«Գրանցված է»
ՀՀ արդարադատության
նախարարության կողմից
1 դեկտեմբերի 2003 թ.
Պետական գրանցման թիվ 10203359

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

25 նոյեմբերի 2003 թ. ք. Երևան

N 390-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆՈՏԱՐՆԵՐԻ ԿՈՂՄԻՑ ՎԱՎԵՐԱՑՎՈՂ ՓԱՍՏԱԹՂԹԵՐՈՒՄ ՊԱՇՏՊԱՆԻՉ ԻՆՔՆԱՍՈՍՆՁՎՈՂ ՊԻՏԱԿՆԵՐԻ ՕԳՏԱԳՈՐԾՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Նոտարական փաստաթղթերը կեղծիքներից պաշտպանելու նպատակով‚

Հրամայում եմ`

Հաստատել Հայաստանի Հանրապետության նոտարների կողմից վավերացվող փաստաթղթերում պաշտպանիչ ինքնասոսնձվող պիտակների օգտագործման կարգը (հավելված N 1 կցվում է):

Դ. Հարությունյան

Հավելված N 1   Հաստատված է ՀՀ արդարադատության նախարարի 2003 թ. նոյեմբերի 25-ի թիվ 390-Ն հրամանով

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆՈՏԱՐՆԵՐԻ ԿՈՂՄԻՑ ՎԱՎԵՐԱՑՎՈՂ ՓԱՍՏԱԹՂԹԵՐՈՒՄ ՊԱՇՏՊԱՆԻՉ ԻՆՔՆԱՍՈՍՆՁՎՈՂ ՊԻՏԱԿՆԵՐԻ ՕԳՏԱԳՈՐԾՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգը կարգավորում է Հայաստանի Հանրապետության նոտարների կողմից վավերացվող փաստաթղթերում պաշտպանիչ ինքնասոսնձվող պիտակների օգտագործման ընթացքում ծագող հարաբերությունները:

2. Պաշտպանիչ ինքնասոսնձվող պիտակները օգտագործվում են նոտարի կողմից վավերացվող փաստաթղթերը կեղծիքներից, ինչպես նաև հետագայում դրանց նույնականացման (իդենտիֆիկացման) հատկանիշները պաշտպանելու նպատակով:

3. Պաշտպանիչ ինքնասոսնձվող պիտակները համարվում են խիստ հաշվառման փաստաթղթեր: Նախարարության աշխատակազմի նոտարիատի բաժինը բացում է պաշտպանիչ ինքնասոսնձվող պիտակների հաշվառման հատուկ գրանցամատյան (այսուհետ` գրանցամատյան), որտեղ նշվում է պիտակների այն քանակությունը, ըստ համարների, որը հատկացվում է տվյալ նոտարին:

Պաշտպանիչ ինքնասոսնձվող պիտակի ստացման մասին նոտարը ստորագրում է գրանցամատյանում:

4. Պաշտպանիչ ինքնասոսնձվող պիտակների բաշխումը կատարվում է Հայաստանի Հանրապետության արդարադատության նախարարության (այսուհետ` նախարարություն) աշխատակազմի նոտարիատի բաժնի կողմից` յուրաքանչյուր նոտարի վճարած գումարին համապատասխան:

Պաշտպանիչ ինքնասոսնձվող պիտակներ ձեռք բերելու համար նոտարը նախարարության աշխատակազմի նոտարիատի բաժին է ներկայացնում դիմում, ինչպես նաև պաշտպանիչ ինքնասոսնձվող պիտակների ձեռք բերման համար վճարված գումարը հաստատող փաստաթղթի (հաշիվ-ֆակտուրա) բնօրինակն ու պատճենը (բնօրինակը վերադարձվում է նոտարին):

Պաշտպանիչ ինքնասոսնձվող պիտակները նոտարին տրվում են սույն կետով նախատեսված փաստաթղթերը ներկայացնելուց անմիջապես հետո:

II. ՊԱՇՏՊԱՆԻՉ ԻՆՔՆԱՍՈՍՆՁՎՈՂ ՊԻՏԱԿՆԵՐՆ ՕԳՏԱԳՈՐԾԵԼՈՒ ԵՎ ԴՐԱՆՔ ՎԵՐԱԴԱՐՁՆԵԼՈՒ ԿԱՐԳԸ

5. Պաշտպանիչ ինքնասոսնձվող պիտակները դրվում են նոտարի կողմից վավերացվող բոլոր փաստաթղթերի վրա, անկախ դրանց էջերի քանակից:

6. Եթե փաստաթուղթը բաղկացած է մեկ թերթից, ապա պաշտպանիչ ինքնասոսնձվող պիտակը փակցվում է նոտարի վավերացման մակագրությունից հետո, փաստաթղթի ներքևում: Պիտակի կեսի վրա նոտարը դնում է Հայաստանի Հանրապետության զինանշանի պատկերով իր կնիքը:

Եթե փաստաթուղթը բաղկացած է մի քանի թերթից, ապա «Նոտարիատի մասին» Հայաստանի Հանրապետության օրենքի համաձայն, տվյալ թերթերը կարվում են, իսկ պաշտպանիչ ինքնասոսնձվող պիտակը փակցվում է կարի վրա: Պաշտպանիչ ինքնասոսնձվող պիտակի կեսի վրա նոտարը դնում է Հայաստանի Հանրապետության զինանշանի պատկերով իր կնիքը:

Պաշտպանիչ ինքնասոսնձվող պիտակների համարները (համարանիշը) պետք է նշել նոտարի սեղանամատյանում` այն նոտարական գործողության գրանցման ռեեստրի դիմաց, որի վավերացման համար օգտագործվում է տվյալ պիտակը:

7. Պաշտպանիչ ինքնասոսնձվող պիտակները դրվում են այնպես, որպեսզի բացառվի դրանք պոկելու հնարավորությունը, առանց փաստաթուղթը վնասելու:

Արգելվում է պաշտպանիչ ինքնասոսնձվող պիտակների վրա կատարել նշագրումներ, պաշտպանիչ ինքնասոսնձվող պիտակները կամ դրանց մի մասը ծածկել անթափանց թաղանթներով:

8. Եթե օգտագործման ընթացքում կամ այլ պատճառներով պաշտպանիչ ինքնասոսնձվող պիտակը վնասվում է, ապա նոտարը այն առանձնացնում և հաշվառում է որպես խոտանված, ապա յուրաքանչյուր տարվա վերջում վերադարձնում Նախարարության աշխատակազմի նոտարիատի բաժին` ոչնչացման համար:

Վնասված պաշտպանիչ ինքնասոսնձվող պիտակները վերադարձվում են առանձին, եթե դա հնարավոր է: Հակառակ դեպքում վնասված պաշտպանիչ ինքնասոսնձվող պիտակները վերադարձվում են փաստաթղթի այն էջի հետ միասին, որի վրա պիտակը փակցվել է:

9. Վնասված պիտակները ոչնչացման ակտով այրվում են Նախարարության աշխատակազմի նոտարիատի բաժնի կողմից:

10. Պաշտպանիչ ինքնասոսնձվող պիտակների օգտագործման կարգի նկատմամբ հսկողությունն իրականացնում է Նախարարության աշխատակազմի նոտարիատի բաժինը: