ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՖԻՆԱՆՍՆԵՐԻ ԵՎ ԷԿՈՆՈՄԻԿԱՅԻ ՆԱԽԱՐԱՐՈՒԹՅՈՒՆ 

Հ Ր Ա Մ Ա Ն

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԵՎՐԱՀԱՆՁՆԱԺՈՂՈՎԻ ՄԻՋԵՎ ԿՆՔՎԱԾ ՄԻՋԱԶԳԱՅԻՆ ՊԱՅՄԱՆԱԳՐԵՐՈՎ ՍԱՀՄԱՆՎԱԾ ՀԱՐԿԱՅԻՆ, ՄԱՔՍԱՅԻՆ ԵՎ ԱՅԼ ՊԱՐՏԱԴԻՐ ՎՃԱՐՆԵՐԻ ԳԾՈՎ ՆԱԽԱՏԵՍՎԱԾ ԱՐՏՈՆՈՒԹՅՈՒՆՆԵՐԻ ԿԻՐԱՌՄԱՆ» 26/04/01 Թ. ԹԻՎ 02/520 ՀՐԱՀԱՆԳԻ ՀԱՎԵԼՎԱԾՈՎ ՍԱՀՄԱՆՎԱԾ ՏԵՂԵԿԱՆՔԻ ՆԵՐԿԱՅԱՑՄԱՆ, ՀԱՍՏԱՏՄԱՆ, ՏՐԱՄԱԴՐՄԱՆ ԵՎ ՀԱՇՎԱՌՄԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

«Հարկերի մասին» Հայաստանի Հանրապետության օրենքի 38 հոդվածին համապատասխան, Հայաստանի Հանրապետության անունից կնքված և վավերացված միջազգային պայմանագրերով սահմանված հարկային արտոնությունների կիրառումը կարգավորելու նպատակով

Հրամայում եմ`

1. Հաստատել «Հայաստանի Հանրապետության և Եվրահանձնաժողովի միջև կնքված միջազգային պայմանագրերով սահմանված հարկային, մաքսային և այլ պարտադիր վճարների գծով նախատեսված արտոնությունների կիրառման» 26/04/01 թ. թիվ 02/520 հրահանգի հավելվածով սահմանված տեղեկանքի ներկայացման, հաստատման, տրամադրման և հաշվառման կարգը:

2. Դրամաշնորհային ծրագրերը իրականացնող մարմինների կողմից ներկայացված տեղեկանքների տվյալների ճշտության ստուգման և եզրակացության ներկայացման իրավասությունը վերապահել ՀՀ Ֆինանսների և Էկոնոմիկայի եվրոպական տեխնիկական օգնության կոորդինացման բաժնին:

3. Դրամաշնորհային ծրագրերը իրականացնող մարմինների կողմից ներկայացված տեղեկանքները ՀՀ Ֆինանսների և Էկոնոմիկայի պետական եկամուտների քաղաքականության գլխավոր վարչության և Եվրոպական տեխնիկական օգնության կոորդինացման բաժնի սույն հրամանի 2-րդ կետում նշված եզրակացության հիման վրա, հաստատում է ՀՀ Ֆինանսների և Էկոնոմիկայի նախարարի աշխատակազմի ղեկավարը:

Հաստատված է  ՀՀ ֆինանսների և էկոնոմիկայի նախարարության 01.08.01 N 226 հրամանով

Գրանցված է ՀՀ արդարադատության նախարարության կողմից 2001 __ ________ գրանցման թիվ ___

 Կ Ա Ր Գ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԵՎՐԱՀԱՆՁՆԱԺՈՂՈՎԻ ՄԻՋԵՎ ԿՆՔՎԱԾ ՄԻՋԱԶԳԱՅԻՆ ՊԱՅՄԱՆԱԳՐԵՐՈՎ ՍԱՀՄԱՆՎԱԾ ՀԱՐԿԱՅԻՆ, ՄԱՔՍԱՅԻՆ ԵՎ ԱՅԼ ՊԱՐՏԱԴԻՐ ՎՃԱՐՆԵՐԻ ԳԾՈՎ ՆԱԽԱՏԵՍՎԱԾ ԱՐՏՈՆՈՒԹՅՈՒՆՆԵՐԻ ԿԻՐԱՌՄԱՆ» 26/04/01 Թ. ԹԻՎ 02/520 ՀՐԱՀԱՆԳԻ ՀԱՎԵԼՎԱԾՈՎ ՍԱՀՄԱՆՎԱԾ ՏԵՂԵԿԱՆՔԻ ՆԵՐԿԱՅԱՑՄԱՆ, ՀԱՍՏԱՏՄԱՆ, ՏՐԱՄԱԴՐՄԱՆ ԵՎ ՀԱՇՎԱՌՄԱՆ

Սույնով սահմանվում է Հայաստանի Հանրապետության և Եվրահանձնաժողովի դրամաշնորհային պայմանագրերով նախատեսված հարկային, մաքսային և այլ պարտադիր վճարների գծով արտոնությունների վերապահման համար «Հայաստանի Հանրապետության և Եվրահանձնաժողովի միջև կնքված միջազգային դրամաշնորհային պայմանագրերով սահմանված հարկային, մաքսային և այլ պարտադիր վճարների գծով նախատեսված արտոնությունների կիրառման» 26/04/01 թ. թիվ 02/520 հրահանգի հավելվածով սահմանված տեղեկանքի ներկայացման, հաստատման, տրամադրման և հաշվառման կարգը:

ԸՆԴՀԱՆՈՒՐ ԴՐՈՒՅԹՆԵՐ

Տեղեկանքը հանդիսանում է խիստ հաշվառման բլանկ, և նրա նկատմամբ կիրառվում են խիստ հաշվառման փաստաթղթերի համար ՀՀ օրենսդրությամբ սահմանված պահանջները: Տեղեկանքի ձևաթղթերը ձեռք են բերվում ՀՀ Ֆինանսների և Էկոնոմիկայի նախարարությունից` փոխհատուցմամբ, որը սահմանվում է ՀՀ Ֆինանսների և Էկոնոմիկայի նախարարության կողմից` կատարված փաստացի ծախսերի չափով: Այն լրացվում է դրամաշնորհային ծրագրերը իրականացնող մարմինների կողմից և ներկայացվում է հաստատման ՀՀ Ֆինանսների և Էկոնոմիկայի նախարարություն: Վերջինս 3 աշխատանքային օրվա ընթացքում այն հաստատում է և վերադարձնում ԴԾԻՄ-երին:

ՏԵՂԵԿԱՆՔԻ ՀԱՍՏԱՏՄԱՆ ՀԱՄԱՐ ՀԱՅՏԻ ՆԵՐԿԱՅԱՑՄԱՆ ԿԱՐԳ

1.1. Տեղեկանքի հաստատման նպատակով ԴԾԻՄ-ը ՀՀ Ֆինանսների և Էկոնոմիկայի նախարարություն է ներկայացնում հետևյալ փաստաթղթերը.

ա) հայտ, որում նշվում է, թե ապրանքները կամ ծառայությունները ծրագրի որ բաղադրիչի շրջանակներում և ինչ գումարով են ձեռք բերվում, ներկայացվող փաստաթղթերի ցանկը, էջերի թիվը,

բ) սոցիալական ապահովության պարտադիր վճարների գծով նախատեսված արտոնությունների կիրառման համար տեղեկանքի հաստատման հայտ ներկայացնելու դեպքում` հաստիքացուցակ և աշխատավարձի ամփոփագիր.

գ) ԴԾԻՄ-ի և համապատասխան պայմանագրի կողմի միջև ապրանքների կամ ծառայությունների մատակարարման պայմանագրի պատճենը.

դ) մատակարարի կողմից ԴԾԻՄ-ին ներկայացված վճարման փաստաթղթերը.

ե) ապրանքների ներմուծման դեպքում նախատեսված արտոնությունների կիրառման համար տեղեկանքի հաստատման հայտ ներկայացնելու դեպքում` հաշիվ-ապրանքագիր.

զ) տեղեկանքի 4 օրինակ. առաջին օրինակը թողնվում է ՀՀ ֆինանսների և Էկոնոմիկայի նախարարությանը, երկրորդ օրինակը տրվում է ԴԾԻՄ-ին ի պահ, երրորդ օրինակը տրվում է ԴԾԻՄ-ին` գործարքի մյուս կողմին տրամադրելու և չորրորդ օրինակը` պետական կառավարման մարմիններ ըստ պահանջի ներկայացնելու համար:

1.2. Փաստաթղթերը ներկայացվում են ՀՀ Ֆինանսների և Էկոնոմիկայի նախարարություն:

ՏԵՂԵԿԱՆՔԻ ՀԱՍՏԱՏՄԱՆ ԿԱՐԳ

2.1. ՀՀ Ֆինանսների և Էկոնոմիկայի նախարարությունում փաստաթղթերը ենթարկվում են ուսումնասիրության` հայտի հիմնավորվածությունը պարզելու նպատակով: Դրական եզրակացության դեպքում տեղեկանքը սույն կարգի դրույթներին համապատասխան հաստատվում է և տրամադրվում է ԴԾԻՄ-ին: Հակառակ դեպքում ՀՀ Ֆինանսների և Էկոնոմիկայի նախարարությունը մերժում է հայտը` հիմնավորելով մերժման պատճառները:

2.2. Տեղեկանքը հաստատելու վերաբերյալ հայտը մերժվում է այն դեպքում եթե.

ա) չեն ներկայացվել սույն կարգով սահմանված փաստաթղթերը.

բ) փաստաթղթերը սահմանված կարգով ձևակերպված չեն.

գ) փաստաթղթերում բերված տեղեկությունները չեն համապատասխանում նախարարության տրամադրության տակ եղած և/կամ ներկայացված մնացած տեղեկություններին.

դ) տեղեկանքում նշված ապրանքների և ծառայությունների ձեռք բերումը դրամաշնորհային համաձայնագրով և ծրագրի ֆինանսատեխնիկական հիմնավորումով նախատեսված չէ:

2.3. Տեղեկանքի օրինակները հաստատվում են ՀՀ Ֆինանսների և Էկոնոմիկայի նախարարության կնիքով և լիազորված պաշտոնատար անձի ստորագրությամբ:

ՀԱՇՎԱՌՄԱՆ ԿԱՐԳ

3.1. Տեղեկանքների ձևաթղթերը պատրաստվում են տպարանում կենտրոնացված կարգով ՀՀ Ֆինանսների և Էկոնոմիկայի նախարարության պատվերով:

3.2. Տեղեկանքները տպագրվում են համարներով և տառային սերիաներով, որոնք կազմվում են գրքի ձևով` յուրաքանչյուրում 25 տեղեկանք 4 օրինակից: Բոլոր 4 օրինակները համարվում են իսկական, տպագրվում են գունավոր ֆոնով և նշվում նույն համարներով և տառային սերիաներով:

3.3. ԴԾԻՄ-երի ապահովումը տեղեկանքներով իրականացվում է ՀՀ Ֆինանսների և Էկոնոմիկայի նախարարության գործերի կառավարչության կողմից` ինքնարժեքի չափով փոխհատուցմամբ:

3.4. Տեղեկանքի ձևաթղթերը տրամադրվում են ԴԾԻՄ-ի համապատասխան գրություն-պահանջագրի հիման վրա, որը կնքվում և ստորագրվում է ԴԾԻՄ-ի տնօրենի կողմից: Տեղեկանքի ձևաթղթերը ստանալու համար գրություն-պահանջագրերը կազմվում են 2 օրինակից, որից մեկը մնում է գործերում, իսկ մյուսը ուղարկվում է ՀՀ Ֆինանսների և Էկոնոմիկայի նախարարություն:

3.5. Տեղեկանքի ձևաթղթերը հաշվառվում են ՀՀ Ֆինանսների և Էկոնոմիկայի նախարարության գործերի կառավարչության կողմից (Ձև 1, հավելված 1):

3.6. Փչացած ձևաթղթերը վերացվում են տարեկան մեկ անգամ ՀՀ Ֆինանսների և Էկոնոմիկայի նախարարության գործերի կառավարչության կազմած արձանագրության համաձայն:

 3.7. Ձևաթղթերի կորստի դեպքում ՀՀ Ֆինանսների և Էկոնոմիկայի նախարարության գործերի կառավարչության կողմից կազմվում է արձանագրություն, որտեղ նշվում է կորած ձևաթղթերի քանակը (սերիաները և համարները): Եթե չօգտագործված ձևաթղթերի և այդ ձևաթղթերի առկա մնացորդների միջև ստուգման արդյունքներով տարբերություններ չեն հայտնաբերվում, ապա այդ ստուգումը արձանագրությամբ ձևակերպելու անհրաժեշտություն չի առաջանում, միայն գրանցվում է արվում անցկացրած ստուգման վերաբերյալ:

3.8. Տեղեկանքի ձևաթղթերի հաշվառման մատյանները պետք է լինեն համարակալված, ժապավենված և ստորագրված ՀՀ Ֆինանսների և Էկոնոմիկայի նախարարության գործերի կառավարչության պետի կողմից և կնքված լինեն ՀՀ Ֆինանսների և Էկոնոմիկայի նախարարության կնիքով:

3.9. ԴԾԻՄ-երը կատարում են ՀՀ Ֆինանսների և Էկոնոմիկայի նախարարության կողմից հաստատված տեղեկանքների հաշվառում:

3.10. ՀՀ Ֆինանսների և Էկոնոմիկայի նախարարության համապատասխան ստորաբաժանման կողմից վարվում են հաշվառման մատյաններ: Ստորաբաժանումը պատասխանատու է հաշվառման ճշտության և փաստաթղթերի պահպանման համար:

3.11. ՀՀ Ֆինանսների և Էկոնոմիկայի նախարարության կողմից հաստատված տեղեկանքը ստանալուց հետո ԴԾԻՄ-ը պարտավոր է վճարման փաստաթղթերի պատճենները ներկայացնել ՀՀ Ֆինանսների և Էկոնոմիկայի նախարարության համապատասխան ստորաբաժանում:

Հավելված 1

Ձև 1

ՏԵՂԵԿԱՆՔՆԵՐԻ ՁԵՎԱԹՂԹԵՐԻ ՀԱՇՎԱՌՄԱՆ ԳԻՐՔ

ՀՀ ֆինանսների եվ Էկոնոմիկայի նախարարություն

Ծանոթություն.

1. Յուրաքանչյուր ԴԾԻՄ-ի համար հատկացվում է առանձին էջ կամ էջեր:

 Գրանցված է
Հայաստանի Հանրապետության
արդարադատության նախարարության կողմից
2 օգոստոսի 2001 թ.
Պետական գրանցման թիվ 11801119