ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ

Ո Ր Ո Շ ՈՒ Մ

ԲԴԽ-16-Ն-6 2021 թ.

         ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՀԱՎԱՍԱՐԱՉԱՓ ԲԱՇԽՄԱՆ ՉԱՓԱՆԻՇՆԵՐԸ ԵՎ ԿԱՐԳԸ, ԳՈՐԾԵՐԻ ՎԵՐԱԲԱՇԽՄԱՆ, ԿՈԼԵԳԻԱԼ ԴԱՏԱԿԱՆ ԿԱԶՄԵՐԸ ՁԵՎԱՎՈՐԵԼՈՒ ԿԱՐԳԸ ԵՎ ԴԱՏԱՎՈՐՆԵՐԻՆ ՀԱՆՁՆՎՈՂ ԳՈՐԾԵՐԻ ՏՈԿՈՍԱՉԱՓԵՐ, ԻՆՉՊԵՍ ՆԱԵՎ ՕՊԵՐԱՏԻՎ-ՀԵՏԱԽՈՒԶԱԿԱՆ ՄԻՋՈՑԱՌՈՒՄՆԵՐ ԻՐԱԿԱՆԱՑՆԵԼՈՒ ՄԱՍԻՆ ՄԻՋՆՈՐԴՈՒԹՅՈՒՆՆԵՐ ՔՆՆՈՂ ԴԱՏԱՎՈՐՆԵՐԻ ՑԱՆԿԸ ԵՎ ՆՐԱՆՑ ՀԱՆՁՆՎՈՂ ԳՈՐԾԵՐԻ ՏՈԿՈՍԱՉԱՓԵՐԸ ՍԱՀՄԱՆԵԼՈՒ ՄԱՍԻՆ
(վերնագիրը լրաց. 05.01.23 ԲԴԽ-2-Ն-1, 02.05.23 ԲԴԽ-46-Ն-16)

 Ղեկավարվելով «Հայաստանի Հանրապետության դատական օրենսգիրք» սահմանադրական օրենքի 40-րդ հոդվածի 1-ին մասով, 42-րդ հոդվածի 1-ին մասով, 45-րդ հոդվածի 3-րդ մասով, 46-րդ հոդվածի 2-րդ մասով, 89-րդ հոդվածի 1-ին մասի 27-րդ և 45-րդ կետերով, 89-րդ հոդվածի 2-րդ մասով, 94-րդ հոդվածի 1-ին մասով՝ Բարձրագույն դատական խորհուրդը

Որոշում է

1. Սահմանել Հայաստանի Հանրապետության դատարաններում դատավորների միջև գործերի հավասարաչափ բաշխման չափանիշները և կարգը՝ համաձայն հավելված 1-ի:

2. Սահմանել Հայաստանի Հանրապետության առաջին ատյանի, վերաքննիչ և վճռաբեկ դատարաններում կոլեգիալ դատական կազմերը ձևավորելու, դատավորների միջև գործերի վերաբաշխման կարգը՝ համաձայն հավելված 2-ի:

3. Սահմանել Հայաստանի Հանրապետության առաջին ատյանի, վերաքննիչ և վճռաբեկ դատարանների և վճռաբեկ դատարանի պալատների նախագահներին, Բարձրագույն դատական խորհրդի դատավոր անդամներին, Հայաստանի Հանրապետության դատավորների ընդհանուր ժողովի էթիկայի և կարգապահական հարցերի, դատավորների գործունեության գնահատման, ուսումնական հարցերի հանձնաժողովների դատավոր անդամներին հանձնվող գործերի տոկոսաչափերը՝ համաձայն հավելված 3-ի:

3.1. Սահմանել օպերատիվ-հետախուզական միջոցառումներ իրականացնելու մասին միջնորդություններ քննող դատավորների ցանկը և նրանց հանձնվող գործերի տոկոսաչափերը՝ համաձայն հավելված 4-ի:

(3.1-ին կետը լրաց. 05.01.23 ԲԴԽ-2-Ն-1, 02.05.23 ԲԴԽ-46-Ն-16)

4. Սույն որոշման 1-ին հավելվածի 1-ին կետի 2-րդ, 4-րդ, 5-րդ և 6-րդ ենթակետերով, 2-րդ, 3-րդ, 5-րդ, 6-րդ, 10-րդ, 11-րդ, 12-րդ, 13-րդ, 16-րդ, 20-րդ, 22-րդ, 23-րդ, 24-րդ, 26-րդ, 27-րդ և 28-րդ կետերով, 2-րդ հավելվածի 4-րդ կետով սահմանված կարգավորումներն իրացնել համապատասխան ծրագրային լուծումների հետ միաժամանակ:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Բարձրագույն դատական խորհրդի նախագահ	Ռ. ՎԱՐԴԱԶԱՐՅԱՆ
2021 թ. մարտի 25 ք. Երևան

Հավելված 1 Բարձրագույն դատական խորհրդի 2021 թվականի մարտի 25-ի թիվ ԲԴԽ-16-Ն-6 որոշման

1. ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՀԱՎԱՍԱՐԱՉԱՓ ԲԱՇԽՄԱՆ ՉԱՓԱՆԻՇՆԵՐԸ

1. Հայաստանի Հանրապետության դատարաններում ստացված գործերը դատավորների միջև բաշխելիս Դատական ավտոմատացված համակարգը` Դատական համակարգ համակարգչային ծրագիրը (այսուհետ՝ Ծրագիր) հիմք է ընդունում գործերի հավասարաչափ բաշխման հետևյալ չափանիշները՝

 1) գործերի բաշխման պատահականությունը` Ծրագրում ապահովելով դատավորների միջև գործերը բաշխելիս պատահական ընտրությունը` առանց գործերի մուտքագրման հաջորդականությունը հաշվի առնելու,

 2) գործերի բաշխման հավասարությունը՝ Ծրագրում ապահովելով դատավորների միջև գործերի բաշխման տվյալ օրվան նախորդող 365-օրյա ժամանակահատվածը` համապատասխան մասնագիտացում ունեցող դատավորներից յուրաքանչյուրին բաշխված (հանձնված) գործերի միջին քանակի համահարթեցմանը համապատասխան,

 3) դատավորների մասնագիտացումը` Ծրագրում ապահովելով դատավորների միջև գործերի բաշխումը դատավորի հիմնական, իսկ առկայության դեպքում՝ նաև առանձին տեսակի գործեր քննելու մասնագիտացումը հաշվի առնելով,

 4) առանձին տեսակի գործերի բաշխման համար օրենքով նախատեսված առանձնահատկությունները հաշվի առնելը` օրենքով սահմանված դեպքերում Ծրագրում առանձին տեսակի գործերի բաշխումն իրականացնելով անհապաղ,

 5) գործերի բարդությունը` Ծրագրում ապահովելով դատավորների միջև գործերի բաշխումը` առանձին տեսակի գործերի բարդության աստիճանից ելնելով, ընդ որում՝ բարդության աստիճանը սահմանվում է Բարձրագույն դատական խորհրդի որոշմամբ:

 6) մատչելիությունը` Ծրագրում ապահովելով դատավորների միջև գործերը բաշխելիս դատարանի ծառայություններից օգտվողների համար առավել մատչելի արդարադատության ապահովման նպատակով նստավայրերի սպասարկման տարածքի շրջանակներում նաև դատարանի նստավայրերի միջև հեռավորությունները հնարավորինս հաշվի առնելը,

 7) գաղտնիությունը` Ծրագրում ապահովելով դատավորների միջև գործեր բաշխելիս, վերաբաշխելիս օրենքով պահպանվող, այդ թվում՝ պետական գաղտնիք պարունակող տվյալների գաղտնիությունը:

2. ԱՌԱՋԻՆ ԱՏՅԱՆԻ ԴԱՏԱՐԱՆՆԵՐՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ԲԱՇԽՄԱՆ ԿԱՐԳԸ

2. Հայաստանի Հանրապետության առաջին ատյանի դատարաններում քրեական, քաղաքացիական, վարչական և սնանկության գործերը, մինչդատական վարույթի դատական երաշխիքների շրջանակներում ներկայացված միջնորդությունները և բողոքները՝ բացառությամբ սույն որոշմամբ սահմանված դեպքերի, պատժի կատարման հետ կապված, հարկադիր բուժման տեսակի փոփոխության վերաբերյալ միջնորդությունները, դատական հանձնարարությունները, հայցի նախնական ապահովման միջոցներ կիրառելու վերաբերյալ դիմումներն անհապաղ մուտք են արվում Ծրագիր և նույն օրը` ժամը 20:00-ին, հավասարաչափ բաշխման չափանիշներին համապատասխան բաշխվում են տվյալ դատարանի համապատասխան մասնագիտացում ունեցող դատավորների միջև՝ հաշվի չառնելով գործերի մուտքագրման հերթականությունը՝ ըստ Բարձրագույն դատական խորհրդի (այսուհետ՝ Խորհուրդ) որոշմամբ սահմանված դատավորների մասնագիտացումների:

(2-րդ կետը փոփ. 05.01.23 ԲԴԽ-2-Ն-1)

2.1. Հայաստանի Հանրապետության քրեական օրենսգրքի հավելված N 1-ով նախատեսված հակակոռուպցիոն դատարանին ընդդատյա կոռուպցիոն հանցանքների վերաբերյալ մինչդատական վարույթի դատական երաշխիքների վարույթները և բողոքները բաշխվում են հակակոռուպցիոն դատարանի կոռուպցիոն հանցագործությունների քննության գործերով մասնագիտացման դատավորների միջև՝ սույն բաժնի 2-րդ կետով սահմանված կարգով:

3. Քաղաքացիական գործերի շրջանակներում վճարման կարգադրություն արձակելու վերաբերյալ գործերի բաշխումն իրականացվում է առանձին, ընդ որում՝ էլեկտրոնային և թղթային եղանակով դատարանում ստացված վճարման կարգադրություն արձակելու վերաբերյալ գործերը բաշխվում են միմյանցից առանձին: Վճարման կարգադրություն արձակելու վերաբերյալ գործերը բաշխվում են դատարանի քաղաքացիական մասնագիտացման բոլոր դատավորների միջև՝ անկախ նստավայրերի սպասարկման տարածքից:

4. Էլեկտրոնային եղանակով ստացված վճարման կարգադրությունների՝ Ծրագրի միջոցով բաշխման գործընթացն իրականացվում է առաջին ատյանի ընդհանուր իրավասության բոլոր դատարաններում:

5. Դատավորների միջև գործերը բաշխվում են տվյալ օրվան նախորդող 365-օրյա ժամանակահատվածում (բացառությամբ գործուղման մեջ գտնվող դատավորների) տվյալ դատարանում (նստավայրում) համապատասխան մասնագիտացում ունեցող դատավորներից յուրաքանչյուրին բաշխված (հանձնված) գործերի միջին քանակի համահարթեցմամբ: Ընդ որում, տվյալ օրը դատավորներին բաշխված գործերի միջև տարբերությունը չի կարող գերազանցել 20 տոկոսը: Համահարթեցումն իրականացնելիս հաշվի են առնվում նվազեցումից օգտվող դատավորների համար սույն որոշման 3-րդ հավելվածով սահմանված տոկոսաչափերը:

6. Նույն անձի կողմից նույն պահանջով ներկայացված դիմումը, միջնորդությունը կամ բողոքը, որի վերաբերյալ գործն ըստ էության լուծող դատական ակտ (եզրափակիչ դատական ակտ) չի կայացվել (այդ թվում՝ վերադարձվել է կամ թողնվել է առանց քննության) Ծրագրի միջոցով բաշխվում է այն նույն դատավորին (դատական կազմին), որին նախկինում բաշխված է եղել (նշված դեպքերում ստացված գործերը որպես նոր գործ չեն հաշվարկվում): Այն դեպքերում, երբ տվյալ դատավորը գտնվում է արձակուրդում կամ օրենքով նախատեսված հիմքերից մեկի առկայության հետևանքով որոշակի ժամկետով բացակայում է աշխատանքից կամ նրա անուն-ազգանունը ժամանակավորապես հանված է գործերի բաշխման ցանկից կամ լիազորությունները կասեցվել, դադարել կամ դադարեցվել են, բաշխումը կատարվում է սույն որոշմամբ սահմանված ընդհանուր կարգով:

7. «Հայաստանի Հանրապետության դատական օրենսգիրք» սահմանադրական օրենքի (այսուհետ` Օրենսգիրք) 42-րդ հոդվածի 4-րդ մասով սահմանված դեպքում նստավայրի սպասարկման տարածքի ընտրությունը, մինչև ծրագրային լուծումների մշակումը, իրականացնում է դատարանի աշխատակազմի ղեկավարը:

(7-րդ կետը փոփ. 27.02.23 ԲԴԽ-27-Ն-8)

8. Անհապաղ քննության ենթակա մինչդատական վարույթի դատական երաշխիքների վարույթները քննարկման նպատակով դատարանի նախագահի կողմից հանձնվում են համապատասխան դատարանում տվյալ օրը հերթապահության ներգրավված դատավորներին:

(8-րդ կետը փոփ. 05.01.23 ԲԴԽ-2-Ն-1)

8.1. Դատավորի կողմից մինչդատական ակտերի դեմ ներկայացված բողոքները, ինչպես նաև դատական ակտերն ի կատար ածելու, դատական ակտերի կատարումը հետաձգելու, նշանակված պատժից ազատելու, պատժից պայմանական վաղաժամկետ ազատելու, պատիժ կատարող հիմնարկների և մարմինների պաշտոնատար անձանց գործողության, անգործության կամ ընդունած որոշումների դեմ ներկայացված բողոքները վերադարձվելու դեպքում, դրանք կրկին դատարան ստացվելուց հետո հանձնվում են նույն դատավորին: Տվյալ դատավորին գործը բաշխելու անհնարինության դեպքում (եթե դատավորն արձակուրդի մեջ է, կամ գործուղվել է այլ դատարան կամ բացակայում է ժամանակավոր անաշխատունակության հետևանքով, կամ նրա լիազորությունները կասեցվել են, ինչպես նաև այլ բացառիկ դեպքերում) այն ընդհանուր կարգով Ծրագրի միջոցով վերաբաշխվում է այլ դատավորի:

9. Oպերատիվ-հետախուզական միջոցառումներ իրականացնելու վերաբերյալ միջնորդությունների բաշխումն իրականացվում է Երևան քաղաքի առաջին ատյանի ընդհանուր իրավասության քրեական դատարանի նախագահի կողմից՝ նույն դատարանի դատավորների միջև:

(9-րդ կետը լրաց., փոփ. 06.03.23 ԲԴԽ-28-Ն-10)

10. ՀՀ վարչական դատավարության օրենսգրքի 27-րդ, 28-րդ և 31.3-րդ գլուխներով և Օրենսգրքի 99-րդ հոդվածի 4-րդ մասով նախատեսված գործերի բաշխումն իրականացվում է Ծրագրի միջոցով՝ անհապաղ:

11. Նույն նորմատիվ իրավական ակտի իրավաչափությունը վիճարկելու վերաբերյալ ներկայացված դիմումը բաշխվում է նույն դատական կազմին, որին բաշխվել է այդ նորմատիվ իրավական ակտի վիճարկման դիմումը:

12.Դատական գործի շրջանակներում ներկայացված միջնորդությունները (դիմումները) հանձնվում են տվյալ գործը քննող կամ քննած դատավորին, բացառությամբ այն դեպքերի, երբ տվյալ գործը քննող կամ քննած դատավորը գտնվում է արձակուրդում կամ օրենքով սահմանված այլ հիմքով բացակայում է, իսկ միջնորդությունների (դիմումների) քննարկման համար սահմանված են սեղմ դատավարական ժամկետներ: Տվյալ դեպքերում հիշյալ միջնորդությունները (դիմումները) Ծրագրի միջոցով պատահական ընտրությամբ հնարավորինս հավասարաչափ բաշխվում են տվյալ դատարանի համապատասխան մասնագիտացում ունեցող այլ դատավորների միջև, բացառությամբ դատավորի վարույթում գտնվող քրեական գործերով ներկայացված միջնորդությունների:

13. Նույն անձանց միջև և նույն առարկայի մասին վեճի վերաբերյալ ներկայացված հայցադիմումները, վերադարձված և կրկին ներկայացված հայցադիմումները (դիմումները)` անկախ օրենքով սահմանված ժամկետում կրկին ներկայացվելու հանգամանքից, ընդդատության (ենթակայության) կարգով ուղարկված և ընդդատությամբ (ենթակայությամբ) կրկին նույն դատարան վերադարձված գործերը, ինչպես նաև հայցադիմումը (դիմումը) վերադարձնելու, ընդունումը մերժելու մասին որոշումները վերադաս դատական ատյանների կողմից վերացվելու դեպքում Ծրագիրը դրանք հանձնում է նույն դատավորին (նշված դեպքերում ստացված գործերը որպես նոր գործ չեն հաշվարկվում), բացառությամբ այն դեպքերի, երբ տվյալ դատավորը գտնվում է արձակուրդում կամ օրենքով նախատեսված հիմքերից մեկի առկայության հետևանքով որոշակի ժամկետով բացակայում է աշխատանքից կամ նրա անուն-ազգանունը ժամանակավորապես հանված է գործերի բաշխման ցանկից կամ լիազորությունները կասեցվել, դադարել կամ դադարեցվել են: Այս դեպքերում բաշխումը կատարվում է սույն որոշմամբ սահմանված ընդհանուր կարգով:

14. ՀՀ քաղաքացիական դատավարության օրենսգրքի 138-րդ հոդվածով սահմանված գործերը, համապատասխան ծրագրային ապահովումից հետո, Ծրագիրը հանձնում է հայցի ապահովման միջոց և/կամ հայցի նախնական ապահովման միջոց կիրառած դատավորին:

15. Դատական գործից մաս անջատվելու դեպքում, այն, որպես նոր գործ, Ծրագրի միջոցով հանձնվում է նույն դատավորին, ում կողմից կայացվել է դատական գործից մաս անջատելու մասին որոշումը: Այն դեպքում, երբ դատավորի վարույթում գտնվող քրեական գործի քննության ընթացքում դատարանը ստանում է տվյալ գործից նախաքննության փուլում անջատված մասը (մասերը), ապա այն Ծրագրի միջոցով հանձնվում է այն դատավորին, ում վարույթում է գտնվում քրեական գործից անջատված մյուս մասը (մասերը):

16. Դատավորի կողմից վարույթ ընդունված քրեական գործը մեղադրողին վերադարձվելու դեպքում, այն կրկին դատարան ստացվելուց հետո հանձնվում է նույն դատավորին: Տվյալ դատավորին գործը բաշխելու անհնարինության դեպքում (եթե դատավորն արձակուրդի մեջ է, կամ գործուղվել է այլ դատարան կամ բացակայում է ժամանակավոր անաշխատունակության հետևանքով, կամ նրա լիազորությունները կասեցվել են, ինչպես նաև այլ բացառիկ դեպքերում) այն ընդհանուր կարգով Ծրագրի միջոցով վերաբաշխվում է այլ դատավորի:

17.Վերադաս դատական ատյանի կողմից բեկանված և նոր քննության համար ստորադաս դատարան ուղարկված գործերը Ծրագիրը հանձնում է այլ դատավորի (ոչ այն դատավորին, ում կողմից կայացված դատական ակտը բեկանվել և գործն ուղարկվել է նոր քննության):

18. Եթե դատավորն արձակուրդի մեջ է (ներառյալ՝ արձակուրդին նախորդող տասնհինգօրյա ժամանակահատվածը) կամ գործուղվել է այլ դատարան (ներառյալ՝ գործուղմանը նախորդող տասնօրյա ժամանակահատվածը, ինչպես նաև գործուղման ժամանակահատվածի ավարտին նախորդող մեկամսյա ժամկետը) կամ բացակայում է ժամանակավոր անաշխատունակության հետևանքով, կամ նրա լիազորությունները կասեցվել են, կամ նրա պաշտոնավարման ժամկետի ավարտին մնացել է 3 ամիս, ինչպես նաև առկա են Օրենսգրքով սահմանված այլ դեպքեր, ապա այդ դատավորի անուն-ազգանունը համապատասխան ժամկետով, հանվում է բաշխման ցանկից` նշելով իրավական հիմքը և ժամկետը: Այն դեպքերում, երբ դատավորի՝ արձակուրդում, այլ դատարան գործուղման մեջ գտնվելու իրավական հիմքն առաջանում է Օրենսգրքով սահմանված վերոնշյալ տասնօրյա կամ տասնհինգօրյա ժամկետի չպահպանմամբ, ապա տվյալ դատավորի անուն-ազգանունը բաշխման ցանկից հանվում է համապատասխան իրավական հիմքն առաջանալու պահից: Վերապատրաստման դասընթացներին մասնակցելու, օտարերկրյա գործուղման մեջ գտնվելու հետևանքով բացակայելու դեպքերում դատավորի անուն-ազգանունը գործերի բաշխման ցանկից հանվում է վերապատրաստման դասընթացներին կամ օտարերկրյա գործուղմանը նախորդող աշխատանքային օրը:

(18-րդ կետը փոփ., լրաց. 06.03.23 ԲԴԽ-28-Ն-10)

19. Այն դեպքում, երբ առաջանում է դատարանում գործի բաշխման անհնարինություն, ապա դատարանի (պալատի) նախագահն Օրենսգրքի 41-րդ հոդվածի 4-րդ մասով սահմանված կարգով բաշխումն իրականացնելուց հետո նույն հոդվածի 5-րդ մասով սահմանված կարգով այդ մասին անհապաղ տեղեկացնում է Խորհրդին:

20. Առանձին տեսակի գործերը բաշխվում են միայն տվյալ դատարանի համապատասխան մասնագիտացում ունեցող դատավորների միջև՝ սույն որոշմամբ սահմանված կարգով: Տվյալ դատարանում (դատարանի նստավայրում) առանձին տեսակի գործեր քննող դատավորների բացակայության դեպքում տվյալ գործերը բաշխվում են հիմնական մասնագիտացում ունեցող դատավորների միջև՝ սույն որոշմամբ սահմանված կարգով:

21. Այն դեպքերում, երբ քաղաքացիական կամ քրեական մասնագիտացման դատավորը քննում է նաև առանձին տեսակի գործեր, ապա նրան հանձնվող գործերի քանակը չպետք է գերազանցի տվյալ դատարանում քաղաքացիական կամ քրեական մասնագիտացման մեկ դատավորին հանձնվող քաղաքացիական կամ քրեական գործերի քանակը:

22. Երևան քաղաքի առաջին ատյանի ընդհանուր իրավասության քրեական դատարանում քրեական գործերը Կենտրոն, Ավան և Շենգավիթ նստավայրերի միջև բաշխելիս Ծրագիրը հաշվի է առնում վերոնշյալ նստավայրերի և դրանց առավելապես մոտ գտնվող դատախազության ստորաբաժանումների միջև հեռավորությունը` առաջնահերթության կարգով քրեական գործերը բաշխելով դատախազության համապատասխան ստորաբաժանմանն առավել մոտ գտնվող նստավայրի դատավորների միջև, եթե դրանով չեն խախտվում սույն գլխով սահմանված հավասարաչափ բաշխման չափանիշները:

(22-րդ կետը լրաց. 06.03.23 ԲԴԽ-28-Ն-10)

3. ՎԵՐԱՔՆՆԻՉ ԴԱՏԱՐԱՆՆԵՐՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ  ԲԱՇԽՄԱՆ ԿԱՐԳԸ

23. Գործն ըստ էության լուծող/եզրափակիչ դատական ակտերի դեմ բերված բողոքներով գործերը և գործն ըստ էության չլուծող/միջանկյալ դատական ակտերի դեմ բերված բողոքներով գործերը Ծրագիր են մուտքագրվում և բաշխվում միմյանցից առանձին՝ (բացառությամբ վճռի, բողոքարկման ոչ ենթակա դատական ակտի, լրացուցիչ վճռի և լրացուցիչ վճիռ կայացնելը մերժելու մասին որոշումների, ինչպես նաև վրիպակները, գրասխալները և թվաբանական սխալներն ուղղելու կամ դրանց վերաբերյալ միջնորդությունը մերժելու մասին որոշումների դեմ բերված բողոքներով գործերի, որոնք մուտքագրվում և բաշխվում են միասին)` հիմք ընդունելով սույն որոշմամբ սահմանված հավասարաչափ բաշխման չափանիշները՝ սույն գլխով սահմանված առանձնահատկությունների հաշվառմամբ:

(23-րդ կետը լրաց. 19.05.22 N ԲԴԽ-49-Ն-17, փոփ. 05.01.23 ԲԴԽ-2-Ն-1)

24. Մինչդատական վարույթի դատական երաշխիքների շրջանակներում ներկայացված միջնորդությունների քննարկման արդյունքում կայացված դատական ակտերի դեմ բերված բողոքներով գործերը բաշխվում են Ծրագրի միջոցով:

(24-րդ կետը փոփ. 05.01.23 ԲԴԽ-2-Ն-1)

24.1. Մինչև ««Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին» թիվ ՀՕ-575-Ն սահմանադրական օրենքով սահմանված ժամկետում Վերաքննիչ հակակոռուպցիոն դատարանի գործելը, հակակոռուպցիոն դատարանին ընդդատյա կոռուպցիոն հանցանքների վերաբերյալ մինչդատական վարույթի դատական երաշխիքների վարույթների և բողոքների վերաբերյալ կայացված դատական ակտերի դեմ բողոքները բաշխվում են Վերաքննիչ քրեական դատարանում կոռուպցիոն հանցագործությունների գործերով բողոքարկման ենթակա դատական ակտերի վերանայումն իրականացնող առանձին դատավոր նշանակված դատավորների միջև:

(24.1-ին կետը լրաց. 05.01.23 ԲԴԽ-2-Ն-1)

25. Նույն գործով դատական ակտի դեմ բերված վերաքննիչ բողոքները հանձնվում են միևնույն դատական կազմի նախագահող դատավորին: Այդ դեպքում Ծրագիրը քանակական տվյալները հաշվարկում է որպես մեկ գործ՝ անկախ ներկայացված բողոքների քանակից: Լրացուցիչ վճռի, բողոքարկման ոչ ենթակա դատական ակտի, լրացուցիչ վճիռ կայացնելը մերժելու մասին որոշումների, վրիպակները, գրասխալները և թվաբանական սխալներն ուղղելու կամ դրանց վերաբերյալ միջնորդությունը մերժելու մասին որոշումների դեմ բերված բողոքները հանձնվում են միևնույն գործով կայացված վճռի դեմ բերված բողոքը քննող դատական կազմին կամ նախագահող դատավորին:

26. Եթե միևնույն գործով տարբեր դատական ակտերի դեմ բերվել է մեկ վերաքննիչ բողոք, և որոշում է կայացվել այդ հիմքով վերաքննիչ բողոքը վերադարձնելու մասին, ապա այդ դատական ակտերի դեմ կրկին բերված մեկից ավելի վերաքննիչ բողոքները հանձնվում են միևնույն դատավորին (նույն դատական կազմին), որին նախկինում բաշխված է եղել վերադարձված վերաքննիչ բողոքը: Այդ դեպքում Ծրագիրը քանակական տվյալները հաշվարկում է որպես առանձին գործեր՝ կախված բողոքարկվող դատական ակտերի քանակից: Այն դեպքերում, երբ տվյալ դատավորը (դատական կազմի դատավորը) գտնվում է արձակուրդում կամ օրենքով նախատեսված հիմքերից մեկի առկայության հետևանքով որոշակի ժամկետով բացակայում է աշխատանքից կամ նրա անուն-ազգանունը ժամանակավորապես հանված է գործերի բաշխման ցանկից կամ լիազորությունները կասեցվել, դադարել կամ դադարեցվել են, ապա բաշխումը կատարվում է սույն որոշմամբ սահմանված ընդհանուր կարգով:

26.1. Վերաքննիչ դատարանի կողմից ներկայացված բողոքը վերադարձվելու դեպքում, այն կրկին դատարան ստացվելուց հետո հանձնվում է նույն դատավորին: Տվյալ դատավորին գործը բաշխելու անհնարինության դեպքում (եթե դատավորն արձակուրդի մեջ է, կամ գործուղվել է այլ դատարան կամ բացակայում է ժամանակավոր անաշխատունակության հետևանքով, կամ նրա լիազորությունները կասեցվել են, ինչպես նաև այլ բացառիկ դեպքերում) այն ընդհանուր կարգով Ծրագրի միջոցով վերաբաշխվում է այլ դատավորի:

(26.1-ին կետը լրաց. 09.04.24 ԲԴԽ-39-Ն-13)

27. Եթե տարբեր գործերով դատական ակտերի դեմ բերվել է մեկ վերաքննիչ բողոք, և որոշում է կայացվել այդ հիմքով վերաքննիչ բողոքը վերադարձնելու մասին, ապա այդ դատական ակտերի դեմ կրկին բերված մեկից ավելի վերաքննիչ բողոքների վերաբերյալ գործերը վերստին մուտքագրվում են Ծրագիր և բաշխվում սույն որոշմամբ սահմանված ընդհանուր կարգով: Միևնույն գործով դատական ակտի դեմ բերված վերաքննիչ բողոքները հանձնվում են միևնույն դատական կազմի նախագահող դատավորին: Այդ դեպքում Ծրագիրը քանակական տվյալները հաշվարկում է որպես մեկ գործ՝ անկախ ներկայացված բողոքների քանակից:

28. Ծրագրում չգրանցված (նախքան Ծրագրի շահագործումը քննված և Ծրագրում կոդ չստացած) դատական գործերով վերաքննիչ բողոքներ ներկայացվելու դեպքում տվյալ դատական գործերի բաշխումը կատարվում է դատարանի նախագահի կողմից:

29. Վերաքննիչ դատարաններում գործերի բաշխման առանձնահատկությունների նկատմամբ կիրառելի են նաև սույն հավելվածի 2-րդ, 5-րդ, 6-րդ, 9-րդ, 11-րդ, 18-րդ և 19-րդ կետերով սահմանված կանոնները:

4. ՎՃՌԱԲԵԿ ԴԱՏԱՐԱՆՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ԲԱՇԽՄԱՆ ԿԱՐԳԸ

30. Վճռաբեկ դատարանում ստացված գործն անհապաղ մուտքագրվում է Ծրագրում և տվյալ պալատի դատավորների միջև բաշխվում է՝ հիմք ընդունելով սույն որոշմամբ սահմանված հավասարաչափ բաշխման չափանիշները:

31. Միևնույն գործով գործն ըստ էության լուծող/եզրափակիչ դատական ակտի դեմ բերված վճռաբեկ բողոքները հանձնվում են տվյալ գործով զեկուցող դատավորին: Այդ դեպքում Ծրագիրը քանակական տվյալները հաշվարկում է որպես մեկ գործ՝ անկախ ներկայացված բողոքների քանակից:

31.1. Մինչդատական վարույթի դատական երաշխիքների շրջանակներում կայացված դատական ակտերի և օպերատիվ-հետախուզական միջոցառումներ իրականացնելու մասին միջնորդությունների քննության արդյունքում կայացված դատական ակտերի դեմ բերված հատուկ վերանայման (բացառիկ) բողոքներով գործերը բաշխվում են ՀՀ վճռաբեկ դատարանի քրեական պալատի, իսկ ՀՀ քրեական օրենսգրքի հավելված N 1-ով նախատեսված կոռուպցիոն հանցանքների վերաբերյալ վարույթներով կայացված դատական ակտերի դեմ բերված հատուկ վերանայման (բացառիկ) բողոքներով գործերը՝ ՀՀ վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորների միջև։

(31.1-ին կետը լրաց. 14.11.22 ԲԴԽ-108-Ն-31, խմբ. 05.01.23 ԲԴԽ-2-Ն-1)

31.2. ՀՀ քրեական օրենսգրքի հավելված N 1-ով նախատեսված կոռուպցիոն հանցագործությունների վերաբերյալ վարույթներով դատաքննության ընթացքում կայացված դատական ակտերի դեմ բերված բողոքներով գործերը բաշխվում են ՀՀ վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորների միջև:

(31.2-րդ կետը լրաց. 14.11.22 ԲԴԽ-108-Ն-31)

32. Ծրագրում չգրանցված (նախքան Ծրագրի շահագործումը քննված և Ծրագրում կոդ չստացած) դատական գործերով վճռաբեկ բողոք/բողոքներ ներկայացվելու դեպքում տվյալ բողոքով/բողոքներով գործերի բաշխումը կատարվում է համապատասխան պալատի նախագահի կողմից:

33. Վճռաբեկ դատարանում գործերի բաշխման առանձնահատկությունների նկատմամբ կիրառելի են նաև սույն հավելվածի 2-րդ, 5-րդ, 9-րդ, 18-րդ, 19-րդ, 23-րդ և 24-րդ կետերով սահմանված կանոնները:

(հավելվածը լրաց. 19.05.22 N ԲԴԽ-49-Ն-17, 14.11.22 ԲԴԽ-108-Ն-31, փոփ., լրաց., խմբ. 05.01.23 ԲԴԽ-2-Ն-1, փոփ. 27.02.23 ԲԴԽ-27-Ն-8, լրաց., փոփ. 06.03.23 ԲԴԽ-28-Ն-10, լրաց. 09.04.24 ԲԴԽ-39-Ն-13)

Հավելված 2 Բարձրագույն դատական խորհրդի 2021 թվականի մարտի 25-ի թիվ ԲԴԽ-16-Ն-6 որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԱՋԻՆ ԱՏՅԱՆԻ, ՎԵՐԱՔՆՆԻՉ, ՎՃՌԱԲԵԿ ԴԱՏԱՐԱՆՆԵՐՈՒՄ ԿՈԼԵԳԻԱԼ ԴԱՏԱԿԱՆ ԿԱԶՄԵՐԸ ՁԵՎԱՎՈՐԵԼՈՒ, ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՎԵՐԱԲԱՇԽՄԱՆ ԿԱՐԳԸ

1. ԱՌԱՋԻՆ ԱՏՅԱՆԻ ԴԱՏԱՐԱՆՆԵՐՈՒՄ ԿՈԼԵԳԻԱԼ ԴԱՏԱԿԱՆ ԿԱԶՄԵՐԸ ՁԵՎԱՎՈՐԵԼՈՒ ԿԱՐԳԸ

1. Այն դեպքում, երբ առաջին ատյանի դատարանում մուտքագրված գործը, համաձայն օրենքի, ենթակա է քննության դատավորների կոլեգիալ կազմով, ապա Ծրագիրը հիշյալ գործերի քննության նպատակով պատահական ընտրությամբ ձևավորում է կոլեգիալ դատական կազմեր:

2. ՀՀ վարչական դատավարության օրենսգրքի 26-րդ, 27-րդ, 28-րդ և 31.2-րդ գլուխներով նախատեսված գործեր քննելու նպատակով ձևավորված դատական կազմի բացակայող դատավորին անհրաժեշտության դեպքում փոխարինելու հարցը (հետևաբար՝ փոխարինող դատավորի հարցը) յուրաքանչյուր դեպքում որոշում է դատարանի նախագահը: Սույն կետով նախատեսված դեպքում դատական կազմի բացակայող դատավորին կարող է փոխարինել նաև տվյալ դատարանի նախագահը:

2. ԱՌԱՋԻՆ ԱՏՅԱՆԻ ԴԱՏԱՐԱՆՆԵՐՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՎԵՐԱԲԱՇԽՄԱՆ ԿԱՐԳԸ

3. Նախապես հայտնի 20 և ավելի աշխատանքային օր անաշխատունակության մեջ գտնվելու հիմքով անընդմեջ բացակայող դատավորին հանձնված և դեռևս վարույթ ընդունելու հարցը չլուծված, նախապես հայտնի 30 և ավելի աշխատանքային օր անաշխատունակության մեջ գտնվելու հիմքով անընդմեջ բացակայող դատավորին հանձնված և վարույթ ընդունված, ինչպես նաև նպատակային՝ երեխայի խնամքի համար արձակուրդում գտնվելու հետևանքով վեց ամիս և ավելի ժամկետով անընդմեջ բացակայող դատավորին հանձնված (դեռևս վարույթ ընդունելու հարցը չլուծված, վարույթ ընդունված) գործերի վերաբաշխման հարցը լուծում է համապատասխան դատարանի նախագահը՝ գործերի քննության ողջամիտ ժամկետների պահպանման նպատակով դատավորի կողմից ներկայացված հիմնավոր դիմումի հիման վրա: Դատավորի հերթական արձակուրդի, ինչպես նաև սույն կետով նշված ժամկետից պակաս ժամկետով բացակայելու դեպքում դատավորին հանձնված (դեռևս վարույթ ընդունելու հարցը չլուծված, վարույթ ընդունված) գործերը չեն վերաբաշխվում, բացառությամբ՝ անհապաղ կամ օրենքով նախատեսված սեղմ ժամկետներում քննության ենթակա առանձին տեսակի գործերի, ինչպես նաև այն դեպքերի, երբ անհապաղ կամ օրենքով նախատեսված սեղմ ժամկետներում տվյալ գործով անհրաժեշտ է կատարել առանձին դատավարական գործողություններ:

(3-րդ կետը խմբ. 04.07.22 ԲԴԽ-66-Ն-22)

4. Դատարանում դատավորների թվի ավելացման դեպքերում դատարանում ստացված գործերը կարող են վերաբաշխվել ավելացած դատավորին միայն այն դեպքերում, երբ նշված գործերով դեռևս որևէ դատավարական գործողություն չի կատարվել: Ծրագիրը դատարանի դատավորների միջև գործերի հավասարաչափ բաշխումն ապահովելու նպատակով ավելացած դատավորին շարունակում է գործեր բաշխել ընդհանուր կարգով` առանց հաշվի առնելու ավելացած դատավորին վերաբաշխված գործերի քանակը: Գործերի վերաբաշխման անհրաժեշտության հարցը որոշում է համապատասխան դատարանի նախագահը:

5. Վերաբաշխման ենթակա գործերը հանձնվում են համապատասխան դատարանի գրասենյակ և Ծրագրի միջոցով պատահական ընտրությամբ հնարավորինս հավասարաչափ վերաբաշխվում են տվյալ դատարանի համապատասխան մասնագիտացում ունեցող այլ դատավորների միջև:

6. Եթե դատավորը գործուղվել է, նրա գործուղման ժամկետն ավարտվել է, նա տեղափոխվել է այլ դատարան, տեղի է ունեցել դատավորների պաշտոնների փոխանակում, տվյալ գործով հայտնել է ինքնաբացարկ, նախկինում մասնակցել է տվյալ գործի քննությանը, գործի հարուցումը մերժել է, որի վերաբերյալ որոշումը սահմանված կարգով վերացվել է, նրա լիազորությունները կասեցվել, դադարել կամ դադարեցվել են, ապա տվյալ դատավորին հանձնված գործերը վերաբաշխվում են տվյալ դատարանի համապատասխան մասնագիտացում ունեցող այլ դատավորների միջև, և Ծրագրի գործերի վերաբաշխման պատուհանում պարտադիր ընտրվում է գործը վերաբաշխելու հիմքերից մեկը: Վերաբաշխման ենթակա գործը չի կարող կրկին հանձնվել նույն դատավորին, բացառությամբ այն դեպքերի, երբ գործը՝ արդարադատության մեկ այլ մարմին ստեղծելու անհնարինությամբ պայմանավորված, հնարավոր չէ քննել նույն դատարանի համապատասխան մասնագիտացում ունեցող այլ դատավորների կողմից, և նման դեպքերում գործը վերաբաշխվում է դատարանի նախագահի կողմից՝ այն հանձնելով տվյալ գործով վերջին դատական ակտը կայացրած դատավորին: Նշված վերաբաշխման արդյունքում այդ դատավորի անաշխատունակության, արձակուրդում գտնվելու, գործուղման և այլ դատարան տեղափոխման դեպքերում՝ գործը դատարանի նախագահի կողմից վերաբաշխվում է Ծրագրի միջոցով տվյալ գործի բաշխման արդյունքում նախորդիվ ընտրված դատավորների միջև՝ հետհաշվարկման հաջորդականությամբ:

(6-րդ կետը խմբ. 13.05.24 ԲԴԽ-51-Ն-21)

7. Այն դեպքում, երբ դատական գործի վարույթը կասեցրած դատավորն այլևս չի աշխատում տվյալ դատարանում, և անհրաժեշտություն է առաջացել վերսկսելու կասեցված դատական գործը, ապա այդ գործերի վերաբաշխումն իրականացվում է ընդհանուր կարգով:

3. ՎԵՐԱՔՆՆԻՉ ԴԱՏԱՐԱՆՆԵՐՈՒՄ ԿՈԼԵԳԻԱԼ ԴԱՏԱԿԱՆ ԿԱԶՄԵՐԸ ՁԵՎԱՎՈՐԵԼՈՒ ԿԱՐԳԸ

8. Այն դեպքում, երբ օրենքով սահմանված է դատական ակտերի դեմ բերված բողոքներով գործերի կոլեգիալ քննության կարգ, ապա վերաքննիչ դատարանում գործը քննվում է կոլեգիալ դատական կազմերով: Դատական կազմը նախագահում է տվյալ կազմի այն դատավորը, որին սույն որոշմամբ սահմանված կարգով հանձնվել է կոնկրետ գործը:

9. Յուրաքանչյուր տարվա հունվարի 1-ին սահմանված կարգով ձևավորված դատական կազմերից մեկական անդամ հաջորդաբար՝ պատահական ընտրությամբ, մեկ դատական կազմից Ծրագրի միջոցով տեղափոխվում է մեկ այլ դատական կազմ: Ընդ որում, մեկ դատական կազմից մեկ այլ դատական կազմ տեղափոխվելու դեպքում տվյալ դատական կազմի մոտ առկա անավարտ գործերը չեն վերաբաշխվում նոր ձևավորված դատական կազմերի միջև: Տվյալ գործերի քննությունը շարունակվում է նույն դատական կազմով` մինչև կոնկրետ գործի քննության ավարտը:

9.1. Ծրագրի խափանման, շահագործումից դուրս գալու կամ որևէ այլ հիմքով օգտագործման անհնարինության դեպքում դատավորների միջև գործերը բաշխվում և վերաբաշխվում են «Հայաստանի Հանրապետության դատական օրենսգիրք» սահմանադրական օրենքով սահմանված կարգով, իսկ կոլեգիալ դատական կազմերը ձևավորվում են այլընտրանքային համակարգչային ծրագրի միջոցով՝ «Հայաստանի Հանրապետության դատական օրենսգիրք» սահմանադրական օրենքով սահմանված մասնագիտացման և պատահական ընտրության սկզբունքների պահպանմամբ:

(9.1-ին կետը լրաց. 30.12.21 ԲԴԽ-111-Ն-32)

10. Ծրագրի միջոցով տարվա սկզբում ձևավորված դատական կազմերն ամբողջ տարվա ընթացքում չեն փոփոխվում: Նշված կայուն դատական կազմերին հանձնված գործերով դատական կազմում ընդգրկված դատավորին/դատավորներին հնարավոր է փոխարինել բացառապես օրենքով նախատեսված համապատասխան հիմքերի առկայության դեպքերում և դրա համար սահմանված համապատասխան կարգով:

11. Մինչև վերաքննիչ դատարաններում ամբողջական դատական կազմերի ձևավորման հնարավորության ապահովումը` վերաքննիչ դատարանների նախագահները չեն ընդգրկվում Ծրագրի միջոցով ձևավորվող դատական կազմերի մեջ, այլ քննում են միայն գործն ըստ էության չլուծող/ միջանկյալ ակտերի դեմ բերված բողոքներով գործեր, ինչպես նաև փոխարինում են դատական կազմերի բացակայող դատավորներին՝ բացառությամբ դատարանի նախագահի կողմից վերաքննիչ բողոքի քննությանը մասնակցության անհնարինության դեպքերի։ Այն դեպքում, երբ առկա է Ծրագրի միջոցով ձևավորված դատական կազմից բացակայող դատավորին դատարանի նախագահի կողմից փոխարինելու անհնարինության դեպք, ապա բացակայող դատավորին փոխարինելու հարցը որոշում է դատարանի նախագահը: Եթե տվյալ տարվա ընթացքում արդեն իսկ ձևավորված դատական կազմի որևէ դատավոր նշանակվում է դատարանի նախագահի պաշտոնում, ապա մինչև տարվա ավարտը տվյալ դատական կազմի դատարանի նախագահ ընտրված դատավորին փոխարինում է տվյալ դատարանի նախկին նախագահը, և տվյալ դատական կազմը համարվում է նոր ձևավորված դատական կազմ: Դատարանի նախկին նախագահը և տվյալ տարվա ընթացքում արդեն իսկ ձևավորված՝ դատարանի նախագահ ընտրված դատավորի մասնակցությամբ դատական կազմը շարունակում են քննել միայն իրենց վարույթներում առկա անավարտ գործերը:

(11-րդ կետը լրաց. 16.08.21 ԲԴԽ-60-Ն-16, 13.12.21 ԲԴԽ-105-Ն-30)

12. Այն դեպքերում, երբ Ծրագրի միջոցով ձևավորված կազմից բացակայում են մեկից ավելի դատավորներ, ապա բացակայող դատավորին փոխարինելու հարցը որոշում է դատարանի նախագահը՝ պահպանելով սույն կարգի 11-րդ կետով նախատեսված կանոնը:

12.1. Եթե հիմնական կազմի դատավորը փոխարինվել է, և տվյալ գործով դեռևս չեն կատարվել այնպիսի դատավարական գործողություններ, որոնք կարող են ազդել բողոքի քննության դատավարական ժամկետների վրա, ապա զեկուցող դատավորի զեկուցագրի հիման վրա դատարանի նախագահի կողմից դատական կազմում կարող է ընդգրկվել սկզբնական դատական կազմի փոխարինված դատավորը:

(12.1-ին կետը լրաց. 13.12.21 ԲԴԽ-105-Ն-30)

13. Այն դեպքերում, երբ Ծրագրի միջոցով ձևավորված դատական կազմերում առկա են դատավորի թափուր տեղեր, ապա նոր դատավոր նշանակվելիս դատական կազմի (կազմերի) համալրման հարցը որոշում է դատարանի նախագահը:

14. Այն դեպքերում, երբ վերադաս դատական ատյանից բեկանված գործի բաշխումը Ծրագրի միջոցով հնարավոր չէ՝ դատական կազմերում ընդգրկված դատավորների՝ նախկինում գործի քննությանը մասնակցության պատճառով, ապա կոնկրետ գործի քննության համար Ծրագիրը ձևավորում է մեկանգամյա ժամանակավոր դատական կազմ:

4. ՎԵՐԱՔՆՆԻՉ ԴԱՏԱՐԱՆՆԵՐՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՎԵՐԱԲԱՇԽՄԱՆ ԿԱՐԳԸ

15. Այն դեպքում, երբ դատավորը նախկինում մասնակցել է տվյալ գործի քննությանը և տվյալ գործով վերաքննիչ դատարանում կրկին վերաքննություն իրականացնելու անհրաժեշտություն է առաջացել, ապա Ծրագիրը գործը հանձնում է այլ դատավորի: Եթե նախկինում տվյալ գործի քննությանը մասնակցել է դատական կազմին անդամակցող դատավորը կամ դատավորները, ապա վերջիններիս փոխարինումն այլ դատավորով կամ դատավորներով կատարվում է Ծրագրի միջոցով: Մինչև ծրագրային լուծումների մշակումը նախկինում տվյալ գործի քննությանը մասնակցած դատավորի կամ դատավորների փոխարինումը կատարվում է դատարանի նախագահի կողմից:

16. Եթե ինքնաբացարկի որոշում է կայացվել դատական կազմի նախագահող դատավորի կամ դատական կազմի բոլոր դատավորների կողմից, ապա նշված դատական գործի վերաբաշխումը կատարվում է Ծրագրի միջոցով: Այն դեպքում, երբ ինքնաբացարկի որոշում է կայացվել դատական կազմին անդամակցող դատավորի կամ դատավորների կողմից, ապա դատական կազմի համալրումն իրականացվում է դատարանի նախագահի կողմից:

17. Գործերի վերաբաշխման մյուս դեպքերի նկատմամբ կիրառելի են սույն հավելվածի 2-րդ գլխով սահմանված կանոնները:

5. ՎՃՌԱԲԵԿ ԴԱՏԱՐԱՆՈՒՄ ԴԱՏԱՎՈՐՆԵՐԻ ՄԻՋԵՎ ԳՈՐԾԵՐԻ ՎԵՐԱԲԱՇԽՄԱՆ ԿԱՐԳԸ

18. Գործերի վերաբաշխման Օրենսգրքի 44-րդ հոդվածի 3-րդ մասով սահմանված դեպքից բացի, գործերի վերաբաշխման մյուս դեպքերի նկատմամբ կիրառելի են նաև սույն հավելվածի 2-րդ գլխով սահմանված կանոնները:

(հավելվածը լրաց. 16.08.21 ԲԴԽ-60-Ն-16, 30.12.21 ԲԴԽ-111-Ն-32, 13.12.21 ԲԴԽ-105-Ն-30, խմբ. 04.07.22 ԲԴԽ-66-Ն-22, 13.05.24 ԲԴԽ-51-Ն-21)

Հավելված 3 Բարձրագույն դատական խորհրդի 2021 թվականի մարտի 25-ի թիվ ԲԴԽ-16-Ն-6 որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԱՋԻՆ ԱՏՅԱՆԻ, ՎԵՐԱՔՆՆԻՉ ԵՎ ՎՃՌԱԲԵԿ ԴԱՏԱՐԱՆՆԵՐԻ ԵՎ ՎՃՌԱԲԵԿ ԴԱՏԱՐԱՆԻ ՊԱԼԱՏՆԵՐԻ ՆԱԽԱԳԱՀՆԵՐԻՆ, ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴԻ ԴԱՏԱՎՈՐ ԱՆԴԱՄՆԵՐԻՆ, ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱՎՈՐՆԵՐԻ ԸՆԴՀԱՆՈՒՐ ԺՈՂՈՎԻ ԷԹԻԿԱՅԻ ԵՎ ԿԱՐԳԱՊԱՀԱԿԱՆ ՀԱՐՑԵՐԻ, ԴԱՏԱՎՈՐՆԵՐԻ ԳՈՐԾՈՒՆԵՈՒԹՅԱՆ ԳՆԱՀԱՏՄԱՆ, ՈՒՍՈՒՄՆԱԿԱՆ ՀԱՐՑԵՐԻ ՀԱՆՁՆԱԺՈՂՈՎՆԵՐԻ ԴԱՏԱՎՈՐ ԱՆԴԱՄՆԵՐԻՆ ՀԱՆՁՆՎՈՂ ԳՈՐԾԵՐԻ ՏՈԿՈՍԱՉԱՓԵՐԸ

(աղյուսակը փոփ., լրաց. 16.08.21 ԲԴԽ-60-Ն-16, փոփ. 13.12.21 ԲԴԽ-105-Ն-30, 17.02.22 ԲԴԽ-20-Ն-2, 11.04.22 ԲԴԽ-38-Ն-9, փոփ., լրաց. 31.10.22 ԲԴԽ-105-Ն-30, լրաց. 19.12.22 ԲԴԽ-118-Ն-36, փոփ., լրաց. 06.03.23 ԲԴԽ-28-Ն-10, լրաց. 27.03.23 ԲԴԽ-38-Ն-14, փոփ. 02.05.23 ԲԴԽ-46-Ն-16, լրաց. 29.05.23 ԲԴԽ-52-Ն-20, լրաց., փոփ. 07.08.23 ԲԴԽ-75-Ն-25, լրաց. 15.01.24 ԲԴԽ-2-Ն-2, փոփ. 26.08.24 ԲԴԽ-81-Ն-33, 23.09.24 ԲԴԽ-86-Ն-35)

(աղյուսակը փոփ. 28.03.22 ԲԴԽ-34-Ն-7, 31.10.22 ԲԴԽ-105-Ն-30, 14.11.22 ԲԴԽ-108-Ն-31, 16.01.23 ԲԴԽ-3-Ն-2, լրաց. 06.03.23 ԲԴԽ-28-Ն-10, փոփ. 02.05.23 ԲԴԽ-46-Ն-16, 07.08.23 ԲԴԽ-75-Ն-25, փոփ., լրաց. 04.09.23 ԲԴԽ-81-Ն-27, փոփ. 04.12.23 ԲԴԽ-98-Ն-36, 14.03.24 ԲԴԽ-24-Ն-9, 04.06.24 ԲԴԽ-57-Ն-24, լրաց. 09.07.24 ԲԴԽ-70-Ն-27, լրաց., փոփ. 08.01.25 ԲԴԽ-1-Ն-1)

(աղյուսակը լրաց. 06.03.23 ԲԴԽ-28-Ն-10, փոփ. 23.10.23 ԲԴԽ-88-Ն-30, 15.01.24 ԲԴԽ-2-Ն-2, 09.04.24 ԲԴԽ-39-Ն-13, լրաց. 25.04.24 ԲԴԽ-46-Ն-18, փոփ. 23.09.24 ԲԴԽ-86-Ն-35)

(աղյուսակը փոփ. 28.03.22 ԲԴԽ-34-Ն-7, 31.10.22 ԲԴԽ-105-Ն-30, լրաց. 06.03.23 ԲԴԽ-28-Ն-10, փոփ. 02.05.23 ԲԴԽ-46-Ն-16, 07.08.23 ԲԴԽ-75-Ն-25, փոփ., լրաց. 04.09.23 ԲԴԽ-81-Ն-27, փոփ. 15.01.24 ԲԴԽ-2-Ն-2, 23.09.24 ԲԴԽ-86-Ն-35)

(աղյուսակը լրաց., փոփ. 16.08.21 ԲԴԽ-60-Ն-16, լրաց. 06.03.23 ԲԴԽ-28-Ն-10, փոփ. 09.04.24 ԲԴԽ-39-Ն-13, 23.09.24 ԲԴԽ-86-Ն-35)

(հավելվածը փոփ., լրաց. 16.08.21 ԲԴԽ-60-Ն-16, փոփ. 13.12.21 ԲԴԽ-105-Ն-30, 17.02.22 ԲԴԽ-20-Ն-2, 28.03.22 ԲԴԽ-34-Ն-7, 11.04.22 ԲԴԽ-38-Ն-9, փոփ., լրաց. 31.10.22 ԲԴԽ-105-Ն-30, փոփ. 14.11.22 ԲԴԽ-108-Ն-31, լրաց. 19.12.22 ԲԴԽ-118-Ն-36, փոփ. 16.01.23 ԲԴԽ-3-Ն-2, փոփ., լրաց. 06.03.23 ԲԴԽ-28-Ն-10, լրաց. 27.03.23 ԲԴԽ-38-Ն-14, փոփ. 02.05.23 ԲԴԽ-46-Ն-16, լրաց. 29.05.23 ԲԴԽ-52-Ն-20, լրաց., փոփ. 07.08.23 ԲԴԽ-75-Ն-25, 04.09.23 ԲԴԽ-81-Ն-27, փոփ. 23.10.23 ԲԴԽ-88-Ն-30, 04.12.23 ԲԴԽ-98-Ն-36, լրաց., փոփ. 15.01.24 ԲԴԽ-2-Ն-2, փոփ. 14.03.24 ԲԴԽ-24-Ն-9, 09.04.24 ԲԴԽ-39-Ն-13, լրաց. 25.04.24 ԲԴԽ-46-Ն-18, փոփ. 04.06.24 ԲԴԽ-57-Ն-24, լրաց. 09.07.24 ԲԴԽ-70-Ն-27, փոփ. 26.08.24 ԲԴԽ-81-Ն-33, 23.09.24 ԲԴԽ-86-Ն-35, լրաց., փոփ. 08.01.25 ԲԴԽ-1-Ն-1)

Հավելված 4 Բարձրագույն դատական խորհրդի 2021 թվականի մարտի 25-ի թիվ ԲԴԽ-16-Ն-6 որոշման

    ՑԱՆԿ

(վերնագիրը խմբ. 02.05.23 ԲԴԽ-46-Ն-16)

N	ԴԱՏԱՐԱՆ	ԴԱՏԱՎՈՐ	ՀԱՆՁՆՎՈՂ ԳՈՐԾԵՐԻ ՏՈԿՈՍԱՉԱՓ
1.	Երևան քաղաքի առաջին ատյանի ընդհանուր իրավասության քրեական դատարան	Մնացական Մարտիրոսյան	5%
2.	Երևան քաղաքի առաջին ատյանի ընդհանուր իրավասության քրեական դատարան	Ժորա Չիչոյան	75%
3.	Երևան քաղաքի առաջին ատյանի ընդհանուր իրավասության քրեական դատարան	Դավիթ Արղամանյան	75%
4.	Երևան քաղաքի առաջին ատյանի ընդհանուր իրավասության քրեական դատարան	Ջոն Հայրապետյան	75%

(հավելվածը լրաց. 05.01.23 ԲԴԽ-2-Ն-1, խմբ. 02.05.23 ԲԴԽ-46-Ն-16, լրաց. 06.11.23 ԲԴԽ-91-Ն-33, փոփ. 04.06.24 ԲԴԽ-57-Ն-24, 29.07.24 ԲԴԽ-76-Ն-28)

Պաշտոնական հրապարակման օրը՝ 27 մայիսի 2021 թվական: