ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

19 սեպտեմբերի 2023 թ. քաղ. Երևան

N 556-Ն

Հ Ր Ա Մ Ա Ն

Ղեկավարվելով ««Նոտարիատի մասին» օրենքում լրացումներ և փոփոխություն կատարելու մասին» ՀՕ-229-Ն օրենքի 82.5-րդ հոդվածի 2-րդ մասով.

ՀՐԱՄԱՅՈՒՄ ԵՄ՝

1. Սահմանել նոտարների միջև գումարի բռնագանձման պահանջով կարգադրություն արձակելու մասին դիմումների հավասարաչափ բաշխման և վերաբաշխման չափանիշները և կարգը ՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող տասներորդ օրը։

Գ. Մինասյան

Հավելված Արդարադատության նախարարի 2023 թվականի սեպտեմբերի 19-ի N 556-Ն հրամանի

1. Հայաստանի Հանրապետության Նոտարական պալատում ստացված գումարի բռնագանաձման պահանջով կարգադրություն արձակելու վերաբերյալ դիմումները (այսուհետ՝ Դիմումներ) նոտարների միջև բաշխելիս հատուկ համակարգչային ծրագիրը (այսուհետ՝ Ծրագիր) հիմք է ընդունում գործերի հավասարաչափ բաշխման հետևյալ չափանիշները՝

1) դիմումների բաշխման պատահականությունը` Ծրագրում ապահովելով նոտարների միջև գործերը բաշխելիս պատահական ընտրությունը` առանց գործերի մուտքագրման հաջորդականությունը հաշվի առնելու,

2) գործերի բաշխման հավասարությունը՝ Ծրագրում ապահովելով նոտարների միջև գործերի բաշխման տվյալ օրվան նախորդող 365-օրյա ժամանակահատվածը` նոտարներից յուրաքանչյուրին բաշխված դիմումների միջին քանակի համահարթեցմանը համապատասխան,

3) գաղտնիությունը` Ծրագրում ապահովելով նոտարների միջև գործեր բաշխելիս, վերաբաշխելիս օրենքով պահպանվող, այդ թվում՝ պետական գաղտնիք պարունակող տվյալների գաղտնիությունը:

2. Գումարի բռնագանձման պահանջով կարգադրություն արձակելու վերաբերյալ դիմումները բաշխվում են Նոտարական պալատի բոլոր նոտարների միջև Ծրագրի միջոցով՝ անկախ նրանց սպասարկման տարածքից:

3. Նոտարների միջև դիմումները բաշխվում են տվյալ օրվան նախորդող 365-օրյա ժամանակահատվածում (բացառությամբ ժամանակավոր բացակայության մեջ գտնվող կամ գործունեությունը կասեցրած նոտարների) նոտարներից յուրաքանչյուրին բաշխված դիմումների միջին քանակի համահարթեցմամբ: Տվյալ օրը նոտարների միջև բաշխված դիմումների միջև տարբերությունը չի կարող գերազանցել 20 տոկոսը:

4. Նույն անձանց միջև և նույն պահանջով ներկայացված դիմումները, որոնք վերադարձվել են նոտարի կողմից և գումարի բռնագանձման պահանջով կարգադրություն չի արձակվել՝ Ծրագրի միջոցով բաշխվում են այն նույն նոտարին, որին նախկինում բաշխված են եղել (նշված դեպքերում ստացված դիմումները որպես նոր դիմում չեն հաշվարկվում): Այն դեպքերում, երբ տվյալ նոտարը «Նոտարիատի մասին» օրենքի 18-րդ հոդվածով սահմանված հիմքերից մեկով ժամանակավոր բացակայում է կամ նրա գործունեությունը կասեցվել, դադարել կամ դադարեցվել է, բաշխումը կատարվում է սույն որոշմամբ սահմանված ընդհանուր կարգով:

5. Եթե նոտարը արձակուրդի մեջ է (ներառյալ՝ արձակուրդին նախորդող տասնօրյա ժամանակահատվածը) կամ բացակայում է կամ գործուղվել է այլ նոտարական տարածք (ներառյալ՝ գործուղմանը նախորդող տասնօրյա ժամանակահատվածը, ինչպես նաև գործուղման ժամանակահատվածի ավարտին նախորդող մեկամսյա ժամկետը) կամ բացակայում է ժամանակավոր անաշխատունակության հետևանքով, կամ նրա լիազորությունները կասեցվել են, ինչպես նաև առկա են «Նոտարիատի մասին» օրենքով սահմանված այլ դեպքեր, ապա այդ նոտարի անուն-ազգանունը համապատասխան ժամկետով, հանվում է բաշխման ցանկից` նշելով իրավական հիմքը և ժամկետը: Այն դեպքերում, երբ նոտարի՝ արձակուրդում, այլ նոտարական տարածք գործուղման մեջ գտնվելու իրավական հիմքն առաջանում է «Նոտարիատի մասին» օրենքով սահմանված վերոնշյալ տասնօրյա ժամկետի չպահպանմամբ, ապա տվյալ նոտարի անուն-ազգանունը բաշխման ցանկից հանվում է համապատասխան իրավական հիմքն առաջանալու պահից: Վերապատրաստման դասընթացներին մասնակցելու դեպքում նոտարի անուն-ազգանունը գործերի բաշխման ցանկից հանվում է վերապատրաստման դասընթացներին նախորդող աշխատանքային օրը:

6. Նոտարը, ելնելով իր ծանրաբեռնվածությունից կամ հարգելի այլ պատճառների առկայության դեպքում, կարող է դիմել Նոտարական պալատ՝ առաջարկելով իր անուն-ազգանունը ժամանակավորապես հանել բաշխման ցանկից կամ սահմանել իրեն բաշխվելիք գործերի առանձին տոկոսաչափ: Նոտարի դիմումը հիմնավոր համարելու դեպքում Նոտարական պալատը որոշում է կայացնում տվյալ նոտարի անուն-ազգանունը Դիմումների բաշխման ցանկից ժամանակավորապես հանելու կամ նրան բաշխվելիք դիմումների առանձին տոկոսաչափ նախատեսելու վերաբերյալ՝ դրա համար սահմանելով որոշակի ժամանակահատված, որը չի կարող գերազանցել յուրաքանչյուր տարվա համար երեք ամիսը:

7. Նախապես հայտնի 20 և ավելի աշխատանքային օր անաշխատունակության մեջ գտնվելու հիմքով անընդմեջ բացակայող նոտարին հանձնված և դեռևս դիմումին ընթացք չտված, նախապես հայտնի 30 և ավելի աշխատանքային օր անաշխատունակության մեջ գտնվելու հիմքով անընդմեջ բացակայող նոտարին հանձնված և պարտապանին ծանուցված, ինչպես նաև նպատակային՝ հղիության և ծննդաբերության արձակուրդում գտնվելու հետևանքով վեց ամիս և ավելի ժամկետով անընդմեջ բացակայող նոտարին հանձնված (դեռևս դիմումին ընթացք չտրված, պարտապանին ծանուցված ընդունված) դիմումների վերաբաշխման հարցը լուծվում է Ծրագրի միջոցով՝ դիմումների քննության ողջամիտ ժամկետների պահպանման նպատակով նոտարի կողմից ներկայացված հիմնավոր դիմումի հիման վրա: Նոտարի հերթական արձակուրդի, ինչպես նաև սույն կետով նշված ժամկետից պակաս ժամկետով բացակայելու դեպքում նոտարին հանձնված դիմումները չեն վերաբաշխվում:

8. Նոտարական պալատում նոտարների թվի ավելացման դեպքերում ստացված դիմումները վերաբաշխվում են ավելացած նոտարների միջև: Դրանք ենթական են վերաբաշխման միայն այն դեպքերում, երբ նշված դիմումներով դեռևս որևէ գործողություն չի կատարվել: Ծրագիրը նոտարների միջև գործերի հավասարաչափ բաշխումն ապահովելու նպատակով ավելացած նոտարին շարունակում է գործեր բաշխել ընդհանուր կարգով` առանց հաշվի առնելու ավելացած նոտարներին վերաբաշխված դիմումների քանակը:

9. Վերաբաշխման ենթակա դիմումները Ծրագրի միջոցով պատահական ընտրությամբ հնարավորինս հավասարաչափ վերաբաշխվում են նոտարների միջև:

10. Դիմումների վերաբաշխման պատուհանում պարտադիր պետք է նշվի վերաբաշխման հստակ որոշված դեպքը (օրինակ` ժամանակավոր անաշխատունակություն, նոտարի լիազորությունների դադարեցում կամ կասեցում և այլն) և դիմումը վերաբաշխելիս պետք է ընտրվի նշված հիմքերից մեկը: Վերաբաշխման ենթակա դիմումը չի կարող կրկին հանձնվել նույն նոտարին:

Պաշտոնական հրապարակման օրը՝ 22 սեպտեմբերի 2023 թվական: