ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

10 հուլիսի 2018 թվականի N 786-Ն

ԸՆՏԱՆԵԿԱՆ ԵՎ ԿԵՆՑԱՂԱՅԻՆ ԲՌՆՈՒԹՅԱՆ ԿԱՆԽԱՐԳԵԼՄԱՆ ԽՈՐՀՈՒՐԴ ՍՏԵՂԾԵԼՈՒ, ԽՈՐՀՐԴԻ ՁԵՎԱՎՈՐՄԱՆ ԿԱՐԳԸ ԵՎ ԳՈՐԾԱՌՈՒՅԹՆԵՐԸ ՍԱՀՄԱՆԵԼՈՒ ՄԱՍԻՆ
(վերնագիրը խմբ. 30.01.25 N 107-Ն)

Ղեկավարվելով «Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» օրենքի 14-րդ հոդվածի 2-րդ և 4-րդ մասերով՝ Հայաստանի Հանրապետության կառավարությունը որոշում է.

(նախաբանը խմբ. 30.01.25 N 107-Ն)

1. (կետն ուժը կորցրել է 30.01.25 N 107-Ն)

2. Սահմանել ընտանեկան և կենցաղային բռնության կանխարգելման խորհրդի ձևավորման կարգը և գործառույթները` համաձայն հավելվածի:

(2-րդ կետը խմբ. 30.01.25 N 107-Ն)

3. (կետն ուժը կորցրել է 30.01.25 N 107-Ն)

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ն. Փաշինյան
2018 թ. հուլիսի 16 Երևան

Հավելված ՀՀ կառավարության 2018 թվականի հուլիսի 10-ի N 786-Ն որոշման

ԸՆՏԱՆԵԿԱՆ ԵՎ ԿԵՆՑԱՂԱՅԻՆ ԲՌՆՈՒԹՅԱՆ ԿԱՆԽԱՐԳԵԼՄԱՆ ԽՈՐՀՐԴԻ ՁԵՎԱՎՈՐՄԱՆ ԿԱՐԳԸ ԵՎ ԳՈՐԾԱՌՈՒՅԹՆԵՐԸ

(վերնագիրը խմբ. 30.01.25 N 107-Ն)

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են ընտանեկան և կենցաղային բռնության կանխարգելման խորհրդի (այսուհետ` խորհուրդ) ձևավորման և գործառույթների իրականացմանն ուղղված հարաբերությունները:

(1-ին կետը փոփ. 30.01.25 N 107-Ն)

2․ Խորհուրդն ընտանեկան և կենցաղային բռնության կանխարգելման և ընտանեկան և կենցաղային բռնության ենթարկված անձանց պաշտպանության ոլորտում հասարակական հիմունքներով գործող խորհրդակցական մարմին է:

(2-րդ կետը խմբ. 30.01.25 N 107-Ն)

3. Խորհուրդն իր գործունեության ընթացքում ղեկավարվում է Հայաստանի Հանրապետության օրենսդրությամբ և սույն կարգով:

II. ԽՈՐՀՐԴԻ ՁԵՎԱՎՈՐՈՒՄԸ

4. Խորհուրդն ստեղծվում է Հայաստանի Հանրապետության աշխատանքի և սոցիալական հարցերի նախարարին կից: Խորհրդի առաջին նիստը հրավիրում է լիազոր մարմնի ղեկավարը:

5. Խորհրդի անհատական կազմը հաստատում է Հայաստանի Հանրապետության վարչապետը:

6. Խորհուրդը կազմված է առավելագույնը 29 անդամից, ովքեր խորհրդի աշխատանքներին մասնակցում են հասարակական հիմունքներով:

(6-րդ կետը փոփ. 30.01.25 N 107-Ն)

7. Խորհրդի նախագահը լիազոր մարմնի ղեկավարի՝ ընտանիքի, կանանց և երեխաների հիմնահարցերի ոլորտը համակարգող տեղակալն է:

8․ Խորհրդի կազմում ընդգրկվում են՝

1) մեկական ներկայացուցիչ՝ Հայաստանի Հանրապետության աշխատանքի և սոցիալական հարցերի նախարարությունից (այսուհետ՝ լիազոր մարմին), լիազոր մարմնի միասնական սոցիալական ծառայությունից, Հայաստանի Հանրապետության առողջապահության նախարարությունից, Հայաստանի Հանրապետության կրթության, գիտության, մշակույթի և սպորտի նախարարությունից, Հայաստանի Հանրապետության տարածքային կառավարման և ենթակառուցվածքների նախարարությունից, Հայաստանի Հանրապետության արդարադատության նախարարությունից, Հայաստանի Հանրապետության ներքին գործերի նախարարության ոստիկանությունից, Հայաստանի Հանրապետության քննչական կոմիտեից, Հայաստանի Հանրապետության գլխավոր դատախազությունից, Մարդու իրավունքների պաշտպանի աշխատակազմից.

2) ութ ներկայացուցիչ (համաձայնությամբ)՝ հասարակական կազմակերպություններից (այսուհետ՝ կազմակերպություններ), որոնք ընտանեկան և կենցաղային բռնության կանխարգելման և ընտանեկան և կենցաղային բռնության ենթարկված անձանց պաշտպանության ոլորտում վերջին հինգ տարվա ընթացքում ունեն առնվազն երեք տարվա գործունեության փորձ։ Կազմակերպությունների ներկայացուցիչները խորհրդի կազմում ընդգրկվում են երեք տարի ժամկետով: Կազմակերպությունների ներկայացուցիչները խորհրդի կազմում կարող են հանդես գալ միայն մեկ կարգավիճակով՝ որպես կազմակերպության ներկայացուցիչ, և միաժամանակ չեն կարող հանդես գալ որպես աջակցության կենտրոնի կամ ապաստարանի ներկայացուցիչ։ Յուրաքանչյուր կազմակերպություն կարող է առաջադրել մեկ ներկայացուցչի թեկնածություն.

3) տասնմեկ ներկայացուցիչ (համաձայնությամբ)՝ աջակցության կենտրոններից և ապաստարաններից, որոնք ընտանեկան և կենցաղային բռնության կանխարգելման և ընտանեկան և կենցաղային բռնության ենթարկված անձանց պաշտպանության ոլորտում վերջին հինգ տարիների ընթացքում ունեն առնվազն երեք տարվա գործունեության փորձ և ընտանեկան և կենցաղային բռնության ենթարկվածներին ու նրանց խնամքի տակ գտնվող անձանց մատուցել են Հայաստանի Հանրապետության օրենսդրությամբ նախատեսված սոցիալական ծառայություններ կամ ընտանեկան և կենցաղային բռնության կամ ենթադրաբար ընտանեկան և կենցաղային բռնության ենթարկված անձանց, իսկ անհրաժեշտության դեպքում` այդ անձանց ընտանիքների անդամներին տրամադրել են սոցիալական աջակցություն: Աջակցության կենտրոնների և ապաստարանների ներկայացուցիչները խորհրդի կազմում ընդգրկվում են երեք տարի ժամկետով: Աջակցության կենտրոնների և ապաստարանների ներկայացուցիչները խորհրդի կազմում կարող են հանդես գալ միայն մեկ կարգավիճակով՝ որպես աջակցության կենտրոնի կամ ապաստարանի ներկայացուցիչ։ Յուրաքանչյուր աջակցության կենտրոն և ապաստարան կարող է առաջադրել մեկ ներկայացուցչի թեկնածություն։

(8-րդ կետը խմբ. 30.01.25 N 107-Ն)

9․ Խորհրդի կազմում կազմակերպությունների, աջակցության կենտրոնների, ապաստարանների ներկայացուցիչներ ընդգրկելու համար խորհրդի գործավարության իրականացման համար պատասխանատու ստորաբաժանումը լիազոր մարմնի պաշտոնական կայքում հրապարակում է հայտարարություն։

(9-րդ կետը խմբ. 30.01.25 N 107-Ն)

10. Հայտարարության մեջ ներառվում են հետևյալ տվյալները`

1) հայտերը ներկայացնելու վայրը, հասցեն, հեռախոսահամարը, էլեկտրոնային փոստի հասցեն և հայտերն ընդունող պատասխանատու անձի հեռախոսահամարը, էլեկտրոնային փոստի հասցեն.

2) հայտերի` առձեռն հանձնելու դեպքում ընդունման օրերը և ժամերը.

3) հայտեր ներկայացնող կազմակերպությանը, աջակցության կենտրոնին, ապաստարանին ներկայացվող պահանջները և հայտին կից ներկայացվող փաստաթղթերի ցանկը.

4) հայտերը ներկայացնելու վերջնաժամկետը:

(10-րդ կետը խմբ. 30.01.25 N 107-Ն)

10․1․ Հայտերը ներկայացվում են հայտարարությունը հրապարակվելու հաջորդ օրվանից սկսած` 10 օրվա ընթացքում։

(10.1-ին կետը լրաց. 30.01.25 N 107-Ն)

10․2․ Խորհրդի կազմում ընդգրկվելու նպատակով հայտին կից լիազոր մարմնին պետք է ներկայացվեն նաև հետևյալ տվյալները՝

1) կազմակերպության, ապաստարանի, աջակցության կենտրոնի անվանումը, գտնվելու կամ գործունեության իրականացման վայրը, էլեկտրոնային փոստի հասցեն.

2) առաջադրվող ներկայացուցչի անունը, ազգանունը, անձնագրային տվյալները, կոնտակտային տվյալները (հեռախոսահամարը, էլեկտրոնային փոստի հասցեն).

3) կազմակերպության, ապաստարանի, աջակցության կենտրոնի գործունեության ոլորտը և տվյալ ոլորտում գործունեություն ծավալելու ժամանակահատվածը.

4) տեղեկություններ սույն կարգի 8-րդ կետի 2-րդ և 3-րդ ենթակետերում նշված ոլորտում առկա փորձի, դրա տևողության, իրականացրած ծրագրերի վերաբերյալ.

5) առաջադրվող ներկայացուցչի կենսագրական տվյալները։

(10.2-րդ կետը լրաց. 30.01.25 N 107-Ն)

10․3․ Հայտը և կից փաստաթղթերը (այսուհետ միասին՝ փաստաթղթեր) կարող են հանձնվել առձեռն, ուղարկվել փոստով կամ ներկայացվել հայտարարության մեջ նշված էլեկտրոնային փոստի հասցեին՝ էլեկտրոնային թվային ստորագրությամբ հաստատված կամ ստորագրված և տեսաներածված:

(10.3-րդ կետը լրաց. 30.01.25 N 107-Ն)

10․4․ Փոստով և էլեկտրոնային եղանակով ուղարկված փաստաթղթերի ստացման վերաբերյալ կազմակերպությունը, ապաստարանը, աջակցության կենտրոնը ծանուցվում է փաստաթղթերն ստանալուն հաջորդող մեկ աշխատանքային օրվա ընթացքում՝ իր կողմից տրամադրված էլեկտրոնային փոստի հասցեով:

(10.4-րդ կետը լրաց. 30.01.25 N 107-Ն)

10․5․ Սահմանված ժամկետից ուշ ներկայացված հայտերը չեն ուսումնասիրվում:

(10.5-րդ կետը լրաց. 30.01.25 N 107-Ն)

10․6․ Կազմակերպությունների, ապաստարանների, աջակցության կենտրոնների ներկայացուցիչների ընդգրկումն իրականացվում է երկու փուլերով: Առաջին փուլում լիազոր մարմինն ստուգում է փաստաթղթերի ամբողջականությունը և համապատասխանությունը:

(10.6-րդ կետը լրաց. 30.01.25 N 107-Ն)

10․7․ Փաստաթղթերը թերի լինելու կամ անհրաժեշտ փաստաթղթերի ցանկին չհամապատասխանելու դեպքերում հայտ ներկայացնողը դրա մասին ծանուցվում է (իր կողմից տրամադրված էլեկտրոնային փոստի հասցեով) մեկ աշխատանքային օրվա ընթացքում և նրան տրամադրվում է երեք աշխատանքային օր թերությունները շտկելու համար: Սահմանված ժամկետում թերությունները չշտկելու դեպքում հայտին ընթացք չի տրվում:

(10.7-րդ կետը լրաց. 30.01.25 N 107-Ն)

10․8․ Եթե սույն որոշման 8-րդ կետի 2-րդ ենթակետով սահմանված չափանիշներին համապատասխանում են առավելագույնը ութ կազմակերպություն, ապա այդ կազմակերպություններն ընդգրկվում են խորհրդի կազմում։ Եթե սահմանված չափանիշներին համապատասխանում են ութից ավելի կազմակերպություն, ապա խորհրդում ընդգրկելու համար նախապատվությունը տրվում է հաշմանդամություն ունեցող անձանց իրավունքների պաշտպանության և երեխաների իրավունքների պաշտպանության ոլորտում առավել երկար գործունեություն ծավալած առնվազն մեկ հասարակական կազմակերպության:

(10.8-րդ կետը լրաց. 30.01.25 N 107-Ն)

10․9․ Եթե սույն որոշման 8-րդ կետի 3-րդ ենթակետով սահմանված չափանիշներին համապատասխանում են առավելագույնը 11 աջակցության կենտրոն, ապաստարան, ապա այդ աջակցության կենտրոնները, ապաստարաններն ընդգրկվում են խորհրդի կազմում: Եթե սահմանված չափանիշներին համապատասխանում են 11-ից ավելի աջակցության կենտրոն, ապաստարան, ապա խորհրդում ընդգրկելու համար նախապատվությունը տրվում է սույն որոշման 8-րդ կետի 3-րդ ենթակետում նշված ոլորտներում առավել մեծ փորձառություն ունեցող (առավել երկար գործունեություն ծավալած և առավել շատ ծրագրեր իրականացրած) մեկական աջակցության կենտրոնի, ապաստարանի:

(10.9-րդ կետը լրաց. 30.01.25 N 107-Ն)

10.10․ Եթե խորհրդի կազմում կազմակերպությունների, աջակցության կենտրոնների, ապաստարանների ներկայացուցիչներ ընդգրկելու համար լիազոր մարմնի պաշտոնական կայքում հրապարակված հայտարարության արդյունքում սույն որոշման 8-րդ կետի 2-րդ և 3-րդ ենթակետերով սահմանված չափանիշներին համապատասխան կազմակերպությունների, աջակցության կենտրոնների, ապաստարանների՝ սույն որոշման 2-րդ բաժնի 6-րդ կետում նախատեսված առավելագույն թվին համապատասխան ներկայացուցիչներ չեն դիմում, ապա խորհուրդը կազմավորվում է ըստ փաստացի դիմած և ընդգրկված ներկայացուցիչների քանակի։

(10.10-րդ կետը լրաց. 30.01.25 N 107-Ն)

III. ԽՈՐՀՐԴԻ ՆՊԱՏԱԿԸ, ՍԿԶԲՈՒՆՔՆԵՐԸ ԵՎ ԳՈՐԾԱՌՈՒՅԹՆԵՐԸ

11. Խորհրդի գործունեության նպատակն ընտանեկան և կենցաղային բռնության կանխարգելման բնագավառում պետական ռազմավարական միջոցառումների, դրանից բխող ծրագրերի, օրենսդրական բարեփոխումների, ընտանեկան և կենցաղային բռնության ենթարկված անձանց աջակցության, պաշտպանության, ընտանիքում համերաշխության վերականգնման մեխանիզմների, հանրության իրազեկման միջոցառումների և այլ հարցերի վերաբերյալ առաջարկությունների ներկայացումն է:

(11-րդ կետը խմբ. 30.01.25 N 107-Ն)

12. Խորհուրդը գործում է օրինականության, կոլեգիալության, հրապարակայնության և թափանցիկության սկզբունքների հիման վրա:

(12-րդ կետը լրաց. 30.01.25 N 107-Ն)

13․ Խորհուրդն իրականացնում է հետևյալ գործառույթները`

1) ուսումնասիրում, քննարկում և ներկայացնում է առաջարկներ ընտանեկան և կենցաղային բռնության կանխարգելման և դրա դեմ պայքարի բնագավառում պետական միասնական քաղաքականության, այդ թվում՝ ոլորտային իրավական ակտերի վերաբերյալ.

2) քննարկում է ընտանեկան և կենցաղային բռնության կանխարգելմանն առնչվող առանձին հարցերը, հրատապ խնդիրները և ներկայացնում դրանց լուծմանն ուղղված համապատասխան առաջարկություններ.

3) ներկայացնում է ընտանեկան և կենցաղային բռնության վերաբերյալ հանրությանն իրազեկելու միջոցառումներ իրականացնելու առաջարկություններ.

4) քննարկում է տեղական և միջազգային կազմակերպությունների կողմից կատարված հետազոտությունների արդյունքները և դրանց հիման վրա ներկայացնում է առաջարկություններ.

5) ներկայացնում է ընտանեկան և կենցաղային բռնության ենթարկված և ընտանեկան և կենցաղային բռնություն գործադրած անձանց սոցիալական վերականգնմանն ուղղված ծրագրերի վերաբերյալ առաջարկություններ.

6) ուսումնասիրում և քննարկում է պետական կառավարման համակարգի մարմինների կողմից ընտանեկան և կենցաղային բռնության կանխարգելմանը և դրա դեմ պայքարին ուղղված ծրագրերի մասին հրապարակված հաշվետվությունները.

7) առաջարկություններ է ներկայացնում լիազոր մարմնին ընտանեկան և կենցաղային բռնության ենթարկվածների՝ ժամանակավոր աջակցության հաշվեհամարի տնօրինման և ժամանակավոր ֆինանսական աջակցության տրամադրման վերաբերյալ․

8) իր գործունեության մասին ներկայացնում է տարեկան հաշվետվություն, որը, ոչ ուշ, քան մինչև հաջորդող տարվա փետրվարի 2-րդ տասնօրյակը տեղադրում է լիազոր մարմնի պաշտոնական ինտերնետային կայքէջում:

(13-րդ կետը խմբ. 30.01.25 N 107-Ն)

IV. ԽՈՐՀՐԴԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

14․ Խորհրդի աշխատանքները կազմակերպվում են նիստերի միջոցով, որոնք գումարվում են առնվազն յուրաքանչյուր կիսամյակը մեկ անգամ: Խորհրդի նախագահի կամ խորհրդի անդամների առնվազն կեսի նախաձեռնությամբ հրատապ լուծում պահանջող հարցերի քննարկման նպատակով կարող են հրավիրվել արտահերթ նիստեր: Խորհրդի նիստերն արձանագրվում են:

(14-րդ կետը խմբ. 30.01.25 N 107-Ն)

15․ Խորհրդի աշխատանքներն առավել արդյունավետ կազմակերպելու նպատակով խորհրդի նիստերը կարող են իրականացվել նաև հեռավար եղանակով։ Խորհրդի նիստերը հեռավար տարբերակով անցկացնելու դեպքում խորհրդի նախագահի որոշմամբ ընտրվում է տեսաձայնային հեռահաղորդակցության միջոցի տեսակը։

(15-րդ կետը խմբ. 30.01.25 N 107-Ն)

16․ Խորհրդի նիստի օրակարգը կազմվում և համապատասխան փաստաթղթերով էլեկտրոնային փոստի միջոցով տրամադրվում է խորհրդի անդամներին՝ խորհրդի նիստից առնվազն երեք աշխատանքային օր առաջ: Էլեկտրոնային փոստի միջոցով իրականացված ծանուցումը համարվում է պատշաճ, եթե առկա է համապատասխան փաստաթղթերն ուղարկելու և այն հասցեատիրոջ կողմից ստանալու փաստը հաստատելու հնարավորություն: Խորհրդի անդամներն արտահերթ նիստի անցկացման վայրի, օրվա և ժամի մասին տեղեկացվում են խորհրդի նիստի անցկացման օրվանից առնվազն մեկ օր առաջ: Սույն կետով նախատեսված ծանուցումները սույն կարգի 8-րդ կետի 1-ին ենթակետով նախատեսված մարմիններին ուղարկվում են նաև էլեկտրոնային փաստաթղթաշրջանառության պաշտոնական համակարգի միջոցով։

(16-րդ կետը խմբ. 30.01.25 N 107-Ն)

17. Խորհրդի յուրաքանչյուր նիստ սկսվում է նիստի օրակարգի և նախորդ նիստում ընդունված որոշումների կատարման ընթացքի վերաբերյալ խորհրդի նախագահի և խորհրդի անդամի կողմից համապատասխան տեղեկություն տրամադրելու միջոցով: Խորհրդի նիստերը վարում է խորհրդի նախագահը: Վերջինիս բացակայության դեպքում խորհրդի նիստերը վարում է նրա կողմից լիազորված խորհրդի անդամներից մեկը:

(17-րդ կետը խմբ. 30.01.25 N 107-Ն)

18. Ընտանեկան և կենցաղային բռնության կանխարգելման բնագավառում պետական ռազմավարական միջոցառումների, դրանից բխող ծրագրերի, օրենսդրական բարեփոխումների վերաբերյալ հարցերի քննարկման և առաջարկությունների ներկայացման համար խորհրդի նախագահը և անդամները խորհրդում քննարկելու նպատակով խորհրդի յուրաքանչյուր հերթական նիստին տեղեկատվություն են տրամադրում ընտանեկան և կենցաղային բռնության կանխարգելման բնագավառում նախատեսվող օրենսդրական բարեփոխումների վերաբերյալ:

(18-րդ կետը խմբ. 30.01.25 N 107-Ն)

19․ Խորհրդի նիստն իրավազոր է, եթե դրան մասնակցում է խորհրդի անդամների առնվազն կեսը:

(19-րդ կետը խմբ. 30.01.25 N 107-Ն)

20․ Խորհուրդն իր կողմից քննարկվող հարցերի վերաբերյալ ընդունում է որոշումներ, որոնք կարող են լինել առաջարկությունների, եզրակացությունների, վերլուծությունների, հաշվետվությունների, ուղերձների, հաղորդումների ձևով և կրում են խորհրդատվական բնույթ: Խորհրդի որոշումներն ընդունվում են բաց քվեարկությամբ՝ խորհրդի տվյալ նիստին մասնակցող անդամների ձայների պարզ մեծամասնությամբ: Ձայների հավասարության դեպքում խորհրդի նախագահի ձայնը վճռորոշ է:

(20-րդ կետը խմբ. 30.01.25 N 107-Ն)

21․ Խորհրդի նիստերին խորհրդի նախագահի հրավերով կարող են մասնակցել նաև այլ հասարակական կազմակերպությունների, միջազգային կազմակերպությունների ներկայացուցիչներ, պետական մարմինների՝ խորհրդի օրակարգում ընդգրկված հարցերին առնչվող մասնագետներ, ինչպես նաև այլ կազմակերպությունների, Հայաստանյայց Առաքելական եկեղեցու և զանգվածային լրատվության միջոցների ներկայացուցիչներ:

(21-րդ կետը խմբ. 30.01.25 N 107-Ն)

22. Խորհրդի նիստերին խորհրդի նախագահի հրավերով խորհրդակցական ձայնի իրավունքով մասնակցում է Բարձրագույն դատական խորհրդի աշխատակազմի ներկայացուցիչը (համաձայնությամբ)։

(22-րդ կետը խմբ. 30.01.25 N 107-Ն)

23. (կետն ուժը կորցրել է 30.01.25 N 107-Ն)

24. (կետն ուժը կորցրել է 30.01.25 N 107-Ն)

25․ Խորհուրդն իր աշխատանքներն առավել արդյունավետ իրականացնելու նպատակով կարող է ձևավորել աշխատանքային խմբեր, որոնց կազմում կարող են ընդգրկվել խորհրդի անդամ չհանդիսացող այլ մարմինների և կազմակերպությունների ներկայացուցիչներ (համաձայնությամբ), ինչպես նաև առանձին առաջադրանքների իրականացման նպատակով խորհուրդը կարող է ներգրավել մասնագետներ, փորձագետներ և խորհրդատուներ:

(25-րդ կետը խմբ. 30.01.25 N 107-Ն)

26. Աշխատանքային խմբերը կատարում են խորհրդի որոշումները, ինչպես նաև ներկայացնում առաջարկություններ խորհրդի առջև դրված խնդիրների լուծման, խորհրդի նիստերի միջև ընկած ժամանակահատվածում ծագած խնդրահարույց և հրատապ լուծում պահանջող հարցերի վերաբերյալ: Խորհրդի անդամ չհանդիսացող աշխատանքային խմբի ղեկավարը մասնակցում է խորհրդի նիստերին խորհրդատվական ձայնի իրավունքով:

27. Խորհրդի նախագահը`

1) ղեկավարում և կազմակերպում է խորհրդի աշխատանքը.

2) նշանակում է խորհրդի նիստի անցկացման օրը, վայրը և հաստատում օրակարգը.

3) հրավիրում և վարում է խորհրդի նիստերը.

4) ապահովում է խորհրդի բնականոն գործունեությունը.

5) ստորագրում է խորհրդի նիստի արձանագրությունը.

6) ներկայացնում է խորհուրդն այլ մարմինների և կազմակերպությունների հետ փոխհարաբերություններում.

7) համակարգում է խորհրդի, աշխատանքային խմբերի, ինչպես նաև մասնագետների, փորձագետների և խորհրդատուների աշխատանքները:

(27-րդ կետը լրաց. 30.01.25 N 107-Ն)

28. Խորհրդի անդամները`

1) իրավունք ունեն՝

ա. ներկայացնելու հարցեր՝ խորհրդի օրակարգում ընդգրկելու նպատակով,

բ. ներկայացնելու առաջարկություններ խորհրդի գործունեության, ինչպես նաև նիստի օրակարգում ընդգրկված հարցերի վերաբերյալ,

գ․ խորհրդի որոշումների վերաբերյալ ներկայացնելու հատուկ կարծիք. Եթե խորհրդի որևէ անդամ խորհրդի ընդունած որոշման վերաբերյալ ունի հատուկ կարծիք և այն գրավոր տրամադրում է խորհրդին, ապա հատուկ կարծիքը կցվում է խորհրդի տվյալ որոշմանը,

դ. ծանոթանալու խորհրդի նիստերի արձանագրություններին.

2) պարտավոր են՝

ա. անձամբ մասնակցել խորհրդի աշխատանքներին,

բ. անձամբ մասնակցել խորհրդի նիստերին,

գ. կատարել խորհրդի որոշումները,

դ. քվեարկել խորհրդի օրակարգում ընդգրկված հարցերի վերաբերյալ,

ե. խորհրդում քննարկվող հարցերի վերաբերյալ խորհրդի որոշմամբ նախատեսված ժամկետներում ներկայացնել գրավոր դիրքորոշում, հաշվետվություն, եզրակացություն, առաջարկություն, իրենց իրավասության շրջանակում ձեռնարկված միջոցառումների վերաբերյալ այլ տեղեկություններ: Խորհրդի անդամի կողմից ներկայացված գրավոր դիրքորոշումը, հաշվետվությունը, եզրակացությունը, առաջարկությունը, իրենց իրավասության շրջանակում ձեռնարկված միջոցառումների վերաբերյալ տեղեկությունները պետք է դիտարկվեն որպես սույն կարգի 8-րդ կետի 1-3-րդ ենթակետերով նախատեսված մարմինների, կազմակերպությունների, աջակցության կենտրոնների և ապաստարանների պաշտոնական դիրքորոշում:

(28-րդ կետը խմբ., լրաց. 30.01.25 N 107-Ն)

29. Խորհրդի գործավարությունն իրականացնում է լիազոր մարմնի աշխատակազմի ընտանիքի, կանանց և երեխաների հիմնահարցերի վարչությունը, որը`

1) նախապատրաստում է խորհրդի նիստի օրակարգը, օրակարգին վերաբերող համապատասխան նյութերն ու կազմակերպում նյութերի տրամադրումը խորհրդի անդամներին.

2) կազմակերպում է էլեկտրոնային հարցման կամ հեռավար կարգով խորհրդի նիստերի անցկացումը.

3) խորհրդի նիստերին հրավիրում է խորհրդի անդամներին և հրավիրված անձանց, արձանագրում է խորհրդի նիստերը.

4) ապահովում է խորհրդի նիստի որոշումների նախագծերի կազմումը.

5) կազմակերպում է խորհրդի նիստի որոշումների տրամադրումը խորհրդի անդամներին.

6) հետևում է խորհրդի նիստի որոշումների կատարմանը և խորհրդի նիստում զեկուցում դրանց կատարման ընթացքի մասին.

7) խորհրդի նիստերի միջև ընկած ժամանակահատվածում ընդունում և խորհրդի նախագահին է հանձնում խորհրդի անդամների և աշխատանքային խմբերի առաջարկությունները.

8) ապահովում է խորհրդի աշխատանքների լուսաբանումը.

9) ապահովում է խորհրդի տարեկան հաշվետվությունների նախագծերի կազմումը:

(29-րդ կետը լրաց. 30.01.25 N 107-Ն)

29.1․ Խորհրդի գործունեությունը հրապարակային է՝ բացառությամբ խորհրդի նախագահի պատճառաբանված որոշմամբ նիստը կամ դրա մի մասը դռնփակ անցկացնելու դեպքերի։

(29.1-րդ կետը լրաց. 30.01.25 N 107-Ն)

V. ԽՈՐՀՐԴԻ ԳՈՐԾՈՒՆԵՈՒԹՅԱՆ ԵՎ ԽՈՐՀՐԴԻ ԱՆԴԱՄԻ ԼԻԱԶՈՐՈՒԹՅՈՒՆՆԵՐԻ ԴԱԴԱՐՈՒՄԸ

(վերնագիրը խմբ. 30.01.25 N 107-Ն)

(բաժինը խմբ. 30.01.25 N 107-Ն)

30. Խորհրդի գործունեությունը դադարում է Հայաստանի Հանրապետության կառավարության որոշմամբ:

31. Խորհրդի անդամի լիազորությունները դադարում են սույն կարգի 28-րդ կետի 2-րդ ենթակետով նախատեսված իր պարտականությունները չկատարելու կամ ոչ պատշաճ կատարելու դեպքում, խորհրդի անդամի կողմից խորհրդի կազմից դուրս գալու մասին դիմումը խորհրդի նախագահին ներկայացնելու, ինչպես նաև զբաղեցրած պաշտոնից ազատվելու դեպքում:

32. Սույն կարգի 28-րդ կետի 2-րդ ենթակետի «ա» և «բ» պարբերություններով նախատեսված դեպքերում խորհրդի անդամի լիազորությունները կարող են դադարել, եթե խորհրդի անդամն անհարգելի պատճառով մեկ տարվա ընթացքում առնվազն 2 անգամ չի մասնակցել խորհրդի նիստերին և աշխատանքներին, և այդ կապակցությամբ չի ներկայացրել գրավոր պատճառաբանված բացատրություն:

33. Խորհրդի անդամի լիազորությունները դադարեցնելու հարցը կարող է դրվել քվեարկության խորհրդի նախագահի կամ խորհրդի անդամների առնվազն մեկ երրորդի նախաձեռնությամբ:

34. Խորհրդի անդամի լիազորությունների դադարեցման որոշումն ընդունվում է խորհրդի անդամների ձայների պարզ մեծամասնությամբ: Քվեարկությանը չի մասնակցում խորհրդի այն անդամը, որին վերաբերում է քննարկվող հարցը։

35․ Խորհրդի անդամի լիազորությունները դադարելու դեպքում լիազորությունները դադարելուց հետո 20 աշխատանքային օրվա ընթացքում սույն որոշմամբ սահմանված կարգի համաձայն խորհրդի կազմում ընդգրկվում է նոր ներկայացուցիչ (առաջադրվում է նոր անդամի թեկնածություն):

(հավելվածը խմբ., փոփ., լրաց. 30.01.25 N 107-Ն)

Հայաստանի Հանրապետության վարչապետ

Ն. Փաշինյան