ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

9 նոյեմբերի 2010 թ.

թիվ 299-Ն

ՀԱՃԱԽՈՐԴԻ ԲԱՑԱԾ ԲԱՆԿԱՅԻՆ ՀԱՇԻՎՆԵՐԻ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐԸ ԱՌԵՎՏՐԱՅԻՆ ԲԱՆԿԵՐԻ ԿՈՂՄԻՑ ՀԱՐԿԱՅԻՆ ՄԱՐՄԻՆ ՆԵՐԿԱՅԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Հարկերի մասին» Հայաստանի Հանրապետության օրենքի 20-րդ հոդվածի ութերորդ մասի 5-րդ կետը և ղեկավարվելով «Իրավական ակտերի մասին» Հայաստանի Հանրապետության օրենքի 16-րդ հոդվածով` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Հաճախորդի բացած բանկային հաշիվների վերաբերյալ տեղեկությունները առևտրային բանկերի կողմից հարկային մարմին ներկայացնելու կարգը»` համաձայն Հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ կենտրոնական բանկի նախագահ	Ա. Ջավադյան
2010 թ. նոյեմբերի 15 ք. Երևան

Հավելված

Հաստատված է ՀՀ կենտրոնական բանկի խորհրդի 2010 թ. նոյեմբերի 9-ի թիվ 299-Ն որոշմամբ	Հաստատված է ՀՀ կառավարությանն առընթեր պետական եկամուտների կոմիտեի նախագահի 2010 թվականի նոյեմբերի 17-ի թիվ 2437-Ն հրամանով
ՀՀ կենտրոնական բանկի նախագահ _________________ Ա. Ջավադյան	ՀՀ կառավարությանն առընթեր պետական եկամուտների կոմիտեի նախագահ _________________ Գ. Խաչատրյան

Կ Ա Ր Գ

ՀԱՃԱԽՈՐԴԻ ԲԱՑԱԾ ԲԱՆԿԱՅԻՆ ՀԱՇԻՎՆԵՐԻ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐԸ ԱՌԵՎՏՐԱՅԻՆ ԲԱՆԿԵՐԻ ԿՈՂՄԻՑ ՀԱՐԿԱՅԻՆ ՄԱՐՄԻՆ ՆԵՐԿԱՅԱՑՆԵԼՈՒ

1. Սույն կարգը սահմանում է հաճախորդի բացած բանկային հաշիվների վերաբերյալ տեղեկությունները առևտրային բանկերի կողմից Հայաստանի Հանրապետության կառավարությանն առընթեր պետական եկամուտների կոմիտե (այսուհետ` Հարկային մարմին) ներկայացնելու հետ կապված հարաբերությունները:

2. Առևտրային բանկը մինչև 2011 թվականի փետրվարի 1-ը Հարկային մարմին է ներկայացնում հետևյալ անձանց բանկային հաշիվների թվաքանակը (ըստ խմբերի), որոնց համար առևտրային բանկը 2011 թվականի հունվարի 1-ի դրությամբ վարել է բանկային հաշիվներ (մինչև 2011 թվականի հունվարի 1-ը փակված բանկային հաշիվների վերաբերյալ տեղեկատվություն (թվաքանակ) չի տրամադրվում)`

1) Հայաստանի Հանրապետության տարածքում ստեղծված իրավաբանական անձինք,

2) օտարեկրյա պետություններում ստեղծված իրավաբանական անձանց և իրավաբանական անձի կարգավիճակ չունեցող կազմակերպությունների` Հայաստանի Հանրապետության տարածքում ստեղծված մասնաճյուղեր և ներկայացուցչություններ, ինչպես նաև միջազգային կազմակերպությունների` Հայաստանի Հանրապետության տարածքում ստեղծված մասնաճյուղեր և ներկայացուցչություններ,

3) Հայաստանի Հանրապետությունում օտարերկրյա պետությունների դիվանագիտական ներկայացուցչություններ և հյուպատոսական հիմնարկներ,

4) միջազգային կազմակերպություններ,

5) Հայաստանի Հանրապետությունում պետական գրանցում ստացած անհատ ձեռնարկատերեր:

3. Առևտրային բանկը 2011 թվականի հունվարի 1-ից հետո յուրաքանչյուր եռամսյակի համար` մինչև տվյալ եռամսյակին հաջորդող ամսվա 15-ը, Հարկային մարմին է ներկայացնում սույն կարգի 2-րդ կետով սահմանված սուբյեկտների բանկային հաշիվների թվաքանակի փոփոխությունները: Ընդ որում` առևտրային բանկը սույն կարգի 2-րդ կետով սահմանված սուբյեկտների բանկային հաշիվների թվաքանակի փոփոխություն է ներկայացնում հարկային մարմին նաև այն դեպքում, երբ տվյալ առևտրային բանկում բանկային հաշիվ ունեցող տվյալ սուբյեկտի համար մեկ այլ բանկային հաշիվ է բացվում կամ առևտրային բանկում փակվում է տվյալ սուբյեկտի անունով (անվանումով) առևտրային բանկում գտնվող բանկային հաշիվներից թեկուզ մեկը:

Եթե սույն կետում նշված փոփոխությունները տեղի չեն ունենում, ապա առևտրային բանկը սույն կետում նշված ժամկետում այդ մասին նույնպես հայտնում է Հարկային մարմնին:

4. Հարկային մարմինը սույն կարգի որևէ խախտում հայտնաբերելու կամ սույն կարգի համաձայն տրամադրված տեղեկատվությունը իր մոտ առկա տեղեկությունների հետ համադրման արդյունքում անհամապատասխանություններ կամ այլ անճշտություններ հայտնաբերելու դեպքում դիմում է Հայաստանի Հանրապետության կենտրոնական բանկ (այլ ոչ առևտրային բանկ):

5. Սույն կարգով նախատեսված տեղեկությունները առևտրային բանկերի կողմից հարկային մարմին ներկայացվում են MS Excell ֆայլի տեսքով: Տեղեկությունների ներկայացման էլեկտրոնային հասցեն, ֆայլի տեսքը և դրա լրացման ուղեցույցը առևտրային բանկերին տրամադրում է Հարկային մարմինը: