ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

Հ Ր Ա Մ Ա Ն

«14» մայիսի 2024 թ.

N 44-Ն

Հիմք ընդունելով «Նորմատիվ իրավական ակտերի մասին» օրենքի 33-րդ, 34-րդ հոդվածները՝

ՀՐԱՄԱՅՈՒՄ ԵՄ

1. Հայաստանի Հանրապետության կրթության և գիտության նախարարի 2010 թվականի մարտի 18-ի «Պետական ուսումնական հաստատության կոլեգիալ կառավարման մարմնի՝ խորհրդի ձևավորման կարգը հաստատելու և Հայաստանի Հանրապետության կրթության և գիտության նախարարի 2006 թվականի դեկտեմբերի 8-ի N 981-Ն հրամանը ուժը կորցրած ճանաչելու մասին» N 113-Ն հրամանի հավելվածը շարադրել նոր խմբագրությամբ՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

Նախարար`   5/14/2024

Ժ. ԱՆԴՐԵԱՍՅԱՆ

Հավելված  ՀՀ կրթության, գիտության,  մշակույթի և սպորտի նախարարի 2024 թվականի մայիսի 14-ի N 44-Ն հրամանի

«Հավելված  ՀՀ կրթության և գիտության  նախարարի 2010 թվականի մարտի 18-ի N 113-Ն հրամանի»

1. Սույն կարգով կարգավորվում են պետական ուսումնական հաստատության կոլեգիալ կառավարման մարմնի՝ խորհրդի (այսուհետ՝ խորհուրդ) ձևավորման հետ կապված իրավահարաբերությունները։

2. Պետական ուսումնական հաստատության (այսուհետ` հաստատություն) հիմնվելու դեպքում Հայաստանի Հանրապետության կրթության, գիտության, մշակույթի և սպորտի նախարարությունը (այսուհետ՝ նախարարություն), մարզպետի աշխատակազմը և Երևանի քաղաքապետարանը (այսուհետ` լիազորված մարմին) հաստատության հիմնադրման կամ խորհրդի ձևավորման կարգի փոփոխման դեպքերում 30-օրյա ժամկետում, սույն կարգի համաձայն, ըստ ենթակայության կազմակերպում և ապահովում են հաստատության խորհրդի անդամների ընտրության գործընթացը:

3. Խորհուրդը ձևավորվում է 3 տարի ժամկետով՝

1) իբրև առանձին խորհուրդ, եթե հաստատությունում սովորողների թիվը 1500 և ավելի է.

2) իբրև միասնական խորհուրդ՝ միավորելով միևնույն ենթակայության մինչև 1499 սովորող ունեցող առավելագույնը 7 հաստատություն, որոնցում սովորողների ընդհանուր թիվը չի գերազանցում 2500-ը:

4․ Խորհրդի գործունեության եռամյա ժամկետի ընթացքում, եթե առաջանում է սովորողների թվի փոփոխություն, ապա խորհրդում ներառված հաստատությունների ցանկում փոփոխություն տեղի չի ունենում:

5. Խորհրդի անդամներին առաջադրում են.

1) Հայաստանի Հանրապետության կրթության, գիտության, մշակույթի և սպորտի նախարարը (այսուհետ՝ նախարար),

2) համապատասխան լիազորված մարմինը,

3) յուրաքանչյուր հաստատության մանկավարժական խորհուրդը,

4) յուրաքանչյուր հաստատության ծնողական խորհուրդը,

5) համայնքի ղեկավարը:

6. Ուսումնական հաստատության տեղակայման վայրի համայնքից խորհրդի կազմում կարող է ներգրավվել կենսաթոշակի անցած՝ հանրակրթության ոլորտի փորձառու մասնագետ կամ ուսուցչական արհեստակցական միության ներկայացուցիչ՝ համայնքի ղեկավարի առաջարկով:

7. Հատուկ դպրոց-ռեսուրս կենտրոնի խորհրդի կազմում ընդգրկվում է նաև հաշմանդամության համապատասխան ուղղությամբ մասնագետ:

8. Նախարարը մարզպետի աշխատակազմի և Երևանի քաղաքապետարանի ենթակայության հաստատությունների խորհուրդներում առաջադրում է մեկական անդամ, իսկ նախարարության ենթակայության հաստատությունների խորհրդում՝ երկուական անդամ:

9. Մարզերում նախարարության ենթակայությամբ գործող հաստատությունները միավորվում են մեկ միասնական խորհրդում՝ պահպանելով սույն կարգի պահանջները:

10. Խորհուրդներում, ըստ ենթակայության, առաջադրվում է համապատասխան լիազորված մարմնի մեկ անդամ։

11. Հաստատության մանկավարժական և ծնողական խորհուրդներն իրենց կազմից փակ քվեարկությամբ ընտրում են խորհրդի մեկական անդամ:

12. Հաստատության խորհրդի կազմում նախարարի, համապատասխան լիազորված մարմնի, համայնքի ղեկավարի, մանկավարժական խորհրդի և ծնողական խորհրդի կողմից չի կարող առաջադրվել տվյալ հաստատության աշխատակից համարվող անձը:

13. Հաստատության տնօրենը և վարչատնտեսական մասի համակարգողը չեն կարող լինել տվյալ հաստատության խորհրդի կամ այն միասնական խորհրդի կազմում, որում ընդգրկված է տվյալ հաստատությունը:

14. Խորհրդի անդամի լիազորությունները, լիազորությունների դադարեցման հիմքերը, պարտականությունները սահմանվում են «Հանրակրթության մասին» օրենքով և Հայաստանի Հանրապետության կառավարության 2002 թվականի հուլիսի 25-ի N 1392-Ն որոշմամբ:

15. Սույն կարգի 3-րդ կետով սահմանված ժամկետը լրանալուց 15 աշխատանքային օր առաջ խորհրդի անդամին առաջադրող մարմինը, սույն կարգի պահանջներին համապատասխան, առաջադրում է խորհրդի անդամի նոր թեկնածու:

16. Հաստատության ենթակայության փոփոխության դեպքում 15 աշխատանքային օրվա ընթացքում լիազորված մարմնի կողմից առաջադրված խորհրդի անդամների ընդգրկվածության համամասնությունը և խորհրդի անդամների առաջադրումը համապատասխանեցվում է սույն կարգի 10-րդ կամ 12-րդ կետերի պահանջներին:

17. Լիազորված մարմինը, հիմք ընդունելով առաջադրող մարմնի կողմից ներկայացված խորհրդի անդամի թեկնածուի տվյալները, սույն կարգի 15-րդ կետի պահանջներին համապատասխան՝ 5 աշխատանքային օրվա ընթացքում, ըստ ենթակայության, հաստատում է խորհրդի անվանական կազմը կամ սույն կարգի 11-րդ, 12-րդ և 13-րդ կետերի պահանջների խախտման առկայության դեպքում մերժում է խորհրդի անվանական կազմում առաջադրված անձի թեկնածությունը:

18. «Հանրակրթության մասին» օրենքով սահմանված դեպքերում՝ խորհրդի անդամի լիազորությունների դադարեցման կամ լիազորված մարմնի կողմից խորհրդի անվանական կազմում սույն կարգի 11-րդ, 12-րդ և 13-րդ կետերի պահանջների խախտմամբ առաջադրված անձի թեկնածությունը մերժելու դեպքերում, նրան առաջադրող մարմինը 5 աշխատանքային օրվա ընթացքում առաջադրում է խորհրդի անդամի նոր թեկնածու` սույն կարգի 17-րդ կետի պահանջներին համապատասխան:

19. «Հանրակրթության մասին» օրենքով սահմանված դեպքերում սույն կարգի 3-րդ կետով նախատեսված ժամկետից շուտ խորհրդի անդամի լիազորությունները դադարեցվելու դեպքում խորհրդի նոր անդամի լիազորություններն ավարտվում են խորհրդի լիազորությունների ժամկետի ավարտի հետ միաժամանակ:

20. Խորհրդի առաջին նիստը վարում է խորհրդի՝ տարիքով ավագ անդամը:

21. Խորհրդի նիստն իրավազոր է, եթե դրան մասնակցում է խորհրդի անդամների առնվազն կեսից ավելին։

22. Խորհրդի որոշումներն ընդունվում են խորհրդի նիստին մասնակցող անդամների կեսից ավելի ձայների դեպքում։

23. Խորհուրդը փակ քվեարկությամբ ընտրում է խորհրդի նախագահ` խորհրդի անդամների ընդհանուր թվի ձայների մեծամասնությամբ:

24. Եթե քվեարկության արդյունքում որևէ թեկնածու չի ստանում սույն կարգի 23-րդ կետով նախատեսված ձայները, ապա 2 աշխատանքային օրվա ընթացքում անցկացվում է նոր քվեարկություն:

25. Նոր քվեարկության արդյունքում ևս խորհրդի նախագահ չընտրվելու դեպքում ընտրված է համարվում առավել ձայներ ստացած թեկնածուն, իսկ հավասար ձայների դեպքում խորհրդի նախագահը որոշվում է վիճակահանությամբ: Հավասար ձայներ ստացած թեկնածուների անուններով թերթիկներից մեկը խորհրդի կազմում ընդգրկված տարիքով ամենակրտսեր ներկայացուցչի կողմից դուրս է բերվում պատահականության սկզբունքով:

26. Խորհրդի նախագահի առաջադրմամբ և խորհրդի անդամների ձայների պարզ մեծամասնությամբ ընտրվում է քարտուղար, որն արձանագրում է խորհրդի նիստերը։ Քարտուղարը խորհրդի յուրաքանչյուր նիստից առնվազն 5 աշխատանքային օր առաջ խորհրդի նիստի օրվա, վայրի և ժամի և օրակարգի մասին գրավոր ծանուցում է յուրաքանչյուր անդամի։

27. Խորհրդի նիստերը գումարվում են խորհրդի՝ սույն կարգի 22-րդ կետով սահմանված պահանջներին համապատասխան ընդունված որոշմամբ ընտրված հաստատությունում՝ յուրաքանչյուր եռամսյակում առնվազն մեկ անգամ (առկա կամ հեռավար)՝ ըստ խորհրդի կողմից հաստատված ժամանակացույցի, ինչպես նաև խորհրդի նախագահի կողմից` սեփական նախաձեռնությամբ, լիազորված մարմնի, հաստատության տնօրենի կամ խորհրդի անդամների մեկ երրորդի նախաձեռնությամբ: Նիստը գումարվում է նախաձեռնողների սահմանած ժամկետում և օրակարգով: Տնօրենին անվստահություն հայտնելու որոշումն ընդունվում է խորհրդի անդամների առնվազն երկու երրորդի կողմ ձայների առկայության դեպքում:

Պաշտոնական հրապարակման օրը՝ 17 մայիսի 2024 թվական: