ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«20» օգոստոսի 2024 թ․

թիվ 10-Ն

«Մասնավոր պահնորդական գործունեության մասին» օրենքի 16-րդ հոդվածի 3-րդ մասի համաձայն՝

1. Սահմանել պահնորդների և թիկնապահների կողմից իրենց պարտականությունները կատարելիս հատուկ միջոցների մարտավարական գործադրման կարգը՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը։

Պարտականությունները կատարող`

Ս. Սարգսյան   «20» օգոստոսի 2024 թ. ք․ Երևան

Հավելված Հայաստանի Հանրապետության ներքին գործերի նախարարի 2024 թվականի օգոստոսի 20-ի  թիվ 10-Ն հրամանի

1. Սույն կարգով կարգավորվում են պահնորդների և թիկնապահների կողմից իրենց պարտականությունները կատարելիս հատուկ միջոցների մարտավարական գործադրման հետ կապված հարաբերությունները:

2. Պահնորդները և թիկնապահներն իրենց պարտականությունները կատարելիս իրավունք ունեն գործադրել հետևյալ հատուկ միջոցները.

1) ռետինե մահակներ․

2) ձեռնաշղթաներ․

3) տրանսպորտային միջոցը հարկադիր կանգնեցնելու միջոցներ․

4) պահնորդական շներ:

3. Իր պարտականությունները կատարելիս պահնորդը (թիկնապահը) հատուկ միջոցներ կարող է գործադրել հետևյալ դեպքերում.

1) իր կամ պահպանվող անձի կյանքին և առողջությանն անմիջականորեն սպառնացող հարձակումը խափանելիս.

2) իր կամ պահպանվող անձի (գույքի) դեմ ուղղված հարձակումը կանխելիս, երբ հարձակվողը ցույց է տալիս ֆիզիկական դիմադրություն.

3) պահպանվող օբյեկտ մուտք գործելու փորձ կատարող տրանսպորտային միջոցը կանգնեցնելու անհրաժեշտությունից ելնելով, եթե վարորդը չի կատարում մեքենան կանգնեցնելու վերաբերյալ պահնորդի (թիկնապահի) օրինական պահանջը.

4) պահնորդի (թիկնապահի) հատուկ միջոցներին տիրանալու փորձը կանխելիս:

4. Արգելվում է հատուկ միջոցների գործադրումը հղիության նկատելի նշաններ ունեցող կանանց, հաշմանդամություն ունեցող անձանց, անչափահասների նկատմամբ, եթե նրանց տարիքն ակնհայտ է կամ հայտնի է պահնորդին (թիկնապահին), բացառությամբ նրանց կողմից զինված դիմադրություն ցույց տալու, պահնորդի (թիկնապահի) կամ պահպանվող այլ անձի կյանքին կամ առողջությանը, պահպանվող օբյեկտի անվտանգությանը սպառնացող զինված կամ խմբակային այլ հարձակումը կանխելու դեպքերի։

5. Անհրաժեշտ պաշտպանության կամ ծայրահեղ անհրաժեշտության պայմաններում հատուկ միջոցների բացակայության դեպքում պահնորդը (թիկնապահը) իրավունք ունի օգտագործել ձեռքի տակ եղած բոլոր հնարավոր միջոցները:

6. Հատուկ միջոցների գործադրման ընտրությունը կատարելիս պահնորդն (թիկնապահը) առաջնորդվում է` ելնելով ստեղծված իրավիճակից և ոտնձգության բնույթից` ղեկավարվելով պահպանվող օբյեկտի կամ անձի պաշտպանությունն առավել հուսալի և անվտանգ իրականացնելու անհրաժեշտությամբ:

7. Պահնորդը (թիկնապահը) հատուկ միջոցներ գործադրելուց առաջ պարտավոր է նախազգուշացնել դրանք գործադրելու մասին` բավարար ժամանակ տրամադրելով իր օրինական պահանջները կատարելու և ոտնձգությունը դադարեցնելու համար, բացառությամբ այն դեպքերի, երբ դրանց գործադրման հապաղումն անմիջական սպառնալիք է ստեղծում պահպանվող անձի կամ իր կյանքի ու առողջության համար կամ կարող է առաջացնել այլ ծանր հետևանքներ կամ երբ ստեղծված իրավիճակում այդպիսի նախազգուշացումն անհնար է:

8. Հատուկ միջոցների օգտագործման յուրաքանչյուր դեպք պետք է լինի իրավաչափ և խիստ հիմնավոր:

9. Պահնորդի (թիկնապահի) կողմից հատուկ միջոցներ գործադրելու մտադրության մասին նախազգուշացումներ անելու առաջարկելի ձևակերպումները հետևյալն են.

1) «Խոսում է պահնորդը (թիկնապահը): Դադարեցրեք (հեռացեք), այլապես կգործադրվեն հատուկ միջոցներ (նշել տեսակը)»,

2) «Խոսում է պահնորդը (թիկնապահը): Դադարեցրեք (հեռացեք), այլապես կգործադրվեն հատուկ միջոցներ (նշել տեսակը): Այլևս նախազգուշացում չի լինելու:

10. Պահնորդը (թիկնապահը) պարտավոր է`

1) ելնելով ոտնձգության բնույթից` ձգտել, որ ոտնձգություն կատարած անձին պատճառվող վնասը հասցվի նվազագույնի․

2) անհապաղ ապահովել (ցուցաբերել) առաջին օգնություն այն անձին, որի առողջությանը պատճառվել է վնաս, և անհրաժեշտության դեպքում հրավիրել շտապ օգնության ծառայություն․

3) հատուկ միջոցների գործադրմամբ անձին պատճառած մարմնական վնասվածքի կամ մահվան դեպքում անհապաղ տեղեկացնել իր ղեկավարին և ոստիկանությանը:

11. Պահնորդի (թիկնապահի) կողմից օրենքով չնախատեսված դեպքերում կամ սահմանների անցումով հատուկ միջոցների գործադրումը առաջացնում է պատասխանատվություն` օրենքով սահմանված կարգով:

3. ՀԱՏՈՒԿ ՄԻՋՈՑՆԵՐԻ ԳՈՐԾԱԴՐՄԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ

12. Ռետինե մահակներ` նախատեսված են տարբեր իրավիճակներում ինքնապաշտպանական արագ և կանխարգելիչ գործողություններ իրականացնելու համար: Արգելվում է ռետինե մահակներով հարվածներ հասցնել իրավախախտի գլխին, պարանոցին, որովայնի և սեռական օրգանների հատվածներում, բացառությամբ կյանքին և առողջությանը սպառնացող հարձակումներից պաշտպանվելու դեպքերից:

13. Ձեռնաշղթաներ` նախատեսված են իրավախախտի ակտիվ ֆիզիկական գործողությունները սահմանափակելու համար: Գործադրման ընթացքում անհրաժեշտ է երկու ժամը մեկ ստուգել ձեռնաշղթայի փականների վիճակը, անհրաժեշտության դեպքում թուլացնել սեղմվածքը:

14. Տրանսպորտային միջոցների հարկադիր կանգնեցման միջոցներ` նախատեսված են պահպանվող օբյեկտ մուտք գործելու փորձ կատարող տրանսպորտային միջոցը կանգնեցնելու համար, եթե վարորդը չի կատարում մեքենան կանգնեցնելու վերաբերյալ պահնորդի (թիկնապահի) օրինական պահանջը: Նշված միջոցները արգելվում է գործադրել`

1) շտապ բժշկական օգնության ծառայության ավտոմեքենաների նկատմամբ․

2) մարդկանց փոխադրում իրականացնող ընդհանուր օգտագործման տրանսպորտային միջոցների և մարդկանց տեղափոխող բեռնատար ավտոմոբիլների նկատմամբ.

3) մոտոցիկլների, մոտոսայլակների և մոպեդների նկատմամբ.

4) լեռնային ճանապարհներին կամ ճանապարհի սահմանափակ տեսանելիությամբ հատվածներում.

5) երկաթուղային գծանցներում, թունելներում, կամուրջների, ուղետարների և էստակադաների վրա:

15. Պահնորդական շները օգտագործվում են «Մասնավոր պահնորդական գործունեության մասին» օրենքով նախատեսված դեպքերում՝ հոգեբանաֆիզիոլոգիական ազդեցության միջոցով կանխարգելիչ և վնասազերծող գործողություններ իրականացնելու համար: Արգելվում է պահնորդական շների օգտագործումը տրանսպորտի, կապի և այլ կազմակերպությունների աշխատանքը կազմալուծող զանգվածային անկարգությունների և խմբակային գործողությունների խափանման ընթացքում:

4. ՀԱՏՈՒԿ ՄԻՋՈՑՆԵՐԻ ՊԱՀՊԱՆՈՒՄԸ

16. Հատուկ միջոցները (բացի պահնորդական շներից) պահվում են թիկնապահական և պահնորդական գործունեություն իրականացնող կազմակերպության պահասենյակներում` համապատասխան արկղերում կամ դարակաշարերի վրա, գործարանային փաթեթավորման մեջ: Հատուկ միջոցների պահպանության համար անմիջական պատասխանատվություն է կրում թիկնապահական և պահնորդական գործունեություն իրականացնող կազմակերպության ղեկավարի հրամանով նշանակված անձը:

17. Հատուկ միջոցները պահպանվում են մինչև դրանց մարտավարատեխնիկական տվյալներով նախատեսված ժամկետի լրանալը:

18. Արգելվում է շահագործման համար ոչ պիտանի հատուկ միջոցների օգտագործումը:

19. Շահագործման համար ոչ պիտանի հատուկ միջոցների վերաբերյալ կազմվում է համապատասխան արձանագրություն: Նշված հատուկ միջոցները և արձանագրությունը հանձնվում են ոստիկանությանը, որից հետո ոչնչացվում են սահմանված կարգով:

5. ՀԱՏՈՒԿ ՄԻՋՈՑՆԵՐԻ ՀԱՏԿԱՑՈՒՄԸ

20. Հատուկ միջոցները հատկացվում են հատուկ միջոցների հաշվառման մատյանում (Ձև) գրառում կատարելուց հետո` ստացողի ստորագրությամբ:

21. Հատուկ միջոցների օգտագործման ավարտից հետո պահնորդը (թիկնապահը) դրանք հանձնում է թիկնապահական և պահնորդական գործունեություն իրականացնող կազմակերպության պահասենյակների պահպանության համար պատասխանատու անձին:

Ձև

Հատուկ միջոցների հաշվառման մատյան

Պաշտոնական հրապարակման օրը՝ 23 օգոստոսի 2024 թվական: