«Գրանցված է»
ՀՀ արդարադատության

նախարարության կողմից
10 հունիսի 2005 թ.
 Պետական գրանցման թիվ  33005207

 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ

ՖԻԶԻԿԱԿԱՆ ԿՈՒԼՏՈՒՐԱՅԻ ԵՎ ՍՊՈՐՏԻ ՊԵՏԱԿԱՆ ԿՈՄԻՏԵ

19 մայիսի 2005 թ. ք. Երևան

N 7-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՑԿԱՑՎՈՂ ՖԻԶԿՈՒԼՏՈՒՐԱՅԻՆ-ՄԱՐԶԱԿԱՆ ՄԻՋՈՑԱՌՈՒՄՆԵՐԻՆ ՄԱՆՈՒԿՆԵՐԻ ԵՎ ՊԱՏԱՆԻՆԵՐԻ ՄԱՍՆԱԿՑՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Մանկապատանեկան սպորտի մասին» Հայաստանի Հանրապետության օրենքի 21-րդ հոդվածի և Հայաստանի Հանրապետության վարչապետի 2004 թվականի դեկտեմբերի 29-ի «Մանկապատանեկան սպորտի մասին» Հայաստանի Հանրապետության օրենքի կիրարկումն ապահովող միջոցառումների մասին» թիվ 888-Ա որոշմամբ հաստատված հավելվածի 18-րդ կետի`

Հրամայում եմ`

1. Հաստատել Հայաստանի Հանրապետությունում անցկացվող ֆիզկուլտուրային-մարզական միջոցառումներին մանուկների և պատանիների մասնակցության կարգը` համաձայն հավելվածի:

2. Սույն հրամանի կատարման հսկողության իրավասությունը վերապահել Հայաստանի Հանրապետության կառավարությանն առընթեր ֆիզիկական կուլտուրայի և սպորտի պետական կոմիտեի նախագահի տեղակալներ Հ. Յավրյանի և Մ. Իսպիրյանի վրա:

Նախագահ`

Ի. Զաքարյան

Հավելված ՀՀ կառավարությանն առընթեր ֆիզիկական կուլտուրայի և սպորտի պետական կոմիտեի նախագահի 2005 թ. մայիսի 19-ի N 7-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՑԿԱՑՎՈՂ ՖԻԶԿՈՒԼՏՈՒՐԱՅԻՆ-ՄԱՐԶԱԿԱՆ ՄԻՋՈՑԱՌՈՒՄՆԵՐԻՆ ՄԱՆՈՒԿՆԵՐԻ ՈՒ ՊԱՏԱՆԻՆԵՐԻ ՄԱՍՆԱԿՑՈՒԹՅԱՆ

1. Մանուկների և պատանիների համար անցկացվող ֆիզկուլտուրային-մարզական յուրաքանչյուր միջոցառման կազմակերպողը մշակում ու հաստատում է կանոնակարգ և առնվազն երկու ամիս առաջ այն ուղարկում է համապատասխան կազմակերպություններին:

2. Կանոնակարգում պարտադիր կարգով նշվում են`

ա) միջոցառման նպատակը և խնդիրները.

բ) անցկացման վայրը և ժամկետը.

գ) միջոցառման անցկացման պատասխանատուն.

դ) մասնակիցներն ու անցկացման պայմանները.

ե) պարգևատրման ձևը, ժամանակը և չափը.

զ) ֆինանսական պայմանները և ծախսերի կատարողները.

է) հայտերի ներկայացման կարգը և ժամկետները:

3. Մանուկների և պատանիների շրջանում անցկացվող միջոցառումների կազմակերպիչները պարտավոր են խստորեն հետևել, որպեսզի`

ա/ միջոցառմանը մասնակցող կազմակերպությունների կամ անհատ մարզիկների հայտերը հաստատված լինեն բժշկի և կազմակերպության ղեկավարի կողմից.

բ/ պահպանվեն մարզաձևերի միջազգային ֆեդերացիաների կողմից սահմանված տարիքային խմբերի բաժանման կարգը.

գ/ միջոցառման անցկացման վայրում պահպանվեն սանիտարահիգիենիկ նորմերին համապատասխանող պայմաններ.

դ/ առկա լինեն միջոցառման համար անհրաժեշտ մարզական գույք և սարքավորումներ.

ե/ միջոցառումը սպասարկեն համապատասխան որակավորում և պատրաստվածություն ունեցող մրցավարներ` համաձայն տվյալ մարզաձևի ազգային ֆեդերացիայի սահմանած կարգի.

զ/ ապահովեն մասնակիցների անվտանգությունը և բժշկական սպասարկումը.

է/ միջոցառումները կազմակերպվեն և անցկացվեն հանդիսավոր պայմաններում.

ը/ պահպանվեն հասարակական կարգը մարզակառույցում, անցկացման վայրում.

թ/ միջոցառումները նպատակաուղղվեն մանուկների ու պատանիների մեջ հայրենասիրություն, Հայաստանի Հանրապետության դրոշի և օրհներգի նկատմամբ հարգանք դաստիարակելուն.

ժ/ միջոցառումները լայնորեն լուսաբանվեն զանգվածային լրատվամիջոցներով: