ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳԵՐԱԳՈՒՅՆ ԽՈՐՀՈՒՐԴ
Ո Ր Ո Շ ՈՒ Մ
«ՆԱԻՐԻՏ» ԳԻՏԱԱՐՏԱԴՐԱԿԱՆ ՄԻԱՎՈՐՄԱՆ ԱՐՏԱԴՐՈՒԹՅՈՒՆՆԵՐԻ ԳՈՐԾԱՐԿՄԱՆ ՄԱՍԻՆ
Քննարկելով Հայաստանի Հանրապետության Նախարարների խորհրդի առաջարկը «Նաիրիտ» գիտաարտադրական միավորման քլորոպրենային կաուչուկների և լատեքսների արտադրությունների գործարկման վերաբերյալ, Հայաստանի Հանրապետության Գերագույն խորհուրդը որոշում է.
1. Թույլատրել Հայաստանի Հանրապետության Նախարարների խորհրդին շահագործել «Նաիրիտ» ԳԱՄ-ի քլորոպրենային կաուչուկների և լատեքսների արտադրությունները` մինչև 1995 թվականի դեկտեմբերի 31-ը առկա հզորությունների սահմաններում, պահպանելով գործող բնապահպանական նորմաները:
2. Հայաստանի Հանրապետության Նախարարների խորհրդին` 1991 թվականի ընթացքում լուծել «Նաիրիտ» ԳԱՄ-ը ամբողջովին հանրապետությանը ենթարկելու հարցը:
3. Հայաստանի Հանրապետության Նախարարների խորհրդին` մեկ տարվա ընթացքում հաստատել միավորման վերամասնագիտացված ծրագիր` 1992 թվականից սկսած հանրապետության սոցիալ-տնտեսական ծրագրերում նախատեսելով համապատասխան միջոցառումներ:
4. Ստեղծել Հայաստանի Հանրապետության Գերագույն խորհրդի ենթակայության տակ գործող բնապահպանական մարմին:
Գերագույն խորհրդի բնության պահպանության և բնական պաշարների հարցերի մշտական հանձնաժողովին` մեկամսյա ժամկետում Գերագույն խորհրդի հաստատմանը ներկայացնել վերոհիշյալ մարմնի կառուցվածքն ու ֆունկցիաները:
5. Հայաստանի Հանրապետության Նախարարների խորհրդին` «Նաիրիտ» ԳԱՄ-ի գործունեությունից ստացվող ամբողջ շահութահարկն ուղղել Երևան քաղաքի հարավային արդյունաբերական շրջանի և հարակից բնակավայրերի բնակչության սոցիալ-կենցաղային հարցերի լուծմանը: Այդ ուղղությամբ ձեռնարկվող միջոցառումների ծրագիրը 3-ամսյա ժամկետում ներկայացնել Գերագույն խորհրդի հաստատմանը:
6. Ուժը կորցրած համարել ՀԽՍՀ Գերագույն խորհրդի 1989 թվականի հունիսի 25-ի որոշումը «Նաիրիտ» ԳԱՄ-ին վերաբերող մասում:
| Հայաստանի Հանրապետության Գերագույն խորհրդի նախագահ | Լ. Տեր-Պետրոսյան |
Հայաստանի Հանրապետության Գերագույն խորհրդի քարտուղար |
Ա. Սահակյան |
|
|