ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՖԻՆԱՆՍՆԵՐԻ ԵՎ ԷԿՈՆՈՄԻԿԱՅԻ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

20 օգոստոսի 1998 թ.

N 289

ԱՐԺԵԹՂԹԵՐԻ ՇՈՒԿԱՅՈՒՄ ԻՐԱԿԱՆԱՑՎՈՂ ՏՆՏԵՍԱԿԱՆ ԳՈՐԾՈՒՆԵՈՒԹՅԱՆ ՀԻՄՆԱՎՈՐՎԱԾՈՒԹՅԱՆ ԾՐԱԳՐԻ (ԲԻԶՆԵՍ ՊԼԱՆ) ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

Ելնելով ՀՀ կառավարության 1998 թվականի հունվարի 7-ի թիվ 3 որոշմամբ հաստատված «Արժեթղթերի շուկայում իրականացվող գործունեության լիցենզավորման կարգի» 14-րդ կետի պահանջներից

ՀՐԱՄԱՅՈՒՄ ԵՄ

Հաստատել արժեթղթերի շուկայում իրականացվող գործունեության հիմնավորվածության ծրագրի (բիզնես պլան) կառուցվածքը (կցվում է):

Նախարար`

Է. Սանդոյան

ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ և ԷԿՈՆՈՄԻԿԱՅԻ ՆԱԽԱՐԱՐԻ 20.08.1998 Թ. N 289 ՀՐԱՄԱՆՈՎ

ԱՐԺԵԹՂԹԵՐԻ ՇՈՒԿԱՅՈՒՄ ԻՐԱԿԱՆԱՑՎՈՂ ՏՆՏԵՍԱԿԱՆ ԳՈՐԾՈՒՆԵՈՒԹՅԱՆ ՀԻՄՆԱՎՈՐՎԱԾՈՒԹՅԱՆ ԾՐԱԳՐԻ (ԲԻԶՆԵՍ ՊԼԱՆ) ԿԱՌՈՒՑՎԱԾՔԸ

Տնտեսական գործունեության հիմնավորվածության ծրագիրը նախատեսվող գործունեության տեսակով (տեսակներով) զբաղվելու, նախանշված նպատակների և դրանց հասնելու մեթոդների, ձևերի ու միջոցների բնութագիրն է (բացահայտումը), պլանավորված գործողությունների ծրագիրը` առաջիկա 2 տարիների կտրվածքով: Այդ առումով ծրագրի մեջ օգտագործված բոլոր կանխատեսումներն ու ենթադրությունները պետք է հիմնավորված լինեն կոնկրետ հաշվարկներով (սեփական կապիտալի ավելացման, գործունեության ընդլայնման, եկամտաբերության ավելացման և այլնի վերաբերյալ), վերլուծություններով և ելակետային (բազային) տվյալներով:

Տնտեսական գործունեության հիմնավորվածության ծրագիրը բաղկացած է հետևյալ բաժիններից`

● Անվանաթերթ, 

● Շուկայի ուսումնասիրություն, վերլուծություն և գնահատում, 

● Ներքին կազմակերպական կառուցվածք, 

● Գործունեության բնութագիր, 

● Ֆինանսական ծրագիր և ֆինանսական ռազմավարություն, 

● Ռիսկի կանխատեսում և կառավարում:

1. Անվանաթերթ

Այս բաժնում տրվում են`

1.1. Ձեռնարկության (այդ թվում` բաժնետիրական ընկերության) անվանումը, կազմակերպական-իրավական տեսակը, հասցեն:

1.2. Ծրագրի հակիրճ բնութագիրը և նպատակը:

2. Շուկայի ուսումնասիրություն, վերլուծություն և գնահատում

Այս բաժինն ընդգրկում է`

2.1. Շուկայի հիմնական առանձնահատկությունների բնութագիրը (ներառյալ շուկայի ինստիտուցիոնալ համակարգը, շուկայում շրջանառող օբյեկտները, գործող տոկոսադրույքները, ակնկալվող եկամուտը, աճը, հնարավոր փոփոխությունները` կապված այս կամ այն գործոնի հետ):

2.2. Շուկայի սեգմենտավորումը (ներառյալ շուկայի այն սեգմենտը (սեգմենտները), որտեղ ծավալելու է գործունեությունը) և ներթափանցման մասշտաբների վերաբերյալ կանխատեսումները (ներառյալ այն դիրքը, որը նախատեսվում է գրավել շուկայի տվյալ սեգմենտում (սեգմենտներում):

2.3. Հիմնական մրցակիցների վերաբերյալ ընդհանուր տեղեկություններ և վերջիններիս նկատմամբ ունեցած մրցունակ առավելությունները (ներառյալ հավանական հաճախորդների կազմն ըստ խմբերի և այն հանգամանքներն ու դրդապատճառները, որոնք տվյալ ձեռնարկությունը (այդ թվում բաժնետիրական ընկերությունը) վերոհիշյալ հաճախորդների կողմից ավելի նախընտրելի են դարձնում):

3. Ներքին կազմակերպական կառուցվածք

Այս բաժնում տրվում է`

Ձեռնարկության (այդ թվում բաժնետիրական ընկերության) կազմակերպական կառուցվածքը, կառուցվածքային ստորաբաժանումների թվարկումը և դրանց միջև փոխհարաբերությունները` ելնելով իրականացվող հիմնական գործառնություններից:

4. Գործունեության բնութագիր

Այս բաժնում արտացոլվում են`

4.1. Մատուցվելիք ծառայությունների և պլանավորված աշխատանքների (փուլերով) նկարագիրը,

4.2. Ծառայությունների մատուցման մեխանիզմը (ներառյալ սեփական հնարավորությունները և արտաքին հնարավորությունների օգտագործման շրջանակները):

5. Ֆինանսական ծրագիր և ֆինանսական ռազմավարություն

Այս բաժինը ներառում է`

5.1. Ակտիվների և պասիվների կազմը և կառուցվածքն առաջիկա 2 տարիների կտրվածքով:

5.2. Կանոնադրական հիմնադրամի մեծությունը, ձևավորման աղբյուրները, սեփական կապիտալի նախատեսվող մեծությունը և կառուցվածքը առաջիկա 2 տարիների կտրվածքով` հաշվի առնելով տվյալ գործունեության համար սահմանված տնտեսական նորմատիվները,

5.3. Եկամուտների և ծախսերի կանխատեսումներն առաջիկա 2 տարիների համար` (ներառյալ եկամուտների և ծախսերի կազմն ու կառուցվածքը) հիմնված շուկայի վերլուծության արդյունքների վրա:

6. Ռիսկի կանխատեսում և կառավարում

Այս բաժնում տրվում է`

Տվյալ գործունեության տեսակի (տեսակների) հետ կապված ֆինանսական շուկայում առկա ռիսկերի դասակարգումը, դրանց գնահատման մեխանիզմը, ռիսկայնության միջին մակարդակի հաշվարկը և նախատեսվող միջոցառումները վերջինիս փոփոխության դեպքում:

Հայտատուի հայեցողությամբ ծրագիրը կարող է բովանդակել նաև այլ տեղեկություններ, որոնց առկայությունը տնտեսական գործունեության ծրագրի հիմնավորման առումով հայտատուն նպատակահարմար է գտնում:

Շուկայի նկարագիրը և պահանջվող այլ տեղեկությունները ներկայացվում են կամայական (միասնական ձևեր (ստանդարտներ) սահմանված չեն), սակայն վերլուծության և գնահատման համար ընկալելի ձևով:

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
18 սեպտեմբերի 1998 Թ.

պԵՏԱԿԱՆ ԳՐԱՆՑՄԱՆ ԹԻՎ 20980187