ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԿԱՌԱՎԱՐՈՒԹՅԱՆՆ ԱՌԸՆԹԵՐ ԱՆՇԱՐԺ ԳՈՒՅՔԻ ԿԱԴԱՍՏՐԻ ՊԵՏԱԿԱՆ ԿՈՄԻՏԵ
|
15 օգոստոսի 2001 թ. |
N 531-Կ |
Հ Ր Ա Մ Ա Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՐՀԱԳՐԱԿԱՆ ՕԲՅԵԿՏՆԵՐԻ ԱՆՎԱՆԱԿՈՉՄԱՆԵՎ ԱՆՎԱՆԱՓՈԽՄԱՆ ՀՐԱՀԱՆԳԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Աշխարհագրական անվանումների մասին» Հայաստանի Հանրապետության օրենքի 4, 5, 6, 12-րդ հոդվածների պահանջներով
ՀՐԱՄԱՅՈՒՄ ԵՄ
1. Հաստատել Հայաստանի Հանրապետության աշխարհագրական օբյեկտների անվանակոչման և անվանափոխման հրահանգը (կցվում է):
2. Հրահանգը սահմանված կարգով ներկայացնել Հայաստանի Հանրապետության արդարադատության նախարարություն` գրանցման:
3. Սույն հրամանի կատարման վերահսկողությունը դնել կոմիտեի նախագահի տեղակալ` Մ. Գևորգյանի վրա:
|
Կոմիտեի նախագահ` |
Մ. Վարդանյան |
|
Հաստատված է |
Հ Ր Ա Հ Ա Ն Գ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՐՀԱԳՐԱԿԱՆ ՕԲՅԵԿՏՆԵՐԻ ԱՆՎԱՆԱԿՈՉՄԱՆ ԵՎ ԱՆՎԱՆԱՓՈԽՄԱՆ
Սույն հրահանգը բխում է «Աշխարհագրական անվանումների մասին» ՀՀ օրենքի 4, 5, 6 և 12-րդ հոդվածների դրույթներից և կանոնակարգում է Հայաստանի Հանրապետության աշխարհագրական օբյեկտների անվանակոչումների և անվանափոխումների հետ կապված աշխատանքները:
1. Անվանակոչման ենթակա աշխարհագրական օբյեկտների հիմնական տեսակներն են`
- նորաստեղծ վարչական-տարածքային միավորները
- նոր բնակավայրերը
- նոր առաջացած ներբնակավայրային օբյեկտները
- անանուն կամ նորաստեղծ երկաթուղային կայարանները, օդանավակայանները, ջրամբարները, ջրանցքներն ու այլ ինժեներա-տեխնիկական կառույցները
- անանուն ֆիզիկա-աշխարհագրական օբյեկտները:
2. Աշխարհագրական օբյեկտների անվանումները նպատակահարմար է ընտրել տվյալ վայրի աշխարհագրական, պատմական, մշակութային, ազգագրական, կենցաղային և այլ պայմաններից ելնելով: Հայաստանի Հանրապետության աշխարհագրական օբյեկտների անվանումները տրվում են հայերենով: Անվանումները հնարավորության սահմաններում պետք է լինեն պարզ, միաբառ, բարեհունչ և ունենան բառակազմական մեծ հնարավորություն:
3. Բնակավայրերին կարելի է տալ հետևյալ կարգի անվանումներ`
ա) մոտակա ֆիզիկա-աշխարհագրական օբյեկտների անվանումը (օրինակ` Սևանա լիճ - քաղաք Սևան, գետ Դեբեդ - գյուղ Դեբեդ, Հատիս լեռ - գյուղ Հատիս և այլն):
բ) այլ վայր տեղափոխված կամ լուծարված բնակավայրերի անվանումը (օրինակ` գյուղ Գորայք, գյուղ Ծղուկ և այլն)
գ) պատմական կամ Արևմտյան Հայաստանում գտնվող բնակավայրերի անվանումը (օրինակ` գյուղ Ամասիա, քաղաք Արմավիր և այլն)
դ) «նոր» որոշիչով անվանումներ (օրինակ` Նոր Խարբերդ, Նոր Եդեսիա և այլն):
4. Առանձին դեպքերում կարելի է օգտագործել պետական, ռազմական, գիտական, մշակութային և այլ նշանավոր գործիչների անուններ (օրինակ` գյուղ Խանջյան, գյուղ Դավիթ Բեկ, քաղաք Թումանյան, գյուղ Սայաթ-Նովա և այլն):
5. Բնակավայրերից դուրս գտնվող երկաթգծի կայարաններին նպատակահարմար է տալ մոտակա բնակավայրի կամ ֆիզիկա-աշխարհագրական օբյեկտի անվանումը (օրինակ` Աղին կայարան, Փամբակ կայարան և այլն):
6. Ֆիզիկա-աշխարհագրական օբյեկտներին կարող են տրվել ձևը, կառուցվածքը, չափերը, դիրքն ու այլ բնորոշ հատկանիշներ արտահայտող անվանումներ, օրինակ` Թեքսար լեռ, գյուղ Սառնաղբյուր, Մեծավան գյուղ, Գետավան գյուղ և այլն: Կարելի է նույն անվանումով կոչել մի քանի իրար մոտ գտնվող տարատեսակ ֆիզիկա-աշխարհագրական օբյեկտներ (օրինակ` քաղաք Հրազդան - գետ Հրազդան):
7. Նպատակահարմար չէ նույն անունով անվանակոչել միևնույն վարչական տարածքում գտնվող նույնատիպ ֆիզիկա-աշխարհագրական մի քանի օբյեկտներ:
8. Աշխարհագրական օբյեկտների անվանափոխում կարելի է կատարել`
- կրկնվող անունների դեպքում
- անբարեհունչ և օտար անունների դեպքում
- պատմական անունները վերականգնելիս
- անվանափոխված բնակավայրի տարածքում կամ մոտակայքում գտնվող նույնանուն ինժեներա-տեխնիկական օբյեկտների (երկաթուղային կայարաններ, օդանավակայաններ, ջրամբարներ, ջրանցքներ) անվանափոխման և այլ դեպքերում:
9. Աշխարհագրական օբյեկտների անվանակոչման և անվանափոխման որոշումները ընդունվում են
- ըստ վարչատարածքային միավորների և բնակավայրերի` ՀՀ Ազգային ժողովի կողմից
- ըստ ներբնակավայրային օբյեկտների` տեղական ինքնակառավարման մարմնի կամ Երևանի քաղաքապետարանի կողմից
- ըստ ֆիզիկա-աշխարհագրական օբյեկտների` ՀՀ կառավարության կողմից:
10. Աշխարհագրական օբյեկտների անվանակոչման և անվանափոխման մասին առաջարկությունները պետք է իր մեջ ընդգրկեն հետևյալ տեղեկությունները`
- օբյեկտի տեսակը (մարզ, քաղաք, գյուղ, ե/գ կայարան, օդանավակայան, ջրանցք, ջրամբար, լեռ, գետ, լիճ, լեռնանցք, լեռնագրական այլ տարր)
- օբյեկտի ճշգրիտ դիրքը (մարզ, համայնք, այլ անհրաժեշտ կողմնորոշիչ օբյեկտներ, անհրաժեշտության դեպքում` կոորդինատներ)
- օբյեկտի գործող անվանումը
- առաջարկվող անվանումը
- առաջարկվող անվան հիմնավորումը
- տվյալ վարչատարածքային միավորի ներսում նույնանուն օբյեկտների առկայությունը
- անվանումն առաջարկող կազմակերպության անվանումը:
11. Եթե որպես աշխարհագրական օբյեկտի անվանում առաջարկվում են նշանավոր մարդկանց անուններ, ապա անվանակոչման մասին միջնորդագրին պետք է կցվեն նաև իրավասու մարմնի կողմից հաստատված համառոտ տեղեկանքներ այդ անձանց կյանքի, գործունեության, ինչպես նաև նրանց ժառանգների (եթե գոյություն ունեն) համաձայնության մասին:
12. Եթե անվանումները առաջարկվում են ֆիզիկա-աշխարհագրական օբյեկտների համար, ապա անվանակոչման մասին միջնորդագրին անհրաժեշտ է կցել նաև տվյալ տարածքի քարտեզ-սխեման, որտեղ պատկերված է այդ օբյեկտը:
13. Առաջարկությունները ներկայացվում են ըստ տվյալ աշխարհագրական օբյեկտի գտնվելու վայրի` Հայաստանի Հանրապետության համապատասխան մարզպետներին կամ Երևանի քաղաքապետին: Եթե աշխարհագրական օբյեկտը գտնվում է երկու կամ ավելի մարզերի տարածքում կամ սահմանագծում, ապա անվանակոչման կամ անվանափոխման մասին առաջարկությունները պետք է համաձայնեցվեն տվյալ մարզպետների հետ: Տարաձայնությունների դեպքում կադաստրի պետական կոմիտեն մասնագիտական հանձնաժողովի հետ համատեղ քննարկում է բոլոր առաջարկները և դրական եզրահանգման դեպքում ընդունված տարբերակը ներկայացնում է ՀՀ կառավարություն` որոշում կայացնելու համար:
14. Կադաստրի պետական կոմիտեի կամ մասնագիտական հանձնաժողովի կողմից աշխարհագրական օբյեկտների անվանակոչման կամ անվանափոխման մասին առաջարկը մերժվելու դեպքում այն կարող է կրկին քննարկվել հիմնավորող լրացուցիչ նյութերի և տվյալների տրամադրումից հետո:
15. Տեղական ինքնակառավարման մարմինների կողմից ներբնակավայրային օբյեկտների անվանակոչման կամ անվանափոխման անհրաժեշտության դեպքում համապատասխան նյութերը ներկայացվում են կադաստրի պետական կոմիտե հաշվառման համար:
16. ՀՀ աշխարհագրական օբյեկտների անվանակոչված կամ անվանափոխված անվանումների հաշվառումն ու գրանցումը իրականացվում է համապատասխան մատյաններում, որոնց ձևաթղթերը սահմանվում են կադաստրի պետական կոմիտեի կողմից:
17. ՀՀ աշխարհագրական օբյեկտների հաշվառված և գրանցված անվանումները հավաքվում են կադաստրի պետական կոմիտեի տեղեկատվական բանկում (պետական քարտադարանում), որի տվյալների հիման վրա պարբերաբար հրատարակվում են ՀՀ աշխարհագրական անվանումների պաշտոնական տեղեկատուն (գազետիրը), ընդհանուր և թեմատիկ բառարանները, այլ տեղեկատուներ և ցանկեր:
18. Նոր անվանակոչվող, ինչպես նաև արդեն գոյություն ունեցող անվանումների նկատմամբ պարտադիր պահանջներից է անվանումների ճշգրիտ և անփոփոխ գրառումը բոլոր տեսակի պաշտոնական փաստաթղթերում, տեղեկատուներում և այլ հրատարակչական նյութերում:
Գրանցված է
Հայաստանի Հանրապետության
արդարադատության նախարարության կողմից
1 նոյեմբերի 2001 թ.
Պետական գրանցման թիվ 32201169
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|