«Վավերացնում եմ»

Հայաստանի Հանրապետության

Նախագահ Ռ. Քոչարյան

«6» փետրվարի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 փետրվարի 2002 թվականի N 108

«Պետական ոչ առևտրային կազմակերպությունների մասին» Հայաստանի Հանրապետության օրենքի և Հայաստանի Հանրապետության վարչապետի 2001 թվականի նոյեմբերի 1-ի «Հայաստանի Հանրապետության պետական գույքի կառավարման նախարարության կենտրոնական ապարատի կառուցվածքը հաստատելու և Հայաստանի Հանրապետության վարչապետի 1998 թվականի նոյեմբերի 6-ի N 620 որոշման մեջ փոփոխություն կատարելու մասին» N 774 որոշման 4-րդ կետի «բ» ենթակետին համապատասխան` Հայաստանի Հանրապետության կառավարությունը որոշում է.

1. Ստեղծել «Պետական գույքի գույքագրման, հաշվառման և գնահատման գործակալություն» պետական ոչ առևտրային կազմակերպություն (այսուհետև` պետական կազմակերպություն):

2. Սահմանել, որ`

ա) Հայաստանի Հանրապետության պետական գույքի արդյունավետ կառավարման, Հայաստանի Հանրապետության կառավարության կողմից միջպետական ծրագրերի իրականացման, Հայաստանի Հանրապետությունում ներդրումային միջավայրի բարելավման համար անհրաժեշտ համապարփակ տեղեկատվության տրամադրման, ինչպես նաև Հայաստանի Հանրապետության պետական բյուջե լրացուցիչ, այդ թվում` ոչ հարկային եկամուտների համալրման նպատակով պետական կազմակերպությունն իրականացնում է` 

Հայաստանի Հանրապետությունում և օտարերկրյա պետություններում Հայաստանի Հանրապետության պետական գույքի գույքագրման աշխատանքների կազմակերպումը և պետական կառավարման համապատասխան մարմինների հետ համատեղ գույքագրման աշխատանքները,

Հայաստանի Հանրապետության պետական գույքի հաշվառումը,

Հայաստանի Հանրապետության պետական գույքի հաշվառման ռեեստրի վարմանն աջակցող աշխատանքների իրականացումը,

Հայաստանի Հանրապետության պետական գույքի (այդ թվում` մասնավորեցվող, օտարվող) արժեքի որոշման (գնահատում և վերագնահատում) աշխատանքները.

բ) պետական կազմակերպությունն իրականացնում է ձեռնարկատիրական գործունեության հետևյալ տեսակները`

գույքագրում,

արժեքի որոշում (գնահատում և վերագնահատում),

տեղեկատվության տրամադրում և խորհրդատվություն.

գ) պետական կազմակերպությանը սեփականության իրավունքով հանձնվում է Հայաստանի Հանրապետության պետական գույքի կառավարման նախարարության հաշվեկշռում գտնվող` 13418,25 հազար դրամ հաշվեկշռային արժեքով գույքը (ցանկը կցվում է) և անժամկետ ու անհատույց օգտագործման իրավունքով ամրացվում է նույն նախարարության հաշվեկշռում գտնվող` Երևանի Զաքյան փողոցի N 10 շենքի 3-րդ հարկը` 216,9 քառակուսի մետր ընդհանուր մակերեսով և 823,15 հազար դրամ հաշվեկշռային արժեքով:

(2-րդ կետը խմբ. 23.09.04 N 1490-Ն)

3. Պետական կազմակերպության ընդհանուր կառավարման և բնականոն գործունեության ապահովման լիազորությունները վերապահել Հայաստանի Հանրապետության պետական գույքի կառավարման նախարարությանը (այսուհետև` լիազորված պետական մարմին):

4. Լիազորված պետական մարմնի լիազորություններն են`

ա) պետական կազմակերպության կառավարման համակարգի սահմանումը.

բ) պետական կազմակերպության լուծարման հանձնաժողովի ստեղծումը և լուծարման հաշվեկշռի հաստատումը.

գ) կառավարման մարմինների ձևավորումը և նրանց լիազորությունների վաղաժամկետ դադարեցումը.

դ) պետական կազմակերպության գործունեության վերահսկողությունը.

ե) պետական կազմակերպության գործադիր մարմնի` Հայաստանի Հանրապետության օրենսդրության պահանջներին հակասող հրամանների, հրահանգների, կարգադրությունների ու ցուցումների կասեցումը կամ դրանք ուժը կորցրած ճանաչելը.

զ) պետական կազմակերպության գործունեության մասին հաշվետվությունները լսելը և դրանց գործունեության վերստուգման արդյունքները քննելը.

է) պետական կազմակերպությանն ամրացված պետական սեփականության օգտագործման և պահպանության նկատմամբ վերահսկողության իրականացումը.

ը) պետական կազմակերպության տարեկան հաշվետվությունների և տարեկան հաշվեկշռի հաստատումը.

թ) «Պետական ոչ առևտրային կազմակերպությունների մասին» Հայաստանի Հանրապետության օրենքով, հիմնադրի որոշումներով և պետական կազմակերպության կանոնադրությամբ նախատեսված այլ գործառույթների իրականացումը:

5. Հայաստանի Հանրապետության պետական գույքի կառավարման նախարարությանը`

ա) 15-օրյա ժամկետում` Հայաստանի Հանրապետության կառավարության հաստատմանը ներկայացնել պետական կազմակերպության կանոնադրությունը.

բ) 1-ամսյա ժամկետում` Հայաստանի Հանրապետության կառավարության հաստատմանը ներկայացնել Հայաստանի Հանրապետության նախարարությունների, գերատեսչությունների, պետական կառավարման այլ մարմինների, մարզպետարանների ու Երևանի քաղաքապետարանի տնօրինության` պետական սեփականություն հանդիսացող գույքի անվճար համատեղ գույքագրման ու հաշվառման աշխատանքների ժամանակացույցը:

6. Հայաստանի Հանրապետության պետական գույքի կառավարման նախարարությանը` մինչև 2002 թվականի փետրվարի 15-ը ապահովել`

ա) սույն որոշման 2-րդ կետի «գ» ենթակետով սահմանված պետական կազմակերպությանն սեփականության իրավունքով հանձնված, անժամկետ և անհատույց օգտագործման իրավունքով ամրացված տարածքի անհատույց օգտագործման պայմանագրի կնքումը և հանձնման-ընդունման աշխատանքների իրականացումը.

բ) պետական կազմակերպության գույքային իրավունքների պետական գրանցումը:

7. Սույն որոշումն ուժի մեջ է մտնում 2002 թվականի փետրվարի 6-ից: