«Գրանցված է»

ՀՀ արդարադատության

նախարարության կողմից

3 դեկտեմբերի 2004 թ.

Պետական գրանցման թիվ 10304320

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌԵՎՏՐԻ ԵՎ ՏՆՏԵՍԱԿԱՆ ԶԱՐԳԱՑՄԱՆ ՆԱԽԱՐԱՐ

23 նոյեմբերի 2004 թ. ք. Երևան

N 190-Ն

        

Հ Ր Ա Մ Ա Ն

ԶԲՈՍԱՎԱՐԻ ԵՎ ՈՒՂԵԿՑՈՐԴԻ ՈՐԱԿԱՎՈՐՄԱՆ ԵՎ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ, ԶԲՈՍԱՎԱՐԻ ԵՎ ՈՒՂԵԿՑՈՐԴԻ ՈՐԱԿԱՎՈՐՄԱՆ ՎԿԱՅԱԿԱՆՆԵՐԻ ՁԵՎԵՐԸ ՀԱՍՏԱՏԵԼՈՒ, ՈՐԱԿԱՎՈՐՄԱՆ ԵՎ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎ ՍՏԵՂԾԵԼՈՒ ՄԱՍԻՆ

Ղեկավարվելով «Լիցենզավորման մասին» ՀՀ օրենքի 8-րդ հոդվածի 3-րդ և 4-րդ մասերով և 14 հոդվածով, ՀՀ կառավարության 2001 թ-ի սեպտեմբերի 24-ի N 895 և 2004 թ-ի հունիսի 10-ի N 945-Ն որոշումներով

Հրամայում եմ`

1. Հաստատել.

ա) Զբոսավարի և ուղեկցորդի որակավորման և լիցենզավորման հանձնաժողովի կանոնադրությունը համաձայն N 1 հավելվածի,

բ) զբոսավարի որակավորման վկայականի ձևը համաձայն N 2 հավելվածի,

գ) ուղեկցորդի որակավորման վկայականի ձևը համաձայն N 3 հավելվածի:

2. Ստեղծել զբոսավարի և ուղեկցորդի որակավորման և լիցենզավորման հանձնաժողով՝ համաձայն N 4 հավելվածի:

3. Նախարարի տեղակալ Ա. Պետրոսյանին՝ ապահովել հավելված 4-ի 6-9 կետերով նախատեսված կազմակերպությունների ներկայացրած թեկնածուների ընդգրկումը հանձնաժողովի կազմում՝ հանձնաժողովի կանոնադրության 5-րդ կետի բ) ենթակետին համապատասխան:

4. Սույն հրամանի կատարման հսկողությունը վերապահում եմ ինձ:

Կ. Ճշմարիտյան

Հավելված N 1 ՀՀ առևտրի և տնտեսական զարգացման նախարարի 23.11.2004 թ. N 190-Ն հրամանի

Կ Ա Ն Ո Ն Ա Դ Ր ՈՒ Թ Յ ՈՒ Ն

Զբոսավարի եվ ուղեկցորդի որակավորման եվ լիցենզավորման հանձնաժողովի

I. Ընդհանուր դրույթներ

1. Հայաստանի Հանրապետությունում զբոսավարի և ուղեկցորդի որակավորման և լիցենզավորման հանձնաժողովը (այսուհետ՝ Հանձնաժողով) ստեղծվել է Հայաստանի Հանրապետության առևտրի և տնտեսական զարգացման նախարարի 2004 թվականի նոյեմբերի 23-ի N 190-Ն հրամանով` սույն կանոնադրությամբ սահմանված խնդիրներն իրականացնելու նպատակով:

2. Հանձնաժողովն իր գործունեության ընթացքում ղեկավարվում է Հայաստանի Հանրապետության օրենսդրությամբ և սույն կանոնադրությամբ:

II. Հանձնաժողովի խնդիրներն ու գործառույթները

3. Հանձնաժողովի հիմնական խնդիրը Հայաստանի Հանրապետությունում զբոսավարի և ուղեկցորդի լիցենզավորման գործընթացի իրականացումն է:

4. Հանձնաժողովն իր առջև դրված խնդիրների լուծման նպատակով՝

ա) իրականացնում է մասնագիտական որակավորման ստուգումներ՝ ըստ գործունեության տեսակների.

բ) եզրակացություն է տալիս Հայաստանի Հանրապետության առևտրի և տնտեսական զարգացման նախարարին լիցենզիա տալու, լիցենզիայի գործողությունը կասեցնելու կամ դադարեցնելու վերաբերյալ.

գ) ներկայացնում է առաջարկություններ զբոսաշրջության բնագավառի՝ մասնավորապես զբոսավարների և ուղեկցորդների լիցենզավորման գործընթացի կատարելագործման վերաբերյալ.

դ) հաստատում է որակավորման ստուգման թեստային հարցաշարերի և դրանց լրացման ձևը:

(4-րդ կետը լրաց. 08.02.05 N 20-Ն)

III. Հանձնաժողովի գործունեության կազմակերպումը

5. Հանձնաժողովը կազմված է ինն անդամներից, որոնցից.

ա) հինգը Հայաստանի Հանրապետության առևտրի և տնտեսական զարգացման նախարարության ներկայացուցիչներ են և հանդիսանում են Հանձնաժողովի մշտական անդամներ.

բ) չորսը հավելված 4-ի 6-9 կետերով նախատեսված կազմակերպությունների ներկայացուցիչներ են, որոնք Հանձնաժողովի հերթական նիստին մասնակցելու համար Հանձնաժողովի կազմում ընդգրկվում են Հայաստանի Հանրապետության առևտրի և տնտեսական զարգացման նախարարության հրավերով՝ ռոտացիոն սկզբունքով, ազգանունների այբբենական կարգով:

6. Հանձնաժողովը իր իրավասության հարցերը քննարկում է նիստերում, որոնք հրավիրվում է հանձնաժողովի նախագահի կողմից ըստ անհրաժեշտության:

7. Հանձնաժողովի նիստերն իրավազոր են, եթե դրանց մասնակցում են Հանձնաժողովի անդամների կեսից ավելին:

8. Հանձնաժողովի որոշումներն ընդունվում են նիստին մասնակցող անդամների ձայների պարզ մեծամասնությամբ՝ փակ գաղտնի քվեարկությամբ: Ձայների հավասարության դեպքում որոշումը համարվում է ընդունված հօգուտ հայտատուի կամ լիցենզավորված անձի (այսուհետ` հրավիրված անձ):

9. Հարցերի քննարկման մասին հրավիրված անձին պատշաճ ձևով հայտնվում է քննարկումից ոչ ուշ, քան յոթ օր առաջ՝ տեղեկացնելով նրան քննարկման վայրի, ամսաթվի ու ժամի մասին:

10. Հանձնաժողովի նիստի նախագահողը նիստը բացելիս հայտարարում է նիստի օրակարգը, հրավիրված անձանց կազմը: Հրավիրված անձանց բացատրում է նրանց իրավունքներն ու պարտականությունները, հրապարակում է հայտի, ինչպես նաև քննարկվող այլ փաստաթղթի բովանդակությունը:

11. Հանձնաժողովի նիստին հրավիրված անձանց չմասնակցելը հիմք չի հանդիսանում նիստի օրակարգի հարցերը չքննարկելու կամ այն մերժելու համար, եթե հրավիրված անձը չի խնդրել քննարկումն անցկացնել այլ ժամկետում: Հրավիրված անձի սույն կետով նախատեսված խնդրանքը կարող է բավարարվել, եթե նա քննարկմանը չի կարող մասնակցել հարգելի պատճառով և, եթե քննարկումը հետաձգելիս չեն խախտվի օրենքով նախատեսված քննարկման ժամկետները: Եթե հրավիրված անձը խանգարում է նիստի բնականոն ընթացքը, ապա հանձնաժողովի նախագահի կրկնակի զգուշացումից հետո Հանձնաժողովի նախագահը իրավունք ունի դուրս հրավիրել հրավիրված անձին:

12. Հրավիրված անձն իրավունք ունի Հանձնաժողովի նիստի ժամանակ իրեն վերաբերող հարցերի քննարկմանը մասնակից դարձնել մասնագետի, փորձագետի, աուդիտորի, իրավաբանի կամ թարգմանչի: Հրավիրված անձը կամ նրա շահերի պաշտպաններն իրավունք ունեն ելույթներ ունենալ, պատասխանել հանձնաժողովի անդամների հարցերին, միջնորդություններ հարուցել:

13. Հանձնաժողովի նիստերում հարցերը քննարկվում են դռնբաց:

Դռնբաց քննարկվող հարցերի քննարկմանը կարող են մասնակցել լրագրողներ, մասնագետներ, պաշտոնատար և այլ անձինք:

14. Հանձնաժողովի որոշումը կայացվում է հարցի քննության ավարտից հետո առանձին սենյակում՝ դռնփակ: Հանձնաժողովի կողմից որոշման կայացման ժամանակ այդ սենյակում կարող են գտնվել միայն հանձնաժողովի անդամները:

15. Հանձնաժողովում հարցերի քննարկման ժամանակ կազմվում է արձանագրություն, որտեղ նշվում է՝

ա) հանձնաժողովի նիստի անցկացման ամսաթիվը և տեղը.

բ) հանձնաժողովի տեսակը և կազմը.

գ) քննարկվող հարցի բովանդակությունը.

դ) տեղեկություններ քննարկմանը մասնակցող անձանց մասին.

ե) հարցի քննարկմանը մասնակցող անձանց բացատրությունները, նրանց միջնորդությունները և դրանց քննարկման արդյունքները.

զ) հարցի քննարկման ընթացքում հետազոտված փաստաթղթերը.

Է) հանձնաժողովի եզրակացության բովանդակությունը.

ը) տեղեկություններ ընդունված եզրակացության հրապարակման մասին:

Հանձնաժողովի նիստերի արձանագրությունները ստորագրում են նիստի նախագահողը և քարտուղարը;

16. Հանձնաժողովի եզրակացությունները հրապարակվում են և պատշաճ ձևով հանձնվում կամ ուղարկվում են Հրավիրված անձին:

17. Հանձնաժողովի եզրակացությունն այն կայացնելու օրը հանձնվում է լիցենզավորող մարմնի ղեկավարին:

Հանձնաժողովը ղեկավարում է Հանձնաժողովի նախագահը, իսկ նրա բացակայության դեպքում՝ Հանձնաժողովի նախագահի տեղակալը;

Հանձնաժողովի նիստերի աշխատանքները նախապատրաստում է Հանձնաժողովի քարտուղարը:

18. Հանձնաժողովի նախագահը՝

ա) հրավիրում է հանձնաժողովի նիստերը և նախագահում դրանք.

բ) կազմակերպում է հանձնաժողովի աշխատանքները.

գ) ստորագրում է հանձնաժողովի որոշումները, նիստերի արձանագրությունները և դրանց գործունեության հետ առնչվող մյուս փաստաթղթերը և գրագրությունները.

դ) իրականացնում է ՀՀ օրենսդրությամբ և սույն կանոնադրությամբ իրեն վերապահված այլ լիազորություններ:

19. Հանձնաժողովի քարտուղարը՝

ա) նախապատրաստում է հանձնաժողովի նիստերը.

բ) ստորագրում է հանձնաժողովի նիստերի արձանագրությունները.

գ) հանձնաժողովի քննարկմանն է ներկայացնում վերջինիս գործունեությանը վերաբերող նյութերն ու ընթացիկ տեղեկությունները, նախապատրաստում առաջարկություններ դրանց վերաբերյալ.

ե) կազմում է հանձնաժողովի որոշումների նախագիծը և կազմակերպում հանձնաժողովի որոշումների սահմանված ձևով հանձնումը կամ ուղարկումը Հրավիրված անձին:

20. Հանձնաժողովի անդամները՝

ա) մասնակցում են հանձնաժողովի նիստերին, հանձնաժողովի աշխատանքային պլանների մշակման և դրանց իրականացման հետ կապված աշխատանքներին.

բ) հանձնաժողովի նիստերին հարգելի պատճառով չմասնակցելու դեպքում նախապես տեղեկացնում են հանձնաժողովի նախագահին կամ քարտուղարին:

IV. Հանձնաժողովի ստեղծումը ԵՎ հանձնաժողովի գործունեության դադարումը

21. Հանձնաժողովը ստեղծվում և հանձնաժողովի գործունեությունը դադարում է Հայաստանի Հանրապետության առևտրի և տնտեսական զարգացման նախարարի հրամանով:

22. Հանձնաժողովի նախագահը, նախագահի տեղակալը, քարտուղարը և մյուս մշտական անդամները նշանակվում են և նրանց լիազորությունները դադարեցվում են Հայաստանի Հանրապետության առևտրի և տնտեսական զարգացման նախարարի հրամանով:

23. Հանձնաժողովի գործունեության դադարումից հետո հանձնաժողովի գործունեությանն առնչվող փաստաթղթերը և այլ նյութերը ենթակա են պահպանման Հայաստանի Հանրապետության օրենսդրությամբ սահմանված կարգով:

Հավելված N 2 ՀՀ առևտրի և տնտեսական զարգացման նախարարի 23.11.2004 թ. N 190-Ն հրամանի

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌԵՎՏՐԻ ԵՎ ՏՆՏԵՍԱԿԱՆ ԶԱՐԳԱՑՄԱՆ ՆԱԽԱՐԱՐՈՒԹՅՈՒՆ

ԶԲՈՍԱՎԱՐԻ ԵՎ ՈՒՂԵԿՑՈՐԴԻ ՈՐԱԿԱՎՈՐՄԱՆ ԵՎ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎ

Վ Կ Ա Յ Ա Կ Ա Ն  N  0000

Զ Բ Ո Ս Ա Վ Ա Ր Ի  Ո Ր Ա Կ Ա Վ Ո Ր Մ Ա Ն

_____________________________________________

(անունը, ազգանունը, հայրանունը)

ՎԿԱՅԱԿԱՆԻ ԳՈՐԾՈՂՈՒԹՅԱՆ ԺԱՄԿԵՏԸ`	Արձանագրություն N ____
ԱՆԺԱՄԿԵՏ	«____» «________» 200__ թ.

Հանձնաժողովի նախագահ`	___________________ (ստորագրություն)
Հանձնաժողովի քարտուղար`	___________________ (ստորագրություն)

Հավելված N 3 ՀՀ առևտրի և տնտեսական զարգացման նախարարի 23.11.2004 թ. N 190-Ն հրամանի

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌԵՎՏՐԻ ԵՎ ՏՆՏԵՍԱԿԱՆ ԶԱՐԳԱՑՄԱՆ ՆԱԽԱՐԱՐՈՒԹՅՈՒՆ

ԶԲՈՍԱՎԱՐԻ ԵՎ ՈՒՂԵԿՑՈՐԴԻ ՈՐԱԿԱՎՈՐՄԱՆ ԵՎ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎ

Վ Կ Ա Յ Ա Կ Ա Ն  N  0000

ՈՒ Ղ Ե Կ Ց Ո Ր Դ Ի  Ո Ր Ա Կ Ա Վ Ո Ր Մ Ա Ն

_____________________________________________

(անունը, ազգանունը, հայրանունը)

ՎԿԱՅԱԿԱՆԻ ԳՈՐԾՈՂՈՒԹՅԱՆ ԺԱՄԿԵՏԸ`	Արձանագրություն N ____
ԱՆԺԱՄԿԵՏ	«____» «________» 200__ թ.

Հանձնաժողովի նախագահ`	___________________ (ստորագրություն)
Հանձնաժողովի քարտուղար`	___________________ (ստորագրություն)

Հավելված N 4 ՀՀ առևտրի և տնտեսական զարգացման նախարարի 23.11.2004 թ. N 190-Ն հրամանի

Կ Ա Զ Մ

Զբոսավարի եվ ուղեկցորդի որակավորման եվ լիցենզավորման հանձնաժողովի

1. Արա Պետրոսյան	-	ՀՀ առևտրի և տնտեսական զարգացման նախարարի տեղակալ (Հանձնաժողովի նախագահ)
2. Մեխակ Ապրեսյան	-	ՀՀ առևտրի և տնտեսական զարգացման նախարարության զբոսաշրջության վարչության պետ (Հանձնաժողովի նախագահի տեղակալ)
3. Սուսաննա Ասլիզադյան	-	ՀՀ առևտրի և տնտեսական զարգացման նախարարության զբոսաշրջության վարչության առաջատար մասնագետ (Հանձնաժողովի քարտուղար)
4. Արտաշես Հովհաննիսյան	-	ՀՀ առևտրի և տնտեսական զարգացման նախարարության 1-ին բաժնի պետ
5. Լիաննա Գևորգյան	-	ՀՀ առևտրի և տնտեսական զարգացման նախարարության օրենսդրության և իրավաբանական վարչության առաջատար մասնագետ

6. Ներկայացուցիչ զբոսաշրջության բնագավառում կրթական գործունեություն իրականացնող կազմակերպություններից (համաձայնությամբ)

7. Ներկայացուցիչ գիտական կազմակերպություններից (համաձայնությամբ)

8. Ներկայացուցիչ ՀՀ նախարարություններից և պետական կառավարման այլ մարմիններից (համաձայնությամբ)

9. Ներկայացուցիչ ոչ առևտրային կազմակերպություններից (համաձայնությամբ)

(կազմը փոփ., խմբ. 16.09.05 N 196-Ն)