ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

20 հուլիսի 2023 թվականի N 1243-Ա

ԵՆԹԱԿԱՌՈՒՑՎԱԾՔՆԵՐ ՆԵՐԴՐՈՒՄՆԵՐԻ ԴԻՄԱՑ ՄԻՋՈՑԱՌՄԱՆ ՇՐՋԱՆԱԿՆԵՐՈՒՄ «ԱԳՐՈՊՐՈ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԿՈՂՄԻՑ ՆԵՐԿԱՅԱՑՎԱԾ ՆԵՐԴՐՈՒՄԱՅԻՆ ԾՐԱԳՐԻՆ ՀԱՎԱՆՈՒԹՅՈՒՆ ՏԱԼՈՒ ԵՎ ՕԺԱՆԴԱԿՈՒԹՅՈՒՆ ՏՐԱՄԱԴՐԵԼՈՒ ՄԱՍԻՆ

Ղեկավարվելով Հայաստանի Հանրապետության կառավարության 2022 թվականի օգոստոսի 24-ի «Ենթակառուցվածքներ ներդրումների դիմաց» օժանդակության տրամադրման միջոցառման իրականացման անհրաժեշտ բազային պահանջները, օժանդակության տրամադրման կարգը և պայմանները հաստատելու մասին» N 1343-Ն որոշման (այսուհետ՝ որոշում) դրույթներով՝ Հայաստանի Հանրապետության կառավարությունը որոշում է.

1. Հավանություն տալ «Ագրոպրո» փակ բաժնետիրական ընկերության (այսուհետ՝ ընկերություն) կողմից ներկայացված ներդրումային ծրագրին՝ համաձայն N 1 հավելվածի։

2. Սահմանել, որ՝

1) Հայաստանի Հանրապետության կառավարությունը սույն որոշման առաջին կետով սահմանված ծրագրի իրականացման նպատակով ենթակառուցվածքներ ներդրումների դիմաց օժանդակության տրամադրման միջոցառման շրջանակներում ընկերությանը տրամադրում է աջակցություն՝ Արագածոտն մարզի Աշտարակ համայնքի Արագածոտն գյուղի 02-017-0140-0147 կադաստրային ծածկագրով արդյունաբերական, ընդերքօգտագործման և այլ արտադրական օբյեկտների նպատակային նշանակության հողամասի խմելու ջուր, ասֆալտապատ ճանապարհ, բջջային հեռախոսակապ, ֆիքսված ինտերնետ կապ ապահովելու համար անհրաժեշտ ենթակառուցվածքների կառուցմամբ՝ համաձայն N 2 հավելվածի.

2) Հայաստանի Հանրապետության կառավարությունը սույն որոշման առաջին կետով սահմանված ծրագրի իրականացման նպատակով ենթակառուցվածքներ ներդրումների դիմաց օժանդակության տրամադրման միջոցառման շրջանակներում ընկերությանը տրամադրում է աջակցություն՝ Արագածոտն մարզի Աշտարակ համայնքի Արագածոտն գյուղի 02-017-0140-0153 կադաստրային ծածկագրով ջրային նպատակային նշանակության հողամասի ոռոգումն ապահովելու համար անհրաժեշտ ենթակառուցվածքի կառուցմամբ՝ համաձայն N 3 հավելվածի.

3) Հայաստանի Հանրապետության կառավարությունը սույն որոշման առաջին կետով սահմանված ծրագրի իրականացման նպատակով ենթակառուցվածքներ ներդրումների դիմաց օժանդակության տրամադրման միջոցառման շրջանակներում ընկերությանը տրամադրում է աջակցություն՝ Արմավիր մարզի Խոյ համայնքի Ծաղկալանջ գյուղի 04-051-0153-0034 կադաստրային ծածկագրով գյուղատնտեսական նպատակային նշանակության հողամասի էլեկտրամատակարարումն ապահովելու համար անհրաժեշտ ենթակառուցվածքի կառուցմամբ՝ համաձայն N 4 հավելվածի.

4) ընկերության կողմից իրականացվող ծրագրի շրջանակներում նախատեսվող ներդրումների ծավալը կազմում է 2 մլրդ դրամ, և աջակցության տրամադրման շրջանակներում կառուցվող ենթակառուցվածքների հանրագումարային արժեքը չի կարող գերազանցել ներդրումային ծրագրի ընդհանուր արժեքի 20 տոկոսը.

5) ընկերության կողմից ներկայացված աջակցության տրամադրման շրջանակներում կառուցվող ենթակառուցվածքների հանրագումարային նախնական արժեքը կազմում է 383 մլն դրամ, եթե նախագծահաշվարկային ճշգրտումներից հետո արժեքն ավելանա, սակայն չգերազանցի որոշմամբ հաստատված հավելվածի ընդունված ներդրումային ծրագրի ընդհանուր ներդրումների արժեքի 20 տոկոսը, ապա աջակցության տրամադրման շրջանակներում կառուցվող ենթակառուցվածքների նախագծահաշվարկային ճշգրտումներից հետո ավելացած արժեքի և նախնական արժեքի գումարի տարբերությունը նույնպես կֆինանսավորվի պետական բյուջեից։ Սակայն, եթե նախագծահաշվարկային ճշգրտումներից հետո արժեքն ավելանա և գերազանցի որոշմամբ հաստատված հավելվածի 10-րդ կետի 2-րդ ենթակետով սահմանված ներդրումային ծրագրի ընդհանուր ներդրումների արժեքի 20 տոկոսի չափը, ապա ընկերությունը պարտավորվում է վճարել ներդրումային ծրագրի ընդհանուր արժեքի 20 տոկոսը գերազանցող մասը, որը կարգավորվելու է սույն որոշման 4-րդ կետով սահմանված ընկերության հետ կնքվող պայմանագրով.

6) ընկերությունը պարտավորվում է ծրագրով սահմանված ժամանակացույցով իրականացնել նախատեսվող ներդրումները և վերջիններիս վերաբերյալ սույն որոշման 4-րդ կետով սահմանված ընկերության հետ կնքվող պայմանագրի դրույթների համաձայն Հայաստանի Հանրապետության տարածքային կառավարման և ենթակառուցվածքների նախարարություն և Հայաստանի Հանրապետության բարձր տեխնոլոգիական արդյունաբերության նախարարություն ներկայացնել անկախ աուդիտորական ընկերության կողմից գնահատված տարեկան հաշվետվություններ՝ նախապես սահմանված ժամանակացույցին համապատասխան.

7) եթե ենթակառուցվածքի համար պետական միջոցներից կատարված ծախսերի փաստացի ծավալը գերազանցում է ծրագրի ավարտի վերջնական հաշվետվությամբ ներկայացված փաստացի կատարված ներդրումների ծավալի 20 տոկոսը, ապա գերազանցող մասն ընկերության կողմից վերադարձվում է պետական բյուջե կամ համապատասխան գումարը փոխհատուցվում է որոշմամբ հաստատված հավելվածի 12․1-ին կետով սահմանված բանկային երաշխիքով.

8) ընկերության կողմից նախատեսվող ներդրումների չիրականացման դեպքում վերջինս պարտավորվում է վերադարձնել աջակցության տրամադրման շրջանակներում կառուցվող ենթակառուցվածքների հանրագումարային արժեքն ամբողջությամբ կամ համապատասխան գումարը կփոխհատուցվի որոշմամբ հաստատված հավելվածի 12․1-ին կետով սահմանված բանկային երաշխիքով.

9) ընկերության ներդրումային ծրագրի իրականացման համար անհրաժեշտ ենթակառուցվածքի կառուցման ավարտը 2024 թվականի մարտի 15-ը.

10) սույն որոշմամբ նախատեսվող խմելու ջուր, ոռոգում, ասֆալտապատ ճանապարհ և էլեկտրամատակարարում ապահովելու համար անհրաժեշտ ենթակառուցվածքների կառուցման պատասխանատու պետական մարմին է հանդիսանում Հայաստանի Հանրապետության տարածքային կառավարման և ենթակառուցվածքների նախարարությունը.

11) սույն որոշմամբ նախատեսվող բջջային հեռախոսակապ, ֆիքսված ինտերնետ կապ ապահովելու համար անհրաժեշտ ենթակառուցվածքների կառուցման պատասխանատու պետական մարմին է հանդիսանում Հայաստանի Հանրապետության բարձր տեխնոլոգիական արդյունաբերության նախարարությունը։

3. Հայաստանի Հանրապետության էկոնոմիկայի նախարարին, Հայաստանի Հանրապետության տարածքային կառավարման և ենթակառուցվածքների նախարարին և Հայաստանի Հանրապետության բարձր տեխնոլոգիական արդյունաբերության նախարարին՝ սույն որոշման ընդունումից հետո մեկամսյա ժամկետում Հայաստանի Հանրապետության կառավարության հաստատմանը համատեղ ներկայացնել «Ենթակառուցվածքներ ներդրումների դիմաց» միջոցառման շրջանակներում Հայաստանի Հանրապետության տարածքային կառավարման և ենթակառուցվածքների նախարարությանը և Հայաստանի Հանրապետության բարձր տեխնոլոգիական արդյունաբերության նախարարությանը գումար հատկացնելու մասին որոշման նախագիծը։

4. Հայաստանի Հանրապետության տարածքային կառավարման և ենթակառուցվածքների նախարարին և Հայաստանի Հանրապետության բարձր տեխնոլոգիական արդյունաբերության նախարարին՝ ընկերության կողմից բանկային երաշխիքի ներկայացումից հետո 20-օրյա ժամկետում ընկերության հետ կնքել համապատասխան պայմանագիրը՝ ծրագրի իրականացման և աջակցության տրամադրման վերաբերյալ։

5. Սահմանել, որ՝

1) ընկերությունը պարտավորվում է որոշումն ուժի մեջ մտնելուց հետո տասնօրյա ժամկետում Հայաստանի Հանրապետության տարածքային կառավարման և ենթակառուցվածքների նախարարություն և Հայաստանի Հանրապետության բարձր տեխնոլոգիական արդյունաբերության նախարարություն ներկայացնել որոշմամբ հաստատված հավելվածի 12․1-ին կետով սահմանված բանկային երաշխիքը.

2) ներկայացված՝ Հայաստանի Հանրապետության կառավարության 2022 թվականի օգոստոսի 24-ի N 1343-Ն որոշման հավելվածի 3-րդ գլխի 12․1-ին կետով սահմանված բանկային երաշխիքը պետք է գործի մինչև ծրագրի ավարտը։

6. Սահմանել, որ սույն որոշմամբ նախատեսված համապատասխան պայմանագրի նոտարական ձևակերպման, ենթակառուցվածքների նախագծանախահաշվային փաստաթղթերի կազմման ծախսերն ու կառուցվող ենթակառուցվածքների պետական գրանցման համար պահանջվող վճարներն իրականացվելու են ընկերության միջոցների հաշվին։

Հայաստանի Հանրապետության վարչապետ	Ն. Փաշինյան
Երևան

Հավելված N 1 ՀՀ կառավարության 2023 թվականի հուլիսի 20-ի N 1243-Ա որոշման

ՆԵՐԴՐՈՒՄԱՅԻՆ ԾՐԱԳՐԻ ԱՄՓՈՓ ՆԿԱՐԱԳԻՐԸ

1.	Հայտատուի (կազմակերպության) անվանումը և կազմակերպաիրավական ձևը, հիմնադրման տարեթիվը	«ԱԳՐՈՊՐՈ» ՓԲԸ, 18.09.2020թ.
	Հարկ վճարողի հաշվառման համարը (ՀՎՀՀ)	00226939
	Կազմակերպության բաժնետերերը	Դավիդ Ժիրայրի Սահակյան
	Կոնտակտային տվյալները` Անուն, հայրանուն, ազգանուն	Դավիդ Ժիրայրի Սահակյան
	Իրավաբանական հասցեն	ՀՀ, ք. Երևան, Պռոշյան փ. 2/1, 18 տարածք
	Տնտեսական գործունեության դասակարգիչը	(A) 01.24.1, (C) 11.01.1, (N) 82.92.0, (H) 52.10.0
	Հեռախոսահամարը	093106240
	Էլ. փոստը	info@agropro.am
2.	Ներդրումային ծրագրի իրականացման վայրը/հասցե (ներառյալ՝ կադաստրային գոտին)	Մարզ Արմավիր, համայնք Խոյ, գյուղ Արագած, մարզ Արմավիր, համայնք Խոյ, գյուղ Ծաղկալանջ, մարզ Արագածոտն, համայնք Աշտարակ, գյուղ Արագածոտն (Արագածոտնի մարզ, Աշտարակ համայնք, գյուղ Արագածոտն գյուղի կադաստրային գոտի՝ XIV, Արմավիրի մարզ, Խոյ համայնք, Արագած և Ծաղկալանջ գյուղերի կադաստրային գոտի՝ XII):
3.	Ներդրումային ծրագրի համառոտ նկարագրությունը (ծրագրի նպատակը, իրականացվելիք աշխատանքները, մրցակցային առավելությունները, արտահանման ուղղությունները և քաղաքականությունը, ծրագրով նախատեսված գործունեության տեսակի հստակ նկարագրությունը` նշելով տնտեսական գործունեության դասակարգիչը, ստեղծվելիք աշխատատեղերը, միջին աշխատավարձը և այլն)	«Ագրոպրո» ՓԲԸ-ն 2022-2023թթ. նախատեսում է շուրջ 90 հա հողամասի վրա հիմնել 75 հա սուպերինտենսիվ պտղատու այգի՝ մեկ հեկտար հողակտորի վրա տնկելով շուրջ 2,000 հատ ծառ։ (Փուլային աշխատանքների բացվածքը և նկարագրությունը տրված է 4-րդ կետով): Այգեհիմնումը կատարվելու է արդիական տեխնոլոգիաների լայնածավալ ներդրմամբ: Այգու ոռոգումը կատարվելու է կաթիլային համակարգով, որը սնուցվելու է այգու համար կառուցված շուրջ 17,000 խորանարդ մետր ջրավազանից: Կաթիլային համակարգով ոռոգումը հնարավորություն է տալիս կատարել զգալի ջրային խնայողություններ, ինչպես նաև ժամանակին և արդյունավետ ապահովել այգու սնուցումը: Այգին պաշտպանված է լինելու կարկտապաշտպան ցանցով, որը ոչ միայն ապահովում է ծառերի պաշտպանությունը կարկուտից, այլ նաև արևային այրվածքներից, վնասվածքներից, ինչպես նաև նվազեցնում է ջրի գոլորշիացումը: Այգին հագեցած է լինելու գերժամանակակից գյուղատնտեսական սարքավորումներով և գյուղտեխնիկայով: Այգու ամբողջական կառավարումը լինելու է թվայնացված, ինչպես նաև օգտագործվելու են GPS համակարգից օգտվող, ինչպես նաև ինքնակառավարվող տեխնիկաներ: Նախատեսվում է մշակել մաքսիմալ դիվերսիֆիկացված արտահանման շուկաների ռազմավարություն: Արտահանման աշխարհագրության ընդլայնման ուղղությամբ արդեն քայլեր կատարվում են: Բացի Ռուսաստանից, նախատեսվում է արտահանում իրականացնել նաև դեպի եվրոպական երկրներ, Միջին արևելքի երկրներ և Չինաստան: Այդ նպատակով կազմակերպությունը իրականացնում է Global Gap ստանդարտների համապատասխանության սերտիֆիկատ ստանալու աշխատանքներ: առկայություն: Տնտեսական գործունեության դասակարգիչները (A) 01.24.1, (C) 11.01.1, (N) 82.92.0, (H) 52.10.0 են: Ծրագրի իրականացման արդյունքում ստեղծվելու է շուրջ 60 մշտական և 450 սեզոնային աշխատատեղեր այգում։ Միջին աշխատավարձը մշտական աշխատողների  համար կազմելու է ամսական շուրջ 300,000 ՀՀ դրամ: Նախագծի այգեհիմնման հաստատված բյուջեն կազմում է 3․1 մլրդ ՀՀ դրամ: Մինչև 2023թ․հունվարի 24-ը արդեն իսկ կատարվել են 1․1 մլրդ դրամի ներդրումներ։ 24․01․2023թ․ հետո նախատեսվող ներդրումների չափը 2 մլրդ է։ Այգուց ակնկալվող տարեկան եկամուտը լրիվ բերքատվության ժամանակ կազմելու է շուրջ 1 մլրդ ՀՀ դրամ: Շահութաբերության Ներքին Նորմը կազմելու է շուրջ 35 տոկոս:
4.	Ներդրումային ծրագրի իրականացման, մասնավորապես՝ անշարժ գույքի կառուցման և հիմնական միջոցների ձեռքբերման (այդ թվում` տեղափոխման և տեղադրման) ժամանակացույցը (ժամանակացույցը կազմվում է մեկնարկի պահից սկսված) և նկարագրությունը	Հողային աշխատանքներ, մելիորացիա և տեղանքի պատրաստում՝ 07.2022 – 01.2023 (աշխատանքներն ավարտված են), Ցանքաշարահին համակարգի և հակակարկտային ցանցի ձեռքբերում և տեղադրում՝ 12.2022 – 06.2023 (անհրաժեշտ նյութերը ձեռք են բերվել, կարկտապաշտպան համակարգի սյուները տեղադրվել են), Կաթիլային ոռոգման և պարարտացման համակարգերի ձեռքբերում և տեղադրում՝ 12.2022 – 04.2023 (անհրաժեշտ նյութերը ձեռք են բերվել, աշխատանքները կատարված են շուրջ 80%-ով), Ջրավազանի կառուցում՝ 12.2022 – 03.2023 (աշխատանքները կատարված են շուրջ 90%-ով), Ծառատունկ` 04.2023 – 05.2023 (աշխատանքները կատարված են շուրջ 40%-ով), Գյուղտեխնիկայի ձեռքբերում՝ 06.2022 – 06.2023 (ձեռք է բերվել գյուղտեխնիկայի շուրջ 80%-ը)․ Շինությունների և ենթակառուցվածքների կառուցում՝ 15․03․2024։ 19.07.2023 թվականի դրությամբ կատարված ներդրումների ընդհանուր ծավալը կազմում է 1 827 136 403 ՀՀ դրամ: Ներդրումային ծրագրի ավարտը նախատեսվում է 2024թ․ մարտի 15-ին։
5.	Նախատեսվող ներդրումների չափի և ուղղությունների նկարագրությունը (անշարժ գույքի կառուցում, հիմնական միջոցներ)	Շինությունների և ենթակառուցվածքների կառուցում՝ 300 մլն դրամ, Այգեհիմնում՝ 2.87 մլրդ, ընդ որում. ● Մելիորացիա և տեղանքի պատրաստում՝ 548 մլն դրամ, ● Հակակարկտային ցանց՝ 1.095 մլրդ դրամ, ● Կաթիլային ոռոգում՝ 276 մլն դրամ, ● Ջրավազան՝ 150 մլն դրամ, ● Ծառատունկ՝ 801 մլն դրամ, ԸՆԴԱՄԵՆԸ ՆԵՐԴՐՈՒՄ՝ 3․170 մլրդ դրամ Մինչև հունվարի 24․01․2023թ՝ 1․193 մլրդ դրամ արված ներդրումներ։ 19.07.2023 թվականի դրությամբ կատարված ներդրումների ընդհանուր ծավալը կազմում է 1․827 մլրդ ՀՀ դրամ:
6.	Անհրաժեշտ ենթակառուցվածքի նկարագրությունը և դրա անհրաժեշտության հիմնավորումը	Ասֆալտապատ ճանապարհ դեպի կազմակերպության այգի (մոտ 1,520 մետր երկարությամբ): Արտահանման շուկաների պահանջներին բավարարող որակով թարմ մրգի մատակարարումն այսօր գոյություն ունեցող հողային ճանապարհներով գրեթե անհնար է: Այս ճանապարհը կսպասարկի նաև մոտ 200 հեկտար կից կառուցվող այգիները և մոտ 150 հեկտար գոյություն ունեցող խաղողի այգիները: Բջջային կապ: - Այսօրվա դրությամբ որևէ բջջային ծածկույթ տարածքում գրեթե գոյություն չունի: Հաշվի առնելով պլանավորված աշխատողների քանակը՝ տարածքում բջջային կապ ապահովելը դառնում է կրիտիկական խնդիր, որի չլուծվելու պարագայում տնտեսության արդյունավետ կառավարումն անհնար է: Բացի այդ, GPS համակարգի օգնությամբ աշխատող  ժամանակակից սարքերը և մեքենաները, որոնք լայնածավալ օգտագործվում են այգում, աշխատում են բջջային ցանցով ստացված կարգավորող ազդանշանի հիման վրա, որն այսօրվա դրությամբ անհնար է ստանալ կապի բացակայության պատճառով: Նշենք նաև, որ մոտակայքում գտնվող գյուղերում (Արագածոտն) ծածկույթը բավականին վատն է և ապահովվում է միայն մեկ օպերատորի կողմից: Այդպիսով, բջջային կապը անհարժեշտ է ոչ միայն մեր տնտեսությանը, այլ նաև տեղի բնակիչներին: Ինտերնետ օպտիկական մանրաթելերով: – ժամանակակից տեխնոլոգիաներով հագեցած տնտեսության համար, որը պետք է գործի միջազգային շուկաներում, կայուն և արագ ինտերնետն առաջնային անհրաժեշտություն է: Արտաքին աշխարհի հետ կապի ապահովումը, և ամենակարևորը, կազմակերպության սերվերների աշխատանքն անհնար են առանց վերոնշյալ խնդրի լուծման: Ոռոգման ջրագիծ: Կազմակերպության այգիները, ինչպես նաև կից տնտեսությունների կառուցվող այգիները հիմնվում են տասնյակ տարիներ չօգտագործված կամ նույնիսկ երբեք գյուղատնտեսական նպատակներով չօգտագործված գերնորմատիվային ջրապահանջարկ ունեցող հողամասերում: Գոյություն ունեցող ոռոգման ջրագծերը նախատեսված չեն ևս 90 հեկտար և ավել այգիների ոռոգման համար և դժվարությամբ բավարարում են գոյություն ունեցող խաղողանոցներին: Քանի որ կազմակերպությանը պատկանող ջրավազանը գտնվում է 3 կմ հեռավորության վրա և 130 մետր բարձր է Արմավիրի մարզի Խոյ համայնքի Արագած գյուղով անցնող ոռոգման ջրանցքից, միևնույն ժամանակ, այն գտնվում է 7.4 կմ հեռավորության վրա և 200 մետր ցածր է Արզնի-Շամիրամ ոռոգման ջրանցքից, ուստի, հետագա շահագործման տեսանկյունից ավելի բարենպաստ ենք համարում օգտվել Արզնի Շամիրամի ոռոգման աղբյուրից, ինչպես անում են ջրավազանի հարակից բոլոր այգիները: Խմելու ջրի ջրագիծ: – Այսօրվա դրությամբ տարածքում բացակայում է որևէ խմելու ջրի աղբյուր: Հաշվի առնելով աշխատակիցների քանակը, իրենց կենցաղային պահանջները հոգալու անհրաժեշտությունը, ինչպես նաև սորտավորման ու սառնարանային տնտեսությունների պահանջները՝ մշտական խմելու ջրի առկայությունը խիստ անհրաժեշտ է, առանց որի անհնար է կազմակերպել տնտեսության բնականոն գործունեությունը: Էլեկտրամատակարարում: Հոսանքի առկայությունը պարտադիր պայման է հանդիսանում այգու սպասարկման, բերքահավաքային և հետբերքահավաքային պրոցեսների ապահովման համար: Հաշվի առնելով նաև, որ այգին լինելու է հագեցած ժամանակակից տեխնոլոգիաներով, տարբեր տեսակի սենսորներով, որոնց միջոցով կատարվելու է ինֆորմացիայի հավաքագրում, վերամշակում և կառավարում, ինչպես նաև այն, որ այգու անվտանգության ապահովման համար անհրաժեշտ են տեղադրել անվտանգային համակարգեր, անհրաժեշտ է այգու համար ապահովել էլեկտրամատակարարում: Հոսանքի գծի անհրաժեշտ երկարությունը կազմում է շուրջ 2.8 կմ հեռավորության վրա: Աշխատանքների անհրաժեշտությունից ելնելով, 1․6 կմ հոսքագիծը ապահովել ենք, մնացել է 1․2 կմ։ Ենթակառուցվածքների կառուցման նախընտրելի ժամանակացույցը 2024թ մարտի 15-ն է։ 1. Խմելու ջուր - 21․437․400 ՀՀ դրամ 2. Ճանապարհ - 191․520․000 ՀՀ դրամ 3. էլեկտրամատակարարում – 27․400․00 ՀՀ դրամ 4. Բջջային կապ – 38․500․000 ՀՀ դրամ 5. Ֆիքսված ինտերնետ կապ – 12 մլն ՀՀ դրամ 6. Ոռոգման ջուր – 92․280․000 ՀՀ դրամ Ընդամենը՝ 383 137 400 ՀՀ դրամ։
7.	Ծրագրին վերաբերող այլ տեղեկություններ (հայտատուի հայեցողությամբ)	Հավելված 1-ով ներկայացվում է անհրաժեշտ ենթակառուցվածքների գնահատված ծախսերը և երթուղիները Google Earth հավելվածի միջոցով: Հավելված 2-ով ներկայացվում են «ՍՄԱՐԹ ԱԳՐՈ ՍՈԼՈՒՇԸՆՍ» ՓԲԸ-ի կողմից տրված Համաձայնություններ՝ իր հողամասերի միջով անհրաժեշտ ենթակառուցվածքներ անցկացնելու համար Կառուցման ենթակա բոլոր ենթակառուցվածքները ենթակա են հանրային օգտագործման, բացառությամբ ոռոգման ջրի, քանի որ ջրի ճնշումը կընկնի։

Հայաստանի Հանրապետության վարչապետի աշխատակազմի ղեկավար

Ա. Հարությունյան

Հավելված N 2 ՀՀ կառավարության 2023 թվականի հուլիսի 20-ի N 1243-Ա որոշման

ԱՐԱԳԱԾՈՏՆ ՄԱՐԶԻ ԱՇՏԱՐԱԿ ՀԱՄԱՅՆՔԻ ԱՐԱԳԱԾՈՏՆ ԳՅՈՒՂԻ 02-017-0140-0147 ԿԱԴԱՍՏՐԱՅԻՆ ԾԱԾԿԱԳՐՈՎ ԱՐԴՅՈՒՆԱԲԵՐԱԿԱՆ, ԸՆԴԵՐՔՕԳՏԱԳՈՐԾՄԱՆ ԵՎ ԱՅԼ ԱՐՏԱԴՐԱԿԱՆ ՕԲՅԵԿՏՆԵՐԻ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ՀՈՂԱՄԱՍԻ ԽՄԵԼՈՒ ՋՈՒՐ, ԱՍՖԱԼՏԱՊԱՏ ՃԱՆԱՊԱՐՀ, ԲՋՋԱՅԻՆ ՀԵՌԱԽՈՍԱԿԱՊ, ՖԻՔՍՎԱԾ ԻՆՏԵՐՆԵՏ ԿԱՊ ԱՊԱՀՈՎԵԼՈՒ ՀԱՄԱՐ ԱՆՀՐԱԺԵՇՏ ԵՆԹԱԿԱՌՈՒՑՎԱԾՔՆԵՐԻ ԿԱՌՈՒՑՄԱՆ ՆԿԱՐԱԳՐՈՒԹՅՈՒՆԸ

Խմելու ջուր

1. Խմելու ջրով ապահովման համար անհրաժեշտ է կառուցել 5,300 մ երկարությամբ 75մմ տրամագծով ջրագիծ, որից 3,200 մետրը 8 մթն. PE խողովակով, իսկ 2,100 մետրը՝ 10 մթն. PE խողովակով:

2. Խմելու ջրագիծն անցնում է ամբողջությամբ համայնքային հողամասերով կամ պետական ճանապարհի երկայնքով։

3. 02-017-0140-0147 կադաստրային ծածկագրով հողամասը նախատեսված է ծառայելու որպես մթերման, պահեստավորման և վերամշակման գոտի:

4. Խմելու ջրագծի ընդհանուր արժեքը կազմում է 21,437,400 ՀՀ դրամ՝ ներառյալ ԱԱՀ

Անվանում	Քանակ	Չափի միավ.	Միավորի արժեք, ՀՀ դրամ	Գումար, ՀՀ դրամ՝ Ներառյալ ԱԱՀ
Խողովակ 90մմ 8 մթն	3,200	մետր	1,035	3,312,000
Խողովակ 90մմ 10 մթն	2,100	մետր	1,274	2,675,400
Խողովակների միացման աշխատանքներ	320	հատ	5,000	1,600,000
Հողային աշխատանքներ	5,300	մետր	2,500	13,250,000
Օդաթող օդահան սարք/վանտուզ/	10	հատ	60,000	600,000
Ընդամենը				21,437,400

Քարտեզ 1. Խմելու ջուր

Ասֆալտապատ Ճանապարհ

1. Հողամասի հեռավորությունն ասֆալտապատ ճանապարհից կազմում է 1,520 մետր: Բնականոն գործունեությունն ապահովելու համար ճանապարհի լայնությունը նախատեսվում է կառուցել 7 մետր, իսկ ասֆալտը բաղկացած է հետևյալ շերտերից. 4 սմ մանրահատիկ ասֆալտ, 6 սմ կոպիտ-հատիկավոր ասֆալտ, գլինցովկա (մանր մանրախիճով ցողված բիտում), 22 սմ մանրախիճ, 20-25 սմ ավազակոպչային նախապատրաստում՝ ռելիեֆը հարթեցնելու և թեքություններ ստանալու համար:

2. 02-017-0140-0147 կադաստրային ծածկագրով հողամասը նախատեսված է ծառայելու որպես մթերման, պահեստավորման և վերամշակման գոտի:

3. Մեկ քառակուսի մետր ասֆալտի ճանապարհի արժեքը կազմում է 18,000 ՀՀ դրամ: Ընդամենն անհրաժեշտ է կառուցել 1,520 x 7 = 10,620 մ2 ասֆալտապատ ճանապարհ, որի արժեքը կկազմի 191,520,000 ՀՀ դրամ՝ ներառյալ ԱԱՀ:

Բջջային հեռախոսակապ

1. Բջջային հեռախոսակապի ապահովման համար անհրաժեշտ է կառուցել աշտարակ և բազային կայան:

2. Աշտարակը և բազային կայանը նախատեսվում է կառուցել «Սմարթ Ագրո Սոլուշընս» ՓԲԸ-ին սեփականության իրավունքով պատկանող 02-017-0160-0274 կադաստրային ծածկագրով հողամասի տարածքում, որի համաձայնությունն առկա է/ կցված է/:

3. Աշտարակի և բազային կայանի անհրաժեշտ սարքավորումների արժեքը կազմում է 32,000,000 ՀՀ դրամ: Աշտարակը հոսանքով ապահովելու համար անհրաժեշտ է կառուցել նաև 200 մետր երկարությամբ հոսանքի գիծ և տեղադրել ենթակայան 250/10 (ԼՏԵ): Բջջային հեռախոսակապով ապահովման ծախսերը կկազմեն 38,500,000 ՀՀ դրամ:

Անվանում	Քանակ	Չափի միավ.	Միավորի արժեք, ՀՀ դրամ	Գումար, ՀՀ դրամ՝ Ներառյալ ԱԱՀ
Աշտարակ	1	հատ	32,000,000	32,000,000
Հոսանքի գիծ	200	մետր	5000	1,000,000
Ենթակայան 250/10 (ԼՏԵ)	1	հատ	5,500,000	5,500,000
Ընդամենը				38,500,000

 

Ֆիքսված ինտերնետ կապ

1. Ֆիքսված ինտերնետ կապով ապահովման համար անհրաժեշտ է կառուցել օպտիկամալուխային ցանց:

2. Ինտերնետ կապի միացման ամենամոտ կետը գտնվում է Խոյ համայնքի Արագած գյուղում: Այն անցնում է համայնքի բնակելի տարածքով, համայնքային հողամասերով։

3. Ենթակառուցվածքի շինարարությունը ավարտվում է «Ագրոպրո» ՓԲԸ-ի հողամասով (կադաստրային ծածկագիր՝ 02-017-0140-0147)։

4. Միացման կետից հեռավորությունը կազմում է 5,050 մետր: Ենթակառուցվածքի կառուցման ընդհանուր գումարը կազմում է շուրջ 12,000,000 ՀՀ դրամ:

Քարտեզ 5. Ֆիքսված ինտերնետ

Հայաստանի Հանրապետության վարչապետի աշխատակազմի ղեկավար

Ա. Հարությունյան

Հավելված N 3 ՀՀ կառավարության 2023 թվականի հուլիսի 20-ի N 1243-Ա որոշման

ԱՐԱԳԱԾՈՏՆ ՄԱՐԶԻ ԱՇՏԱՐԱԿ ՀԱՄԱՅՆՔԻ ԱՐԱԳԱԾՈՏՆ ԳՅՈՒՂԻ 02-017-01400153 ԿԱԴԱՍՏՐԱՅԻՆ ԾԱԾԿԱԳՐՈՎ ՋՐԱՅԻՆ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ՀՈՂԱՄԱՍԻ ՈՌՈԳՈՒՄՆ ԱՊԱՀՈՎԵԼՈՒ ՀԱՄԱՐ ԱՆՀՐԱԺԵՇՏ ԵՆԹԱԿԱՌՈՒՑՎԱԾՔԻ ԿԱՌՈՒՑՄԱՆ

ՆԿԱՐԱԳՐՈՒԹՅՈՒՆԸ

Ոռոգման ջուր

1. Այգին ոռոգման ջրով ապահովելու համար անհրաժեշտ է կառուցել ջրագիծ:

2. Ջրագծի ընդհանուր երկարությունը կազմում է շուրջ 7,400 մետր: Համակարգը նախատեսվում է կառուցել 225 մմ տրամագծով 8 մթն PE խողովակով: Ոռոգման ջրատարի անհրաժեշտ ծախսերը կազմում են 92,280,000 ՀՀ դրամ:

Անվանում	Քանակ	Չափի միավ.	Միավորի արժեք, ՀՀ դրամ	Գումար, ՀՀ դրամ՝ Ներառյալ ԱԱՀ
Խողովակ	7,400	մետր	9,200	68,080,000
Խողովակների միացման աշխատանքներ	740	հատ	5,000	3,700,000
Հողային աշխատանքներ	7,400	մետր	2,500	18,500,000
Ջրանցքին միացում	1	հատ	1,000,000	1,000,000
Օդահան սարքեր և տեղադրում	1	հատ	1,000,000	1,000,000
Ընդամենը				92,280,000

Քարտեզ 7. Ոռոգման ջուր

Հայաստանի Հանրապետության վարչապետի աշխատակազմի ղեկավար

Ա. Հարությունյան

Հավելված N 4 ՀՀ կառավարության 2023 թվականի հուլիսի 20-ի N 1243-Ա որոշման

ԱՐՄԱՎԻՐ ՄԱՐԶԻ ԽՈՅ ՀԱՄԱՅՆՔԻ ԾԱՂԿԱԼԱՆՋ ԳՅՈՒՂԻ 04-051-0153-0034 ԿԱԴԱՍՏՐԱՅԻՆ ԾԱԾԿԱԳՐՈՎ ԳՅՈՒՂԱՏՆՏԵՍԱԿԱՆ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ՀՈՂԱՄԱՍԻ ԷԼԵԿՏՐԱՄԱՏԱԿԱՐԱՐՈՒՄՆ ԱՊԱՀՈՎԵԼՈՒ ՀԱՄԱՐ ԱՆՀՐԱԺԵՇՏ ԵՆԹԱԿԱՌՈՒՑՎԱԾՔԻ ԿԱՌՈՒՑՄԱՆ

ՆԿԱՐԱԳՐՈՒԹՅՈՒՆԸ

Էլեկտրամատակարարում

1. Հողամասի մոտակայքով անցնում է հոսանքի 10,000 կվա գիծը: Այդ կետից մինչև «Ագրեսոր» ՓԲԸ-ին անհրաժեշտ կետի հեռավորությունը կազմում է 1,200 մետր:

2. Մեկ մետր հոսանքի գծի անհրաժեշտ նյութերի և շինարարության արժեքը կազմում է 12,000 ՀՀ դրամ: Բացի հոսանքի գծից՝ անհրաժեշտ է նաև տեղադրել 2 շարժական ենթակայաններ 400/10 (ՏԵ) և 250/10 (ՏԵ)՝ համապատասխանաբար՝ 7,500,000 և 5,500,000 ՀՀ դրամ արժողությամբ: Հոսանքի հասանելիությունն ապահովելու համար անհրաժեշտ ծախսերը կկազմեն 27,400,000 ՀՀ դրամ:

Անվանում	Քանակ	Չափի միավ.	Միավորի արժեք, ՀՀ դրամ	Գումար, ՀՀ դրամ՝ Ներառյալ ԱԱՀ
Հոսանքի գիծ	1,200	մետր	12,000	14,400,000
Ենթակայան 400/10 (ՏԵ)	1	հատ	7,500,000	7,500,000
Ենթակայան 250/10 (ՏԵ)	1	հատ	5,500,000	5,500,000
Ընդամենը				27․400,000

Քարտեզ 3. Էլեկտրամատակարարում

Հայաստանի Հանրապետության վարչապետի աշխատակազմի ղեկավար

Ա. Հարությունյան