ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Ընդունված է 2025 թվականի մայիսի 12-ին

Հոդված 1. «Սահմանափակ պատասխանատվությամբ ընկերությունների մասին» 2001 թվականի հոկտեմբերի 24-ի ՀՕ-252 օրենքի (այսուհետ` Օրենք) 30-րդ հոդվածը շարադրել հետևյալ խմբագրությամբ.

«Հոդված 30.

Ընկերության կանոնադրական կապիտալում ավանդների ներդրման կարգը

1. Ընկերության յուրաքանչյուր հիմնադիր պարտավոր է ամբողջությամբ ներդնել իր ավանդը ընկերության կանոնադրական կապիտալում հիմնադիր պայմանագրով սահմանված ժամկետում, որը չի կարող գերազանցել ընկերության պետական գրանցման պահից մեկ տարին: Յուրաքանչյուր հիմնադրի ավանդի անվանական արժեքը չպետք է պակաս լինի նրա բաժնեմասի անվանական արժեքից:

2. Չի թույլատրվում հիմնադրին ազատել ավանդի ներդրման պարտականությունից, այդ թվում` ընկերության հանդեպ նրա պահանջների հաշվանցմամբ: Սույն մասի պահանջները չեն տարածվում փոխարկելի փոխառության պայմանագրի հիման վրա բաժնեմասի փոխարկման դեպքերի վրա:»:

Հոդված 2. Օրենքը լրացնել հետևյալ բովանդակությամբ 33.1-ին հոդվածով.

«Հոդված 33.1.

Ի կատարումն փոխարկելի փոխառության պայմանագրի՝ ընկերության կանոնադրական կապիտալի ավելացման կարգը

1. Ընդհանուր ժողովն ընկերության բոլոր մասնակիցների միաձայն որոշմամբ կարող է Հայաստանի Հանրապետության քաղաքացիական օրենսգրքի 886.2-րդ հոդվածով սահմանված փոխարկելի փոխառության պայմանագիր (որով ընկերությունը հանդիսանում է փոխառու, այդ թվում՝ այն դեպքում, երբ նման գործարքը խոշոր գործարք է) կնքելու մասին որոշում ընդունել: Ընկերության կնքած փոխարկելի փոխառության պայմանագրում (որով ընկերությունը հանդիսանում է փոխառու) փոփոխություններ կատարելու վերաբերյալ որոշումը կայացնում է ընդհանուր ժողովը՝ ընկերության բոլոր մասնակիցների միաձայն որոշմամբ:

2. Ի կատարումն փոխարկելի փոխառության պայմանագրի (որով ընկերությունը հանդիսանում է փոխառու)` ընկերության կանոնադրական կապիտալի ավելացումը տեղի է ունենում ընկերության մասնակիցների ընդհանուր ժողովի որոշմամբ:

3. Ի կատարումն փոխարկելի փոխառության պայմանագրի (որով ընկերությունը հանդիսանում է փոխառու)՝ փոխատուն պայմանագրով սահմանված ժամկետում ընկերության գործադիր մարմին է ներկայացնում դիմում` ընկերության մասնակից հանդիսացող փոխատուի դեպքում` ընկերության կանոնադրական կապիտալի ավելացման վերաբերյալ` փոխատուի կողմից փոխարկելի փոխառությամբ սահմանված գումարի չափով լրացուցիչ ավանդի ներդրման հիման վրա նրա բաժնեմասի անվանական արժեքի` այդ չափով ավելացման, և փոխարկման եղանակով ավանդների ներդրման արդյունքների հաստատման և ընկերության կանոնադրության փոփոխությունները հաստատելու մասին որոշում կայացնելու մասին, իսկ ընկերության մասնակից չհանդիսացող փոխատուի դեպքում` նրան ընկերություն ընդունելու, ընկերության կանոնադրական կապիտալի ավելացման և փոխատուի կողմից փոխարկելի փոխառությամբ սահմանված գումարի չափով ավանդի ներդրման հիման վրա բաժնեմաս տրամադրելու (փոխարկման եղանակով ավանդների ներդրման արդյունքների հաստատման) և ընկերության կանոնադրության փոփոխությունները հաստատելու մասին որոշում կայացնելու մասին: Եթե փոխարկելի փոխառության պայմանագրով նախատեսված է, որ փոխարկումը պայմանավորված է պայմանագրով սահմանված պայմանների վրա հասնելով, ապա սույն մասում նշված դիմումը պետք է պարունակի այդ պայմանները վրա հասնելու հիմնավորումը։ Փոխարկելի փոխառության պայմանագրով կարող է սահմանվել, որ սույն մասում նշված դիմումը համարվում է ստացված` պայմանագրով սահմանված պայմանները վրա հասնելու դեպքում:

4. Ի կատարումն փոխարկելի փոխառության պայմանագրի (որով ընկերությունը հանդիսանում է փոխառու)` սույն հոդվածի 3-րդ մասով սահմանված դիմումը ընկերության գործադիր մարմնի կողմից ստացվելուց (պայմանագրով սահմանված դեպքում` ստացված համարվելուց), իսկ եթե փոխարկելի փոխառության պայմանագրով նախատեսված է, որ փոխարկումը պայմանավորված է պայմանագրով սահմանված պայմանների վրա հասնելով, ապա այդ պայմանների վրա հասնելուց և սույն հոդվածի 3-րդ մասով սահմանված դիմումն ընկերության գործադիր մարմնի կողմից ստացվելուց (պայմանագրով սահմանված դեպքում` ստացված համարվելուց) հետո՝ 60-օրյա ժամկետում, ընկերությունը պարտավոր է կայացնել սույն հոդվածի 3-րդ մասով սահմանված համապատասխան որոշումները:

5. Սույն հոդվածով սահմանված դեպքերում` մասնակցի լրացուցիչ ավանդը, իսկ ընկերության մասնակից չհանդիսացող փոխատուի դեպքում ավանդը համարվում է լրիվ ծավալով վճարված սույն հոդվածի 3-րդ մասով սահմանված համապատասխան որոշումներն ընդունելու պահին:

6. Ընկերությունը չի կարող փոխարկելի փոխառության պայմանագիր կնքել ընկերության մասնակից չհանդիսացող փոխատուի հետ, եթե ընկերության կանոնադրությամբ արգելված է ընկերության կանոնադրական կապիտալի ավելացումը երրորդ անձանց ավանդների հաշվին:»:

Հոդված 3. Օրենքի 47-րդ հոդվածի 2-րդ մասը «ընդհանուր ձայների թվի մեծամասնությամբ» բառերից հետո լրացնել «, բացառությամբ սույն հոդվածով սահմանված գործարք հանդիսացող փոխարկելի փոխառության պայմանագրի (որով ընկերությունը հանդիսանում է փոխառու), որի կատարման մասին որոշումն ընդունվում է ընդհանուր ժողովի կողմից ընկերության գործարքի կատարման մեջ չշահագրգռված մասնակիցների միաձայնությամբ» բառերով:

Հոդված 4.

Եզրափակիչ մաս և անցումային դրույթ

1. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը:

2. Սույն օրենքի գործողությունը տարածվում է սույն օրենքն ուժի մեջ մտնելուց հետո կնքված պայմանագրերից ծագող հարաբերությունների վրա:

Հանրապետության նախագահ	Վ. Խաչատուրյան
2025 թ. մայիսի 30 Երևան ՀՕ-115-Ն

Պաշտոնական հրապարակման օրը՝ 2 հունիսի 2025 թվական: