Հ Ա Մ Ա Ձ Ա Յ Ն Ա Գ Ի Ր

Կինոմատոգրաֆիայի բնագավառում համագործակցության մասին

Սույն Համաձայնագրի մասնակից պետությունների Կառավարությունները, այսուհետ` Կողմեր,

ղեկավարվելով մշակույթի բնագավառում համագործակցության մասին կնքված երկկողմ և բազմակողմ համաձայնագրերով,

նկատի ունենալով, որ կինոմատոգրաֆիական ստեղծագործությունները կոչված են արտակարգ կարևոր դեր խաղալու ազգերի երկխոսության մեջ,

ճանաչելով, որ յուրաքանչյուր ժողովուրդ իրավունք ունի ստեղծելու կինոմատոգրաֆիական ստեղծագործություններ, որոնք արտացոլում են նրա սոցիալական և մշակութային առանձնահատկությունները,

համաձայնեցին ներքոհիշյալի մասին.

Հ ո դ վ ա ծ  1

Կողմերը հաստատում են կինոմատոգրաֆիայի բնագավառում համագործակցելու իրենց ձգտումը` Համագործակցության մասնակից պետությունների ինքնիշխանության, իրավահավասարության սկզբունքների հիման վրա` հաշվի առնելով սույն Համաձայնագրի յուրաքանչյուր մասնակից պետությունում գործող ազգային օրենսդրությունը:

Կողմերը ճանաչում են, որ կինոմատոգրաֆիայի բնագավառում սույն Համաձայնագրի մասնակից պետությունների պետական քաղաքականությունը հիմնվում է հետևյալ սկզբունքների վրա.

ազգային կինոմատոգրաֆիան պահպանելու, օժանդակելու և զարգացնելու պետության պատասխանատվության,

կինոմատոգրաֆիան որպես մշակույթի առանձնահատուկ ոլորտ ճանաչելու, որի գոյության պարտադիր պայման է հանդիսանում զարգացած արտադրական, գիտական, տեխնիկական և տեղեկատվական հիմքի առկայությունը,

բնակչության լայն խավերի համար ազգային կինոարվեստի ստեղծագործությունների մատչելի դարձնող պայմանների ստեղծման,

 ստեղծագործության ազատության, ձեռներեցության օժանդակության, ֆիլմերի արտադրության, վարձույթի և ցուցադրման մասնակիցների սոցիալական պաշտպանության,

միջազգային պայմանագրերի պահպանման:

Կողմերը անհրաժեշտ ջանքեր կներդնեն կինոարվեստը պահպանելու և զարգացնելու համար, այդ թվում՝ ֆիլմեր ստեղծող, վարձով տվող և հրապարակային ցուցադրում իրականացնող ձեռնարկությունների և կազմակերպությունների համար օրենսդրական կարգով հարկային և այլ արտոնություններ տրամադրելու միջոցով:

Հ ո դ վ ա ծ  2

Կողմերն իրենց պետությունների տարածքներում հեղինակային և հարակից իրավունքների պաշտպանության հարցերում կղեկավարվեն Հեղինակային իրավունքի մասին Բեռնի 1886 թվականի Կոնվենցիայում և Հեղինակային իրավունքի մասին 1952 թվականի համաշխարհային Կոնվենցիայում, ինչպես նաև Անկախ Պետությունների Համագործակցության շրջանակներում հեղինակային և հարակից իրավունքների պաշտպանության մասին կնքված համաձայնագրերում ամրագրված սկզբունքներով:

Կողմերը փոխգործակցելով միմյանց հետ, ջանքեր կգործադրեն իրենց պետությունների տարածքներում հեղինակային և հարակից իրավունքների պաշտպանության հուսալի համակարգ ստեղծելու համար:

Հ ո դ վ ա ծ  3

Կողմերն իրենց պետությունների ամբողջ տարածքում կօժանդակեն տարբեր ժանրի ազգային ֆիլմերի առևտրային և ոչ առևտրային լայն փոխանակումներին և դրանց վարձույթին:

Սույն Համաձայնագրի մասնակից պետությունների ազգային օրենսդրությունները իրենց տարածքներում կխրախուսեն ազգային և Համաձայնագրին միացած պետություններում ստեղծված կինոմատոգրաֆիական ստեղծագործությունների ցուցադրումը, կապահովեն Համաձայնագրի մասնակից պետությունների սահմաններով դրանց ազատ տեղաշարժը և մաքսային վճարների գանձումից ազատումը:

Կողմերը կնպաստեն նման ցուցադրման համար անհրաժեշտ վարչական ձևականությունների առավելագույն հեշտացմանը և կրճատմանը:

Համաձայնագրի մասնակից պետությունների ազգային ֆիլմերին վարձույթի և հրապարակային ցուցադրման իրավունք տրամադրող փաստաթղթերը ճանաչվում են Համաձայնագրի մյուս մասնակից պետություններում, որպես ֆիլմերի տնօրինման և (կամ) տիրապետման իրավունքների հաստատում: Ընդ որում Համաձայնագրի մասնակից պետություններից յուրաքանչյուրի համապատասխան պետական մարմինները իրավասու են սահմանել իրենց տարածքներում վարձույթի և հանդիսատեսների լսարանի սահմանափակման կարգը` հաշվի առնելով պետության ավանդույթները, սովորույթները և ազգային առանձնահատկությունները:

Հ ո դ վ ա ծ  4

Կողմերը կպահպանեն համագործակցությունը ազգային կինոմատոգրաֆիական կազմակերպությունների միջև ֆիլմերի արտադրության, վարձույթի և հրապարակային ցուցադրման, ինչպես նաև փոխադարձ արտադրական և սպասարկման ծառայություններ ցուցաբերելու բնագավառներում:

Կողմերը կխրախուսեն և կզարգացնեն կինոմատոգրաֆիայի բնագավառում ստեղծագործական համագործակցության տարբեր ձևերը, կնպաստեն ժամանակակից կինոարվեստի զարգացմանը, կօժանդակեն կինոմշակույթը հարստացնող փորձարարական աշխատանքներին, կիրականացնեն տեղեկությունների փոխանակումներ, կանցկացնեն միջազգային փառատոններ և մրցույթներ:

Հ ո դ վ ա ծ  5

Կինո և տեսաֆիլմերի արտադրություն և վարձույթ իրականացնելու համար անհրաժեշտ ապրանքները Համաձայնագրի մասնակից պետությունների պետական սահմանները հատելիս չեն հարկվում մաքսային վճարներով, եթե առկա է կինոմատոգրաֆիայի ղեկավարման իրավասու պետական մարմնի կողմից տրված նրանց նշանակման հաստատումը` մաքսային սահմանները հատելիս ներկայացնելու համար:

Հ ո դ վ ա ծ  6

Կողմերը կհամագործակցեն կինոարտադրության, այդ թվում՝ կինոմատոգրաֆիայի կարիքների համար մասնագիտական կադրերի պատրաստման և վերապատրաստման ոլորտում, կիրականացնեն կինոարտադրության համակարգի ուսումնական հաստատությունների սովորողների և դասախոսների փոխանակում:

Հ ո դ վ ա ծ  7

Կողմերը կհամագործակցեն կինոմատոգրաֆիական ժառանգության պահպանման և փոխադարձ օգտագործման, ազգային կինոարխիվների և կինոթանգարանների ձևավորման բնագավառում:

Հ ո դ վ ա ծ  8

Ազգային կինոմատոգրաֆիայի զարգացման և համագործակցության խորացման նպատակով` Կողմերը օժանդակություն կցուցաբերեն միջազգային կինոմատոգրաֆիական կազմակերպությունների ստեղծմանը և գործունեությանը:

Հ ո դ վ ա ծ  9

Սույն Համաձայնագրի իրականացման ընթացքում կարող են ստեղծվել համատեղ հանձնաժողովներ և աշխատանքային խմբեր, փոխադարձ համագործակցության ուսումնասիրման և նախագծերի պատրաստման, ազգային կինոմատոգրաֆիական կազմակերպությունների համատեղ գործունեության օժանդակության, այլ հարցեր քննարկելու համար:

Հ ո դ վ ա ծ  10

Սույն Համաձայնագիրը չի բացառում կինոմատոգրաֆիայի բնագավառում երկկողմ և բազմակողմ համաձայնագրեր կնքելու Կողմերի հնարավորությունը:

Համաձայնագիրը բաց է նրա նպատակները և սկզբունքները ընդունող այլ շահագրգիռ պետությունների կողմից միանալու համար:

Հ ո դ վ ա ծ  11

Սույն Համաձայնագիրը կնքվում է երեք տարի ժամկետով և ինքնաբերաբար կերկարաձգվի հաջորդ երեք տարիների համար, եթե Կողմերից ոչ մեկը Համաձայնագրի գործողության հերթական ժամկետի ավարտից վեց ամիս առաջ չծանուցի ավանդապահին սույն Համաձայնագրից դուրս գալու իր մտադրության մասին:

Հ ո դ վ ա ծ  12

Սույն Համաձայնագիրը կիրառվում է ստորագրման օրվանից և ուժի մեջ է մտնում պետությունների կողմից Համաձայնագիրը ուժի մեջ մտնելու համար անհրաժեշտ՝ ներպետական ընթացակարգերը կատարելու մասին երրորդ ծանուցումը ավանդապահին ի պահ հանձնելու օրվանից:

Կատարված է Ալմաթի քաղաքում 1995 թվականի փետրվարի 10-ին, մեկ բնօրինակով` ռուսերեն:

Բնօրինակը պահվում է Բելառուսի Հանրապետության կառավարության արխիվում, որը սույն Համաձայնագիրը ստորագրած յուրաքանչյուր պետությանը կուղարկի Համաձայնագրի հաստատված պատճենը:

*Համաձայնագիրը Հայաստանի Հանրապետության համար ուժի մեջ է մտել 1995 թվականի մայիսի 5-ից: