«Գրանցված է»
ՀՀ արդարադատության
նախարարության կողմից
31 հոկտեմբերի 2005 թ.
Պետական գրանցման թիվ 10305415

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԱՌԵՎՏՐԻ ԵՎ ՏՆՏԵՍԱԿԱՆ ԶԱՐԳԱՑՄԱՆ ՆԱԽԱՐԱՐ

17 հոկտեմբերի 2005 թ.       ք. Երևան

N 212-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԶԲՈՍԱՎԱՐԻ ԵՎ ՈՒՂԵԿՑՈՐԴԻ ԿՈՂՄԻՑ ԱՆՎԱՆԱՔԱՐՏ ԿՐԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով Հայաստանի Հանրապետության կառավարության 2004 թվականի հունիսի 10-ի N 945-Ն որոշման հավելված 1-ի 12-րդ և 13-րդ կետերի բ) ենթակետերով

Հրամայում եմ`

1. Հաստատել Հայաստանի Հանրապետությունում զբոսավարի և ուղեկցորդի կողմից անվանաքարտ կրելու կարգը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

3. Սույն հրամանի կատարման հսկողությունը վերապահել նախարարի տեղակալ Ա. Պետրոսյանին:

        Կ. Ճշմարիտյան

Հավելված ՀՀ առևտրի և տնտեսական զարգացման նախարարի  2005 թ. հոկտեմբերի 17-ի N 212-Ն հրամանի

 Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԶԲՈՍԱՎԱՐԻ ԵՎ ՈՒՂԵԿՑՈՐԴԻ ԿՈՂՄԻՑ ԱՆՎԱՆԱՔԱՐՏ ԿՐԵԼՈՒ

1. Հայաստանի Հանրապետությունում լիցենզավորված զբոսավարը և ուղեկցորդը (այսուհետ՝ Լիցենզավորված անձ) Հայաստանի Հանրապետության կառավարության 2004 թվականի հունիսի 10-ի «Զբոսավարի և ուղեկցորդի գործունեության լիցենզավորման կարգը և լիցենզիայի ձևը հաստատելու մասին» N 945-Ն որոշման հավելված 1-ի 12-րդ և 13-րդ կետերի բ) ենթակետերով նախատեսված անվանաքարտը կրում են սույն կարգին համապատասխան:

2. Լիցենզավորված անձն անվանաքարտ կրում է լիցենզավորվող գործունեություն իրականացնելու ողջ ժամանակահատվածի ընթացքում:

3. Լիցենզավորված անձը անվանաքարտը կրում է տեսանելի տեղում իր արտահագուստի կամ հագուստի վրա, կամ արտահագուստի վրա թափանցիկ նյութից կարված գրպանիկի մեջ:

4. Անվանաքարտի նվազագույն չափսերն են՝ 54մմx86մմ:

5. Անվանաքարտը պետք է պարունակի լիցենզավորված անձի գունավոր լուսանկարը՝ առնվազն 30մմx40մմ չափսերով:

6. Անվանաքարտը լրացվում է հայերեն և անգլերեն տպագիր տառերով:

7. Անհատ ձեռնարկատեր հանդիսացող լիցենզավորված անձի անվանաքարտի վրա լրացվում է՝

ա) լիցենզավորված անձի անունը, ազգանունը և «Անհատ ձեռնարկատեր» նշումը,

բ) լիցենզավորված անձի լիցենզիայի համարը, տրման ամսաթիվը,

գ) անհատ ձեռնարկատիրոջ պետական գրանցման համարը:

8. Աշխատանքային պայմանագրով աշխատող լիցենզավորված անձի անվանաքարտի վրա լրացվում է՝

ա) լիցենզավորված անձի անունը, ազգանունը,

բ) լիցենզավորված անձի լիցենզիայի համարը, տրման ամսաթիվը,

գ) գործատու-կազմակերպության անվանումը (անհատ ձեռնարկատիրոջ անունը, ազգանունը):

9. Անվանաքարտը վավերացվում է գործատուի ստորագրությամբ և կնիքով, կամ անհատ ձեռնարկատիրոջ ստորագրությամբ և կնիքով (առկայության դեպքում), եթե լիցենզավորված անձը գործունեություն է իրականացնում իր անունից:

10. Անվանաքարտի վրա կնիքը դրվում է այնպես, որ այն ծածկի լուսանկարի ներքևի
մասը: