«Գրանցված է»
ՀՀ արդարադատության
նախարարության կողմից
29 օգոստոսի 2005 թ.
Պետական գրանցման թիվ 11105362

հայաստանի հանրապետության

ՄՇԱԿՈՒՅԹԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐ 

25 հուլիսի 2005 թ. ք. Երևան

N 348-Ն

Հ Ր Ա Մ Ա Ն

ԺԱՄԱՆԱԿԱՎՈՐ ԱՐՏԱՀԱՆՈՒՄԻՑ ՎԵՐԱԴԱՐՁՎԱԾ ՄՇԱԿՈՒԹԱՅԻՆ ԱՐԺԵՔՆԵՐԻ ՆՈՒՅՆԱԿԱՆԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ի կատարումն «Մշակութային արժեքների արտահանման և ներմուծման մասին» ՀՀ օրենքի 8-րդ հոդվածի 1-ին մասի 14-րդ կետի պահանջի և ՀՀ վարչապետի 2005 թվականի մարտի 5-ի N 139-Ա որոշմամբ հաստատված «Մշակութային արժեքների արտահանման և ներմուծման մասին» Հայաստանի Հանրապետության օրենքի կիրարկումն ապահովող միջոցառումների ցանկի» 11-րդ կետի`

Հրամայում եմ`

1. Սահմանել «ժամանակավոր արտահանումից վերադարձված մշակութային արժեքների նույնականացման կարգը»` համաձայն հավելվածի:

2. Սույն կարգի ապահովման հսկողությունը դնել ՀՀ մշակույթի նախարարության աշխատակազմի մշակութային արժեքների պահպանության գործակալության պետի վրա:

(2-րդ կետը փոփ. 18.09.10 N 612-Ն)

Նախարար`

Հ. Հովեյան

Հավելված ՀՀ մշակույթի և երիտասարդության հարցերի նախարարի 2005 թ. հուլիսի 25-ի N 348-Ն հրամանի

Կ Ա Ր Գ

ԺԱՄԱՆԱԿԱՎՈՐ ԱՐՏԱՀԱՆՈՒՄԻՑ ՎԵՐԱԴԱՐՁՎԱԾ ՄՇԱԿՈՒԹԱՅԻՆ ԱՐԺԵՔՆԵՐԻ ՆՈՒՅՆԱԿԱՆԱՑՄԱՆ

1. Սույն կարգով սահմանվում է ժամանակավոր արտահանումից վերադարձված մշակութային արժեքների նույնականացման գործընթացը, որը նախատեսված է «Մշակութային արժեքների արտահանման և ներմուծման մասին» Հայաստանի Հանրապետության օրենքի 8-րդ հոդվածի 1-ին մասի 14-րդ կետով:

2. Սույն կարգի գործողությունը տարածվում է միայն պետական սեփականություն համարվող մշակութային արժեքների և պետական սեփականություն չհամարվող այն մշակութային արժեքների վրա, որոնք գրանցված են կամ ենթակա են գրանցման մշակութային արժեքների պահպանական ցուցակում(այսուհետ` մշակութային արժեքներ):

Ժամանակավոր արտահանումից վերադարձված մշակութային արժեքները ենթակա են նույնականացման, որն իրականացվում է մաքսային ծառայության մարմինների կողմից նույնականացման գործընթացի հետ միաժամանակ:

3. Մշակութային արժեքների նույնականացումն իրականացնում են ՀՀ մշակույթի նախարարության աշխատակազմի մշակութային արժեքների պահպանության գործակալության (այսուհետ` գործակալություն) համապատասխան մասնագետները` հայտատուի հայտի հիման վրա: Հայտատուի իրավաբանական անձ լինելու դեպքում նույնականացմանը մասնակցում է իրավաբանական անձի ներկայացուցիչը, իսկ ֆիզիկական անձ լինելու դեպքում` սեփականատերը:

(3-րդ կետը խմբ. 18.09.10 N 612-Ն)

4. Նույնականացումն իրականացվում է ժամանակավոր արտահանումից վերադարձված մշակութային արժեքների և դրանց` ժամանակավոր արտահանման իրավունքի վկայագիր տալու ժամանակ վավերացված լուսանկարների կամ ցուցակի տվյալների համեմատական ստուգման միջոցով: Ցուցակի առկայության դեպքում լուսանկարն ընդունելի է նաև մշակութային արժեքի անվանման ու ծածկագրի նշումով:

5. Մշակութային արժեքները հայտատուն նույնականացման նպատակով տեղափոխում է Գործակալություն, իսկ դրանց մեծաքանակ կամ ծավալուն լինելու, ինչպես նաև վերադարձը ոչ աշխատանքային օրերին համընկնելու դեպքերում` իր տարածք:

6. Մշակութային արժեքները հայտատուի տարածք տեղափոխելու դեպքում Գործակալության համապատասխան մասնագետները, համատեղ պայմանավորվածության արդյունքում, երեք աշխատանքային օրվա ընթացքում այցելում են նշված տարածք և իրականացնում մշակութային արժեքների նույնականացման գործընթացը:

6.1. Նույնականացման նպատակով հայտատուի տարածք գործակալության մասնագետների տեղափոխությունն ապահովում է հայտատուն:

(6.1-րդ կետը լրաց. 18.09.10 N 612-Ն)

7. Մշակութային արժեքները գործակալություն տեղափոխելու դեպքում դրանց նույնականացման գործընթացն իրականացվում է գործակալությունում` սույն կարգի 3-րդ կետով նախատեսված անձանց մասնակցությամբ:

(7-րդ կետը խմբ. 18.09.10 N 612-Ն)

8. Նույնականացման գործընթացն ավարտելուց հետո Գործակալության մասնագետները տեղում կազմում են մշակութային արժեքների նույնականացման մասին ակտ:

(8-րդ կետը լրաց. 18.09.10 N 612-Ն)

9. Պետական սեփականություն համարվող մշակութային արժեքների վնասվածքների դեպքում Գործակալության մասնագետներն ու հայտատուն կազմում են մշակութային արժեքների վնասվածքի մասին ակտ: Մշակութային արժեքների վնասվածքի մասին հայտնվում է համապատասխան լիազորված պետական մարմնին:

10. Մշակութային արժեքների պահպանական ցուցակում գրանցված կամ գրանցման ենթակա պետական սեփականություն չհամարվող մշակութային արժեքների վնասվածքների դեպքերում Գործակալության մասնագետներն ու հայտատուն կազմում են մշակութային արժեքների վնասվածքի մասին ակտ:

10.1. Մշակութային արժեքների վնասվածքի մասին ակտերը կազմվում են տեղում:

(10.1 կետը լրաց. 18.09.10 N 612-Ն)

11. Մշակութային արժեքների անհամապատասխանությունների դեպքերում Գործակալության մասնագետներն ու հայտատուն տեղում կազմում են մշակութային արժեքների անհամապատասխանության մասին ակտ: Մշակութային արժեքների անհամապատասխանության մասին հայտնվում է համապատասխան լիազորված պետական մարմնին:

(11-րդ կետը լրաց. 18.09.10 N 612-Ն)

12. Սույն կարգով նախատեսված ակտերը հիմք են հանդիսանում մշակութային արժեքների նույնականացման գործընթացն ավարտելու վերաբերյալ, որոնք կազմվում են երեք օրինակից. մեկը տրվում է Գործակալությանը, երկրորդը` հայտատուին, երրորդը` մաքսային ծառայության մարմիններին:

Աշխատակազմի ղեկավար`

Գ. Մանասյան