ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ՆԱԽԱԳԱՀ
|
16 դեկտեմբերի 2022 թ. |
N 1320-Ն |
Հ Ր Ա Մ Ա Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵԻ ՆԱԽԱԳԱՀԻ 2016 ԹՎԱԿԱՆԻ ԴԵԿՏԵՄԲԵՐԻ 30-Ի N 300-Ն ՀՐԱՄԱՆԻ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» ՀՀ օրենքի 34-րդ հոդվածի 1-ին մասը`
Հրամայում եմ՝
1. Հայաստանի Հանրապետության կառավարությանն առընթեր պետական եկամուտների կոմիտեի նախագահի 2016 թվականի դեկտեմբերի 30-ի «Եկամտային հարկի և սոցիալական վճարի ամսական (պարզեցված), եկամտային հարկի և սոցիալական վճարի տարեկան հաշվարկների, տեղեկությունների և տեղեկանքի ձևերը և դրանց լրացման կարգերը հաստատելու մասին» N 300-Ն հրամանի՝
1) N 1 հավելվածով հաստատված եկամտային հարկի և սոցիալական վճարի ամսական հաշվարկի ձևի 2-րդ բաժնում՝
ա. լրացման կարգի 16-րդ կետը շարադրել հետևյալ խմբագրությամբ՝
«16. 2-րդ բաժնում տրվում է հաշվետու ամսում տվյալ հարկային գործակալի կողմից բոլոր ֆիզիկական անձանց վճարված հարկման բազա հանդիսացող այլ եկամուտներից եկամտային հարկի հաշվարկը, յուրաքանչյուր եկամտի տեսակի և քաղաքացիության համար լրացվում է մեկ տող, ընդ որում՝
1) 2020 թվականի հունվարի 1-ից հետո ընկած հաշվետու ժամանակահատվածներին վերագրվող (այդ հաշվետու ժամանակահատվածների գործունեության արդյունքում ստացվող) շահույթներից՝ որպես շահույթի բաշխում, օտարերկրյա քաղաքացու կամ քաղաքացիություն չունեցող անձ հանդիսացող մասնակցի ստացած շահաբաժինների մասով եկամտային հարկը հաշվարկվում է 5% դրույքաչափով,
2) 2023 թվականի հունվարի 1-ից հետո տոկոսների (բացառությամբ բանկային ավանդի և հրապարակային առաջարկի միջոցով հանրությանը առաջարկված կամ կարգավորվող շուկայում առևտրին թույլատրված պարտքային արժեթղթերի դիմաց տոկոսների) մասով եկամտային հարկը հաշվարկվում է ընդհանուր սահմանված դրույքաչափով: Բանկային ավանդի և հրապարակային առաջարկի միջոցով հանրությանը առաջարկված կամ կարգավորվող շուկայում առևտրին թույլատրված պարտքային արժեթղթերի դիմաց տոկոսների մասով եկամտային հարկը հաշվարկվում է 10% դրույքաչափով։»,
բ. 2-րդ աղյուսակի 2-րդ կետում բոլոր «10%» բառերը փոխարինել «ընդհանուր սահմանված դրույքաչափ (10%)» բառերով, 14-րդ կետում «Նվազեցման կատարման» բառերը փոխարինել «Եկամուտների ստացման իրավունքը ձեռք բերելու հարկային» բառերով,
2) N 3 հավելվածով հաստատված եկամտային հարկի և սոցիալական վճարի տարեկան հաշվարկի ձևի 2-րդ բաժնի՝
ա. 1-ին աղյուսակի 2-րդ կետում «10%» բառերը փոխարինել «ընդհանուր սահմանված դրույքաչափ (10%)» բառերով,
բ. 1-ին աղյուսակի 5-րդ կետում «Ձեռնարկատիրական գործունեության առարկա համարվող գույքի (բացառությամբ սույն աղյուսակի 6-րդ կետում նշվածի) օտարման դիմաց եկամուտ» բառերը փոխարինել «Գույքի (բացառությամբ սույն աղյուսակի 4-րդ և 6-րդ կետերում նշվածների) օտարման դիմաց եկամուտ» բառերով, իսկ «10%(20%)» բառերը փոխարինել «10%» բառերով,
գ. 1-ին աղյուսակի 8-րդ կետից հետո լրացնել 9-րդ կետ՝ հետևյալ բովանդակությամբ․
|
9․ Եկամուտների ստացման իրավունքը ձեռք բերելու հարկային տարվան հաջորդող 12-ամսյա ժամանակահատվածում չվճարված պասիվ եկամուտներ |
[2.13] |
5% (10%, 20%) |
դ. 1-ին աղյուսակի վերջին տողում «Ընդամենը [2.13]» բառերը փոխարինել «Ընդամենը [2.14]» բառերով,
ե. լրացման կարգի 11-րդ կետի 2-րդ ենթակետում «տոկոսները (տող [2.5])» բառերից հետո լրացնել «ընդ որում՝ 2023 թվականի հունվարի 1-ից հետո տոկոսների (բացառությամբ բանկային ավանդի և հրապարակային առաջարկի միջոցով հանրությանը առաջարկված կամ կարգավորվող շուկայում առևտրին թույլատրված պարտքային արժեթղթերի դիմաց տոկոսների) մասով եկամտային հարկը հաշվարկվում է ընդհանուր սահմանված դրույքաչափով» բառերով,
զ. լրացման կարգի 11-րդ կետի 5-րդ ենթակետը շարադրել հետևյալ խմբագրությամբ․
«5) գույքի (բացառությամբ ձեռնարկատիրական գործունեության առարկա համարվող գույքի և կառուցապատողի կողմից օտարվող գույքի) օտարման դիմաց եկամուտը (տող [2.9]),»,
է. լրացման կարգի 11-րդ կետը լրացնել 9-րդ ենթակետով՝ հետևյալ բովանդակությամբ․
«9) եկամուտների ստացման իրավունքը ձեռք բերելու հարկային տարվան հաջորդող 12-ամսյա ժամանակահատվածում չվճարված պասիվ եկամուտները (տող [2.13]), որոնց մասով եկամտային հարկը հաշվարկվում է Հայաստանի Հանրապետության հարկային օրենսգրքի 150-րդ հոդվածով սահմանված համապատասխան դրույքաչափով։»,
ը. լրացման կարգի 12.2-րդ կետը շարադրել հետևյալ խմբագրությամբ՝
«12.2. [2.14] տողում (սյունակ [2.3]) լրացվում է [2.4]-ից [2.13] տողերում հաշվարկված եկամտային հարկի ընդհանուր գումարը (տող [2.14] = 1-ին աղյուսակի սյունակ [2.3]-ի տողերի հանրագումարը):»։
2. Սույն հրամանն ուժի մեջ է մտնում 2023 թվականի հունվարի 1-ից։
|
|
Ռ. ԲԱԴԱՍՅԱՆ |
Պաշտոնական հրապարակման օրը՝ 19 դեկտեմբերի 2022 թվական: