ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

27 դեկտեմբերի 1995 թվականի N 361

քաղ. Երևան

 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳԱԶԱՄԱՏԱԿԱՐԱՐՄԱՆ ԲԱՐԵԼԱՎՄԱՆ ՄԱՍԻՆ

Հայաստանի Հանրապետության գազամատակարարման բարելավման, օգտագործված բնական գազի դիմաց վճարումների ապահովման նպատակով`

1. Սահմանել, որ Հայաստանի Հանրապետության էներգետիկայի նախարարության «Հայգազարդ» պետական կոնցեռնը Հայաստանի Հանրապետություն բնական գազի ներկրումներն ապահովող և համապատասխան ծառայություններն իրականացնող միակ լիազորված ձեռնարկությունն է:

Հայաստանի Հանրապետության կառավարությունը բնական գազի ներկրման համար տնտեսական պատասխանատվություն չի կրում և երաշխիքներ չի տրամադրում:

2. Հայաստանի Հանրապետության էներգետիկայի նախարարությանը`

ա) սահմանել կարգ և «Հայգազարդ» պետական կոնցեռնի միջոցով ապահովել այլ ձեռնարկությունների կողմից գնված ու Հայաստանի Հանրապետություն ներմուծման համար նախատեսված բնական գազի տեղափոխումը, պահեստավորումը և համապատասխան սպառողներին մատակարարումը.

բ) 2-օրյա ժամկետում ապահովել «Հայգազարդ» պետական կոնցեռնի կողմից հատուկ հաշվի բացումը, որի միջոցով այսուհետև պետք է Հայաստանի Հանրապետության էներգետիկայի նախարարության կողմից սահմանված կարգով իրականացվեն գազի առուծախի հետ կապված բոլոր գործառնությունները.

գ) վերահսկողություն իրականացնել «Հայգազարդ» պետական կոնցեռնի կողմից նշված հատուկ հաշվում առկա միջոցներին համապատասխան ծավալներով բնական գազի ձեռքբերման նկատմամբ.

դ) բնական գազի սակագները հաստատվում են Հայաստանի Հանրապետության էներգահամակարգում սակագներ հաստատող միջգերատեսչական հանձնաժողովի կողմից:

(2-րդ կետը խմբ. 14.05.96 N 282)

3. Հայաստանի Հանրապետության ֆինանսների նախարարությանը` մեկշաբաթյա ժամկետում Հայաստանի Հանրապետության էներգետիկայի նախարարության «Հայգազարդ» պետական կոնցեռնին 6-ամսյա ժամկետով տրամադրել 300 մլն դրամի չափով փոխատվություն` այն բացառապես Թուրքմենստանից բնական գազ գնելու համար օգտագործելու պայմանով:

4. Հայաստանի Հանրապետության էներգետիկայի նախարարությանը` Հայաստանի Հանրապետության էկոնոմիկայի նախարարության և ֆինանսների նախարարության հետ համատեղ մեկամսյա ժամկետում Հայաստանի Հանրապետության կառավարություն ներկայացնել «Հայգազարդ» պետական կոնցեռնի և «Հայթուրթրեյդ» պետական ձեռնարկության կառուցվածքային բարեփոխումների վերաբերյալ առաջարկություն:

Հայաստանի Հանրապետության վարչապետ

Հ. ԲԱԳՐԱՏյան