Ղեկավարվելով «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքի 47-րդ հոդվածի 1-ին մասով` Հայաստանի Հանրապետության կառավարությունը որոշում է.

1. Սահմանել մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողներին հավելավճար հաշվարկելու նպատակով իրականացվող ատեստավորման կարգը՝ համաձայն հավելվածի:

2. Սահմանել, որ սույն կարգի կիրառման իմաստով՝

1) մարտական խնդիրների շրջանակը ներառում է համազորային, հատուկ նշանակության, հետախուզական, հրթիռային, հրետանային, հակաօդային պաշտպանության, ռադիացիոն քիմիական պաշտպանության, ռադիոէլեկտրոնային պայքարի, ավիացիոն, անօդաչու թռչող սարքերի, կապի, ինժեներական կամ ռազմատեղագրական մասնագիտական գործունեությունը և այդ գործունեության օպերատիվ, տեխնիկական, թիկունքային կամ բժշկական ապահովմանը, մարտական կամ զորահավաքային կամ բարոյահոգեբանական պատրաստության և զինվորական ծառայության կազմակերպմանն ուղղված գործունեությունը.

2) մարտական խնդիրների իրականացման գործառույթներ ունեցող են հանդիսանում սույն կետի 1-ին ենթակետում սահմանված գործունեության անմիջական իրականացում նախատեսող պաշտոնները.

3) մարտական խնդիրների պլանավորման գործառույթներ ունեցող են հանդիսանում սույն կետի 1-ին ենթակետում սահմանված գործունեության կազմակերպման և իրականացման գործընթացի պլանավորում նախատեսող պաշտոնները.

4) մարտական խնդիրների վերահսկման գործառույթներ ունեցող են հանդիսանում սույն կետի 1-ին ենթակետում սահմանված գործունեության կազմակերպման և իրականացման գործընթացի նկատմամբ վերահսկողություն նախատեսող պաշտոնները:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ն. Փաշինյան
Երևան

09.02.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2023 թվականի փետրվարի 9-ի N 162-Ն որոշման

1. Սույն կարգով (այսուհետ՝ կարգ) կարգավորվում են մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողների ատեստավորման գործընթացի իրականացման հետ կապված հարաբերությունները:

2. Ատեստավորման նպատակն է գնահատել մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողների (այսուհետ՝ զինծառայող) մասնագիտական գիտելիքները, ծառայողական պարտականությունների իմացությունը, ֆիզիկական, կրակային և շարային պատրաստության աստիճանը և գնահատման արդյունքներով որակավորման համար զինծառայողներին վճարել հավելավճար՝ Հայաստանի Հանրապետության կառավարության որոշմամբ սահմանված չափերով և կարգով:

3. Ատեստավորմանը մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողներն առաջին անգամ մասնակցում են կամավոր:

4. Զինվորական պաշտոնների յուրաքանչյուր խմբում նախատեսված և մարտական խնդիրների իրականացման, պլանավորման կամ վերահսկման գործառույթներ ունեցող պաշտոն առաջին անգամ զբաղեցնող զինծառայողները ենթակա են ատեստավորման պաշտոնը զբաղեցնելու օրվանից ոչ շուտ, քան երեք ամիս հետո և ոչ ուշ, քան չորրորդ ամիսը լրանալու օրը: Սույն կետում նախատեսված ժամկետում ատեստավորման ենթակա են նաև «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքի (այսուհետ՝ օրենք) 33-րդ հոդվածի 4-րդ մասի համաձայն նոր պայմանագիր կնքած և մարտական խնդիրների իրականացման, պլանավորման կամ վերահսկման գործառույթներ ունեցող պաշտոնի նշանակված զինծառայողը՝ անկախ այն հանգամանքից, թե համապատասխան պաշտոնը զինծառայողը զբաղեցնում է առաջին անգամ, թե ոչ:

5. Ատեստավորման գործընթացին չի թույլատրվում մասնակցել այն զինծառայողին, որի նկատմամբ իրականացված թմրամիջոցի և (կամ) հոգեմետ և (կամ) հոգեներգործուն նյութի օգտագործման թեստը դրական է:

6. Զինվորական պաշտոնը զբաղեցնելու ընթացքում ատեստավորված և տվյալ պաշտոնի խմբի համար սահմանված չափով հավելավճար ստացող զինծառայողները ենթակա են ատեստավորման յուրաքանչյուր երեք տարին մեկ անգամ՝ հավելավճարի հաշվարկումը շարունակելու համար: Սույն կետով սահմանված դեպքում՝

1) հղի կամ մինչև երեք տարեկան երեխայի խնամքի համար արձակուրդում գտնվող զինծառայողն ատեստավորման ենթակա է ոչ շուտ, քան արձակուրդից վերադառնալուց երեք ամիս հետո և ոչ ուշ, քան չորրորդ ամիսը լրանալու օրը.

2) հերթական արձակուրդում կամ գործուղման կամ բուժման մեջ գտնվող զինծառայողը ենթակա է ատեստավորման հերթական արձակուրդի կամ գործուղման կամ բուժման ավարտից հետո եռամսյա ժամկետում:

7. Սույն կարգի 3-րդ կետի համաձայն, մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող զինծառայողների կողմից կամավոր հիմունքներով ատեստավորմանը մասնակցելու նպատակով, ատեստավորման անցկացման մասին տրվում է Հայաստանի Հանրապետության պաշտպանության նախարարի հրաման, որը ներառում է`

1) ատեստավորման անցկացման ժամկետը, որը չի կարող պակաս լինել հրամանի ուժի մեջ մտնելուց հետո 30 և ավելի` 50 օրացուցային օրվանից.

2) ատեստավորմանը մասնակցելու հայտերի ընդունման սկիզբը և վերջնաժամկետը, ընդ որում՝ վերջնաժամկետը չի կարող գերազանցել հրամանի ուժի մեջ մտնելուց հետո 25 օրացուցային օրը.

3) ատեստավորում անցկացնող մարմինները և ատեստավորման անցկացման վայրերը.

4) Հայաստանի Հանրապետության պաշտպանության նախարարության համակարգի զորամասերի և զինվորական կառավարման մարմինների հրամանատարներին (պետերին) տրված հանձնարարականը՝ զորամասում կամ զինվորական կառավարման մարմնում մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող զինծառայողներին հրամանը գրավոր ծանոթացնելու վերաբերյալ:

8. Սույն կարգի 7-րդ կետի 2-րդ ենթակետում նշված ժամկետի ավարտից հետո ներկայացված ատեստավորման հայտերը չեն ընդունվում, և այդ մասին եռօրյա ժամկետում գրավոր տեղեկացվում է զինծառայողին` նշելով հայտը չընդունելու պատճառը: Սույն կետով սահմանված կարգով չի ընդունվում նաև ատեստավորման այն հայտը, որը ներկայացրած զինծառայողը չի զբաղեցնում օրենքի 47-րդ հոդվածի 1-ին մասի համաձայն Հայաստանի Հանրապետության պաշտպանության նախարարի հրամանով սահմանված զինվորական պաշտոնների անվանացանկում նշված պաշտոն:

9. Ատեստավորման հայտը զինծառայողը ներկայացնում է Հայաստանի Հանրապետության պաշտպանության նախարարության կադրային քաղաքականության գլխավոր վարչության (այսուհետ՝ գլխավոր վարչություն) պետի անունով:

10. Զինծառայողի ատեստավորման հայտը գլխավոր վարչություն է ուղարկվում զինծառայողի ծառայության վայրի զորամասի (զինվորական կառավարման մարմնի) հրամանատարի (պետի) ուղեկցող գրությամբ, որին, բացի զինծառայողի ատեստավորման հայտից, կցվում է նաև զորամասի (զինվորական կառավարման մարմնի) տեղեկանքը, որում նշվում են զինծառայողի անունը, ազգանունը, հայրանունը, զինվորական կոչումը, զինվորական հաշվառման մասնագիտությունը, զբաղեցրած պաշտոնը և խումբը, իսկ զինծառայողի կողմից սույն կարգի 15-րդ կետում նախատեսված՝ չթույլատրվող ֆիզիկական վարժությունների ցանկում նշված համապատասխան հիվանդություն ունենալու դեպքում՝ նաև դրա վերաբերյալ տեղեկատվություն:

11. Ներկայացված ատեստավորման հայտերի հիման վրա սույն կարգի 7-րդ կետի 2-րդ ենթակետում նշված ժամկետի ավարտի օրվանից հետո 7 աշխատանքային օրվա ընթացքում գլխավոր վարչության կողմից կազմվում է ատեստավորմանը մասնակցող զինծառայողների անվանացուցակ, որի վերաբերյալ գլխավոր վարչության կողմից եռօրյա ժամկետում էլեկտրոնային եղանակով գրավոր տեղեկացվում է ատեստավորման հայտ ներկայացրած զինծառայողի ծառայության վայրի զորամասի (զինվորական կառավարման մարմնի) հրամանատարին (պետին)՝ հանձնարարելով ատեստավորման անցկացման վայրի, օրվա և ժամի վերաբերյալ մեկօրյա ժամկետում գրավոր տեղեկացնել զինծառայողին, ինչպես նաև ատեստավորման անցկացման օրը զինծառայողին արձակել ծառայության վայրից՝ ատեստավորմանը մասնակցելու համար:

12. Սույն կարգի 4-րդ կետի համաձայն, զինվորական պաշտոնների յուրաքանչյուր խմբում նախատեսված և մարտական խնդիրների իրականացման, պլանավորման կամ վերահսկման գործառույթներ ունեցող պաշտոն առաջին անգամ զբաղեցնող կամ օրենքի 33-րդ հոդվածի 4-րդ մասի համաձայն նոր պայմանագիր կնքած և մարտական խնդիրների իրականացման, պլանավորման կամ վերահսկման գործառույթներ ունեցող պաշտոնի նշանակված զինծառայողների ատեստավորման անցկացման նպատակով, պաշտոնի զբաղեցման կամ պաշտոնի նշանակման օրվանից հետո ոչ ուշ, քան 15-օրյա ժամկետում զինծառայողի ծառայության վայրի զորամասի (զինվորական կառավարման մարմնի) հրամանատարի (պետի) ուղեկցող գրությամբ գլխավոր վարչություն է ներկայացվում սույն կարգի 10-րդ կետում նշված տեղեկանքը: Սույն կետում նշված ժամկետի ավարտից հետո 5 աշխատանքային օրվա ընթացքում գլխավոր վարչության կողմից կազմվում է ատեստավորմանը մասնակցող զինծառայողների անվանացուցակ, որի վերաբերյալ գլխավոր վարչության կողմից մեկօրյա ժամկետում էլեկտրոնային եղանակով գրավոր տեղեկացվում է զինծառայողի ծառայության վայրի զորամասի (զինվորական կառավարման մարմնի) հրամանատարին (պետին)՝ հանձնարարելով ատեստավորման անցկացման վայրի, օրվա և ժամի վերաբերյալ մեկօրյա ժամկետում գրավոր տեղեկացնել զինծառայողին, ինչպես նաև ատեստավորման անցկացման օրը զինծառայողին արձակել ծառայության վայրից՝ ատեստավորմանը մասնակցելու համար:

13. Սույն կարգի 6-րդ կետի համաձայն զինվորական պաշտոնը զբաղեցնելու ընթացքում ատեստավորված և տվյալ պաշտոնի խմբի համար սահմանված չափով հավելավճար ստացող զինծառայողների ատեստավորման անցկացման նպատակով զինծառայողի ատեստավորման եռամյա ժամկետը լրանալու օրվանից ոչ շուտ, քան 90 օրացուցային օր առաջ և ոչ ուշ, քան 75 օրացուցային օր առաջ կամ հղի կամ մինչև երեք տարեկան երեխայի խնամքի համար տրված արձակուրդից զինծառայողի վերադառնալու կամ զինծառայողի հերթական արձակուրդի կամ գործուղման կամ բուժման ավարտի օրվանից հետո 15-օրյա ժամկետում զինծառայողի ծառայության վայրի զորամասի (զինվորական կառավարման մարմնի) հրամանատարի (պետի) ուղեկցող գրությամբ գլխավոր վարչություն է ներկայացվում սույն կարգի 10-րդ կետում նշված տեղեկանքը: Սույն կետում նշված համապատասխան վերջնաժամկետի օրվանից հետո 5 աշխատանքային օրվա ընթացքում գլխավոր վարչության կողմից կազմվում է ատեստավորմանը մասնակցող զինծառայողների անվանացուցակ, որի վերաբերյալ գլխավոր վարչության կողմից մեկօրյա ժամկետում էլեկտրոնային եղանակով գրավոր տեղեկացվում է զինծառայողի ծառայության վայրի զորամասի (զինվորական կառավարման մարմնի) հրամանատարին (պետին)՝ հանձնարարելով ատեստավորման անցկացման վայրի, օրվա և ժամի վերաբերյալ մեկօրյա ժամկետում գրավոր տեղեկացնել զինծառայողին, ինչպես նաև ատեստավորման անցկացման օրը զինծառայողին արձակել ծառայության վայրից՝ ատեստավորմանը մասնակցելու համար:

14. Սույն կարգի համաձայն, մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող զինծառայողների ատեստավորման կազմակերպման և անցկացման նպատակով, Հայաստանի Հանրապետության պաշտպանության նախարարի հրամանով ստեղծվում են ատեստավորման 5 կենտրոններ և 10 հանձնաժողովներ: Յուրաքանչյուր հանձնաժողովը կազմվում է 10 անձից՝ հանձնաժողովի նախագահ և ինը անդամներ, որոնք հանձնաժողովի նախագահի գլխավորությամբ բաժանվում են երեք խմբերի, հանձնաժողովի անդամներից երեքն անցկացնում են ատեստավորմանը մասնակցող զինծառայողների ֆիզիկական պատրաստության աստիճանի գնահատումը, երեքը՝ կրակային և շարային պատրաստության աստիճանի գնահատումը, իսկ մյուս երեքը՝ մասնագիտական գիտելիքների և ծառայողական պարտականությունների իմացության գնահատումը:

15. Զինծառայողների ֆիզիկական, կրակային և շարային պատրաստության աստիճանի գնահատումն իրականացվում է համապատասխան գործնական վարժությունների, իսկ մասնագիտական գիտելիքների և ծառայողական պարտականությունների իմացության գնահատումը՝ գրավոր թեստավորման միջոցով: Ֆիզիկական պատրաստության աստիճանը գնահատվում է ըստ զինծառայողների տարիքային խմբերի համար սահմանված ֆիզիկական վարժությունների, կրակային պատրաստության գնահատումը՝ ըստ զինծառայողի անհատական կրակային վարժությունների ծրագրային նորմացույցերի, իսկ շարային պատրաստությունը՝ շարային պատրաստության մեթոդիկա-ձեռնարկի համաձայն: Ֆիզիկական պատրաստության աստիճանի գնահատման համապատասխան գործնական վարժության կատարումից ազատվում է այն զինծառայողը, որն ունի Հայաստանի Հանրապետության կառավարության 2018 թվականի ապրիլի 12-ի N 404-Ն որոշման N 2 հավելվածով սահմանված՝ չթույլատրվող ֆիզիկական վարժությունների ցանկով նախատեսված համապատասխան գործնական վարժության կատարման հակացուցում: Թեստավորման առաջադրանքը բաղկացած է 50 հարցից, որից 5-ը՝ պաշտպանության ոլորտի օրենսդրության, 35-ը՝ զինծառայողի զինվորական հաշվառման մասնագիտության, իսկ 10-ը՝ գործառութային պարտականությունների վերաբերյալ: Թեստերը բաղկացած են ընտրովի և կարճ պատասխաններ պահանջող առաջադրանքներից:

16. Գլխավոր վարչությունը յուրաքանչյուր ատեստավորումից առնվազն 20 աշխատանքային օր առաջ զորամասեր (զինվորական կառավարման մարմիններ) է ուղարկում մեթոդական ուղեցույց, որում ներկայացվում են թեստերի կառուցվածքը, թեստային առաջադրանքներում ընդգրկվող նյութը և առաջադրանքների նմուշները, ֆիզիկական, կրակային և շարային պատրաստության աստիճանի գնահատման գործնական վարժությունների և վարժաձևերի նորմատիվները, ըստ յուրաքանչյուր ուղղության գնահատման ձևաթղթերի լրացման կարգը:

17. Ատեստավորումն անցկացվում է 4 օրում, որից առաջին երեք օրում իրականացվում է ֆիզիկական, կրակային և շարային պատրաստության աստիճանի գնահատումը, իսկ չորրորդ օրը՝ թեստավորումը: Ֆիզիկական, կրակային և շարային պատրաստության աստիճանի գնահատումն իրականացվում է Հայաստանի Հանրապետության զինված ուժերում գործող նորմատիվների համաձայն:

18. Թեստավորման սենյակում աշխատանքներն սկսվելուց մեկ ժամ առաջ հանձնաժողովի նախագահը թեստավորման սենյակում թեստավորման խմբին է տրամադրում թեստի հարցերի պատասխանների ձևաթղթի ծրարը և թեստավորմանը մասնակցող զինծառայողների ցուցակը:

19. Պատասխանների ձևաթղթի ծրարը պարունակում է թեստավորմանը մասնակցող զինծառայողների թվով պատասխանների ձևաթուղթ, որոնք տրվում են զինծառայողներին, և երկու լրացուցիչ ձևաթուղթ, որոնք օգտագործվում են պատասխանների ձևաթղթերի խոտանման դեպքում:

20. Զինծառայողների մուտքը թեստավորման սենյակ սկսվում է ատեստավորման կենտրոնի ղեկավարի հրահանգով, սենյակում զինծառայողը ստանում է պատասխանների ձևաթուղթը, ցուցակում ստորագրում է իր անվան դիմաց և նստում է համարակալված որևէ նստարանի:

21. Գրավոր աշխատանքն սկսվելուց 15 րոպե առաջ հանձնաժողովի նախագահը զինծառայողների համար ընթերցում է թեստավորման անցկացման կարգը:

22. Զինծառայողը պատասխանների ձևաթղթում լրացնում է իր կոչումը, անունը, ազգանունը, հայրանունը, այնուհետև խմբի անդամները մոտենում են զինծառայողներին, կտրում պատասխանների ձևաթղթերի` անձնական տվյալները պարունակող մասերը, հաշվում են և հանձնում հանձնաժողովի նախագահին:

23. Հանձնաժողովի նախագահը պատասխանների ձևաթղթերի անձնական տվյալները պարունակող մասերը խմբի անդամների մասնակցությամբ հաշվում, ստուգում, այնուհետև տեղավորում է այդ նպատակով ստացված ծրարում` ծրարի վրա գրելով կտրված մասերի թիվը:

24. Հանձնաժողովի նախագահը համապատասխան թեստերի փաթեթները ցուցադրում է զինծառայողներին` նրանց ուշադրությունը հրավիրելով փաթեթների փակ և ամբողջական լինելու հանգամանքի վրա, որից հետո բացում է դրանք` բոլորին տեսանելի ձևով: Փաթեթների բացման վերաբերյալ արձանագրությունների համապատասխան տողում խմբի անդամները կատարում են նշում:

25. Խմբի անդամները զինծառայողներին բաժանում են թեստերը: Զինծառայողը, ստանալով իր թեստը, ստուգում է այն և թեստի շապիկի համապատասխան մասում գրում է իր կոչումը, անունը, ազգանունը, հայրանունը և նստարանի համարը: Հայտարարվում է գրավոր աշխատանքի սկիզբը, տևողությունը, ցուցատախտակի վրա կատարվում է նշում գրավոր աշխատանքի սկզբի և ավարտի վերաբերյալ: Թեստավորմանը հատկացվում է 2 ժամ:

26. Գրավոր աշխատանքի սկիզբը հայտարարվելուց հետո արգելվում է ուշացած զինծառայողի մուտքը թեստավորման սենյակ:

27. Գրավոր աշխատանքի ընթացքում արգելվում է այլ զինծառայողների հետ խոսելը, թեստերը և պատասխանների ձևաթղթերը փոխանակելը, միմյանցից արտագրելը, բջջային հեռախոսներ կամ կապի այլ միջոցներ թեստավորման սենյակ բերելը, այլ նստարանին նստելը: Սույն կետով սահմանված խախտումների դեպքում հանձնաժողովի նախագահը մեկ անգամ բանավոր նախազգուշացնում է զինծառայողին, իսկ կրկնվելու դեպքում՝ դադարեցնում է զինծառայողի թեստավորումը և զինծառայողին դուրս հրավիրում թեստավորման սենյակից՝ արձանագրելով խախտումը և զինծառայողի տվյալները: Այս դեպքում կայացվում է եզրակացություն՝ ենթակա չէ հաշվարկվելու հավելավճար:

28. Գրավոր աշխատանքի ընթացքում թեստավորման սենյակից զինծառայողը կարող է դուրս գալ միայն անհրաժեշտության դեպքում` հանձնաժողովի նախագահի թույլտվությամբ խմբի անդամներից մեկի ուղեկցությամբ:

29. Թեստավորման սենյակում թեստի բովանդակության վերաբերյալ զինծառայողի հարցերը չեն քննարկվում:

30. Գրավոր աշխատանքի ընթացքում ի հայտ եկած տպագրական կամ այլ թերություններ ունեցող թեստերն ու պատասխանների ձևաթղթերը նորերով փոխարինում է հանձնաժողովի նախագահը` արձանագրությունների համապատասխան տողում նշելով այդ փաստը: Թերություններ ունեցող պատասխանների ձևաթղթերի և թեստերի վրա գրվում են «Խոտանված է» բառերը:

31. Գրավոր աշխատանքի ամբողջ ընթացքում թեստավորման սենյակում կարող են ներկա գտնվել միայն հանձնաժողովի նախագահը, խմբի անդամները և թեստավորվող զինծառայողները:

32. Գրավոր աշխատանքի ավարտից 30 րոպե առաջ հանձնաժողովի նախագահը զինծառայողների ուշադրությունն է հրավիրում ժամանակի վրա և հիշեցնում առաջադրանքների պատասխանները թեստերից պատասխանների ձևաթղթերի վրա անցկացնելու մասին:

33. Գրավոր աշխատանքն ավարտած զինծառայողը թեստը և պատասխանների ձևաթուղթը հանձնում է հանձնաժողովի նախագահին` ստորագրելով թեստավորմանը մասնակցող զինծառայողների ցուցակի՝ իր վերաբերյալ տվյալների տողում: Հանձնաժողովի նախագահը համեմատում է թեստի և պատասխանների ձևաթղթում նշված թեստի համարները, այնուհետև պատճենահանում է պատասխանների ձևաթուղթը և պատճենահանված օրինակը հանձնում է զինծառայողին, որը զինծառայողը պահում է իր մոտ:

34. Հանձնաժողովի նախագահը պատասխանների ձևաթղթերի (օգտագործված, չօգտագործված, խոտանված), թեստավորմանը մասնակցած զինծառայողների ցուցակի ծրարները, պատասխանների ձևաթղթերի կտրված մասերի ծրարները և թեստերը (օգտագործված, չօգտագործված) հաշվում է և արձանագրում:

35. Պատասխանների ձևաթղթերի կտրված մասերի վերծանումից հետո ստուգման տվյալները գրանցվում են որպես զինծառայողի թեստավորման արդյունք:

36. Ատեստավորման արդյունքները հանձնաժողովների կողմից ամփոփվում են ատեստավորման ավարտից հետո 3 աշխատանքային օրվա ընթացքում, որի ժամանակ կազմվում է արձանագրություն, և ըստ ատեստավորման արդյունքների՝ յուրաքանչյուր զինծառայողի վերաբերյալ տրվում է գրավոր եզրակացություն՝

1) ենթակա է հաշվարկվելու հավելավճար, կամ

2) ենթակա է շարունակելու հավելավճարի հաշվարկումը կամ

3) ենթակա չէ հաշվարկվելու հավելավճար:

37. Ատեստավորման արդյունքներով «ենթակա չէ հաշվարկվելու հավելավճար» եզրակացությունը կայացվում է այն դեպքում, երբ ֆիզիկական, կրակային և շարային պատրաստության աստիճանների գնահատման արդյունքներով զինծառայողն առնվազն մեկ պատրաստության աստիճանից կամ մասնագիտական գիտելիքների և ծառայողական պարտականությունների իմացության թեստավորումից ստացել է «անբավարար» գնահատական: Ատեստավորման արդյունքներով «ենթակա է հաշվարկվելու հավելավճար» կամ «ենթակա է շարունակելու հավելավճարի հաշվարկումը» եզրակացությունը կայացվում է այն դեպքում, երբ ֆիզիկական, կրակային և շարային պատրաստության աստիճաններից ու մասնագիտական գիտելիքների և ծառայողական պարտականությունների իմացության թեստավորումից զինծառայողը ստացել է «բավարար» կամ «լավ» կամ «գերազանց» գնահատական: Ընդ որում, զինծառայողը՝

1) մասնագիտական գիտելիքների և ծառայողական պարտականությունների իմացության թեստային առաջադրանքների առնվազն 21 հարցի սխալ պատասխանելու դեպքում ստանում է «անբավարար», 30-ից մինչև 34-ը ներառյալ հարցերին ճիշտ պատասխանելու դեպքում՝ «բավարար», 35-ից մինչև 44-ը ներառյալ հարցերին ճիշտ պատասխանելու դեպքում՝ «լավ», իսկ 45 և ավելի հարցերին ճիշտ պատասխանելու դեպքում՝ «գերազանց» գնահատական.

2) գնահատվում է «գերազանց», եթե ֆիզիկական, կրակային և շարային պատրաստության աստիճաններից ու մասնագիտական գիտելիքների և ծառայողական պարտականությունների իմացության թեստավորումից ստացել է միայն «գերազանց» գնահատական.

3) գնահատվում է «լավ», եթե ֆիզիկական կամ կրակային կամ շարային պատրաստության աստիճաններից կամ մասնագիտական գիտելիքների և ծառայողական պարտականությունների իմացության թեստավորումից թեկուզև մեկից ստացել է «լավ» գնահատական, իսկ մնացածներից ստացել է «գերազանց» գնահատական.

4) գնահատվում է «բավարար», եթե ֆիզիկական կամ կրակային կամ շարային պատրաստության աստիճաններից կամ մասնագիտական գիտելիքների և ծառայողական պարտականությունների իմացության թեստավորումից թեկուզև մեկից ստացել է «բավարար» գնահատական, իսկ մնացածներից ստացել է «գերազանց» կամ «լավ» գնահատական:

(37-րդ կետը խմբ. 11.05.23 N 711-Ն)

38. Ատեստավորման արձանագրությունը, գրավոր եզրակացությունը և ըստ յուրաքանչյուր ուղղության գնահատման ձևաթղթերը հանձնաժողովների կողմից մեկօրյա ժամկետում ներկայացվում են գլխավոր վարչություն:

39. Ատեստավորման արդյունքներով որակավորված կամ ատեստավորումը չանցած զինծառայողների վերաբերյալ գլխավոր վարչությունը 3-օրյա ժամկետում գրավոր տեղեկացնում է զինծառայողի ծառայության վայրի զորամասի (զինվորական կառավարման մարմնի) հրամանատարին (պետին)՝ կից ուղարկելով նաև զինծառայողի վերաբերյալ կայացված գրավոր եզրակացության և ըստ յուրաքանչյուր ուղղության գնահատման ձևաթղթերի պատճենները, որոնք պարտադիր կցվում են զինծառայողի անձնական գործին:

40. Գլխավոր վարչությունը վարում է ատեստավորմանը մասնակցած զինծառայողների էլեկտրոնային գրանցամատյան, որում գրառվում են սույն կարգի 10-րդ կետում նախատեսված տեղեկությունները, զինծառայողի ատեստավորման ժամկետը, ատեստավորման արդյունքները և կայացված եզրակացությունները:

41. Ատեստավորմանը մասնակցած զինծառայողը մեկօրյա ժամկետում պարտադիր ծանոթացվում է ատեստավորման արդյունքներին և կայացված եզրակացությանը: Զինծառայողն իրավունք ունի վերադասության կարգով Հայաստանի Հանրապետության պաշտպանության նախարարին բողոքարկելու ատեստավորման արդյունքները և կայացված եզրակացությունը՝ դրանց ծանոթանալու օրվանից հետո ոչ ուշ, քան հինգ աշխատանքային օրվա ընթացքում, կամ վարչական դատավարության կարգով:

42. Ատեստավորման արդյունքների և կայացված եզրակացության վերադասության կարգով բողոքարկումը չի կարող հանգեցնել նոր ատեստավորման անցկացման: Քննարկելով բերված բողոքը` Հայաստանի Հանրապետության պաշտպանության նախարարն իրավունք ունի`

1) բավարարելու բողոքն ամբողջությամբ՝ հանձնարարելով ատեստավորման հանձնաժողովին կայացնելու նոր եզրակացություն.

2) մերժելու բողոքը` ատեստավորման հանձնաժողովի եզրակացությունը թողնելով անփոփոխ:

43. Ատեստավորման արդյունքներով հավելավճար ստանալու կամ հավելավճարի հաշվարկումը շարունակելու իրավունք ձեռք չբերած զինծառայողը կարող է կրկնակի ատեստավորում անցնելու համար դիմել տարեկան ոչ ավելի, քան երկու անգամ, որի դեպքում զինծառայողի ատեստավորումը կազմակերպվում և անցկացվում է սույն կարգի 2-րդ և 4-րդ գլուխների պահանջների համաձայն: Ընդ որում, եթե զինծառայողը հավելավճար ստանալու կամ հավելավճարի հաշվարկումը շարունակելու իրավունք ձեռք չի բերել ֆիզիկական, կրակային և շարային պատրաստության աստիճանների գնահատման արդյունքներով միայն մեկ պատրաստության աստիճանից կամ միայն մասնագիտական գիտելիքների և ծառայողական պարտականությունների իմացության թեստավորումից «անբավարար» գնահատական ստանալու պատճառով, ապա իրավունք ունի սույն կարգի 41-րդ կետով նախատեսված ատեստավորման եզրակացությունն ստանալու օրվանից հետո 15-օրյա ժամկետում սույն կարգի 9-րդ կետի համաձայն ներկայացնել «անբավարար» գնահատական ստացած համապատասխան պատրաստության աստիճանի գնահատումը կամ մասնագիտական գիտելիքների և ծառայողական պարտականությունների իմացության թեստավորումը վերահանձնելու ատեստավորման հայտ, որի դեպքում ատեստավորման հայտին ընթացք է տրվում սույն կարգի 11-րդ կետի համաձայն: Սույն կետում նշված դեպքում համապատասխան պատրաստության աստիճանի գնահատման կամ մասնագիտական գիտելիքների և ծառայողական պարտականությունների իմացության թեստավորման վերահանձնման արդյունքներով զինծառայողն ատեստավորված է համարվում սույն կարգի 37-րդ կետով սահմանված պայմաններով:

(43-րդ կետը լրաց. 04.01.24 N 16-Ն)

(հավելվածը խմբ. 11.05.23 N 711-Ն, լրաց. 04.01.24 N 16-Ն)

Հայաստանի Հանրապետության վարչապետի աշխատակազմի ղեկավար

Ա. Հարությունյան

09.02.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 9 փետրվարի 2023 թվական: