2. Նախագծի 1-ին հոդվածով «Շահումով խաղերի, ինտերնետ շահումով խաղերի և խաղատների մասին» օրենքի (այսուհետ՝ օրենք) 6-րդ հոդվածի 2.1-ին մասում լրացվող «դ1» կետը համահունչ չէ 2.1-ին մասի մյուս կետերի բովանդակության հետ՝ հաշվի առնելով այն, որ քննարկվող մասով սահմանվում են ինտերնետ շահումով խաղերի գործունեության կազմակերպչի գործառույթները (պարտականությունները), մինչդեռ, լրացվող «դ1» կետը սահմանում է հատուկ խաղային հաշվի համալրման եղանակը: Մասնավորապես, առաջարկվում է սահմանել, որ հատուկ խաղային հաշիվը կարող է համալրվել բացառապես տվյալ խաղացողին պատկանող բանկային (այդ թվում՝ քարտային) հաշիվների միջոցով: Այս կապակցությամբ հարկ է ուշադրություն հրավիրել նաև քննարկվող օրենքի 6-րդ հոդվածի 2.2-րդ կետի ձևակերպմանը, որի համաձայն օրենքով սահմանված անկանխիկ գործարքները պետք է իրականացվեն միայն բանկային հաշիվների կամ քարտերի միջոցով: Բացի այդ, հարկ է հաշվի առնել «Նորմատիվ իրավական ակտերի մասին» օրենքի 15-րդ հոդվածի 2-րդ մասի պահանջը, որի համաձայն նորմատիվ իրավական ակտում միևնույն միտքն արտահայտելիս կիրառվում են միևնույն բառերը, տերմինները կամ բառակապակցությունները` որոշակի հերթականությամբ:

Նշվածից ելնելով՝ առաջարկվում է քննարկվող օրենքի 6-րդ հոդվածի 2.1-ին մասում «դ1» կետը լրացնելու փոխարեն նույն մասի «դ» կետը շարադրել հետևյալ խմբագրությամբ.

«դ) ինտերնետ շահումով խաղի կազմակերպչի սերվերում ստեղծում է յուրաքանչյուր խաղացողի համար հատուկ խաղային հաշիվ, որը կարող է համալրվել բացառապես տվյալ խաղացողին պատկանող բանկային հաշիվների կամ քարտերի միջոցով.»:

Սույն առաջարկի ընդունման արդյունքում անհրաժեշտություն կառաջանա վերանայելու նախագծի վերնագիրը և նախագծի 1-ին հոդվածում «2.1-ին մասը լրացնել «դ1» կետով և» բառերը փոխարինել «2.1-ին մասի «դ» կետը» բառերով:

3. Նախագծի 1-ին հոդվածում օգտագործվող «(այսուհետ՝ օրենք)» բառերն առաջարկում ենք հանել, իսկ 2-րդ հոդվածում օգտագործվող «Օրենք» բառը գրել փոքրատառերով:

Նույն դիտարկումը վերաբերում է նաև «Վիճակախաղերի մասին» օրենքում լրացում կատարելու մասին» Հայաստանի Հանրապետության օրենքի նախագծի 2-րդ հոդվածին:

4. Նախագծով առաջարկվող փոփոխությամբ պայմանավորված՝ անհրաժեշտ է փոփոխություն կատարել «Շահումով խաղերի, ինտերնետ շահումով խաղերի և խաղատների մասին» Հայաստանի Հանրապետության օրենքի 4-րդ` «Սույն օրենքի խախտումները, դրանց համար կիրառվող պատասխանատվության միջոցները» գլխում՝ սահմանելով համապատասխան պատժամիջոց։

5. Նախագծի տրամաբանության շրջանակում առաջարկում ենք օրենքի 6-րդ հոդվածի 2-րդ մասի «է» կետի 2-րդ նախադասությունը «եղանակով» բառից հետո լրացնել «, բացառապես տվյալ խաղացողին պատկանող բանկային (այդ թվում՝ քարտային) հաշիվների միջոցով» բառերով։

II. «Վիճակախաղերի մասին» օրենքում լրացում կատարելու մասին» Հայաստանի Հանրապետության օրենքի նախագծի (այսուհետ՝ նախագիծ) վերաբերյալ՝

1. Նախագծի 1-ին հոդվածով առաջարկվում է փոփոխություն կատարել «Վիճակախաղերի մասին» օրենքի 5.2-րդ հոդվածի 2-րդ մասում (մասն առաջարկվել է շարադրել նոր խմբագրությամբ), այսինքն, քննարկվող նախագծով որևէ լրացում չի առաջարկվում: Հետևաբար, առաջնորդվելով «Նորմատիվ իրավական ակտերի մասին» օրենքի 12-րդ հոդվածի 1-ին մասի կարգավորմամբ (նորմատիվ իրավական ակտն ունենում է վերնագիր, որը համապատասխանում է նորմատիվ իրավական ակտի բովանդակությանը)՝ անհրաժեշտ է քննարկվող նախագծի վերնագիրը համապատասխանեցնել նախագծի բովանդակությանը:

2. Նախագծի 1-ին հոդվածով նոր խմբագրությամբ շարադրվող 2-րդ մասի 3-րդ նախադասությունն ունի հետևյալ ձևակերպումը. «Տոտալիզատորի մասնակցի հաշիվը կարող է համալրվել բացառապես տվյալ խաղացողին պատկանող բանկային (այդ թվում՝ քարտային) հաշիվների միջոցով:: Մինչդեռ, հարկ է նկատել, որ «Վիճակախաղերի մասին» օրենքի 5.2-րդ հոդվածի 4-րդ մասի համաձայն՝ օրենքով սահմանված անկանխիկ գործարքները պետք է իրականացվեն միայն բանկային հաշիվների կամ քարտերի միջոցով: Նշվածից ելնելով՝ օրենքում օգտագործվող տերմինների միատեսակությունն ապահովելու նկատառումից ելնելով՝ առաջարկվում է նոր խմբագրությամբ շարադրվող 2-րդ մասի 3-րդ նախադասությունը շարադրել հետևյալ խմբագրությամբ. «Տոտալիզատորի մասնակցի հաշիվը կարող է համալրվել բացառապես տվյալ խաղացողին պատկանող բանկային հաշիվների կամ քարտերի միջոցով::