիրառումը իր տարածքում,
Բանկի ներդրումները և երաշխիքներն ազատել սահմանափակումներից, կարգավորումներից, հսկողությունից կամ ցանկացած տեսակի վճարի հետաձգումից,
- ազատել Բանկին հարկումից կամ հարկային պահումներից և գանձումներից,
- թույլատրել Բանկին` տեղաբաշխել կամ մասնակցել Հայաստանում թողարկված արժեթղթերի տեղաբաշխմանը,
- Բանկի պահանջով նշանակել նրա համար ընդունելի գործակալություն,
- ճանաչել Բանկի սեփականության իրավունքը ցանկացած գույքի կամ գույքային իրավունքի նկատմամբ,
- որպես սուբրոգացիա Բանկի ձեռք բերած` ՀՀ արժույթով գումարներին` դրանց օգտագործման, փոխարկման և արտահանման կապակցությամբ, տրամադրել այնպիսի բարենպաստ վիժակ, որը կտրամադրվեր Բանկի ֆինանսական միջոցներին, եթե դրանք ստացված լինեին Հայաստանի Հանրապետությունում Բանկի ուղղակի փոխառություններից:
5. Երաշխավորագիր-նամակում նշված երաշխիքները, յուրաքանչյուր փոխառության կամ բաժնետիրական կապիտալի ներդրումների համար Բանկը բոլոր անհրաժեշտ ընթացակարգային ձևակերպումները կիրականացնի ըստ ՀՀ գործող օրենքների:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 2005 թվականի փետրվարի 25-ին Երևանում ստորագրված` Ասիական զարգացման բանկի մասնավոր հատվածի գործողությունների երաշխավորագիր-նամակում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Նախագահող |
Գ. Հարությունյան |
|
|